Mateo 27
27
So Jesús qaÿauegueu'a so Pilato
(Marcos 15.1; Lucas 23.1-2; Juan 18.28-32)
1Qaq co'ollaq mashi yi'oxoñi, nachi 'enauac nam lataxala'pi nam ntaxaÿaxanaxanecpi qataq nam lquedoxonecpi na judiopi mashi nmachigui da lataxac da yaqto' qaÿalauat so Jesús. 2Nachi qaÿauec somayi, qoÿaxatta'a't naua lhua'q, da qoÿaneu'a so nta'a Poncio Pilato.
Da 'eetec da l-leuaxa so Judas
3Qaq so Judas mayi nachiso so ÿaneuo so Jesús, co'ollaq ila'a da qoÿanguet da nalaataguec somayi, nachi ÿataqta lta'adaic da ntoguetaxac. Nachi ÿi'iguelaxa't soua treinta lca'chole mayi chigaqaiguilo na plata, ÿi'iguelaxateu'alo som lataxala'pi na ntaxaÿaxanaxanecpi qataq som nquedoxonecpi. 4Nachi 'eetega somayipi, 'eeta':
–Aÿim huo'o da ÿasouaxashit, cha'ayi sanguet da nalaataguec so shiÿaxaua mayi qaica ca ÿasouaxat.
Qalaxayi somayipi 'enapeco':
–Aque', ¡Damayi sa ishit da qomi' saqtapegueu'a! ¡Damayi maichi 'adasouaxashit!
5Nachi so Judas ÿasaxaigui aso n'onaxanaxaqui aso anompi. Ime, nachi jec, nachi maichi icoñidot na lqosot.
6Nachi som lataxala'pi na ntaxaÿaxanaxanecpi nachi ÿacona aso anom. Nachi 'enapeco':
–Qomi' sa seshitaq da sachaqangui añi laÿi' ana nachitaqtaxanaqte ana plata, cha'ayi anamayi lashiue soua ntago'q.
7Ime, nachi somayipi detaxaÿapigui, da yaqto' qaishijnaxana so 'alhua mayi qaÿamata'ac n'onaxa som 'alhua l'o, da yaqto' qaÿauo'o nladaqa' nam ÿaqa'a ca chigaqa'ague. 8Qaq ÿoqo'oyi se'eso 'alhua nachi l'enaxat qanqoÿin de'eda n'onaxa mayi lashiue so ntago'q, chochi ivitta'a nagui. 9Huaña, nachi ÿataqta ipacchigui da l'aqtaxanaxac so l'aqtaxanaxanec ñi Dios l'enaxat Jeremías, co'ollaq 'eeta': “Qaÿacona asom treinta lcatpiole mayi chigaqaigui na plata (asom ÿaneuo nam llalaqpi so Israel mayi ÿauotaique lashiue que'eca shiÿaxaua), 10nachi asomayi tagui da qaishijnaxana som n'onaxa so 'alhua l'o, qaq ipacchigui da aÿim ÿamaxalec ñi qadataxala' Dios.”
So Jesús datato'ot so Pilato
(Marcos 15.2-5; Lucas 23.3-5; Juan 18.33-38)
11So Jesús qaÿauegueu'a so nta'a Pilato. Nachi somayi inattac so Jesús, 'eeta':
–¿Peta'a nachi'am lta'a na judiopi?
Nachi so Jesús 'enapeco':
–Aja', nachida dam qonapec.
12Nachi nam lataxala'pi nam ntaxaÿaxanaxanecpi qataq nam nquedoxonecpi co'ollaq imettalec na lasouaxashitpi, qalaq somayi sa ishit da ÿasat. 13Nachi so Pilato 'enapego' somayi, 'eeta':
–¿Sa ishit peta'a da 'au'axaÿa nam n'aqtacpi da 'am qoÿiitega?
14Qalaxayi so Jesús sa ishit da ÿasat. Qaq ÿoqo'oyi so nta'a huo'o da l'aalaxa, nachi ÿataqta sa ÿaÿaten ca 'eetec.
So Jesús qoÿanguet da nalaataguec
(Marcos 15.6-20; Lucas 23.13-25; Juan 18.38–19.16)
15Qaq huo'o da n'onataxac naxa so nta'a da ivita soua na'axa'te naponaxaqui', nachi somayi ishit da isouec ca camachaqca ncoñitaguishic, cam maichi iÿaxaneu'a na shiÿaxauapi. 16Qaq huo'o so ncoñitaguishic ÿataqta ÿi'oxodaic, l'enaxat da Barrabás. 17Nachi co'ollaq lapoota'a't somayipi, nachi so Pilato inattac somayipi, 'eeta':
–¿Négue't cam qauÿaxañiu'a, da yaqto' aÿim sesouec: ñi Barrabás, huo'otaq da Jesús mayi qoÿiitega nta'a nca'alaxaqui?
18Cha'ayi somayi ÿaÿaten da chochi huo'o da nquiÿaxa so Jesús, ÿoqo'oyi qoÿaneuo.
19Qaq so Pilato co'ollaq ña nso'ootaña so l'onataxanqa', nachi aso lhua namaxai' da l'aqtac, 'eeta': “Sa ishit qome da 'aÿapegueu'a que'eca shiÿaxaua mayi no'on da lataxac, cha'ayi so pe ÿataqta qaica ca 'en'am da lchic so ichoxonaxac, souaxat camayi.”
20Qalaxayi nam lataxala'pi nam ntaxaÿaxanaxanecpi qataq nam nquedoxonecpi, namayipi ÿayina'a na shiÿaxauapi, da yaqto' iÿaxanau'a da qaisouec so Barrabás, qataq da yaqto' qaÿalauat so Jesús. 21Nachi so nta'a qaltaq ÿi'iguelaxalec da denataxan, 'eeta':
–¿Chaq négue't cam 'oonolec nam dos ca qanshiitaique da sesouec?
Nachi somayipi 'enapeco':
–Qomyi Barrabás.
22Nachi so Pilato denataxano', 'eeta':
–Qaq ¿huá'ague ca shiitec dam Jesús mayi qoÿiitega nta'a nca'alaxaqui?
Nachi 'enauac somayipi 'enapeco':
–¡Qomyi damayi qaiuaxaneuo!
23Nachi so Pilato 'enapego' somayipi, 'eeta':
–Qaq ¿négue'to' cam i'ot sa ÿaÿamaxañi damayi?
Qalaxayi somayipi ñi'iguelaxashiguem da i'alaq, 'eeta':
–¡Qaiuaxaneuo!
24Qaq so Pilato co'ollaq ila'a da sa ishit da ÿañoxot so shiÿaxauapi, chaqdata da nquictashiguem somayipi da lliÿa't, nachi somayi damaxasoxonaique so 'etaxat. Nachi somayi ÿauaachigui naq'en so shiÿaxauapi da iÿoi' naua lhua'q, nachi 'enapeco':
–Aÿim sa ishit da ÿasouaxashit da l-leuaxa de'eda shiÿaxaua mayi qaica ca ÿasouaxat. Qaq damayi maichi qadasouaxashichi.
25Nachi 'enauac so shiÿaxauapi nmashiguem da ÿasat, 'eeta':
–¡Qomi' qataq na qoyalaqpi ñachoxola't qome da qadasouaxashit da l-leuaxa de'eda shiÿaxaua! 26Nachi so Pilato isouec so Barrabás. Ime, nachi damaxasoxoolec da qaiuaxan so Jesús, qataq ÿaneec da yaqto' qaiuaxanauo.
27Ime, nachi na nallippi se'eso nta'a ÿauec so Jesús da ÿauega ca lma' lta'adaic somayi. Nachi qalapona't 'enauac so allippi, da yaqto' qaicoleesop somayi. 28Ime, nachi qanqa't soua alogo, nachi qanapoxonaxanaxaaña so npo' togaxadaic. 29Qataq qoÿanaxanaxangui na lqaic aso n'onata ÿaxat, qataq qaÿachaigui na lhuaq aso coqta. Nachi qai'adoto naua nllicte somayi, nachi qai'iitac, qoÿiita':
–¡La', 'am mayi 'am lta'a na judiopi!
30Qataq nataq'en qanqaigoqto'ot, qataq qaÿacona aso coqta, nachi qaiuaxaatagui na lqaic. 31Qaq co'ollaq ime da n'enaguec somayi, nachi qanqat so lapo' mayi togaxadaic nachi qoÿanaxanaxanguilo soua maichi alogo. Ime, nachi qaÿauec da yaqto' qaiuaxaneuo.
Qaiuaxaneuo so Jesús
(Marcos 15.21-32; Lucas 23.26-43; Juan 19.17-27)
32Qaq co'ollaq mashi qanayicot somayi, nachi qanatena'aguet so shiÿaxaua mayi lma' yi Cirene, l'enaxat Simón. Nachi qaÿaconeu'a somayi, da yaqto' ÿachi qanqoÿin so npe'enaxaqui so Jesús.
33Qaq co'ollaq qaivita so 'alhua mayi l'enaxat Gólgota, de'eda n'aqtac naigui na nqaic lpi'inec lma'. 34Huaña yimayi, nachi qanÿomaxangui somayi so lataxa mayi qaÿalecneguet na chimaxadaic. Qalaxayi co'ollaq ÿi'iguen, nachi so Jesús sa ishit da nÿomgui.
35Qaq co'ollaq mashi ime da qaiuaxaneuo somayi, nachi so huataxanaqpi nallichiguilo soua alogo so Jesús, da yaqto' naloguilo somayipi. Nachi ÿataqta ipacchigui co'ollaxa da i'axat so l'aqtaxanaxanec ñi Dios, co'ollaq 'eeta': “Nallichiguilo naua aÿogo namayipi, da yaqto' naloguilo.” 36Ime, nachi nso'ooñi somayipi da qanauaatalec somayi. 37Qaq na nalotchiguema na lqaic somayi, nachi qoÿanaña som nanettalec da lasouaxashit, 'eeta': “Ne'ena, nachina na Jesús mayi lta'a na judiopi.”
38Nataq'en dos soua cachaxaiqa lÿatchiyigue'm somayi co'ollaq qaiuaxaneuo. So 'oonolec soomayi qoÿana'ague na aloic, qaq so lÿa qoÿana'ague na n'emaq. 39Nachi nam natapeuga se'eso nqa'aic, namayipi ÿataqta iconnaxan na lqaic da ishiueetac somayi. 40Nachi 'eeta':
–'Am mayi qonetega co'ollaxa da 'anlaxajñi añi n'onaxanaxaqui late'edai, ime, nachi qaltaq 'an'oxooshiguem, tres na'axa'te nachi 'aumat. Qaq nagui maichi 'anca'alaxajla't qome. Qom ÿoqta 'eesa da 'am llalec ñi Dios, qaq 'aunoteeguesop qome na 'am qaiuaxaata'aguet.
41Qaq nachi 'eetec nataq'en nam lataxala'pi na ntaxaÿaxanaxanecpi qataq na dapaxaguenataxaatacpi qataq na fariseopi qataq na nquedoxonecpi da ÿi'iitac somayi. Nachi 'enapeco' namayipi:
42–Nca'alaxateec ca lÿa, qalaq ñimayi sa ishit da maichi nca'alaxajla't. Qom ÿoqta 'eesa da nachiñi ñi lta'a na llalaqpi so Israel, qaq no'on da huenoteeguesop ñi npe'enaxaqui, yaqto' ishit da sa'amaqtenaq ñimayi. 43Ñi mayi ÿachito'ot da lpi'iÿaxac ñi Dios. Qaq ñi Dios no'on da nca'alaxateec nagui ñimayi, qom ÿoqta 'eesa da lauotaxat. Cha'ayi ñimayi maichi qomi' da'aqtaxaatapeguema co'ollaxa da 'eetega ÿataqta llalec ñi Dios.
44Qaq ivida'alo nataq'en soua cachaxaiqa mayi npe'enaxa'u, soomayi nataq'en ishiueetrac somayi.
Da 'eetec da l-leuaxa so Jesús
(Marcos 15.33-41; Lucas 23.44-49; Juan 19.28-30)
45Nachi 'enauac ana 'alhua ÿataqta napanñi, chigoqta'a so na'a'q laiñi, chochi ivitta'a so dashichiguiñi aso nala' se'eso avit. 46Qaq so mashi dashi aso nala', nachi so Jesús ÿataqta n'axannec da i'alaq, 'eeta':
–Elí, Elí, ¿lama sabactani?, (de'eda n'aqtac da naigui 'eeta': 'Am ita'a Dios, 'am ita'a Dios, ¿tá'ainco' yi aÿim 'aualat?)
47Qaq huo'o na hueta'a yimayi na hua'aqchigui de'eda l'aqtac, nachi namayipi 'enapeco':
–Ñi'iñi shiÿaxaua, ñimayi iÿaxaataique so n'aqtaxanaxanec l'enaxat Elías.
48Nachi 'oonolec somayipi so nqalgoqtaique aso nauol. Qaq co'ollaq mashi imat ipet aso nauol na lataxa 'iuaxaic, nachi ÿanagui aso coqta. Nachi nqo'ona somayi da huotaique da napigoxoguet naq'en asomayi. 49Qalaxayi so laÿipi qoÿiitega somayi, qoÿiita':
–Ña 'auaqta'a ñimayi; ña semejnaq qom huo'otaq anac ca Elías da nca'alaxateec.
50Nachi qaltaq ÿi'iguelaxalec so Jesús da i'alaq. Ime, nachi ileu. 51Huaña, nachi depoqchiguingui na laiñi so lapoxot aso n'onaxanaxaqui, som nacchiguingui na laiñi. Nachi na 'alhua ÿataqta cholaxan, nachi depoqogui ana coma'pi. 52Qataq nauajñigui ana huachiquipi, nachi ÿataqta qalota na nca'aleec nam leuaxaicpi mayi i'amaqteetac co'ollaxa ñi Dios. 53Nachi somayipi nnoxooshiguem, chigaqangui ana huachiquipi. Qaq co'ollaq mashi qaltaq nca'aleec so Jesús, nachi somayipi tau'a so la ciudad mayi huaña da qaÿi'oxoden ñi Dios, l'enaxat Jerusalén. Huaña yimayi, nachi ÿataqta qalota na shiÿaxauapi na ÿauaachigui somayipi.
54Nachi so huataxanaq lta'a qataq som laÿipi mayi nauaatalec so Jesús co'ollaq ÿauaachigui so nacholaxanaxa qataq nam laÿipi mayi yi'oq, nachi ÿataqta qalota da lcolanaxa. Nachi somayipi 'enapeco':
–Ñi'iñi shiÿaxaua ÿoqta 'eesa da llalec ñi Dios.
55Qaq ÿataqta qalota na 'alpi qaÿoqteuga da demejnaxaatac, nam ca'attague' co'ollaxa so Jesús, chigoqchiguiña yi Galilea da itauaatac somayi. 56Qaq se'eso 'alpi ÿalectauo aso María mayi lma' yi Magdala, qataq aso lÿa María mayi late'e so Santiago qataq so José, qataq aso late'e' soua llalqa so Zebedeo.
So Jesús mashi qailayiñi
(Marcos 15.42-47; Lucas 23.50-56; Juan 19.38-42)
57Qaq co'ollaq mashi napaltapiguiñi, nachi anac so shiÿaxaua sallaxanec, l'enaxat José. Somayi lma' yi pueblo Arimatea. Somayi nataq'en i'amaqteetac so Jesús. 58Nachi somayi nqo'oneu'a so Pilato, nachi iÿaxaneu'a so l'oquiaxac so Jesús. Nachi so Pilato damaxasoxoolec da qoÿami' somayi. 59Nachi so José nqajñi so l'oquiaxac so Jesús, nachi lpataxangui so hualoq lapagaxaic qui'itta. 60Nachi ÿachangui aso maichi lalamaqte nhuachiqui mayi damaxasoxoolec co'ollaxa da qanshi' da qoÿanaigui so coma'. Qaq co'ollaq imat da ÿapogui asomayi so coma' lta'adaic, nachi jec. 61Qaq nachi hueta'a yimayi aso María mayi lashi yi Magdala, qataq aso lÿa María, nso'ootrañi, netraña so naloteuga aso huachiqui.
So huataxanaqpi nauaatalec so lasom aso nhuachiqui so Jesús
62Qaq so lÿa na'a'q mayi mataxaqui, som pa'aiguet so na'a'q aÿamaxataxaqui, nachi so lataxala'pi na ntaxaÿaxanaxanecpi qataq so fariseopi nachi nqo'oneu'a so Pilato. 63Nachi qoÿiitega, qoÿiita':
–'Am qadataxala', qomi' tachigui qadhuel se'eso shipecaic da l'aqtac co'olla ña nca'altauec, qalaq 'eetega da mashi inoxoodeec caua tres na'axa'te nachi qaltaq nca'aleeguesop da nleuaxa. 64Qaq ÿoqo'oyi no'on da qanauanalec qome añi laÿi', chochi ivitta'a da inoxoodeec caua tres na'axa'te, yaqto' sa ishit da anac qome na lapaxaguenatacpi da pe da decachiÿa da l'oquiaxac, ime, qaq 'enapega na shiÿaxauapi, 'eeta': “Nca'aleeguesop na leuaxaicpi somayi.” Huaña qome, nachi que'eca pa'ateec nashipegaxanaxac ÿataqta saq 'ena'aÿa', sa ishit da 'eeta'am so hua'auteec nashipegaxanaxac.
65Nachi so Pilato 'enapeco':
–'Eda da huataxanaqpi. Qauesomiÿa, qanqo'oñiuga aca huachiqui. Nachi ÿataqta qanaÿamaxachiitelec da qanauañiÿalec.
66Nachi somayipi jec, da yaqto' qanauanalec qanqoÿin aso huachiqui, qataq qoÿanagui aso l'anaqte so coma' mayi lapoxot aso huachiqui. Nachi qan'onaxatrañi soua huataxanaq lashi', da yaqto' nauaatralec asomayi.
Currently Selected:
Mateo 27: TBSNT
Highlight
Share
ਕਾਪੀ।
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.