Čơdơ̆ng Phŭn 6
6
Tơlơi Soh Jai Đĭ Tui
1Ană mơnuih jai lu tui amăng lŏn tơnah laih anŭn tơkeng rai lu ană đah kơmơi.#Jôp 1:6; 2:1. 2Ƀing ană đah rơkơi Ơi Adai#6:2,4 Dưi pơblang dơ̆ng mơ̆n: ană đah rơkơi kơ ƀing yang. ƀuh ană đah kơmơi ană mơnuih jing hiam rŏ, gơñu mă dŏ ƀing hlơi gơñu ruah. 3Yêhôwa laĭ: “Yang Bơngăt Kâo ƀu či dŏ nanao amăng ană mơnuih#6:3 Dưi pơblang dơ̆ng mơ̆n: amăng tơlơi jrok jơlan. ôh yua kơ gơñu jing asar đôč. Mơ̆ng anai truh pơ anăp gơñu ƀu či hơdip rơgao hloh kơ sa rơtuh dua pluh thŭn ôh.”
4Amăng khul hrơi anŭn, laih anŭn wơ̆t kơ tơdơi kơ anŭn mơ̆n, hmâo mơnuih prŏng glong biă mă tơbiă rai ƀơi lŏn tơnah, yua kơ ană đah rơkơi Ơi Adai đih bĭt hăng ană đah kơmơi ană mơnuih, gơñu tơkeng rai ană bă. Gơñu jing ƀing mơnuih prŏng kơtang đưm adih, jing ƀing mơnuih hing ang.#Yap 13:33.
5Yêhôwa ƀuh tơlơi sat ƀai ană mơnuih lar hyu ƀơi lŏn tơnah laih anŭn tơlơi pơmĭn gơñu kơnơ̆ng hơduah sem khul mơneč sat.#Mat 24:37; Luk 17:26; I Pê 3:20. 6Yêhôwa hơƀlŏk glaĭ yua kơ Ñu hmâo pơjing rai ană mơnuih ƀơi lŏn tơnah, laih anŭn rơngot ruă amăng pran jua. 7Yêhôwa laĭ: “Kâo či sut lui abih bang mơnuih Kâo hmâo pơjing laih mơ̆ng lŏn tơnah, mơ̆ng ană mơnuih truh kơ hlô mơnơ̆ng rong, hlô hro rui, khul čĭm, yua kơ kâo hơƀlŏk glaĭ kơ tơlơi Kâo hmâo hrih pơjing laih ƀing gơñu.”
Nôê Hmâo Tơlơi Pap Ƀơi Anăp Khua Yang
8Samơ̆ Nôê hmâo tơlơi pap ƀơi anăp Yêhôwa.
9Anai jing kơnŭng djuai Nôê. Amăng rơnŭk ñu dŏ hơdip, Nôê jing sa čô mơnuih tơpă hơnơ̆ng laih anŭn hlom ƀom; ñu rơbat hrŏm hăng Ơi Adai.#II Pê 2:5. 10Nôê hmâo klâo čô ană đah rơkơi: Sem, Čam laih anŭn Japhet.
Nôê Ngă Kompăn
11Lŏn tơnah hlăk anŭn leng kơ soh sat ƀơi anăp Ơi Adai laih anŭn bă blai tơlơi ƀơhok kreñ. 12Ơi Adai lăng lŏn tơnah, ƀuh gơñu soh sat, yua kơ abih bang mơnuih ƀơi lŏn tơnah leng kơ hơdip amăng tơlơi soh sat. 13Ơi Adai laĭ kơ Nôê; “Kâo khư̆p-ư pơluč hĭ abih bang mơnuih, yua kơ mơ̆ng ƀing gơñu yơh lŏn tơnah bă blai hăng tơlơi ƀơhok kreñ. Anai nê, Kâo či pơđŭt hĭ ƀing gơñu mơ̆ng lŏn tơnah. 14Brơi ih ngă bĕ sa boh kompăn hăng kơyâo gôpher,#6:14 gôpher jing djuai kơyâo hmâo kơtăk ƀlit. pơpha hĭ lu adŭ laih anŭn pik ñu hăng kơtăk ƀlit amăng lăm wơ̆t hăng gah rơngiao mơ̆n. 15Brơi ih ngă kompăn kar hăng anai: Yong ñu sa rơtuh rơma pluh met,#6:15 Boh hră phŭn: 300 amma (Čih tui boh pơhiăp Prăng jing “kuđê”); 1 amma = 44,5 cm. da ñu dua pluh rơma met, dơ̆ng ñu pluh rơma met. 16Brơi ih ngă sa boh bơbŭng#6:16 Dưi pơblang dơ̆ng mơ̆n: amăng phă. brơi kơ kompăn, bơbŭng ñu glong ƀiă kơ kompăn ha mơkrah met, laih anŭn pŏk amăng phă ƀơi djeo ñu. Brơi ih ngă ñu klâo tal. 17Bơ kơ Kâo, Kâo či ba rai ia lip lŏn tơnah kiăng pơđŭt hĭ abih bang djuai hơdip ƀơi lŏn tơnah. Abih bang mơnơ̆ng ƀơi lŏn tơnah leng kơ či djai hĭ. 18Samơ̆ Kâo či pơdơ̆ng kơnol pơgop hăng ih, giơ̆ng anŭn ih či mŭt amăng kompăn hrŏm hơbĭt hăng bơnai ih, ƀing ană đah rơkơi laih anŭn ƀing hơđŭ ih. 19Kơ khul mơnơ̆ng hơdip, brơi ih ba pơmŭt bĕ amăng kompăn rĭm djuai sa grop, hmâo tơno hmâo ania, kiăng kơ djă pioh gơñu hơdip hrŏm hăng ih. 20Čĭm tui hluai hăng djuai ñu, hlô mơnơ̆ng rong tui hluai hăng djuai ñu, hlô mơnơ̆ng hro rui tui hluai hăng djuai ñu, rĭm djuai hmâo sa grop, gơñu či rai pơ ih kiăng kơ ih djă pioh tơlơi hơdip gơñu. 21Hloh kơ anŭn dơ̆ng, brơi ih djă ba mơnơ̆ng ƀơ̆ng huă pơkom pioh kiăng ngă mơnơ̆ng ƀơ̆ng huă brơi kơ ih pô laih anŭn kơ khul hlô mơnơ̆ng anŭn mơ̆n.” 22Nôê ngă abih bang bruă djơ̆ tui hăng tơlơi Ơi Adai hmâo pơtă laih kơ ñu.#Hêb 11:7.
Currently Selected:
Čơdơ̆ng Phŭn 6: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.