Lalaḡova 13
13
Uloilua mwa Ḡitalua Banabas mai Sol mwa Horara huri Rovoga
1Haḡe ira atatun vevsera mai ira vagahi rituai lol uloilua Antiok Banabas mai Simion mwa uloinia be gul Meto, Lusias nin Sairini, Manaen kea gabe nu togotogo mai Ratahigi Lavoa Herod, mai Sol. 2Mahavana be ram lol rovoga lalai Ratahigi i ram ḡaragaravwavwa, Vui Sabuga mwa bevea lalainira be, “Nam doron be giv tari Banabas mai Sol, huri rovoga be nan uloinira huria.”
3Haḡe ram dataro, ram dau limara alura i ram hora luara.
Banabas mai Sol ramuru Doretore Saepras
4Haḡe mwa hora lua ira tarua geki gin roron̄o non Vui Sabuga, Banabas mai Sol ramuru bano vai Selusia i ramuru bano nin aia la waḡa vai Saipras. 5Mahavana be ramuru botu la vanua Salmis, ramuru doretore huri avoana non God lol imwa tataro gaivua. I ramuru lai Jon Mak be vi buluira la rovoga.
6Haḡe ram dol ban rahurahu tuhi vai la vanua Bavos, i aia ram habwe atatun vui son̄son̄o vwate ihana Ba-Jisas, ira Jius mwa uloinia be atatun vevsera. 7Wani geki kea atatu non Sejas Bolas, kea gabe atat mataisaoga. Haḡe tomuai vevev mwa uloi Banabas mai Sol vai abena bwatuna gabe mwa doron be men ron̄ te avoana non God. 8Take atatun vuison̄son̄o vwate mwa du ḡorora ihana Elimas la avoana ata Kris, imwa lol ron̄oe be vi tuḡoro tomuai vevev huri binihimwasigi garagusi. 9Haḡe Sol gabe mwa iloana na ihana be Pol kea mwa masiri gin Vui Sabuga, mwa ḡita mutmutai atatun vuison̄son̄o 10mwa bevea be, “Giḡo nitun Setan. Giḡo gom bora ivwalu ḡoro vavtutu duluai. Giḡo gon masiri gin rururuhi i tenteneana, i vataha mahavana gom lol ron̄oe be gov leahi vavtutu non Ratahigi gi tenteneana. 11I liman Ratahigi vi himai alumwa kadogaha i gov matagaraga i gosav mom ḡita te gigitan ute rani huri mahavana. Haḡe darihou n̄an dodo meto viviga mwa ḡagav ḡoro matana Elimas i kea mwa hovi, i kea mwa lago dedeorai mwa lol ron̄oe be vi habwe atatu vwate be vi dulei limana. 12Haḡe mahavana be tomuai vevev mwa ḡita ginau be mwa loli, kea mwa binihimwasigi, bwatuna be kea mwa dan̄an̄a maragai gin silo vagahi non Ratahigi.”
Banabas mai Pol, ramuru mai vai Antiok la Vanua Pisidia
13Pol maira non buluana ram mwalue nin Pavos ram mai vai Pega, bwatutun vanua vai Pamvilia, i Jon Mak mwa rov maragai ninira mwa bano mulei vai Jerusalem. 14Haḡe ramuru ban rahurahu nin vanua Pega vai Antiok lol vanua Pisidia, i kera ram haroro lol alolon imwa tataro non ira Jius ram domahuri lol gubwen̄ mambuharai. 15Mahavana be atatu vwate mwa basogo avoana huri silo non Moses, i avoana non ira atatun vevsera tuai, haḡe ira tomuai ḡoro imwa tataro ram hudalinira be ram bevea be, “Ira tua. Be ihei te abemiu non avoan dura be vi laia lalai sinombu, nu tavuha maragai be giv lai luae lalai kamai.” 16Haḡe Pol mwa du amare mwa hagai limana i mwa dau bwatuna mwa avo mwa bevea be, “Kimiu ira Jius mai ira Lolobon̄i teti gabe gim gogonai God, giv ron̄oau. 17God non sinombu ira Jius nu gita luara nomai bwatmetua i mwa lol sinombu ram bora vara lavoa lol mahavan taro be ran togo gi tausala lol vanua Ijip. God nu lai luara nin vanua Ijip gin non muramura gaivua, 18i nu gitaḡorora huri taul n̄avul gaivasi lol vanua vuroi. 19I kea nu lol kaburai vora gaibitu lol vanua Kenan i mwa lol non sinombu ram bora tomuai ḡoro vanua. 20Ginau duluai geki nu loli huri taulu vudolu vavasi vena n̄avul gailima.”
“I ataguna God mwa darira gabe nora tomuai huribe rai vevegi nora vwalaua vaivotu, gubwen̄in Samuel atatun vevsera. 21Haḡe mahavana be ram hudaligi huri ratahigi lavoa, God mwa lai Sol gabe nitun Kis lalainira, i kea ata la varan Benjemen mwa mai gi nora ratahigi lavoa huri taul n̄avul gaivasi. 22I ataguna be God mwa lai dagainia, mwa dau Deved gi nora ratahigi lavoa.” Geki avoana be God mwa bevea huri Deved mwa bevea be, “Nam habwea be Deved gabe nitun Jese kea haḡea atatu gabe nam doronia, i atatu geki kea haḡea gabe vi lol noḡu doronira duluai gabe nam doronia be vi lolia.” 23Jisas sibona kea ata la varan Deved, gabe God nu lolia mwa bora varahun sinombu ira Jius, kun gabe nu tatauleo huria. 24Amua Jisas mwa siv tan bwatun non rovoga Jon nu toretore lalai sinombu ira Jius mwa bevea be rav binihi leahi nin vurora i rav lai garuhisabuga. 25Haḡe nu sosori gin mahavana be Jon men nogoi non rovoga, kea mwa bevea lalai sinombu be, Matu gim binihiau be ihei? Inau nam hav vora te wani gabe gim hohovia. Take giv ron̄oe geki namen vevea be. Kea mwa mai ataguku i inau siboku nam hav dadariha tehe be nav tagahi non sus nin bwalagena.
26“Ira tua kimiu ira Jius, gabe gim mai nin varan Ebraham, mai ira Lolobon̄i duluai teti gabe gim ḡogonai God: roroi huri varahuva geki be nu horae haḡea lalai gida! 27Bwatuna gabe sinombu be ram dogo Jerusalem mai nora tomuai duluai ram hav iloe tehe be kea sibona varahu, i mulei ram hav ilo te avoana non atatun vevsera gabe mwa basogo ana vataha gubwen̄ mambu harai. Take ram lol avoana non ira atatun vevsera mwa mwasigi aluna be ram bevegi Jisas. 28Son̄o be ram hav habwe te bwatuna huribe ramen vevegi bamatea, take ran hudali Paelat be vi vevegia huri mateana. 29I ataguna be ram lol ginau duluai gabe Leo Tavuha nu vevea huria, ram lai huria nin volovolo i ram daua lol malan̄a. 30Take God mwa lol domareinia nin mateana, 31i kea mwa bisirai vaivusi lalainira gabe ran lago bulu nin Kalili vai jerusalem. I kera geki haḡea kadogaha ram bora gaitura huri non tomarean mulei lalai sinombu ira Jius. 32-33I kamai haḡea teti kadogaha be gav seserai Roroi Tavuha lalai kimiu, i ginau gabe God nu tatauleo lalai ira sibida huria be vi lolia, kea mwa lolia kadogaha lalai gida gabe ira ata la varara, ginia be mwa lol domarei Kraes vai lol rahuana. Kunia gabe mwa bevea lol gairuan Sam be, ‘Giḡo Nituku, garigi nam bora Tamamwa.’ 34I geki haḡea avoana gabe God nu vevea huria be vi lol domareinia nin mateana, take sihav boboga tehe kaburai lol tano, ‘Nav lai ginau tavtavuha lalainigo i vatavuha gabe nan tatauleo huria lalai Deved.’ 35Haḡe mwa bev muleinia lol ute dolua vwate mulei be, ‘Gosav mahin̄ai te nom atatun rovoga binihimwasigi be vi boboga lol tano.’ 36Bwatuna be Deved nu lalaḡo lalai God lol taron non rovoga mau, vaivotu kea mwa mate i mai ira sibina, i rebehina mwa boboga lol tano. 37Take nuhav loli te kunia lalai wani gabe God nu lol domareinia nin mateana. 38-39Ira tua kimiu ira Jius, roroi huri tugu kaburai vuro lalai kimiu mwa mai n̄ano sivi Jisas, i atatu duluai gabe ram binihimwasigi aluna, mwa dugura nin vurora ninia gabe silo non Moses nu hav tugua te dum ninigo. 40Giv gita ḡoro haḡea, be havanau be ira atatun vev sera ran vevea sihav loli tehe lalai kimiu.
41‘Giv gitae, kimiu gabe gim lol leileia!
Giv haraḡo ginia i giv mate!
Huribe havanau gabe nam lolia kadogaha
ginau gabe gisav vinihi te mwasiginia,
son̄o be atatu si tugu halana lalai kimiu!’”
42I mahavana gabe Pol mai Banabas ramuru derai imwa tataro, sinombu ram hudali muleinira be raru vi tabagilu mulei gubwen̄ dolua la gubwen̄ mambuharai ba bevuri mulei ginau geki lalainira. 43Ataguna be sinombu ram ban dagai nin ḡoḡoana, sinombu ivusi ira Jius mai sinombu ivusi nin ira Lolobon̄i gabe nu lai ḡoḡora vai la vanua Juda ram huri nora binihimwasigi. Haḡe ira hala ram av durara be rav tu rahu alun nora binihi huri hogoi non God.
44Haḡe gubwen̄ dolua lol gubwen̄ mambuharai nu abena be atatu duluai lol taon ram mai be ramen ron̄ Avoana non Ratahigi. 45Mahavana be ira Jius ram ḡita sinombu gaivua be ram ḡoḡo, sinera mwa hantai ram bigaigai alun havanau gabe Pol mwa bevea ram rav kaburainia. 46Take Pol mai Banabas ramuru av lua i nora avoana mwa wasi liu i ramuru bevea be, “Mwa du maragai be garu vi seserai avoana non God muana lalai kimiu. Take bwatuna be gim bevea sibomiu be gin hav dadariha tehe be giv haroro lol rahuana vai tuai, i gav derai kimiu i gai vai vano vai alolon nira Lolobon̄i. 47Bwatuna be geki tatauleo gabe Ratahigi nu laia lalai kamaru mwa bevea be, ‘Nam lol kimiru gi gigita huri ira Lolobon̄i, huribe ureure duluai vi rahu.’”
48Mahavana be ira Lolobon̄i ram ron̄ avoana geki, ram avkari Ratahigi gin samwarana gaivua, i kera gabe nu uloinira huri rahuana ram bora ira binihimwasigi.
49Haḡe avoana non Ratahigi mwa ban vano lol vanua gea. 50Take ira Jius ram suvwai ira tomuai ḡoro sinombu la bwatutun vanua i ira vavin binihi marahi alolon ira Lolobon̄i gabe ram binihimwasigi God. I ram dau bwatuna ram lol ḡagaras Pol mai Banabas i ram bohai kaburainira nin vanuara. 51Haḡe ramuru darudaruai kaburai taniavu aten bwalagera vai alura i ramuru bano vai Ikoniam. 52Haḡe sinombu ata Antiok ram masiri gin samwarana i Vui Sabuga.
Currently Selected:
Lalaḡova 13: HNB
Highlight
Share
ਕਾਪੀ।
Want to have your highlights saved across all your devices? Sign up or sign in
Bible Society of the South Pacific
