Génesis 18
18
Diosajj Abrahamar mä wawa churañataquiw arsu
1Tatitusti Abrahamarojj Encinas de Mamre sat chekanwa wasitat uñstäna; Abrahamasti carpa puncun kont'atäscänwa, niya cheka ururaquïnwa. 2Abrahamasti uñatatasinjja quimsa jakenacaruw jupa nayräjjan sayt'atäsquir uñjäna. Uñjasinsti mäqhiw sarthapi uca jakenacar catokañataqui, uqhamarac p'ekepsa oraker puriñcamaw alt'asiraquïna, 3aqham sasa:
—Tatitojja, achict'asmawa, janiquiy mäqhi saramti. 4Jumataqui waliquïchi ucqhajj mä juc'a uma mayï cayunacam jarekasiñamataqui, ucatsti mä juc'a rato koka ch'iwir samart'añamataqui. 5Naya sirviriman utapar visitt'atamatsti mä juc'a mank'a apanirapipjjäma, mank't'asipjjañamataqui, uqhamat ch'amani sarasipcañamataquiqui.
—Waliquiw, uqhamajja —sasaw uca jakenacajj ucqharojj samarapjjäna.
6Abrahamasti carpaparuw mantawayäna, ucatsti Sara warmiparojj saraquïnwa:
—Janc'aqui, mä pä tunca kilo jac'u aptasin t'ant'anac luram —sasa.
7Ucatsti Abrahamajj cawqhanccäntejj uywanacapajj ucaruw janc'aqui jalaraquïna, ucatsti cawquïritejj suma liq'ïcäna uca vaca kallwa irptanïna, ucatsti maynïri sirviriparuw churäna, uca sirviristi janc'aquiraquiw mank'añataqui waquicht'anïna. 8Uca vaca kallut sipansa, Abrahamajj cuajat lechempi, jan cuajat lechempi churaraquïna, wali suma sirvt'araquïna jupanacan koka c'uchun mank'añapcamajja.
9Mank'aña tucuyjjatatsti, uca jakenacajj Abrahamarojj jisct'apjjänwa:
—¿Cawquinquis Sara warmimajja? —sasa.
—Qhä carpancasquiw —sasaw Abrahamajj saraquïna.
10Ucatsti maynïrejj saraquïnwa:
—Mara aca horasaw visitt'iri cutt'aniraquï, ucqhataquisti Sara warmimajj mä yokall wawanïniwa —sasa.
Ucañcamasti Sarajj Abrahaman khepäjjapanwa, carpa mantañäwjan take uca parlatanac isch'uquiscäna. 11Abrahamampi, Sara warmipampisti wali chuymanëjjapjjänwa, uqhamarus Saran phajjsi wilapas chhaktjjaraquïnwa. 12Ucat Sarajj larusïna, saraquïnwa: “Cunjämarac wawanïriststi, chachajjasa, nayasa wali chuymanëjjapjjstjjaya” sasa. 13Ucampisa Tatitojj Abrahamarojj sascaquïnwa:
—¿Cunatsa Sarajj larusi? ¿Janit iyawsqui chuymani tokeru wawanïñjja? 14¿Utjaspati Tatitutaquisti cuna lurañas jupataqui wali ch'amätapa? Mara aca horasaw visitir cutt'aniraquï, ucqhataquisti Sarajj mä yokall wawanïniwa —sasa.
15Uc ist'asinsti, Sarajj ajjsarthapïnwa, ucatsti c'arisiñ munäna, aqham sasa:
—Janiw nayajj laruscti —sasa.
Ucampisa Tatitojj juparojj saraquïnwa:
—Jïsa, larustawa —sasa.
Abrahamajj Sodomataquiw Diosar mayi
16Uca khepatsti uca visitanacajj sayt'asjjapjjänwa, ucatsti Sodoma marca tokeruw sarjjarupjjaraquïna. Abrahamasti jupanac chicaraquiw sartäna qhitanucjjañataqui. 17Ucatsti Tatitojj saraquïnwa: “Abrahamarusti siristwa cuntejj lurcä ucjja, 18niyaquejjay jupajj mä jach'a ch'amani marcan awquipächinejja. Jupa toke take marcanacar bendiciñataquiw arsuractjja. 19Nayaraquiw juparojj ajlliracta wawanacaparu nayan yatichäwinacajjar jaysaña yatekapjjañapataqui, uqhamarus cunatejj chekapäqui asquïcaraqui ucanac lurapjjañapataqui, uqhamat nayajj take arsüwinacajjaru phokhañajjataqui” sasa. 20Uqhamasti Tatitojj sänwa:
—Sodomanquiri, uqhamarac Gomorranquiri jakenacajj sinti jan wali jakenacat uñt'atäpjjewa, juchanacapasti sinti jan walipuniraquiwa. 21Jichhajj nayajj uñjiriw sarä chekpachapuniti jucha luratanacapajj sintïpacha janicha uc yatiñataqui, uqhamatwa yatiraquëjja.
22Uca jakenacat paninisti Sodoma tokerupuniw sarjjapjjänjja, ucampis Abrahamajj Tatitun nayrakataparuw kheparascäna. 23Juparu mä juc'ampi jac'achasisinsti jisct'änwa:
—¿Jan juchani jakenacarojj juchaninacampi chicti t'unjaraquïta? 24Inampisa pheska tuncani jan juchan jakenacajj utjascaspa uca marcanjja. Uqhamäquipansa, ¿t'unjascaquïtati uca marcarojja, janiraquiti perdoncasma uca pheska tuncani jan juchan jakenac laycojja? 25¡Janiw waquiscaspati uqham jan juchanirojja juchaninacampi chica jiwarayañamajja, panpachanis pachpa jucha lurapcaspa uqhama! ¡Jan uc luramti! Jumajj aca mundpachana jach'a juezätawa, ¿janiti chekaparu uñjcäta? —sasa.
26Ucatsti Tatitojj saraquïnwa:
—Pheska tunca asqui jakenactejj uca Sodoma marcan jicjjäta ucqhajj, uca jan juchani jakenac laycojj perdonäw take uca marcan jaquir jakenacarojja —sasa.
27Ucampis Abrahamajj sascaquïnwa:
—Perdonit nayan uqham jumar parlatajjata, jumasti Diosätawa, nayasti mä jisc'a jakequïtwa; 28ucampisa inas faltchini pheskani uca pheska tuncani jan juchan jakenacar phokhachañataquejja, ¿uca pheskani faltquipansa t'unjascaquïtati uca marcarojja? —sasa.
Tatitusti saraquïnwa:
—Pusi tunca pheskani jan juchan jakenactejj jicjjatäjja, janiw uca marcarojj t'unjcäti —sasa.
29—Inas pusi tunca jan juchan jakenacac utjchini —sasa, Abrahamajj sascaquïnwa.
—Uca pusi tuncani laycojj janiw uca marcarojj t'unjcäti —sasaw Tatitojj saraquïna.
30Ucampis Abrahamajj Tatiturojj achict'ascaquïnwa:
—Tata, janiy colerasimti nayan uca toket jumar parlascaquitajjata. Inas quimsa tunca jan juchan jakenacaqui jicjjatchïta —sasa.
Tatitusti saraquïnwa:
—Uca quimsa tuncani jan juchan jakenac laycojj marcarojj perdonäwa —sasa.
31Abrahamasti wasitat sascaquïnwa:
—Tata, nayajj sintiw p'eke usuysma parlatajjampejja, ucampisa, ¿cunsa lurasma pä tunca jan juchan jakenacaqui jicjjatasma ucqhajja? —sasa.
Tatitusti saraquïnwa:
—Uca pä tuncani laycojj janiw marcarojj t'unjcäti —sasa.
32Abrahamajj sascaquïnwa:
—Tata, jan nayatac colerasimti, aca maya cutimpi arst'ä, ucatsti janiw mayampsa parlcjjäti, ¿tunca jan juchani jakenacaqui jicjjatasma ucqhajj cunsa lurasma? —sasa.
Tatitusti saraquïnwa:
—Uca tuncani laycojj janiw marcarojj t'unjcäti —sasa.
33Cunapachatejj Tatitojj Abrahamampi parlañ tucuyjjän ucqhajj uca chekatjja sarawayjjänwa, Abrahamasti carpaparuraquiw cuttjjäna.
Currently Selected:
Génesis 18: AYBOL1986
Highlight
Share
Copy
Want to have your highlights saved across all your devices? Sign up or sign in
Biblia Aymar © Sociedad Bíblica Boliviana, 1986.