پێدایش 11
11
بابِلئے بُرج
1سجّهێن دنیائے زُبان یکّێن اَت و لبز یکّێن اَتنت. 2مردم که چه رۆدَراتکا لَڈِّتنت، شینارئے سرڈگارا دَشتے دیستِش و همۆدا جَهمنند بوتنت. 3گۆن یکدومیا گوَشتِش: ”بیا، هِشتَ جنێن و شرّیئے سرا پچێنِش.“ آیان سِنگئے جاها هِشت کارَ بست و گِلئے جاها ڈامبر. 4گوَشتِش: ”بیا په وت شهرے اَڈَّ کنێن، اَنچێن بُرجے مانی ببیت که سَرٹُلّی آسمانا سر ببیت، تانکه په وت نامے اێر بکنێن که سجّهێن زمینئے سرا شِنگ و شانگ مبێن.“ 5هُداوند اێر آتک تانکه هما شهر و بُرجا بچاریت که مردمی اَڈّ کنگا اَتنت. 6هُداوندا گوَشت: ”اِدا بچار، نون اے یکّێن راج و کئوم اَنت و سجّهێنانی زبان یکّ اِنت. اگن اے کارِش بِندات کرتگ، چه اِد و دێم اے هرچے کنگ بلۆٹنت، په اِشان نَبوتنیَ نبیت. 7بیا، جَهلادَ رئوێن و اِشانی زُبانا گَڑ و مَنجَ#11:7 گَڑ و مَنج کنگ، بزان مان گیشێنَگ، هۆر و تَهۆر کنگ. کنێن که اے، یکدومیئے هبران سرپد مبنت.“
8هُداوندا، اے مردم چه اۆدا سجّهێن زمینئے سرا شِنگ و شانگ کرتنت و اِشان شهرئے اَڈّ کنگئے کار بند کرت. 9پمێشکا آ شهرئے نام بابِل#11:9 بابِلئے لبز گۆن اِبرانی زبانئے لبز ”بَلَلا“ نزّیکّ اِنت که مانایی گَڑ و مَنج اِنت. بوت که هُداوندا اۆدا سجّهێن دنیائے یکّێن زُبان گَڑ و مَنج کرت. آییا مردم چه اۆدا زُرتنت و سجّهێن زمینئے سرا شِنگ و شانگ کرتنت.
سامئے نَسل و پَدرێچ
10سامئے نَسل و پَدرێچئے کِسّه چُش اِنت:
توپّانا دو سالا رند وهدے سامئے اُمر 100 سال اَت، چه آییا اَرپَکشاد پێدا بوت. 11اَرپَکشادئے پێدائِشا رند، ساما 500 سال اُمر کرت و آییا دگه مردێن‌چُکّ و جنێن‌چُکّ هم بوت.
12اَرپَکشادئے اُمر 35 سال اَت که چه آییا شِلَه پێدا بوت. 13شِلَهئے پێدائِشا رند، اَرپَکشادا 403 سال اُمر کرت و آییا دگه مردێن‌چُکّ و جنێن‌چُکّ هم بوت.
14شِلَهئے اُمر 30 سال اَت که چه آییا اِبِر پێدا بوت. 15اِبِرئے پێدائِشا رند، شِلَها 403 سال اُمر کرت و آییا دگه مردێن‌چُکّ و جنێن‌چُکّ هم بوت.
16اِبِرئے اُمر 34 سال اَت که چه آییا پێلِگ پێدا بوت. 17پێلِگئے پێدائِشا رند، اِبِرا 430 سال اُمر کرت و آییا دگه مردێن‌چُکّ و جنێن‌چُکّ هم بوت.
18پێلِگئے اُمر 30 سال اَت که چه آییا رَهو پێدا بوت. 19رَهوئے پێدائِشا رند، پێلِگا 209 سال اُمر کرت و آییا دگه مردێن‌چُکّ و جنێن‌چُکّ هم بوت.
20رَهوئے اُمر 32 سال اَت که چه آییا سِروگ پێدا بوت. 21سِروگئے پێدائِشا رند، رَهوا 207 سال اُمر کرت و آییا دگه مردێن‌چُکّ و جنێن‌چُکّ هم بوت.
22سِروگئے اُمر 30 سال اَت که چه آییا ناهۆر پێدا بوت. 23ناهۆرئے پێدائِشا رند، سِروگا 200 سال اُمر کرت و آییا دگه مردێن‌چُکّ و جنێن‌چُکّ هم بوت.
24ناهۆرئے اُمر 29 سال اَت که چه آییا تێرا پێدا بوت. 25تێرائے پێدائِشا رند، ناهۆرا 119 سال اُمر کرت و آییا دگه مردێن‌چُکّ و جنێن‌چُکّ هم بوت. 26تێرائے اُمر 70 سال بوت و رندا چه آییا اِبرام و ناهۆر و هاران پێدا بوتنت.
تێرائے نَسل و پَدرێچ
27تێرائے نَسل و پَدرێچئے کِسّه چُش اِنت:
چه تێرایا اِبرام و ناهۆر و هاران پێدا بوتنت. چه هارانا لوت پێدا بوت. 28هارانئے پت، تێرا اَنگت زندگ اَت و هاران مان کَلدانیانی شهر اورا مُرت، همۆدا که پێدا بوتگ‌اَت. 29اِبرام و ناهۆر، دوێنان سور و سانگ کرت. اِبرامئے لۆگیئے نام سارایی اَت و ناهۆرئے لۆگیئے نام مِلکَه. مِلکَه، هارانئے جنکّ اَت و هاران، مِلکَه و یَسکاهئے پت. 30سارایی سَنٹ اَت و چُکّی نێست‌اَت. 31تێرایا وتی چُکّ اِبرام و نُماسگ لوت، که هارانئے چُکّ اَت و وتی نِشار، بزان اِبرامئے جَن سارایی زُرتنت و چه کَلدانیانی شهر اورا در آتک. اے سجّهێن دێم په کَنهانئے سرڈگارا راه گپتنت، بله وهدے هارانئے شهرا رستنت، همۆدا نِشتنت. 32تێرایا دو سَد و پنچ سال اُمر کرت و هارانا مُرت.
Currently Selected:
پێدایش 11: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.