MATIU 16
16
A Varisi mana Satiusi ramo uduhuri na kaivosangi
(Mak 8.11-13; Luk 12.54-56)
1A Varisi* maira mana Satiusi* ramo vanamai vaki mai Jisas. Rau lengaia kwara rana tiusinae, ramo uhia huri na kaivosangi tina taetae kwara ne vosangi kwara i God aia maia. #a Mat 19.3; b Mat 12.38; Luk 11.16; Sione 6.30; 1 Kor 1.22 2Vae i Jisas mo kwaha maira mo viti “Lolona a mataniaho mo soro, tulu mo viti kwara, ‘A taro ne karea huri u mera.’ 3Sirovobongi bise tulu mo viti kwara, ‘Vae ne uha, huri a taetae u mera u dodoka.’ Tulu mo tagai na mahaleki, tulu viti lavia kwara a domianaki hoki na havakinau, vae tulu he kikilai na domiana na kaivosangi tea huri na taro aira vano hikani. 4I kamu a tangaloi hati, tulu tuku veveki rera vovohi God. Tulu nehe tagai na kaivosangi tea. A kaivosangi lo tangaloi* duruduruki i Sona, aia kehekeheki tulu ne tagaia.”
Hikani mo tirakinira mo vano. #Mat 12.39; Luk 11.29
A is nona Varisi mana Satiusi maira
(Mak 8.14-21)
5Lolona a ngwalagelo ramo vano utu vaki tavalakwai tokatoka lakua tavaluki, rau domihagwe kwara a lologa bongi kwara rana lai te bereti*. 6I Jisas mo kwaha maira mo viti kwara, “!Tulu tagahuri ne karea! A is nona Varisi* maira, mana nona Satiusi* maira u hati.” #Luk 12.1
7Ramo maraka hika ramo toko vitiviti huri na leo hi siboga ramo viti kwara, “U viti na leo hi huri tahe lai te bereti.”
8I Jisas u kikilai kwara rau tuku viti aha vae mo uduhuri kinira mo viti “?Kworoho tulu mo vikwahaki kwara tulu he lai te bereti? !A nomiu hauhuriana u kelekele haburu! 9?Tulu he rongo kikilakinia te radu? ?A lolomiu bongi kina bereti kailima hinea nomo bete lakwa na tangaloi u tari vakailima mana kete kaivihe hinea tulu mo hokoni na bereti tilologa takuni tina kanikani? #Mat 14.13-21; Mak 6.34-44; Luk 9.11-17; Sione 6.1-13 10?A lolomiu bongi vake kina bereti kaibitu hinea nomo bete lakwa na tangaloi u tari vakaivati, mana kete kaivihe hinea tulu mo hokoni na bereti tilologa takuni tina kanikani? #Mat 15.32-38; Mak 8.1-9 11?Kworohokinia hika tulu he va rongo kikilakinia te kwara nohe kwaha te maikamu huri na bereti? Tulu tagahurikamu ne karea tina is nona Varisi mana Satiusi maira.”
12Vunu a ngwalagelo ramo rongo kikilakinia kwara he viti te lakwara kwara rana tagahurira ne karea tina is hinea ramo toko tau lolo vulaoa, vae tina huhuiana nona Varisi mana Satiusi maira.
A matangwasarakiana noi Pita huri i Jisas
(Mak 8.27-30; Luk 9.18-21)
13Hikani i Jisas u vano vaki lo vanua garagarani mana gwatuivanua lakua Sisaria Vilivae. Takwahini mo uduhuri kina nona ngwalagelo mo viti kwara, “?A tangaloi rau vitiau, i nau a Natu* na Tangaloi, kwara i nau ihe?”
14Ramo daraki ramo viti “Tuaki rau viti kwara i nigo i Sione a tangaloi na bavtaes tangaloi. Tuaki rau viti kwara i nigo i Elaesa, vake tuaki rau viti kwara i nigo i Seremaea, diko a tangaloi* duruduruki te katukwale.” #Mak 6.14-15; Luk 9.7-8
15Vunu mo uduhuri kinira mo viti “?Vae i kamu tulu viti kwara i nau ihe?”
16I Saemon Pita mo daraki mo viti kwara, “I nigo i Vurae*, i Natu i God Tatoka.” #Mat 26.63; Mak 14.61
17Vunu i Jisas mo daraki mo viti kwara, “Saemon, natu i Sione, ne havutiko, huri hete tangaloi kwara u viti na kinau hi lakwako, vae i Tamagu lolo taetae u vosangia lakwako bakotoki. #Mat 17.5; Gal 1.15-16 18Vae hikani na viti lakwako, i nigo i Pita, i nigo a vatu. Vae hivoulu lo vatu hikani na tabe na nogu kwarelua* ne tu, vae a huirana na mateana nehe vai lai te kwara ne guia. #a Sione 1.42; b Eves 2.20; d Job 38.17; Aes 38.10 19Na beteki na ki lakwako, aira a ki na Vanua Karagwa hinea i God u hugwe koroa. A havakinau hinea kona kwaha suri hike lo varamana, i God lolo taetae ne kwaha suria vake. A havakinau hinea kona tiraki hike lo varamana, i God lolo taetae ne tirakinia vake.” #Mat 18.18; Sione 20.23
20Vunu i Jisas mo suri na nona ngwalagelo kwara rana hatu viti lakwa na tangaloi kwara aia i Vurae. #Mat 17.9; Mak 9.9
I Jisas mo matangwasaraki kwara vae ne mate vunu ne maraka taliku
(Mak 8.31-33; Luk 9.22)
21Mo tinakaki lo taro hi i Jisas mo viti matangwasaraki lakwa na nona ngwalagelo maira kwara, “Na vano vaki lo gwatuivanua lakua Serusalem, vae a ngwarasea* maira, a tangaloi* lingilingi lalakua mana tangaloi* kikikila na Uliuli* Kokona rana vaiau na rongo hati haburu. Rana kwohi mateiau, vunu lo rani kaitoluki i God ne rakatiau na ahi taliku.” 22Vae i Pita mo lai gegeakinia mo suria mo viti kwara, “Hugwe*, i God ne tu koro na kinau hi. He taritarisa tea kwara a tangaloi rana vai kwehini lakwako.”
23Vunu i Jisas mo halebohi mo kwaha lui Pita mo viti “!Setano*, ko vano tiau! I nigo hoki na vatu hinea u saro koro halagu kwara nana tatu na sovi luna, huri a domidomimu vano hi a domidomi nona tangaloi vohoki, hete domidomi noi God.” #Mat 4.10
A tangaloi noi Jisas rana hatu huri na noga domidomi siboga
(Mak 8.34—9.1; Luk 9.23-27)
24Vunu i Jisas mo kwaha mana nona ngwalagelo maira mo viti kwara, “Diko te tangaloi u lengaia kwara ne huriau, ne tiraki na nona domidomi sibona, ne kwali na kaibetuna, ne huriau. #Mat 10.38; Luk 14.27 25Diko te tangaloi ne uti na mamaurianana vae ne vai salakinia, vae ihe hinea ne tiraki na mamaurianana huriau neri hagwe na ahiana. #Mat 10.39; Luk 17.33; Sione 12.25 26Diko te tangaloi u lai savi na vivilagoki na varamana doluaki vae diko a mamaurianana ne sala, vae nehe hagwe na kinau te vohoki. A kinau tikei kwara a tangaloi ne volitukuhi na mamaurianana kinia. #Mat 4.8-9 27I nau, a Natu* na Tangaloi, u garagarani kwara na vanamai lo hahaviada noi Tamagu mana nogu kaihora maira tina taetae, vunu na malai savi na tangaloi ne taritarisa mana noga boloki. #a Mat 25.31; b Sam 28.4; 62.12; Prov 24.12; Rom 2.6; Rev 22.12 28Kareaki na viti lakwakamu, ratuaki rau tu hike maiau ranahe mate tea tarisaki hi rana tagaiau, i nau a Natu na Tangaloi, na vanamai, i nau a Hugwe Lakua.” #a Mat 10.23; b Mat 20.21
Currently Selected:
MATIU 16: HWT
Highlight
Share
Copy
Want to have your highlights saved across all your devices? Sign up or sign in
Havakinau New Testament © Bible Society of the South Pacific, 2016.