चुणिरे चेले रे काम 5

हनन्याह होर सफीरा रा पवित्र आत्मा किन्हें झूठ बोलणा

1होर हनन्याह नांऊँआं रे एक माह्णुंऐ, होर तेसरी लाड़ी सफीरे आपणी जमीना रा कुछ हिस्सा बेचेया। 2होर तेस्सा जमीना री कीमता मन्झा ले तिन्हें कुछ हिस्सा आपणे कठे रखी लितेया; होर ये गल तेसरी लाड़ी भी जाणहां ईं थी, होर तिन्हें तेता रा एक हिस्सा लई किन्हें चुणिरे चेले जो देई दितेया।

3पर पतरसे बोल्या, “हे हनन्याह! सैताने तेरे मना मन्झ ये गल किधियो पाई कि तू पवित्र आत्मा किन्हें झूठ बोले, होर जमीना री कीमता मन्झा ले कुछ रखी लितेया? 4क्या बेचणे ले पैहले तेरी जमीन तेरी नी थी? होर जेबे से बिकी गई ता क्या तेसा री कीमता पर तेरा हक नी था? तुस्सा रे मना मन्झ ये बुरा बिचार किधियो आया? तैं माह्णुं किन्हें नी, पर परमेसरा किन्हें झूठ बोलिरा।”

5ये गल्ला सुणदे ही हनन्याह जमीना पर पई गया, होर से मरी गया; होर सभ सुणने वाले पर बड़ा भारी डर छाई गया। 6फेरी जुआन माह्णुंऐ आई किन्हें तेसरी ल्हास चदरा मन्झ लपेटी, होर बाहार लई जाई किन्हें दबाई दिती। 7लगभग तीन घंटे बाद तेसरी लाड़ी भी जेह्ड़ा कुछ हुआ था, नी जाणी किन्हें अंदर आई। 8तेबे पतरसे तेस किन्हें बोल्या, मुंजो दस क्या तुस्से दोनो से जमीन इतने मन्झ ई बेची री थी? तेस्से बोल्या, हां, इतने मन्झ ई बेची री थी। 9पतरसे तेस्सा किन्हें बोल्या, ये क्या गल ई कि, तुस्से दुंहीं ऐं प्रभु री आत्मा री परखणी रे कठे एका करी लईरा? देख, तेरे लाड़े जो दबाणे वाले दुराजे वाले ई खड़ीरे ऐं, होर तू भी बाहर लई जाणी। 10तेभे ई से तेसरे पैरा पर जमीना पर पई गई, होर से मरी गई; होर जुआन लोके अंदर आई किन्हें तेस्सा जो मरिरे देख्या, होर बाहर लई जाई किन्हें तिन्हें से तेस्सा रे लाड़े वाले दबाई दिती। 11होर यरुस्लेम सैहरा री सारी कलीसिया रे लोका पर होर इन्हा गल्ला रे सभ सुणने वाले पर, बड़ा डर छाई गया।

चुणिरे चेले रे ज्रीए चिन्ह होर चमत्कार

12होर चुणिरे चेले रे ज्रीए बौह्त चमत्कार होर नौखे काम लोका मन्झ दसेया जाहें थे, होर मसीहा रे विस्वासी सभ एक मन हुई किन्हें सुलेमाना रे बणाईरे मन्दरा रे आंघणा मन्झ कठे हुंहाँ ऐं थे। 13पर जिन्हें ऐबे तक यीसू पर विस्वास नी करदे थे तिन्हा मन्झा ले केसी जो ये हिम्मत नी हुई कि चुणिरे चेले मन्झ सामिल हुई जाए, फेरी भी लोक तिन्हारी बड़ाई करहा ऐं थे। 14होर प्रभु मन्झ विस्वास करणे वाले बौह्त मर्ध होर ज्नाने प्रभु री कलीसिया मन्झ होर भी ज्यादा आई किन्हें मिलदे रैहे। 15चुणिरे चेले रे कामा री वजहा ले लोक ब्मारा जो सड़का पर ल्याई-ल्याई किन्हें, मांजे होर बिस्तरे पर लट्याई देहां ऐं थे कि, जेबे पतरस आये, ता तेसरी छाऊँ ई तिन्हा मन्झा ले केसी एकी पर पई जाए। 16होर यरुस्लेम सैहरा रे ओरले परले गांऊँआं ले भी बौह्त लोक ब्मारा होर दुस्टात्मा रे स्ताईरे लोका जो ल्याई-ल्याई किन्हें, कठे हुंहाँ ऐं थे, होर सभ ठीक करी दिते जाहें थे।

चुणिरे चेलेया जो पकड़णा

17तेबे बडा याजक होर तेसरे सभ साथी जो सदूकी लोका रे पन्था रे थे, जल्नी किन्हें भर्ही गये। 18होर इधी कठे चुणिरे चेले जो पकड़ी किन्हें जेल्हा मन्झ बंद करी दितेया। 19पर राती प्रभु रे एकी स्वर्गदूते जेल्हा रे दुराजे खोल्ही किन्हें तिन्हा जो बाहर ल्याई किन्हें बोल्या, 20“जाऊआ, मन्दरा मन्झ खड़ी किन्हें, लोका जो नौंईं जिन्दगी रे बारे मन्झ सभ गल्ला सुणाऊआ।” 21जेह्ड़ा तिन्हा किन्हें बोलिरा था, स्यों भ्याग हुंदे ई मन्दरा मन्झ जाई किन्हें उपदेस देंदे लगे। पर बडे याजक होर तेसरे साथी आई किन्हें माहसभा जो होर इस्राएल देसा रे सभ यहूदी अगुवे कठे किते, फेरी तिन्हें जेल्हा ले चुणिरे चेले जो बुलाऊआ भेज्या। 22पर जेबे मन्दरा रे स्पाही जेल्हा मन्झ पूजे ता तेथी तिन्हा जो चुणिरे चेले नी मिले, होर तिन्हें वापस आई किन्हें एता री खबर दिती होर 23बोल्या, “आस्सा जो जेल्हा री निगरानी रे कठे ताले लगिरे मिले होर दुराजे वाले चौकीदार खड़ीरे मिले थे पर जेबे आस्से दुराजे खोल्हे ता आस्सा जो अंदर कोई नी मिल्या।”

24जेबे मन्दरा रे स्पाहीया रे सरदारे होर मुख्य याजके ये खबर सुणी, ता बड़ी भारी चिंता मन्झ पई गये कि एस गल्ला रा क्या नतीजा हूंणा? 25इतने मन्झ केसी ऐं आई किन्हें तिन्हा जो दसेया कि, देखा, जिन्हा जो तुस्से जेल्हा मन्झ बंद करी रखिरा था, स्यों माह्णुं मन्दरा मन्झ खड़ीरे लोका जो उपदेस देआ करहा ऐं। 26जेबे तिन्हें ये सुणेया मन्दरा रा सरदार स्पाहीया जो लेई जाई किन्हें, चुणिरे चेले जो बगैर जबरदस्ती करी किन्हें महासभा रे साम्हणें लई आये, क्यूंकि स्यों लोका ले डरहा ऐं थे कि, स्यों तिन्हा पर जो पत्थरवाह करी किन्हें मारी नी दे। 27जेबे स्यों माहसभा रे साम्हणें खड़ा करी दिते, तेबे बडे याजके तिन्हा ले पूछेया, 28“क्या आस्से तुस्सा जो खबरदार करी किन्हें हुक्म नी दितेया था कि, तुस्से यीसू रे एस नांऊँआं रा उपदेस देख्या देंदे? तेबे बी तुस्से सारे यरुस्लेम सैहरा जो आपणे उपदेसा किन्हें भरी दितेया, होर तेस आदमी रा खूना रा दोष आस्सा री क्याड़ी पर मढ़ना चाहें।”

29पर पतरसे होर चुणिरे चेले जवाब दितेया कि, “माह्णुंआं रे हुक्मा ले बढ़ी किन्हें परमेसरा रे हुक्मा रा पालन करणा ही आस्सा री जिम्मेदारी ई। 30आस्सा रे बापदादे रे परमेसरे यीसू जो मरिरे मन्झा ले जीऊंदा कितेया, जेस जो तुस्से क्रूसा प्रयाल्हे लटकाई किन्हें मारी दितेया था। 31परमेसरे यीसू जो आपणे सीधी वखा जो प्रभु होर उद्धार देणे वाल़ा नियुक्त कितेया। परमेसरे ये इधी कठे कितेया ताकि इस्राएल देसा रे लोक पाप करणा छाडी दे, होर आपणे पापा रे कठे तिन्हा जो तेस ले माफी मिली सके। 32होर आस्से इन्हा गल्ला रे गुआह ऐं, होर पवित्र आत्मा भी, जेस जो परमेसरे तिन्हा जो दितिरा, जो तेसरा हुक्म मन्हां ऐं।”

33ये सुणी किन्हें महासभा रे लोका जो गुस्सा हुए, होर चुणिरे चेलेया जो मारणा चाहेया। 34पर एक फरीसी जेसरा नांऊँ गमलीएल से व्यवस्था स्खाणे वाल़े होर सभ लोका मन्झ आदरणीय था, महासभा मन्झ खड़े हुई किन्हें चुणिरे चेले जो थोड़ी देरा रे कठे बहार लई जाणे रा हुक्म दितेया। 35तेबे तिन्हें महासभा रे लोका किन्हें बोल्या, “हे इस्राएल देसा रे लोको, जो कुछ इन्हा लोका किन्हें करणा चाहें, सोची समझी किन्हें करणा।” 36क्यूंकि कुछ ध्याड़े ले पैहले थिऊदास नांऊँआं रा एक माह्णुं था, जेहड़ा दावा करहा था कि, हांऊँ भी कुछ आ; होर लगभग चार सौ माह्णुं तेस साउगी हुई गये। पर से मारेया गया, होर जितने लोक तेस जो मन्हां ऐं थे, सभ तितर-बितर हुई गये होर मिटी गये। 37तेता ले बाद जनगणना रे ध्याड़े मन्झ गलील जिल्ले रा रैहणे वाल़ा यहूदा आया, तिन्हें भी कुछ लोक आपणे वखा जो विद्रोह करणे रे कठे आपणे वखा जो करी लये: से भी मारेया गया, होर जितने लोक तेस जो मन्हां ऐं थे, स्यों सभ तितर-बितर हुई गये।

38“इधी कठे हांऊँ ऐबे तुस्सा किन्हें बोल्हा, इन्हा माह्णुंआं ले दूर ई रैहया होर तिन्हा किन्हें कुछ मतलब नी रखा; क्यूंकि अगर ये योजना या काम माह्णुंआं री तरफा ले हो, तेबे ता ये आप्हुए खत्म हुई जाणा। 39पर अगर परमेसरा री तरफा ले हो, ता तुस्से तिन्हा जो कधी मिटाई नी सकदे; केथी एह्ड़ा नी हो कि, तुस्से परमेसरा किन्हें भी लड़ने वाले बणी जाओ। 40तेबे तिन्हें तेसरी गल मनी लई; होर चुणिरे चेले जो सादी किन्हें पिटेया; होर ये हुक्म देई किन्हें छाडी दितेया कि, यीसू रे नांऊँआं ले फेरी गल्ला देख्या करदे। 41चुणिरे चेले एस गल्ला ले खुस हुई किन्हें माहसभा रे साम्हणें ले चली गये कि, आस्से यीसू रे नांऊँआं रे कठे बेज्जत हूंणे रे लायक ता समझे। 42होर स्यों हर रोज मन्दरा मन्झ होर घरा-घरा मन्झ उपदेस करणे, होर एस खुसी री खबरा रा प्रचार करणे ले नी रुके कि, यीसू ई मसीह ऐं।”

Currently Selected:

चुणिरे चेले रे काम 5: MJLNT

Highlight

ਕਾਪੀ।