Marcos 13
13
So Jesús i'axata'a da qanlaxajñi qome aso n'onaxanaxaqui late'edai
(Mateo 24.1-2; Lucas 21.5-6)
1Qaq so Jesús co'ollaq ca'ai aso n'onaxanaxaqui, nachi so 'oonolec soua lapaxaguenataqa 'enapego' somayi, 'eeta':
–'Am mayi 'auapaxaguenataxaatac, ña 'aumeten na coma'pi, ÿataqta qaica ca 'en'am, qataq na noÿicpi.
2Qalaxayi so Jesús 'enapeco':
–¡Qami' qauloito'ot nagui ne'ena lta'adaic noÿicpi! Namayipi qome sa ishit da nachi 'eetai' da huetalec ca lÿa coma'. 'Enauac qome namayipi qanlaxajñi.
Na n'anecpi mayi i'axata'a ca loga'tna
(Mateo 24.3-28; Lucas 21.7-24; 17.22-24)
3Nachi nqo'ooda aso qasoxonaxa mayi nanqa' ana olivos mayi nachi nalotta aso n'onaxanaxaqui. Nachi so Jesús co'ollaq mashi nso'ootañi, nachi so Pedro qataq Santiago qataq Juan, qataq Andrés, soomayi isoxoototo somayi 'eeta':
4–Qomi' sauoqtaique da qomi' 'au'axatema da chaq lagui qaq ivita ca laloqo' de'eda. Qataq ¿chaq négue't ca l'anaxat 'enauac de'eda qom ivita da ipacchigui?
5Nachi so Jesús 'enapeco':
–Maxatchoxo' qome, yaqto' sa ishit da huo'o ca qami' ÿatenachi't. 6Cha'ayi ÿataqta qalota qome na anac da nactaigui da i'enaxat, nachi 'eeta': “Nachaÿim mayi aÿim qadta'ai qadca'alaxaquii;” nachi ÿataqta qalota qome na ÿatenachit.
7Qalaxayi qami' qom qau'aqÿapeguelec ca alaataxac chimaqchiguiñalo, qalaq sa ishit qome da qayi'ii, cha'ayi nachida da 'eetec qome; qalaxayi saxanaxa da ivita ca loga'tna. 8Cha'ayi na ÿotta'a't shiÿaxauapi deloguiÿa't, qataq ca nta'a delogui' ca lÿa nta'a, qataq qalota naua huañalo 'ale'u na nacholaxanaxa, qataq huo'o ca nqouaxa, qataq ca lta'adaic n'elaxa. Qaq 'enauac ne'ena nachina na chigoqchiguiña na que'ejnaxacpi.
9Qalaxayi qami' ÿataqta qanloiteec qome. Cha'ayi qami' qoÿaneu'alo qome na nta'alpi, qataq qami' qaiuaxaata'pe da huaigui ana laponaxaquipi na judiopi. Huaña, nachi qami' qanachaalataxaneu'alo na nta'alpi mayi ilotagueto naua 'ale'u qataq na lta'alpi namayipi, souaxat da aÿim qoquiitague'. Huaña qome, nachi ishit da aÿim qau'axachiim namayipi. 10Cha'ayi qom yaqta'a da ivita ca loga'tna, nachi da n'aqtac mayi chigaqaigui da nca'alaxa, damayi sogote da qai'aqtaxanem 'enauac na ÿotta'a't shiÿaxauapi. 11Qaq qom ivita da qami' qoÿaneu'alo na nta'alpi, qalaq sa ishit qome da qami' ÿaquicoqchi't cam qad'aqtaqui, ÿataqta sa ishit qome da tatapigui yi qadvilli. Chaqdata da qau'axachi cam qami' ÿanema ñi Dios, cha'ayi sa ishit da nachiqami' da qautaqai, cha'ayi nachiso so Espíritu Santo som detaqa. 12Na shiÿaxauapi maichi i'oteguet qome ca maichi lqaÿa ca nalaataguec qataq ca nta'a maichi i'oteguet ca llalec ca nalaataguec, qataq ca ñalec maichi i'otegueta da nalaatague'c caua maichi lta'al. 13Qaq 'enauac qome na shiÿaxauapi ÿataqta qami' nquiÿalo, souaxat da aÿim qoquiitague'. Qalaxayi cam qaica ca ÿoqocha'a, chochi ivitta'a ca loga't da nachaalataxac, qaq nachica ca qanca'alaxateec.
14So l'aqtaxanaxanec ñi Dios, l'enaxat Daniel, somayi co'ollaxa ÿiyiñi da 'eetec cam ishit da deshipaxanaqtaxan qataq delaqtaxan; da qom qami' qauloÿa'a da qoÿanaña cam sa lma' –qaq cam itaxaÿaxan ne'ena, qaq no'on qome da ÿaÿateeta,– nachi nam netaña qome na Judea datauec, ÿi'iguiishiguemec ana qasoxonaxapi. 15Qaq cam netashiguemec na l-laq ca lma' que'eca na'a'q, camayi sa ishit qome da naguiñi da pa'aigui ca lma' da huo'o ca ÿachi. 16Qataq cam huetauga na n'onaxa, camayi sa ishit qome da ñi'iguelaxauo da huo'o ca ÿachi na logoxot. 17Qaq ¡ÿataqta choxodaxaso' na 'alpi mayi hualaxaipi qataq anam ña illipaxaatac na llalec que'eca na'a'q! 18Qaq ÿoqo'oyi qami' qauÿaxañiÿot qome ñi Dios, da yaqto' sa ishit da huetoigui ca latomaxa da qauataiuec. 19Cha'ayi que'ecaua na'axa'te ÿataqta lta'adaic da que'ejnaxac. Sa ishit da huo'o ca 'eeta'am dam qaÿachigoqta'ague co'ollaq ñi Dios chita'ague da i'ot ana 'alhua, qataq sa ishit da qaltaq qanauane' qome de'eda que'ejnaxac. 20Qaq ñim qadataxala' da huo'otaq sa ishit da ichicaguilo que'ecaua na'axa'te, nachi sa ishit qome da huo'o ca nca'aleec. Qalaxayi ñimayi qome sa ishit da ividaxattreec que'ecaua na'axa'te, souaxat da lauochi nam lalamaxatpi mayi lca'aguishicpi.
21Qaq ÿoqo'oyi da huo'o ca qami' da'aqtaxanema da 'eeta': “–Qauloÿa, 'ena na qadta'a qadca'alaxaqui, hueta'a ne'ena,” huo'otaq da 'eeta': “'Iñi cha'a ñimayi,” qalaq sa ishit qome da qau'amaqchiñi. 22Cha'ayi qalota qome na tenataxanaxaicpi anac, 'eetega da nta'a nca'alaxaqui, huo'otaq da l'aqtaxanaxanec ñi Dios. Nachi namayipi qome i'ot na lta'adaic n'anecpi qataq nam sa qaÿauanapigui, da yaqto' datenataxan. Qaq sa iuena'a qome da nataq'en ishit da ÿatenachit na maichi lca'aguishicpi ñi Dios. 23Qalaxayi qami' ÿataqta qanloiteec qome, cha'ayi mashi sogote da qami' sa'axatema 'enauac ne'ena.
Da 'eetec da lli'iguelaxasoxoc na shiÿaxaua llalec
(Mateo 24.29-35, 42-44; Lucas 21.25-36)
24Qalaxayi qom mashi inoxoodeec que'ecaua na'axa'te mayi que'ejnaxaqui', nachi 'om qome añi nala', qataq qaica ca l'edaxa ñi ca'agoxoic, 25qataq najñi qome ana huaqajñipi, ivida'a da cholaxan nam n'añaxacpi mayi hueto'ot na piguem. 26Nachi qaila'aguet qome na shiÿaxaua llalec da nactaigui ca l'oc, ÿataqta qaica ca 'en'am da l'añaxac qataq da lli'oxoyic. 27Ime, nachi ÿamaqteguelo na lamaxashicpi, da yaqto' laÿona't nam lca'aguishicpi, ÿachigoxotteguelo 'enauaque na laÿil, ivida'a cam loga't ana 'alhua qataq na piguem.
28Qaq qanapaxaguiñiÿa qome aca higo lchiyic mayi qaÿaloqnaxana: Da acamayi da ivita da ñaxateec ana lauepi, nachi qami' qauaÿajñi da mashi sa qaÿapiguii naua nta'pi. 29Qaq nachi 'eetec nataq'en qom qami' qauloiÿa'a da yi'oq 'enauac ne'ena, nachi qami' qauaÿajñi da mashi sa qaÿapeque ca loga'tna. Camayi mashi nayiitai'. 30Qaq ÿataqta 'eesa de'eda qami' sa'axatema, da 'enauac qome ne'ena hua'auñi da yi'oq, qom saxanaxa da ileu nam shiÿaxauapi mayi huetaiguilo ne'enaua na'axa'te. 31Na piguem qataq ana 'alhua imeuo qome, qalaxayi da i'aqtac sa ishit da imeuo.
32Qalaxayi que'eca na'a'q qataq ca laloqo' de'eda, camayi qaica ca ÿaÿaten, ivida'a na namaxashic piguem l'ecpi qataq nam llalec ñi Dios. Chaqñita ñi ita'a mayi ÿaÿaten.
33Qaq ÿoqo'oyi qami' ÿataqta qanloiteec qome qataq qanaÿamaxachiitai' qataq qanqouagaxauñiitac, cha'ayi sa ishit da qauaÿajñi ca laloqo' da ivita. 34Cha'ayi de'eda 'eeta'am ca shiÿaxaua da huo'otaq taigue ca qaÿoqtegue. Qalaxayi da yaqta'a da jec, nachi ipataxalec ca lma' ca l-latacpi. Nachi ÿanem ñi 'oonolec somayipi ca l'onatac. Ime, nachi huaqajlec ca lasom l'o da nloshiguem. 35Qaq ÿoqo'oyi qami' ÿataqta qanloiteec qome, cha'ayi qami' sa qauaÿajñi ca laloqo' da nvi' que'eca lma' ca noÿic, cha'ayi sa iuena'a da nvi' da napalchiguiñi, huo'otaq laiñi ca pe, huo'otaq da mashi noÿin na 'olgaxa, huo'otaq da mashi yi'oxoñi. 36Cha'ayi sa iuena'a da nque'elaxatta da nvi', nachi qami' ÿauanalguete da qau'ochiita. 37Qaq de'eda i'aqtac mayi qami' shinapegalo, damayi nachi taÿauga 'enauac na shiÿaxauapi, 'eeta': Ÿataqta qanloiteec qome.
Currently Selected:
Marcos 13: TBSNT
Highlight
Share
ਕਾਪੀ।
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.