Lalaḡova 10
10
Pita mai Konilias
1Atatu vwate la vanua Sisaria ihana Konilias. Kea muai ḡoro atatun bwaloana non ata Rom. 2Kea atat vavtutu vwate i kea mai tasalana i ira nituna ram ḡogonai God. Kea mulei mwa bului maragai ira hiru ira Jius i mwa dataro vataha mahavana lalai God. 3Atagun bobon alo la alo gaitolu kea mwa hueri, mwa ḡita enjel non God be mwa haroro abena mwa bevea lalainia be “Konilias”.
4Haḡe kea mwa ḡita mutmutai enjel gin mataguana i mwa bevea lalainia be, “Havanau, Vagahi?”
Haḡe enjel mwa bwaliua mwa bevea lalainia be, “God mwa ron̄ mwa davuha gin nom tataro i nom rovoga alun lolotabetabe, i kea mwa dogo be vi vwaliugo. 5I kadogaha gov hora atatu rituai vai Jopa huri atatu gabe ihana Saimon Pita. 6Kea atatu ata lol tanon wani Saimon gabe mwa lol vataha ginau gin vinun buluki, kea mwa dogo antahi.” 7Haḡe enjel mwa ban dagai ninia i Konilias mwa uloi non atatun rovoga gairua mai atatun bwaloana vwate, atat vavtutu vwate gabe buluina. 8Kea mwa bevea lalainira huri havanau be nu loli i mwa hora dagainira vai Jopa.
9Gubwen̄ dolua lol mahavana be kera la hala i ram la sosori gin vanua Jopa, Pita mwa hae amare la ulun imwa abobon alo huri be men tataro. 10Haḡe maro mwa gasia i mwa doron be men gan te ginau mahavana be ram lol vatuvwai vuvuri ginaganiana, kea mwa hueri. 11Kea mwa ḡita ute atamare mwa mahavan̄i i ginau mwa himai nin amare vai lol ureure i gitavanana nuḡun bwabwan̄i, i ram haḡoe la siguna gaivasi dalisia mwa himai vai lol ureure. 12Haḡe lalan̄an boe ram du alolon gete gea, ginau kun avua mai teltele i manu i lalan̄an vataha ginau. 13Haḡe silo mwa bevea lalainia be, “Pita, tomare be wehi ginau kerageki ba ḡania.”
14Take Pita mwa bwaliua mwa bevea be, “Sigai, Ratahigi. Nam hav gan te hohoi ginau be nu bibili sa nuhav tavuha tehe lol matamwa.”
15Haḡe silo mwa bev muleinia lalainia be, “Ginau be God nu lolia mwa melmelo huba gosav vev te dumwia be nu bibili sage nu hantai.” 16Ginau geki nu loli kunia vatolu vuvuri mwa lai muleinia vai lol ute atamare.
17Mahavana be Pita mwa binbinihi daligi huri non hueri, atatu gabe Konilias nu horara ram dol botui imwa, i kadogaha kera la matgatava. 18Haḡe ram dol hudaligi be, “Atatu vwate teti abena be ihana Saimon Pita?”
19Take Pita mwa lol ron̄oe radu be vi ilo binihiva ata lol hueri, haḡe Vui Sabuga mwa bevea lalainia be, “Gov ron̄oe! Atatu gaitolu teti kadogaha ram hiḡego. 20Gov lol vatuvwai be hivo i gosav binbinihi te maragai huri be gomen hiv maira, bwatuna inau nam horara.”
21Haḡe kunia Pita mwa hiv maira mwa bevea be, “Inau haḡea atatu be gim hiḡea, i gim dol mai huri hano?”
22Haḡe ram bwaliua ram bevea be, “Tomuai Konilias mwa hora kamai. Kea mwasin atat tavuha mwa ḡogonai God i ira Jius ram binihi marahi maragainia. Enjel non God nu vevea lalainia be vi warego vai la imwana, huribe vi ron̄ hano be mwa du be goi vevea.” 23Haḡe Pita mwa laira vai aimwa i mwa bevea ram dogo huri bon̄i aia.
Haḡe mwa ran mabon̄i kea mwa bano maira i ira binihimwasigi rituai ata Jopa ram ban bul maia. 24Gubwen̄ dolua mulei ataguna kea mwa botu la vanua Sisaria, i aia Konilias maira ata la imwana duluai maira non buluana gabe nu warera ram hohovia. 25I mahavana be Pita mwa du be men haroro, aia Konilias mwa bisogari maia, i mwa hiv bahudui lol bwalagena mwa dai bwatuna vai aluna. 26Take Pita mwa dabe ragasia mwa bevea lalainia be “Tomare. Inau siboku atatu vuroi n̄ano.” 27Pita mwa bevuri mai Konilias vaivotu ramuru haroro aia i mwa ḡitae be sinombu gaivua ram ḡoḡo. 28Kea mwa bevea lalainia be, “Giḡo sibomwa gom ilo didininia be, mwa hav tu tehe be ira Jius hurin nora uloilua be ramen haroro lol imwan ira Lolobon̄i i rav bulbulu maira. Take God mwa seserainia lalaiau be nasav vev te dumwia be atatu nu bibili sage nu hav tavuha tehe. 29Haḡe mahavana be gom horahora huria, nan hav mai tehe mai binihiv hara bora vwate, nam hudalinigo be gin hudaliau huri havanau?”
30Konilias mwa bevea be, “Gubwen̄ gaitolu nu nogo huba la alo gaitolu atagun bobon alo nan tataro alolon imwaḡu. Haḡe nam ḡita atatu vwate n̄an darihou mwa du mai gaisaga maita ḡoro lol mataku, 31i kea mwa bevea lalaiau be, ‘Konilias! God mwa ron̄ nom tataro i mwa ilo nam lalaḡov tavuha huri lolotabetabe. 32I gov hora atatu rituai vai Jopa huri atatu gabe ihana Saimon Pita. Kea atatu ata lol tanon Saimon gabe mwa lol vataha ginau alun vinun buluki, kea mwa dogo antahi.’ 33I nam hora darihou hurigo, i gom dabeau gom mai dumwi. I kadogaha gida duluai ute gaituvwa teti la lolmatan God i gam hohovi be gav ron̄ te havanau be Ratahigi mwa bevea lalainigo be gov vevea lalai kamai.”
Avoana non Pita
34Haḡe Pita mwa bavora mwa avo mwa bevea be, “Inau nam binihimwasigi be God mwa domuai atatu duluai la hala n̄an gaituvwa. 35Ihei tehe gabe mwa ḡogonainia i mwa lalaḡo bavtutu nu tavuha n̄an lalainia, son̄o be kea hava guli. 36Gim ilo roroi gabe nu horae lalai sinombu ira Jius, nu seserai lua Roroi Tavuha huri tamwata sivi Jisas Kraes, kea Ratahigi ḡoro atatu duluai. 37Kimiu gim ilo ginau duluai gabe nu lol bisirainia alun Jisas Kraes lol vanua Israel, nu tau bwatuna Kalili ataguna be Jon nu toretore huri garuhisabuga. Gim iloe huri Jisas ata Nasaret be kun hanigi God mwa salil non Vui Sabuga aluna mai muramura. 38Nu vano vataha ute duluai mwa lol lalaḡova tavuha, i mwa barahura gabe ram dogo vauhi halaten muramura non Vui hantai, bwatuna God bul maia. 39Kamai haḡea gaitura huri ginau duluai be nu lolia la vanua Israel mai Jerusalem. Haḡe ram bevegia huri mateana, i ram bohae vai alun volovolo. 40Take God mwa lol domareinia nin mateana atagun gubwen̄ gaitolu i mwa lol bisirainia 41mwa hav vora te lalai atatu duluai, take lalai ira gaitura gabe God nu gita luara huba, kea gin binihira be lalai kamai gabe gan gani i gan mwinu bul maia ataguna be nu tomare mulei nin mateana. 42I nu vevea lalai kamai be gav toretore huri leo tavuha lalai sinombu, i mulei be gav tu gi gaitura huria be kea God nu gita luae be vi vora vevegi huri rahuana i mateana. 43Haḡe ira atatun vevsera duluai ran vevea huria be, atatu duluai be ram binihimwasigi aluna vi binihi kaburai vurora alun muramura lol ihana.”
Ira Lolobon̄i ram lai Vui Sabuga
44Mahavana be Pita mwa avo radu, Vui Sabuga mwa hivo alura duluai be ram roron̄tai non avoana. 45Ira Jius gabe ram binihimwasigi alun Jisas Kraes, kera gabe ran mai nin Jopa mai Pita ram dan̄an̄a maragai be God mwa salil non hogoi Vui Sabuga alun ira Lolobon̄i mulei. 46Bwatuna ram ron̄ora be ram avo la avoana dodolua i ram lol roroai God gin samwarana gaivua Pita mwa avlua mwa bevea be, 47“Sinombu kera geki ram lai Vui Sabuga, kunia n̄an be kamai gan laia. Matu atatu te abena be rav tuḡorora be rasav lai te garuhisabuga gin wai?” 48Haḡe kunia Pita mwa bevea lalainira be rav lai garuhisabuga la ihan Jisas Kraes. Haḡe ram hudalinia be vi togo bul maira huri gubwen̄i rituai mulei.
Currently Selected:
Lalaḡova 10: HNB
Highlight
Share
ਕਾਪੀ।
Want to have your highlights saved across all your devices? Sign up or sign in
Bible Society of the South Pacific
