Mɔl 7
7
Azuyilɛ ne
1Ɛdɛnkɛma zele Nowa kɛ, “Ɛ nee wɔ sua nu amra amuala bɛvo ɛlɛne ne anu, ɔluakɛ menwu kɛ ɛ ngomekye ala a ɛdi pɛlepɛle wɔ ewiade ye amuala anu a. 2Fa nane ko biala mɔɔ anwo te la, nyinli nee belɛ nsuu, nuhua mɔɔ anwo ɛnde la, yemɔ fa nyinli nee belɛ ala. 3Fa nloma bɛdabɛ noko, ko biala nyinli nee belɛ nsuu. Sesa ɛhye mɔ amuala kɔ ɛlɛne ne anu, amaa nzinlii bɛanyia bɛ ɛsaso wɔ azɛlɛ ye azo amuala. 4Ɔluakɛ ɛnɛ anwo zo kenle nsuu, mebamaa ezule kpole bie adɔ nɔɔzo nee ewiazo kenle abulanla, azɛkye ninyɛne mɔɔ mebɔ la amuala.” 5Nowa yɛle debie biala mɔɔ Ɛdɛnkɛma zele ye la.
6Nowa lile ɛvolɛ ɛya nsia la yɛɛ azuyilɛ ne rale a. 7#Mat 24.38; Luk 17.27 Ɔ nee ɔ ye nee ɔ mra mrenya nee bɛ mraalɛ ne mɔ hɔvole ɛlɛne ne anu, amaa azuyilɛ ne anva bɛ. 8Bɛvale nane nee nloma mɔɔ anwo te nee mɔɔ anwo ɛnde la, nee debie biala mɔɔ twenle ɔ nwo aze la, ko biala nyinli nee belɛ 9bɛhɔle ɛlɛne ne anu, kɛmɔ Nyamenle zele ye ala la. 10Ɛhye anzi kenle nsuu, azuyilɛ ne vale azɛlɛ ye.
11 #
2 Pit 3.6
Nowa lile ɛvolɛ ɛya nsia la, ye siane ne mɔɔ tɔ zolɛ nwiɔ na ye kenle bulu nee nsuu ne azo, azule mgbole mɔɔ deda azɛlɛ ye azo la nee azɛlɛ ye abo nzule ne mɔ amuala gulule nu dukuele; na anwuma ezule noko dukuele, 12ɔdɔle bilididi nɔɔzo nee ewiazo toonwo kenle abulanla, ɔbule aze na ɔyɛle azɛlɛ ye azo faanwo. 13Kenle ko ne mɔɔ ezule ne dukuele la, Nowa nee ɔ ye nee ɔ mra mrenya ne mɔ, Hyɛm, Ham, yɛɛ Gyeefɛte nee bɛ mraalɛ nsa ne, 14nee nane ngakyile biala nee ye ɛsaso, nyɛmoa nee bɛ ɛsaso, debie biala mɔɔ twenle ɔ nwo aze wɔ azɛlɛ ye azo nee ye ɛsaso vole ɛlɛne ne anu. 15Ɔvale abɔdeɛ ngakyile ne mɔ mɔɔ die ɛnwomenle la ko biala, nyinli nee belɛ, 16kɛmɔ Nyamenle zele ye la ɔvole ɛlɛne ne anu. Na Ɛdɛnkɛma dole ɛlɛne ne anlenkɛ ne anu.
17Azuyilɛ ne hɔle zolɛ toonwo kenle abulanla, nzule ne yile kpole kpalɛ manle ɛlɛne ne tulule. 18Nzinlii nzule ne yile kpole na ɛlɛne ne luale nzule ne anye. 19Nzule ne hɔle zolɛ yɛle kuma, monlɔmonlanle awoka ndendenle ne mɔ mɔɔ wɔ aleɛabo la amuala. 20Nzule ne monlɔmonlanle awoka ne mɔ na ɔhɔle anwuma kɛyɛ mita nsuu. 21Abɔdeɛ biala mɔɔ wɔ azɛlɛ ye azo la, nloma, nyɛmoa, nanemgbole nee ngɛkɛba, yɛɛ menli kɔsɔɔti wule. 22Azɛlɛ resee zo debie biala mɔɔ die ɛnwomenle la wule, kokye anga. 23Ɛdɛnkɛma zɛkyele debie biala mɔɔ die ɛnwomenle mɔɔ wɔ azɛlɛ ye azo la, sonla, nane, debie biala mɔɔ twenle ɔ nwo aze, yɛɛ nloma. Nowa nee bɛdabɛ mɔɔ bɛwɔ ɛlɛne ne anu la ala a hale a. 24Ɔlile kenle kɔkɔlɛ ɛya ko abulanlu kolaa na nzule ne abɔ ɔ bo kɛ ɔsesa.
Currently Selected:
Mɔl 7: NB
Highlight
Share
Copy
Want to have your highlights saved across all your devices? Sign up or sign in
Bible in Nzema © Bible Society of Ghana, 1998.