Yorhaq 1
1
Shiqshaq Pi-awr Jawrle-euq
1Ardanqbae ngae nae Dawq jawrluf-eu mae. Dawq khoer-aq, Miqyaer naeq-aer jawr-awr, Dawq khoer-aq, Miqyaer mae. 2Dawq khoer ardanqbae ngae nae, Miqyaer naeq-aer jawrluf-eu mae.
3Yawqjeq navluf, aqyawf-anr ghoe-awr baetaq-euq mae. Khar baetaq-euq yawqjeq navluf-euq lafkhoer, aqyawf-anr maqghoeni baetaq-euq tiqjeq-iq maqjav-a. 4Aqyawf-euq lafkhoer daef-eu jeq anr-eu mae. Daef-eu jeq khoer-aq, tsawrhaq-euq yawshaef mae. 5Yawshaef khoer yawzanr-euq lafkhoer byaluf-eu mae. Yawzanr-aq, yawshaef-anr maq ghaqler-a.
6Miqyaer nae khaerghae lef-euq Yorhaq laer kur-eu tsawrhaq tiq ghaq jawr-eu mae. 7Aqyawf-aq, sarkir kamq-eu ghaq pyeuf-awr, aqyawf-euq baqda’nae tsawrhaq dawqtawvluf janlarni yawshaef khoer-euq garkawv sarkir kamqle-euq mae. 8Aqyawf-aq, yawshaef khoer maqngeur-a. Yawshaef khoer-euq garkawv sarkir kamqle-euq mae.
9Yawshaef khoer-aq, marjawvni ghae-eu yawshaef mae. Yawshaef khoer mirtsaq-euq khoertav khar daefle-euq tsawrhaq dawqtawv luf-anr bya’naeq le-euq mae.
10Aqyawf, mirtsaq-euq khoertav jawr-eu mae. Mirtsaq heusiq aqyawf-anr ghoe-awr baetaq-euq khawf mirtsaqzaq, aqyawf-anr maq siqnya-a. 11Aqyawf, aqyawf nae baetaq-euq mirtsaq-anr oe-euq khawf, aqyawf-euq tsawrhaq deuq, aqyawf-anr maq hageuf-a. 12Aerkhawf, aqyawf-anr hageuf-awr, aqyawf-euq tsawrmyanr-anr kharjan-eu tsawrhaq-anr aqyawf, aqyawf maf-anr aryaq bif-awr, Miqyaer-euq zaq bi pyeuflar-eu mae. 13Tsawrhaq khoerdeuq, Miqyaer-euq zaq pyeuflar-euq-aq, tsawrjeuq tsawrca baqda’nae maqngeur-a. Shiqshaq-euq nuinoeq nuilov baqda’nae khawf maqngeur-aer, tsawrhaq-euq nuinoeq nuilov baqda’nae khawf maqngeur-a. Miqyaer nuima tsaq-eu baqda’nae pyeuflar-euq mae.
14Dawq khoer-aq, shiqshaq pi-awr aqdui naeq-aer jawrle-euq mae. Aqyawf-euq yawshaef khanqsaer-anr aqdui ya’mawr-euq ma. Yawshaef khanqsaer khoer-aq, Aqda-euq Zaqyo tiq ghaq taef-euq yawshaef khanqsaer mae. Zaqyo heughaq-aq, guiqlanq yawdzanr hawr-eu yawtsaq yawdawr jeq byan-eu mae.
15Yorhaq, aqyawf-euq garkawv sarkir kamq-awr, heulof-aer yawkhav-aer gur-eu lafkhoer aer-eu, “ ‘Ngaq-euq maeqnan oeluf-eu heughaq-aq, ngaq-euq navmaqtser huiqdzaeq-eu mae. Aqjeq mirnae aernar-aq, ngar maq daefle-euq minav-aer aqyawf daefluf-eu mae’ laer ngar aer-eu khoerghaq-aq aqyawf mae.”
16Aqyawf byan-eu lafkhoer, aqdui yawqghaq navluf guiqlanq yawdzanr tiqjeq sair tiqjeq za-euq ma. 17Zanrdawq-aq, Morseq-anr ghoe-awr bifnaeq lef-euq mae. Aerkhawf, guiqlanq yawdzanr hawr-eu yawtsaq yawdawr jeq-aq, Yeqsur Kali-anr nae dovle-euq mae. 18Tsawrhaq tiqghaq-iq tiqjawr-iq Miqyaer-anr maq mawrhaw-aq. Aqda-euq bawkhanr-euq lafkhoer jawr-eu Zaqyo tiq ghaq taef nae, Miqyaer-euq garkawv tsafgaq le-euq mae.
Yorhaq Dawqmaeq Maeq-eu
Mt 3:1-12; Mk 1:1-8; Lk 3:1-18
19Heu-aq, Yorhaq nae kamq-euq sarkir deuq mae. Khoerngae, Yeqlursaqlaeq-anr jawr-eu Yurdav tsawrhaq nae, Yorhaq jawr-eu gar pirma deuq hawr-eu Leqbir tsawrhaq deuq-anr khaerghae-awr, aqyawf-anr heulof-aer bi narhaq-ir-euq mae, “Nawr aqsur ghaq le?” 20Aqyawf maq zaftaq-aer, maqpyaerni dawrcoeni aerkhof naeq-eu, “Ngar-aq, Kali maqngeur.”
21Aqyawfmaf, aqyawf-anr par narhaq-eu, “Tox-aer mar-iq, nawr aqsur ghaq le? Erlirya le lor?”
Khoerngae, aqyawf aerkhof naeq-eu, “Ngar, Erlirya maqngeur.”
Aqyawfmaf par narhaq-eu, “Miqyaer gharduq ngaeqdan-eu khoerghaq le lor?”
Khoerngae, aqyawf aerkhof naeq-eu, “Maqngeur.”
22Khoernar-aq, aqyawfmaf, aqyawf-anr narhaq-eu, “Nawr aqsur ghaq le? Nga’maf, nga’maf-anr khaerghae lef-euq deuq-anr tsaflernya paq-aer, nawr aqsur ghaq le laer yawqhar yawqha aersher-eq?”
23Yorhaq aerkhof naeq-eu, “Ngar-aq, Miqyaer gharduq ngaeqdan-eu Irsaqyar nae aertaq-euq lof-aer,
‘ Sanqpaq Miqyaer -euq garma shardawr-awq’ (Isy 40:3)
laer, bawrtsanq bawrdanr-anr jawr-awr gurluf-eu khoerghaq ma.”
24Narhaq le-euq tsawrhaq khoerdeuq-aq, Paqliqsaer deuq nae khaerghae lef-euq mae. 25Khoerngae, aqyawfmaf, Yorhaq-anr narhaq-eu, “Nawr, Kali khawf maqngeur, Erlirya khawf maqngeur, Miqyaer gharduq ngaeqdan-eu khoerghaq khawf maq ngeurmar-iq, aqjeq mirnae nawr, aqcawq-anr bartirsaq mrnaeq luf-eu le?”
26Yorhaq, aqyawf maf-anr heulof-aer aerkhof naeq-euq mae, “Ngar-aq, ircuf nae bartirsaq mrnaeq luf-eu ma. Aerkhawf, nawmaf maq siqnya-eu tsawrhaq tiq ghaq, nawmaf-euq ghanrcae yawfluf-eu mae. 27Aqyawf, ngaq-euq maeqnan oe-euq khawf, ngaq-euq navmaqtser huiqdzaeq-eu mae. Ngar, aqyawf-euq saeqnawv arcav puirnaeq-eu taef-aer khawf maqgeux-a.”
28Garkawv heu-aq, Yorhaq, Yawrdaq lawrbaq-euq nanrma dovkhaeq paw jav-eu Beqtaqnir pu-anr jawr-awr, bartirsaq mrnaeqluf ngae pyeuflar-euq mae.
Miqyaer-euq Yawrzaq
29Nishawq ngae nan, aqyawf jawr-eu paw Yeqsur oeluf-eu gar Yorhaq ya’mawr ngae, heulof-aer aer-eu mae, “Mirtsaqzaq-euq iqbax-anr pidzae-eu Miqyaer-euq Yawrzaq-anr hawsher-eq! 30‘Ngaq-euq maeqnan oeluf-eu khoerghaq-aq, ngaq-euq navmaqtser huiq-eu mae. Aqjeq mirnae aernar-aq, ngar maq daefle-euq minav-aer aqyawf daefluf-eu mae’ laer ngar aer-eu khoerghaq-aq, aqyawf mae. 31Yawbae ngar, aqyawf-anr maq siqnya-aq. Aerkhawf, Irsaqleqlav-anr panmaeq naeq-eu gharduq, nymq-mr ngar oe-awr bartirsaq mrnaeq luf-eu ma.”
32Khoeruqtaf, Yorhaq heulof-aer sarkir parkamq-eu mae, “Yawshawr Saflar, khaqkhoeq lof-aer mq-anr nae zafka le-awr, aqyawf-euq khoertav dawfle taq-awr jawr-eu gar ngar ya’mawr-euq ma. 33Yawbae-aq, ngar, aqyawf-anr maq siqnya-aq. Aerkhawf, ircuf nae bartirsaq mrnaeq-awq laer ngaq-anr khaer-eu khoerghaq, ngaq-anr heulof-aer aernaeq laf-euq mae, ‘Yawshawr Saflar zafka le-awr, aqgeu ghaq-euq khoertav dawfluf-eu gar nawr ya’mawr nar-aq, khoerghaq-aq, Yawshawr Saflar nae bartirsaq mrnaeq-eu ghaq pyeuf-eu mae.’ 34Ngar khoer-anr ya’mawr-awr, tsawrhaq khoerghaq-aq, Miqyaer-euq Zaqyo mae laer ngar sarkir kamq-eu ma.”
Kurbae Bae-euq Zaqlanr Deuq
35Nishawq ngae nan, Yorhaq, aqyawf-euq zaqlanr nyiq ghaq naeq-aer khoergar yawfluf-eu mae. 36Aqyawf, Yeqsur oeluf-eu gar ya’mawr ngae aer-eu, “Miqyaer-euq Yawrzaq-anr hawsher-eq!”
37Zaqlanr khoer nyiq ghaq Yorhaq khoerlof-aer aer-eu gar yagaq ngae, Yeqsur-euq maeqnan cantae ghae-euq mae. 38Yeqsur nanrghof ghofhaw-awr, aqyawfnyaf cantae luf-eu gar ya’mawr ngae narhaq-eu, “Nawnyaf aqjeq sharpov luf-eu le?”
Aqyawfnyaf narhaq-eu, “Laqbir-or! Nawr aqgar yaf-eu le?” (Laqbir laer aer-eu-aq, saqlaq laer aermawf-eu mae.)
39Yeqsur, aqyawf nyaf-anr aernaeq-eu, “Lar-awr hawlar-awq.” Khoermirnae, aqyawfnyaf le-awr aqyawf-euq jawrduq-anr hawler-euq mae. Khoerngae, uqciftaw naqliq oeq laf aerghaqni byanlar-euq mirnae, khoerngae mir, aqyawfnyaf, Yeqsur naeq-aer yaf-euq mae.
40Yorhaq aer-eu dawq yagaq-awr, Yeqsur-euq maeqnan cantae ler-euq khoer nyiq ghaq-euq lafkhoer tiq ghaq-aq, Sirmoq Beqtuvluv-euq aqnyir Aqdaeqlaeq mae. 41Aqdaeqlaeq mrbae bae-euq jeq-aq, aqyawf-euq ardov Sirmoq-anr povmawr-ir-awr aernaeq-eu, “Nga’nyaf, Meqsirya-anr ya’mawr-euq ma.” (Meqsirya laer aer-eu-aq, Kali laer aermawf-eu mae.) 42Khoernar-aq, Aqdaeqlaeq, Sirmoq sheuq-awr, Yeqsur-anr dzoer-ir-euq mae. Yeqsur, Sirmoq-anr haw-awr aer-eu, “Nawr-aq, Yornav-euq zaqyo Sirmoq ngar-a. Aqkar nar-aq, nawq-anr Geqpar laer yakur taef-a.” (Geqpar laer aer-eu-aq, khaqlo laer aermawf-eu mae.)
Pirlirpuv Hawr-eu Naqdaqneqlar-anr Kur-euq
43Nishawq ngae nan, Yeqsur, Gaqliqlaer mirkhanq-anr irmawf-eu mae. Aqyawf, Pirlirpuv-anr tanqpuq-awr aernaeq-eu, “Ngaq-euq maeqnan cantae lar-awq.”
44Pirlirpuv heughaq-aq, Aqdaeqlaeq hawr-eu Beqtuvluv jawr-eu, Baeqdzerdaq-anr jawr-eu mae. 45Pirlirpuv, Naqdaqneqlar-anr povmawr-awr aqyawf-anr aernaeq-eu, “Morseq nae boftaq-euq zanrdawq-euq lafkhoer hawr-eu, Miqyaer gharduq ngaeqdan-eu deuq-euq sanqbof-euq lafkhoer boftaq-euq tsawrhaq khoerghaq-anr nga’maf ya’mawr-euq ma. Aqyawf-aq, Naqzaqlaer tsawrhaq Yorsaev-euq zaqyo Yeqsur mae.”
46Naqdaqneqlar, aqyawf-anr aernaeq-eu, “Naqzaqlaer-anr nae yawmuiq aqjeq dovlar nya-eu la?” Pirlirpuv, aqyawf-anr aernaeq-eu, “Nawr lar-awr hawlar-awq!”
47Naqdaqneqlar, Yeqsur jawr-eu gar larluf-eu gar Yeqsur ya’mawr ngae, Naqdaqneqlar-euq garkawv heulof-aer aer-eu mae, “Aqdir Irsaqleqlav tsawrhaq pyeuf-eu ghaq-anr hawsher-eq. Aqyawf-euq nuima-euq lafkhoer jaqmyawf maershuir maqanr-a.”
48Khoerngae, Naqdaqneqlar, Yeqsur-anr narhaq-eu, “Nawr, ngaq-anr aqjox-aer siqnya-eu le?”
Yeqsur, aqyawf-anr aerkhof naeq-eu, “Pirlirpuv, nawq-anr maqkur-euq minav-aer, nawr siqguq arbawr-euq uqmov jawrluf ngae nae, ngar, nawq-anr mawr-euq ma.”
49Naqdaqneqlar aer-eu, “Laqbir-or! Nawr-aq, Miqyaer-euq Zaqyo ngar-a! Irsaqleqlav tsawrhaq-euq Sanqpaq khawf ngeur ngar-a!”
50Khoerngae, Yeqsur, aqyawf-anr aernaeq-eu, “ ‘Nawr siqguq arbawr-euq uqmov jawrluf ngae’ nae, ngar, nawq-anr mawr-euq ma laer ngar aer-eu mirnae nawr jan-eu le lor? Nawr heunav maqtser huiq-eu jeq-anr khawf ya’mawr taef-a.” 51Yeqsur, aqyawf-anr paraer-eu, “Ngar, nawmaf-anr aqdir aqmar aernaeq nyar, mq pantaq-euq gar ya’mawr taef-a. Miqyaer-euq mqtav ghaqkhaer, Tsawrhaq-euq Zaqyo-euq khoertav tsawqtoeq tsawqdav-aer canluf-eu gar khawf ya’mawr taef-a.”
Currently Selected:
Yorhaq 1: AKA
Highlight
Share
Copy
Want to have your highlights saved across all your devices? Sign up or sign in
2018 ©
Bibles International ®
The Bible Society of Baptist Mid-Missions