Matayi 4
4
Thotolo yi Yesu
(Malako 1.12-13 ; Luka 4.1-13)
1Ku nzimunina, Pheve Yinlongo yinata Yesu ku dikanga muingi Satana#4.1 Satana : Khadi-a-Phemba kantota. 2Bu kafua nzala, mu diambu di lusambulu#4.2 kafua nzala, mu diambu di lusambulu : voti mina nsoki. mu tezo ki makumaya ma bilumbu, muini ayi builu ; buna wumona nzala. 3Mbadi mvukumuni wuyiza va kaba ayi wunkamba :
—Enati widi Muana Nzambi buna kamba matadi mama makituka mapha.
4Vayi Yesu wumvutudila :
—Disonama ti :
mutu kalendi zingilanga kaka mu dipha ko
vayi mu mambu moso mantotukanga mu munu wu Nzambi.
5Buna Satana wunnata ku divula dinlongo, wuntula ku mbata muanzu wu Nzo Nzambi ; 6ayi wunkamba : “Enati bukiedika widi Muana Nzambi wukilozi ku ntoto, bila disonama :
Nzambi wela fidisa zimbasi ziandi mu diambu diaku
ayi ziela kunata mu mioko miawu
mu diambu kulu kuaku kuedi bumina thutu mu ditadi !”
7Yesu wumvutudila :
—Disonama diaka ti :
“Wulendi vukumuna Pfumu Nzambi aku ko !”
8Satana wunnata diaka va mbata mongo wunda, kuna kammonisina bipfumu bioso bidi va nza ayi minkembo miawu. 9Bosi wunkamba :
—Tala, ngeyo kumfukimina kuandi ayi kumbuongimina ; ndieka kuvana bima bioso biabi !
10Yesu wunkamba :
—Botuka, Satana ! Bila disonama ti :
“Pfumu Nzambi aku niandi fueti buongimina ayi niandi kaka fueti sadila !”
11Buna satana wumbika. Bosi zimbasi ziyiza va kaba ayi zinsadila.
KISALU KI YESU KU NGALILI
Yesu wutona longa
(Malako 1.14-15 ; Luka 4.14-15)
12Yesu bu kawa ti bakotisa Yowani mu nloko ; buna wuvutuka ku Ngalili. 13Wubotuka ku Ngalili. Wuyenda vuanda ku Kafalinawumi, divula didi mu ndambu mbu ; mu tsi yi Zabuloni ayi Nefatali 14muingi mambu ma mbikudi Ezayi madedakana :
15 Tsi yi Zabuloni ayi yi Nefatali,
tsi yidi mu ndambu mbu ku disimu di Yolidani ayi ku Ngalili
tsi yi makanda ma Bapakanu # 4.15 Bapakanu : badi batu bakambulu mu dikanda di Bayuda. .
16 Batu baba nzingilanga mu tombi bamona kiezila kingolo ;
kiezila kitotukila batu bobo baba nkalanga mu tsi yiba
diengidilanga kitsuisula ki lufua.
17Tona thangu yina, Yesu wutona longa bu katuba :
—Lubalula mavanga bila Kipfumu ki diyilu kifikimini !
Minlonguki mitheti mi Yesu
(Malako 1.16-20 ; Luka 5.1-11)
18Yesu bu kaba kuenda yendanga muna muyenda mbu wu Ngalili, wumona bakhomba buadi ; Simoni diodi baba ntedilanga Piela ayi khombꞌandi Andela balembo lozi dikondi mu mbu bila baba banlobi mbizi. 19Buna wuba kamba :
—Ndandakananu ayi ndiela kulukitula minlobi mi batu.
20Muna thangu beni kaka, basia bika makondi mawu ayi banlandakana.
21Buela kuesa fioti, wumona diaka bakhomba buadi : Zaki muana Zebede ayi khombꞌandi Yowani, balembo londi makondi mawu mu khati nlungu va kimosi ayi dise diawu Zebede. Mamvawu wuba tela. 22Muna yawu thangu mamvawu babika nlungu awu ayi dise diawu, banlandakana.
Yesu wubelusa bambevo
(Luka 6.17-19)
23Yesu wudiata mu Ngalili dioso ayi wuba longanga mu zinzo ziawu zi lukutukunu, wuba longanga Nsamu Wumboti wu Kipfumu. Wubelusa ziphila zioso zi bimbevo ayi ziphasi zioso zi phila mu phila mu batu. 24Zitsangu ziandi zimana tembakana mu tsi yoso yi Sili ayi bannatina batu boso baba bimbevo ; bobo bamona ziphasi zi phila mu phila ; ayi yamusu ku phila mu phila, bobo baba ziphevi zimbimbi, bobo baba kimbevo kisisuka ayi bobo baba kimbevo kivonga mianzi. Yesu wumana babelusa. 25Nkangu wu batu bawombo baba kuenda nlandakananga : baba mu Ngalili, baba mu Dekapoli#4.25 Dekapoli : zunga kikutikisa dikumi di mavula., baba mu Yelusalemi, baba mu Yuda dioso ayi baba ku disimu di Yolidani.
Currently Selected:
Matayi 4: YOM
Highlight
Share
Copy
Want to have your highlights saved across all your devices? Sign up or sign in
Nkanda wu Moyo, Nguizani Yimona ayi Minkunga
Copyright © 2002 mu dizina di Biblica, Inc.®
Yisadulu mu nsua wu Biblica, Inc.® Minsua mi tsadulu mikinzika.
Kiyombe Contemporary Version, New Testament and Psalms
Copyright © 2002 by Biblica, Inc.®
Used by permission of Biblica, Inc.®. All rights reserved worldwide.