Metiu 4
4
Jisunyi pokayarka kunam
(Mk 1:12-13; Lk 4:1-13)
1 #
Heb 2:18; 4:15 Vbvrikunamv Dowv Jisunyi chukrimooku lo okv ninyia Uyu am pokayarka modukubv vnggvto. 2Alu champi gula okv ayu champigo dvmabv dooro koching so, Jisu kano toku. 3Vbvrikunamv Uyu ninyi gvlo aala minto, “No Pwknvyarnv gv Kuunyilo ngvbolo, so vlwng vdw sum vtwngbv ridubv mintoka.”
4 #
Det 8:3 Vbvritola Jisu mirwksito, “Darwknv Kitaplo mindu, ‘Nyi si vtwng lokv mwng turma dunv, vbvritola Pwknvyarnv gv minam gaam mvnwngnga dinchi dunv.’”
5Vbvrikunamv Uyu ngv Jisunyi Jerusalem bv vnggv toku, Darwknv Pamtv lo, ninyia Pwknvyarnvnaam aoyachoknv mwnglo aolo dakmuto, 6#Miri 91:11,12 okv ninyia minto, “No Pwknvyarnv gv Kuunyilo ngvbolo, atubongv sokv poklu kaatoka, vkvlvgavbolo Darwknv Kitaplo mindu,
‘Pwknvyarnv no gvbv ninyigv nyidogindung nga orto jire;
bunu nam bunugv laak lo dvvbwngre,
vkvlvgavbolo noogv lvchu nga achidubv vlwng aolo mvmu madubv.’”
7 #
Det 6:16 Jisu mirwksito, “Vbvritola Darwknv Kitaplo vbv mintadu, ‘Noogv Pwknvyarnvnyi no rikwripak mabvka.’”
8Vbvrikunamv Uyu hv Jisunyi vnggv laila moodw aoyachok kolo chaagv toku okv ninyia nyiamooku gv achialvbv kainv karv vdwa kaatam toku. 9Uyu v minto, “No nga gublwk dvla kumbojobo lo, nam ngo so gv kaagv dvnam mvnwng sum jire.”
10 #
Det 6:13 Vbvrikunamv Jisu mirwk toku, “Uyu! No vngroto, Darwknv Kitaplo mindu, “Noogv Pwknvyarnv nyimwng kumlajolaka okv Ninyigv lvgabv rimwng laka!’”
11Vbvrikunamv Uyu ngv Jisunyi vngyu toku; okv nyidogindung ngv aala Jisunyi ridur toku.
Jisu Galili lo ninyigv kudungkua nga rirap toku
(Mk 1:14-15; Lk 4:14-15)
12 #
Mt 14:3; Mk 6:17; Lk 3:19,20 Jonnyi patwk lwknama vdwlo Jisu tvvpa pvkudw, nw Galili bv vngyu toku. 13#Jn 2:12 Nw Najaret lo dooku mato, vbvritola Jibulun gvla Naptali mooku gv Svpar adar lo doonv banggu, Kaparnaum lo doodubv vngtoku. 14Svbvrinam si nyijwk Aijaya gv minpv nama jvjvbv rilin modukubv ritoku,
15 #
Aij 9:1,2 “Jebulun gv Kvdw okv Naptali gv kvdw,
lamtv ngv svmasa lo inv, Jordan Svko gv takdv gonvlo,
Galili, Jentail vdwgv kvdw!
16Kanv arwnglo doonv nyi vdwv,
kairungnv Loung go kaapare.
Sinv vdwgv kanv mooku lo doonv vdwgvlo
loung ngv ungjire.”
17 #
Mt 3:2 Vbvriri lokv Jisu ninyigv doina japrap toku: “Nonuno rimur lokv mvngdin tokuka ogulvgavbolo Nyidomooku gv Karv ngv nvchi duku!”
Jisu ngui naanv nyi api go goklin toku
(Mk 1:16-20; Lk 5:1-11)
18Jisu Galili gv Svpar gv adar lo vngkar rilo, achiboru sinyi go aminv Saimon (Pitar vnam) okv ninyigv boru Andriu vsap lokv svpar lo ngui naadung dubv kaapato. 19Jisu bunua minto, “Nga vngming gvlaka, okv ngo nonua nyi naadubv tamsarre.” 20Vjakgobv bunu vsap a kayupila ninyia lvkobv vngming gvtoku.
21Nw vngdavngra la kvvbi achiboru sigodv kaapato, Jibedi gv kuunyilo Jon nyila Jemsnyi. Bunu svpw lo vsap a mvgemvrap sila doonyato. Jisu bunua gokto, 22okv bunu vjakgobv svpwa okv bunugv abua kayupila ninyia lvkobv vngming gvtoku.
Jisu tamsarla, japkarla, okv mvpuripu toku
23 #
Mt 9:35; Mk 1:39 Jisu Galili gv mooku mvnwng lo vnggo karto, Jius kumku-naam lo tamsarla, Nyidomooku gv Karv gv lvkwng nga japgola, nvgwngnv achiapikla lvvmanv nyi vdwa mvpujila ritoku. 24Jisu gv vbvrinam gv yunying ngv Sairia gv mooku mvnwnglo dusik kartoku, vkvlvgabv nyi vdwv nyi nvgwngnv achiapik nvnga, okv suru nvnga, nyi uyuvram gvnv nga, okv svmik tabnv nga, okv digwng nvnga, ninyi gvlo aagv nyatoku, okv nw bunu mvnwngnga mvpu jitoku. 25Nyi nyipam twngtv nvgo ninyia vngming gvto, hv bunu Galili lokv, okv Dekapolis lokv, Jerusalem, Judia, Jordan Svko gv takdv gonv lokv.
Currently Selected:
Metiu 4: TAG
Highlight
Share
Copy
Want to have your highlights saved across all your devices? Sign up or sign in
Tagin New Testament © NECTAR and The Word For The World International, 2018.