Matiyò 10

Ghɨt ghe Jisòs tì chwokte ha jùmtìbàmsu wunsu

(Mâk 3.13-19; Lûk 6.12-16)

1-2Jisòs tî toŋtî jùmtìbàmsu wunsu njwòsù bà fo a jyak ha ghɨna na ghɨna hi jûmà fihe yohnù be fê chwuka tu nki tu yaftu, nâ tù jɨ̀m. Yet a jùmtìbàmsu tɨnsu mò ghɨn ni, wùt ashyə mô Samùn we ghɨ ndùku toŋte kəbi na Bità nì wâ nè wûn Andùlù nì Jêms nì wâ nè wûn Jon, a wana Sebedì; 3a fê mô Filîb nì Bàtòlòmiyà nì Tomòs nì Matiyò a we wù ndùku kâtà ŋwàklànà; a mô Jêms wâ Àfeyòs nì Tàdiyòs; 4a fê mô Samùn a wùt à nòn a wəhana a toŋte na Silòt nì Judàs Ìskaliyòt a we wù tì kaha bəkle Jisòs.

Jisòs fôktì ni te jùmtìbàmsu wunsu nè hì fêtà

(Mâk 6.7-13; Lûk 9.1-6)

5Jisòs shihi tuma ghɨt a wuna njwòsù bà jis ha ghɨna na, “Kə ghàn yen a yi lak yi tumi; kə ghàn yen a tèk yi Sàmaliyà yile. 6Ghàn bɨlà yen kə ha ghɨt a Isalì a ghɨna mò te sù njyə̀su ləhesu. 7Ghàn yên, ghàn hi fôktè na, fə̂n wù Fùyènù ti bakhâ. 8Ghàn hi fôktè ni, chwuka ghɨt a yafana nâbi ghe ghɨ kəta kùhù, jûmà fihe yohnù wu be. Lôhè ghɨta a yi kpû. Ghàn hi khə na ghàn khɨti jyak ghɨ̂n kə halô, ghàn yên, ghàn hi nê gha ghɨ̂n kə halô. 9Ghàn shihi yèn, kə ghàn nê lêmà ka a bàlì nâ hakoh. 10Kə wùt nê lyê bàlì, kə wùt lyi nju sù bà kəbi nì gwusu wùsu. Kə wùt nè lyê mbàŋ yì gbèna. Ghɨ kəta hi tòknà ha wùt wù fètana.

11“Ghàn ki lyi yi tèk yi chiki, nâbi yi tetani ghàn khɨŋ yen nì wùt we wù kəta chyənà yì jùŋ ghàn hi chyə kə wun a ndâ hi bè tàn wu tuk afa ghàn bè lô.” 12Ghàn lye a wùt a ndâ, ghàn toŋti ha ghɨt ghe ghɨ mô atɨ̂n jis na, ‘Yutì Fùyènì mò ha ghàn.’ 13Ghɨt a nda mu ghe ki fye ghàn a jûŋ, ma yutì ye faŋ a ghɨna tû; ghɨna tê fye ghàn a jûŋ ma yutì yê kahà ben ha ghàn. 14Ghàn lye a wùt a ndâ makə yì tèk, ghɨt atɨna faŋ hi fye ghàn makə ghɨna tê ywo gha ye ghàn jìsà, ghàn shihi lò, ghàn yah wulu wanu ha ghɨna shyəma ghɨna nê khɨli na ngə̂k bê bênàlò ha ghɨna. 15Mu jìsà ha ghàn hamok na à bè hì mô wu tuk wu sak wu Fùyènù, ma ngə̂k bê hi mô ha ghɨta a yi tèk afû chyâ te yì ndùku mô ha ghɨt a Sodòm nì ghɨt a Gòmoliyà.

Jisòs fôktì ha jùmtìbàmsu wunsu na ghɨta bè hì bânàlò ghɨna

(Mâk 13.9-13; Lûk 21.12-17)

16Ghàn hi khə na mu tuma ghàn ni, ghàn mô hi yèn hi tè mò te sù njyə̀ atɨ̂n à nyamsu basu. Yi mô na ghàn kəta hi tof kə te sù ywô bobhe wi kə te wù làt. 17“Ghàn tòkna. Ghɨta bè kwo fâlò ghàn ma ghɨ sak ghàn, ma ghɨ sam ghàn a ghɨna ndâ yì sakana. 18Ghɨ bè kwo yênàlò nì ghàn a gobnàsu ashyə̂ nì fə̂ntù kum nì mu, ma ghàn fokti tum yì jùŋ ha ghɨna kəbi nì ha tumu. 19Ghɨ ki khɨte ghàn yâ, kə ghàn hi kante na ghàn nè yê jîsà na ghə agha, beka ghàn nè yê tan à afû ma ghàn nê khɨli gha ye ghàn nè jîsà. 20À nè. Jîsà wijə ghàn, a nè hì jîsà tohne yohnà Bì wânù ha ghàn.”

21“Tuk wu tɨnu bè kpenâ, ma wùt bê hi lyê wâ nè wûn fo na ghɨ ywi, ma bì lyi wan ma wù fo na ghɨ ywi. Ma mwəlà bê hi ta nì tu ha be ghɨna fê mô hi ywi ghɨna. 22Ghɨt à jɨ̀m bè hì bânàlò ghàn kum mu, biyani ma à wunhi nâbi nde hi bè tàn a gòkhi, ma wù bê bon. 23Ghɨ khɨŋli wulu wanu a yi tèk, ghàn lo yen kə ha yile. Mu jìsà ha ghàn hamok na ghàn bê nê mihè wi fêt yin a tu tèk tu Isalì tu teka Wâ Wùt kahà ben.”

24“Ba ghàn khəlò na wan wù yikena wi hi ta chyà chichà à wûn, khə kəbi na wùt wù fètana tà timi hi chyâ bì yi fèt.” 25Yi kpenelò shyəma walà wù yikena yiki hi mô kəbi te chichà à wûn, fê kpene shyəma wùt wù fètana fet à kwok à kpene hi tè mò kəbi te bì yì fèt. Ghɨ hì mô hi tè toŋte bè ndâ yi yet yi be ni na Bèlsibùl, ghɨ toŋte nâ ghɨt a ndâ na ghə?

Jisòs fôktì wùt we a ghɨ kəta hi tè fàn

(Lûk 12.2-7)

26“Kə ghàn bè hì fânà ghɨta beka shyə ale wi ghɨ baŋa ghɨ bu hi bè bə̀h, makə ghɨ leti nâbi yi lêtì ghɨ bè faŋa hi khɨlî. 27Mu nyamte jîsà yi jîs ha ghàn chîn, ghàn yê laka a wu wən ha ghɨta, gha ghe ghàn ywo a lèt, ghɨ chɨmtè yi chɨ̂mtì ghàn shik a laka a wu wən. 28Kə ghàn hi fânà ghɨt ghe ghɨ mô hi ywe wùt a chyak a wùna, biyani bu hi ywe a yohnà. Ghàn hi bɨlà fânà kə Yèn fe Fu kəta jyaka hi bobhî a yohnà wûtà nì chyak a wùna a wu wùs. 29Ba ghɨ bəkle a mù jìnkwa mù bà kə fukatà ni, biyani fù mòk bu hi chem a chyə̂, à bu na à koŋ Bì wânù Yènfù. 30Nâbi nyuŋ sanisu tusu sù jɨ̀m mò Yènfù khə. 31Yi mô na ghàn kəta wi hi tè fân a shyə ale beka ghàn kokne chyàlò njìŋkwalimù mu dô kə ni.”

(Lûk 12.8-9)

32“À bimi nâbi nde a ghɨta ashyə̂ na wù mò wut à mù, ma mu bê boŋà bimi a Bom a nyə̂ na wù mò wùt à mù.” 33À mana nâbi nde mu a ghɨta ashyə̂, ma mu bê boŋà mana wûn a Bom ashyə̂ we wù mò a nyə̂.

Jisòs fôktì na yi ben nì nôhìnì

(Lûk 12.51-53; 14.26-27)

34“Kə ghàn hi kwâktè na mu a chyə afân tì ben na ghɨta hi chyə nì yutìnì. Mu tà ben nì yutìnì, mu bɨ̀li ben hi nì na ghɨta hi nô. 35Mu ben hi nì na wan wù lɨmà lôtè ki bì yi kə̀k, wan wù ywên lôtè ki nì a yi kə̀k, ywê wan lôtè ki nè lɨm a yi kə̀k. 36Bànàsu wûtsù shyəsu bè hì fwo kə wun a ndâ.

37“À koŋ nâbi nde bè wûn nì nè wûn chyâ te wù kòŋà mu, ma wù hi kpene wi hi tè mò jùmtìbàm ha mu; à hì kôŋà nâbi nde wâ wûn chyâ te wù kòŋà mu, ma wu hi kpene wi hi tè mò jùmtìbàm à mì. 38À faŋ nâbi nde hi bèkà kâkfùtàfù hi jùmtè mu, ma wù hi kpene wi hi tè mò jùmtìbàm à mì. 39À momhi nâbi nde hi chìn à yohnà wuna ma wù kpu; à mâkà nâbi nde yohnà wuna ma wù kwoti ghɨna.”

Jisòs fôktì wùt we wù mò hi bè khɨte wu maktu

(Mâk 9.41)

40“À fyi nâbi nde ghàn ma à hi mô na wù ti fyi mu, à fyi nâbi nde mu ma à hi mô na wù fyi we wù tuma mu. 41À fyi nâbi nde fòktè à Fùyèn a yi yet yi fòktì, ma wù kwoti maktu fòktì. À fyi nâbi nde wùt beka wùt àtɨ̂n mò wùt à chilichili yi yet nì wùt à chilichili a Yènfù ashyə̂ ma wù bê khɨti maktu wùt à chilichili. 42Mu jìsà ha ghàn hamok na, à fo nâbi nde bòm à mòlû mù sana mù ha wùt mòk atɨ̂n à mwəlà mu teta muna beka mwəlà mù teta mù tɨ̂n mò jùmtìbàm samsu, ma wù bê gbi nâbi yàni ma wù bê kwoti maktu wunu.”

Currently Selected:

Matiyò 10: bmv

Highlight

Copy

Want to have your highlights saved across all your devices? Sign up or sign in

Learn More About Ŋwàklù Fùyèn Kàn Mù Fê (Cameron)

Matiyò 10

Popular Bible Verses from
Matiyò 10

Listen to Matiyò 10

Bible:

Bum

Version: Ŋwàklù Fùyèn Kàn Mù Fê (Cameron) - bmv

Matiyò 10

Matiyò 10

Popular Bible Verses from Matiyò 10

Listen to Matiyò 10

Bible:

Bum

Version: Ŋwàklù Fùyèn Kàn Mù Fê (Cameron) - bmv

Matiyò 10

Popular Bible Verses from
Matiyò 10