Maliko 3
3
Yesu ahonya mtamu mushi wa sabato.
1-6.
1Azaingila vituhu vikiloi, muja muna muntu mwena mkono uholozewo. 2Wazemteγeleza, ati neamhonye mushi wa sabato kangwe waone lufyalimile. 3Azamlonga yuja muntu mwena mkono uholozewo: Inuka, uize na aha gati! 4Vikibinda azawati: Vina ṅwiko kuγoshola mbuli ntana mushi wa sabato, hambu mbada? Kumhonya muntu, hambu kumkoma? Miya waja wazatongomala du. 5Azawadulila woshe na maya, hambu azaihilwa, wakitoγesha myoyo yawe ivyoho, azamγamba yuja muntu: Kusula mkono wako! Azaukusula, ne uwo mkono wakwe uhouya, sa ndivyo uilivyo kale.
Yesu abashiγwa ni wantu wangi.
6-12.
6Mafaliseyo wazafikalawa, wazashunga njama na wantu wa Helode kwa mbuli yakwe, ndivyo waonele luhoseze. 7Miya Yesu azahita na wahina wakwe kwe bahali; wantu wangi wa Galileya wazamtongela, hata wa Yudeya 8na wa Yelusalemu na wa Idumeya na walawilewo sheja ja Yolodani na wa Tilo na wa Sidoni, ni bumba kulu, wazamtimila wakiiva avyoγoshola. 9Azalonga wahina wakwe, wamliγanyize kachombo kwa mbuli ya wantu, wakiisa kuγenela, kangwe washemfinte. 10Hambu azahonya wangi, kwa ivyoho woshe welumilwa wazamkinila, kangwe wamdowe. 11Hata mpepo ze usaba zikimwona, zizamkinila na kukema angwe: Iwe u ṅwana Mulungu. 12Azaisiiza kuzivaila, zishemubunkule.
Ashaγula wahina 12.
13-19.
13Azakwela mwe ntuli, azaitanga akundilewo ṅwenye na kwakwe, ne wahomtimila. 14Azagimbika kumi na waili, waange naye, 15kangwe nezeawatume kwa bilikila, wainkwe ufuṅwa wa kuingata mpepo. 16Azawagimbika waja kumi na waili; Simoni azamunka zina ja Petelo. 17Yakobo, ṅwana Zebedeyo, na nduγuye Yohana azawainka zina ja Bowanelige, ni kuγamba: Wana lubambala. 18Watuhu ni Andeleya na Filipo na Balitolomeyo na Mateyo na Toma na Yakobo, ṅwana Alifeyo, na Tadeyo na Simoni ywa Kana 19na Yuda Isikaliyota, ne amwinkileye.
Watabaluwangwa wamunka Yesu mpepo.
20-30.
20Vikibinda azaingila na nyumbai, vituhu wantu wangi wazaunganana, nkawakombaγanye kuja nkande. 21Wanduγu wakwe wakiviiva wazalawila, wamgwile, hambu wazaγamba: Atalaluka.
22Watabaluwangwa walawilewo Yelusalemu wazaγamba: Ana Mzuka, kangi nguvu ya uyu zumbe ywa mpepo ne ayoingata nayo mpepo. 23Azawaitanga, waunganane, azawazisa lushimo angwe: Satani adaha zeze kumwingata Satani ṅwiyae? 24Kangi uzumbe ati wapangana ṅwenye, uja uzumbe nkaudaha kutoγa. 25Kangi ati nyumba yapangana ṅwenye, iyo nyumba nkaidaha kuikala. 26Hata Satani ati akiinukila ṅwenye na kupangana, nkadaha kukalama, atabuza kubindilizika. 27Miya mimtu nkadaha kuingila mwe nyumba ya mnguvu, amhoke ntanu zakwe, aishimshungile yuja mnguvu; akibinda akadaha kumhoka ntanu ze mwe nyumba yakwe. 28Kweli namiti: Wana wantu watazaushiliziγwa uhuza woshe na mbuli za lwezo, ndizo wamweze muntu nazo; 29miya muntu akimweza Mpeho mṅazi nkazaviushiliziγwa kale na kale, aikozile masa ya kale na kale; 30ni kwa kuti wazalonga: Ana mpepo ye usaba.
Wanduγu na nine wa kweli!
31-35.
31Kuzaiza nine na wanduγuze, wazaγoloka se, wazamtumila, wazamwitanga. 32Bumba kulu jizaikala na kumdenganila, wazaγamba: Olela, nyokwe na wanduγuzo wa uko se, wakulonda. 33Azawalandula angwe: Mlala na wenetu ni wandai? 34Akibinda azawaolela waja waikalewo na kumdenganila, azaγamba: Shawa wamlala na wenetu! 35Hambu ndiye aγoshole, Mulungu avyokunda, uyu ne ṅwenetu na lumbu jangu na mlala.
Currently Selected:
Maliko 3: KISHNT05
Highlight
Share
ਕਾਪੀ।
Want to have your highlights saved across all your devices? Sign up or sign in
New Testament in Kishambala © Bible Society of Tanzania, 2005.