Nau Ntơm 21
21
Nau deh Isăk
1Brah Yêhôva jan tâng nau Păng lĕ lah nơh, Păng ăn Sara geh kon ngăn kơt nau Păng lĕ ton. 2Sara ntreo ngăn, tât ta di nar Kôranh Brah lah, păng gŭ oh du huê kon bu klô ăn ma Abrahăm, nôk Abrahăm lĕ ranh ngăn jêh.#18:10; Hêb 11:11 3Kon Sara deh ma Abrahăm nây, jêh ri Abrahăm tê̆ rnha «Isăk».#17:17; 18:10-15 4Tât Isăk lĕ geh pham nar jêh deh, Abrahăm jan koh ntô ma păng, kơt nau Kôranh Brah de đă ma păng ri nơh.#17:10-13; Kar 7:8 5Nôk deh Isăk nây, Abrahăm lĕ geh 100 năm jêh. 6Nôk nây Sara lah: “Kôranh Brah jan ăn gâp jêng gơm, ndrel ma bu moh i tăng nau dja, bu jêng gơm ndrel ma gâp đŏng”.#17:17; 18:10-15 7Sara ngơi jât: “Bu moh bănh mbơh nkoch ma Abrahăm: «Geh du nar ur may mpu toh kon»? Lŏng aƀaơ ri gâp bă du huê kon bu klô ăn ma Abrahăm, dôl păng lĕ ranh ngăn”.
Hakar, ndrel ma Ismaêl du gŭ ta bri rdah
8Tât Isăk lĕ kuŏng oi, păng bah pu toh, jêh ri Abrahăm ndrăp nhêt dŭt kuŏng, nar kon se nây bah pu toh. 9Sara say Ismaêl i kon Hakar phung Êsip deh ăn ma Abrahăm gơm mưch ma Isăk i kon păng nơm, 10jêh ri păng lah ma Abrahăm: “Mprơh lơi dâk bu ur nây, ndrel ma kon păng du lôh bơh ntŭk dja, iăt ma kon dâk bu ur i nây mâu ôh dơn sŏ drăp ndơ khlay ndrel kon gâp Isăk dja”.#Gal 4:29, 30 11Nau ngơi nây jan ăn Abrahăm hô ngăn rngot ta nuih n'hâm păng ri, yorlah Ismaêl nây kon păng đŏng. 12Yơn ma Kôranh Brah lah ma păng: “May lơi ta rngot ôh, yor ma kon se ndrel ma i me păng nây. Ăn may iăt moh nau Sara de lah, yorlah rnoi deh i Gâp ton ma may kơp ta Isăk.#17:19, 21; Rôm 9:7; Hêb 11:18 13Yơn ma kon ur chông may nây, tay Gâp ăn păng jêng du phung geh bri dak đŏng, yorlah păng nơh rnoi deh may đŏng”.#17:20 14Tât ôi tay ri Abrahăm dâk ơm ôi, păng sŏ ndơ sông sa, ndrel ma nông dak ăn ma Hakar, pư dâng lĕ ndơ i nây ăn ta tong ko i mê̆ ri, đă păng hăn ndrel ma i kon păng. Jêh ri Hakar du lôh bơh ntŭk nây hăn nhhơt trong ta bri rdah tâm dăch đah ƀon Ƀêrsêƀa ri.#16:6-12 15Tât lĕ dak ta nông ri, Hakar ntlơi i kon păng gŭ ta nâm du pŭm rlô, 16jêh ri păng nơm gŭ ƀah ma kon păng ri, klăp lah ngai truyh pănh ma na, yorlah păng lah: “Lơi ăn gâp say khât kon gâp”. Jêh ri păng gŭ ƀah ma kon, ndri dâng păng nhŭm nter. 17Kôranh Brah tăng iăt ma kon bu klô nây nhŭm, jêh ri tông păr Kôranh Brah kuăl Hakar bơh kalơ trôk ntŭk Păng nơm: “Hơi Hakar, mơm jan ay rŭng răng ngăn nây heh? Ay lơi ôh rvê, yorlah Kôranh Brah lĕ tăng iăt kon i nây nhŭm nter bơh ntŭk Păng gŭ nây.#NNg 2:23 18Ay dâk hŏm, hăn têk ti kon ay nây, yorlah tay gâp jan ăn păng jêng du phung kuŏng geh bri dak”.#17:20 19Kôranh Brah jan ăn măt Hakar say du mlŏm ntu dak geh dak, păng dâk hăn bŭk dak i nây bêng nông, jêh ri ăn kon păng nhêt. 20Kôranh Brah gŭ ndrel ma kon bu klô i nây, păng gŭ rêh ta bri rdah ri n'ho ma tât kuŏng tât ndăm, păng jêng bunuyh blao pănh na dŭt blao ngăn. 21Păng gŭ ta bri rdah Paran, jêh ri i mê̆ ri kơih bu ur phung Êsip du huê ma jêng ur păng.
Abrahăm tâm rnglăp ndrel kađăch Abimalĭch
22Nôk nây kađăch Abimalĭch, ndrel ma Phikŭl i kôranh tahen kuŏng păng, păng lah ma Abrahăm: “Kôranh Brah gŭ ndrel may, dâng lĕ ntil ndơ may jan.#NNt 26:26 23Lah ndri ăn may ton ma gâp ta dja, ăn Kôranh Brah gĭt say, may lah mâu ndơm gâp, kon gâp, ndrel ma kon sau gâp. Yorlah gâp lĕ jan ueh jêh ma may, lah ndri ăn may jan ueh ma gâp, ndrel ma bri dak gâp i may gŭ dja ăn kơt nây đŏng”. 24Abrahăm ơh ma kađăch: “Ơ, gâp ton”. 25Jêh ri Abrahăm lah ma păng du mlŏm ntu dak i phung ƀon lan păng in nây nơh. 26Kađăch Abimalĭch ơh ma păng: “Gâp mâu gĭt ôh bu moh i jan kơt nây, yorlah may mâu prot nkoch ma gâp đŏng, tât nar dja mơ dâng gâp gĭt nau i nây”. 27Abrahăm sŏ be biăp aƀă, ndrel ma ndrôk aƀă ăn ma kađăch Abimalĭch, jêh ri lĕ bar hê khân păng ri tâm rnglăp ndrel. 28Abrahăm sŏ pơh ơ̆ be biăp i drôh drôh ăn gŭ êng. 29Kađăch Abimalĭch ôp Abrahăm: “Pơh ơ̆ be biăp i drôh drôh may ăn gŭ êng nây moh jan?” 30Abrahăm mbơh ma păng: “Pơh ơ̆ be biăp i dja, gâp ăn ma may ma ti gâp nơm, ndơ dja gay ma mbơh n'hêl nanê̆ lah, ntu dak nây lĕ gâp kuyh ngăn”. 31Kơt ndri dâng bu kuăl ntŭk nây rnha «Ƀêrsêƀa», geh nau khlay jêng «Ntu dak pơh ndơ», mâu lah: «Ntu dak ton», yorlah ntŭk nây jêng ntŭk khân păng lĕ jêh tâm ton băl. 32Kơt ndri nau khân păng lĕ tâm rnglăp băl ta Ƀêrsêƀa ri. Jêh ri kađăch Abimalĭch, ndrel ma kôranh tahen kuŏng păng ri, plơ̆ sât tay ta bri Phalihtin. 33Jêh ri Abrahăm tăm du mlŏm tơm si ta Ƀêrsêƀa nây, ta ntŭk nây đŏng n'ho ma păng yơk mbah Brah Yêhôva i Kôranh Brah i hôm gŭ rêh n'ho ro. 34Abrahăm gŭ ta bri Phalihtin ri jŏ nar.
Currently Selected:
Nau Ntơm 21: cmoL
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.