Lucas 17
17
Aju tolsab'l tu'n qkub' tz'aq tuj il
Mateo 18.6-7,21-22; Marcos 9.42
1Xitzun tma'n Jesús kye t-xnaq'tzb'en:
—Mlay tzik'x ti'j, atlo kb'el q'onte tolsab'l tuj kyb'eye tu'n kykub' tz'aqe tuj il; ex b'ek'b'il twitz aju xjal kb'el q'onte. 2Mas b'a'nwtlo tu'n tok k'alet jun ma tij kya' tjaq' tqul ex tu'n t-xi xo't tuj mar, ex mya tu'n tkub' tz'aq jun tal ch'in tuj il tu'n. 3Ten kykwente kyi'je.
Qa at jun mya b'a'n ma tb'incha termaniya ti'ja, kawinxa; ex qa ma tz'ajtz ti'j tanmi, najsama til. 4Qa ma tb'incha wuq maj mya b'a'n ti'ja tuj jun q'ij, ex qa ma tzul tuk'ila wuq maj tuj jun q'ij ex ma tma: Najsama wile, mya b'a'n ma nb'inchaye ti'ja, qa chi, najsama til.
Nim jaku b'ant qu'n qa at qokslab'l
5Xitzun kyma'n apostol te Qajaw:
—Q'ontza mastl qokslab'le.
6Atzunte Qajaw xi tma'n kye:
—Noqwit at kyokslab'le maske noq ch'in ik tza'n jun tal twitz mostaza, jakwitlo txi kyma'ne te tze' lu: B'aqo'nktz tib'a tzalu ex awa'n ku'x tib'a tuj mar; ex jakulo txi tniman tze' kyyole.
Tza'n tten tu'n tajb'en jun majen
7Ik tza'n kyeye qa at jun kymajene in ch'okin ex qa in kwentin wakẍ tuj kojb'il, ok tajtz meltz'aj kymajene ex ok tul ja, ¿jakupe txi kyma'ne te: Toktza ex qe'kuya tu'n twa'na? 8Mlay txi kyma'ne ikju, o'kx kxel kyma'ne: B'incham ttena tu'n tb'ant nwaye, ex tu'n ttzaj tlaq'b'a'na; oktzun nb'aj wa'ne ex ok nb'aj k'ane, maxitzun kwa'l teya ex kk'ala, che chiloye te. 9¿Jakupe txi kyq'o'ne chjonte te majen tu'nju otoq tb'incha aju otoq txi kyma'ne te? Tuj nnab'le mlay. 10Kyja'tzun kxel nma'ne kyeye, ok tb'aj b'ant tkyaqil aju otoq txi q'ma'n kyeye, kymanxe: Majen qo'ye minti' in b'ant-xix qu'ne, porke o'kx ma b'ant qu'ne aju tzaj q'ma'n qeye.
Laj xinaq at tx'a'k kyi'j aju minti' q'anb'il ti'j, e b'anix tu'n Jesús
11Kyja'toq t-xi' Jesús tuj Jerusalén, ik'x t-xol tx'otx' Samaria tuk'il tx'otx' Galilea. 12Tej tpon tuj jun tal tnam, at laj xinaq at tx'a'k kyi'j aju minti' q'anb'il ti'j, e tzaj kanul ti'j, ex e kub' we' najchaq, 13ex e jaw sch'in:
—Jesús, Xnaq'tzal, q'aq'antz tk'u'ja qi'je, che chi.
14Tejtzun t-xi tke'yin Jesús qe xjal tx'a'k kyi'j, xi tma'n kye:
—Kyxi'ye, ex kyyek'unx kyib'e kye pal kye judiy. Ex tej kyja'toq kyxi' tuj b'e, e b'anix. 15Tejtzun tna'nte jun kye qeju otoq che b'anix, ajtz meltz'aj in sch'in wen, in jaw tnimsa'n tb'i Dios. 16Ex kub' ẍmeje' t-xe tqan Jesús tejxi tpon takl tib'aj twitz twitz tx'otx', ex xi tq'o'n chjonte te. Ex aju xjal lu, aj Samaria. 17Atzunte Jesús xi tma'n:
—¿Myapetzun laj kyb'et qeju ma che b'anix? ¿Yajtzun qeju b'elajtl jatumtzun ate' qe? 18¿O'kxpe jun stranjer xjal ma tz'ajtz meltz'aj q'olte chjonte te Dios?
19Ex xi tma'n Jesús te:
—We'ktza ex b'et-xa; tu'nju ma tokslaya ma b'anixa, chi Jesús.
Tza'n tten tzul tkawb'il Dios
Mateo 24.23-28,36-41
20Xi kyqanin fariseo te Jesús jtoj b'an tul tkawb'il Dios; atzunte Jesús xi ttzaq'we'n:
—Aju tkawb'il Dios mya q'ancha'l ok tul; 21ex mlay kyma xjal: Lu lu, ex qa, max ta' ma chixin, che chiwt; porke aju tkawb'il Dios ya at kyxole.
22Xitzun tma'n Jesús kye t-xnaq'tzb'en:
—Tzul tq'ijlalil ok kyajb'eye tu'n wule jun q'ij kyuk'ile, aqine sk'o'maj qine tu'n Dios tu'n ntene kyuk'il xjal, ex mlay chin kyile. 23Ktzajel kyma'n xjal kyeye: Lu at tzalu, ex qa, lu ta' ma chixin. Ex mi'n che'xe, ex mi'n che ok lpe'ye kyi'j. 24Porke ik tza'n xle'laj kya'j in jaw qoptz'aj t-xe kya'j ex in pon tuj juntl pak', iktzun tten tq'ijlalil ok wule juntl maj, aqine sk'o'maj qine tu'n Dios tu'n ntene kyuk'il xjal. 25Ex tnejel ilxix ti'j tu'n tik'x nimku wu'ne, ex tu'n wel ik'une kyu'n xjal ate' tuj tq'ijlalil ja'lo. 26Ik tza'n o b'aj tuj tq'ijlalil tej tten Noé, ax ikxtzun kb'ajel tuj tq'ijlalil ok wule, aqine sk'o'maj qine tu'n Dios tu'n ntene kyuk'il xjal. 27In che wa'n xjal ex in che k'an; in knet kyxu'jil xinaq ex in knet kychmil xu'j, ex kukx in kyb'incha'n xjal jlu tej tokx Noé tuj barc; tzajtzun q'eqab' ex e b'aj naj kykyaqil. 28Ax ikxtzun o b'aj tuj tq'ijlalil tej tten Lot; in che wa'n xjal ex in che k'an, in che laq'on ex in che k'ayin, in che awan ex in che b'inchan kyja; 29ex ax q'ij tej tetz Lot tuj tnam Sodoma tzaj q'aq' tuj kya'j tuk'ix tal ab'j azufre, ex e b'aj naj kykyaqil. 30Iktzun kb'ajel tuj q'ij ok wule juntl maj, aqine sk'o'maj qine tu'n Dios tu'n ntene kyuk'il xjal.
31Tuj q'ij ok wule, qa at jun xjal tjax twi' tja, mi'n ku'tz q'ilte aju at te tuj tja; ex qa at jun xjal ta' tuj kojb'il, ax ikx mi'n tz'ajtz meltz'aj tja. 32Kyna'ntze ti o b'aj ti'j t-xu'jil Lot. 33Alkye jun xjal o'kx tok tk'u'j ti'j tu'n tten tchwinqlal twitz tx'otx', mlay tkamb'a aju chwinqlal in tzaj tq'o'n Dios; ex alkye jun xjal tq'on tib' tu'n tnaj tchwinqlal twitz tx'otx', ok tkamb'a' aju chwinqlal in tzaj tq'o'n Dios.
34Kxel nma'ne kyeye, kab'e xjal in che tan twi' junx watb'il tuj qonik'an ok wule; jun kxel q'i'n, ex jun kyjel q'o'n. 35Kab'e xu'j in che che'n junx; jun kxel q'i'n, ex jun kyjel q'o'n. 36[Kab'e xinaq in che aq'nan tuj kojb'il; jun kxel q'i'n, ex jun kyjel q'o'n.]
37Atzun kye xnaq'tzb'en xi kyqanin:
—¿Jatum kb'ajel jlu, Tat?
Xi ttzaq'we'n Jesús:
—Jatum ta' t-ximlal kyimni, atzun che chmetel qe k'utz, chi Jesús.
Currently Selected:
Lucas 17: MAMNO
Highlight
Share
Copy
Want to have your highlights saved across all your devices? Sign up or sign in
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
