उत्पत्ति 7
7
नाँ बाडि
1झाइले याहवेहजी नोआने बिइ, “क्हि नेरो क्हिए परवा क्यु झाज न्होंर ह्याद्। तलेबिस्याँ ङइ चु पृथ्बीर छ्याँबै के लबै म्हि क्हि मत्त्रे म्रोंइमुँ। 2झाइले ताँन् खालर्बै चल् तबै खेदोमैं न्होंर्बै त्होब नेरो मोंमा ङिजोर धै चल् आतबै खालर्बै खेदोमैं त्होब नेरो मोंमा तिजोर क्यु झाजर पखो। 3झाइले पृथ्बी तिगोंन् नमेमैंए प्लु आथुँयारिगे बिसि नमेमैं या भाले नेरो योंम लसि ङिजोर क्हिने बालुन् पखो। 4तारेबै ङिरोर ङइ पृथ्बीर प्लिच्यु त्हिंइ प्लिच्यु म्हुँइस नाँ कुलब्मुँ। धै ङइ बनेबै सो प्ह्याबै सैमैं ताँनन् पृथ्बीउँइँले नास लवाब्मुँ।” 5झाइले याहवेहजी लद् बिबै के ताँनन् नोआइ लइ।
6पृथ्बीर नाँ बाडि तमा नोआ टुब्ब्रा बर्षर्बै मुँल। 7नाँ बाडिउँइँले सोरिगे बिसि नोआ, चए प्ह्रेंस्यो, च्ह-चोंमैं क्यु झाज न्होंर होंइ।#मत्ती २४:३८-३९; लूक १७:२७ 8परमेश्वरजी बिब् धोंले चल् तब नेरो चल् आतबै खेदोमैं, नमेंमैं नेरो सर क्ल्याँसि प्रबै ताँन् सो प्ह्याबै सैमैं 9भाले नेरो योंम तिजोर-तिजोर नोआने बालु क्यु झाजर होंइ। 10झाइले ङिरो लिउँइँ पृथ्बीर नाँ बाडि तबर होंइ।
11नोआ टुब्ब्रा बर्ष तबै सालर्बै म्हैंन ङ्हिंर्बै च्युसे ङिगैं तमा मुउँइँले नाँ युबै युबन् तइ। धै पृथ्बी न्होंर्बै थे-थेबै क्युए मुल्मैं ताँन् त्होंयाँइ।#२ पत्र ३:६ 12छले पृथ्बीर प्लिच्यु त्हिंइ प्लिच्यु म्हुँइँस नाँ युबै युबन् तइ।
13च त्हिंइर्न नोआ, चए प्ह्रेंस्यो, च्हमैं शेम, हाम, येपेत नेरो चमैंए प्ह्रेंस्योमैं सौंलो क्यु झाज न्होंर होंइ। 14चमैंने बालु ताँन् खालर्बै क्ह्योंर्बै खेदोमैं, धिंर न्हबै खेदोमैं, सर क्ल्याँसि प्रबै प्हँलाँ-प्हुँलुँमैं नेरो नमेंमैं या क्यु झाज न्होंर होंइ। 15परमेश्वरजी नोआने बिब् धोंले सो प्ह्याबै ताँन् खालर्बै भाले नेरो योंम नोआने बालु क्यु झाज न्होंर होंइ। 16च लिउँइँ याहवेहजी झाजए म्रा तोरमिंइ।
17पृथ्बीरि प्लिच्यु त्हिंइ समा नाँ बाडि तरिमा पृथ्बीर क्यु ल्हें तसि क्यु झाज क्यु फि-फि क्वेसि सउँइँले कैंडो ह्याबर होंइ। 18नाँ युबै युब् तरिमा पृथ्बीर क्यु बेल्ले ल्हें तसि क्यु झाज क्यु फि-फि क्वेबर होंइ। 19पृथ्बीर नाँ युबै युबन् तमा क्यु बेल्ले ल्हें तसि नुब नुबै कोंमैं ताँन् प्ल्हुँयाँइ। 20नुबै कोंमैं या मिटर ङि समा प्ल्हुँवाल। 21पृथ्बीर प्रब् टिब् लबै ताँन् सो प्ह्याबै सैमैं नमेंमैं, न्हबै खेदोमैं, क्ह्योंर्बै खेदोमैं, सर क्ल्याँसि प्रबै प्हँलाँ-प्हुँलुँमैं, म्हिमैं ताँन् सियाइ। 22छले पृथ्बीर मुँबै सो प्ह्याबै सैमैं ताँन् सियाइ। 23पृथ्बीर मुँबै ताँन् सो प्ह्याबै सैमैं म्हि, खेदो, क्ल्याँइ प्रबै प्हँलाँ-प्हुँलुँ, नमेंमैं ताँन् पृथ्बीउँइँले याहवेहजी नास लवाइ। नोआने बालु झाजर मुँब्मैं मत्त्रे सोइ।
24पृथ्बीर प्रसे ङ्हच्यु त्हिंइ समा क्यु चैरिइ।
Currently Selected:
उत्पत्ति 7: GCMB
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.