Acts 3

Peter-aam Piyuayuilnguq Canrircetaa

1Caqerlutek Peter-aankuk John-aaq-llu Agayuvigpagmun mayurtuk piicagyarturlutek piyaramegni, sass'ami qulngunrita'armi. 2Yugmek-llu ullauciut yuurqaanerminek piyuayuilngurmek. Tauna unuaquaqan ellilaraat Agayuviim amiigan canianun, Kenciknarqelriamek aprumalriamun, elliinek kaigasqelluku yugnek agayuyalrianek. 3Taum tangrramikek Peter-aankuk John-aaq-llu itqatalriik Agayuvigmun, carrarmek cikiisquq. 4Peter-aam John-aam-llu tangvakaraak qanrulluku-llu, “Tangvagkuk.” 5Elliin-llu kell'arutak camek cikirnayukluni. 6Tau͡gaam Peter qanertuq, “Akimek suulutaamek-llu piitua, tau͡gaam pingqerrutacimtun cikiqataramken, Jesus-aam Christ-am, Nazareth-aarmium atrakun piyuagi.” 7Tallirpilirnerakun-llu teguluku nangertaa; egmian-llu it'gai cingillri-llu sagtut. 8Nangerquangami nangerngaqertuq piyualuni-llu, ilaklukek-llu itertuq Agayuvigmun, piyualuni qecgaurluni tuaten, Agayun-llu nanrarluku. 9Tamarmeng-llu yuut tangrraat piyuallrani Agayun-llu nanrallrani. 10Elitaqaat-llu taungucia Agayuviim amiigani kenciknarqelriami aqumgaluni kaigalalleq; irr'ikaat-llu alangaarutekluku-llu tuaten elliucia.

11Tua-i-llu Peter-aankuk John-aaq-llu teggutekngakek, yuut quyurrvikagket Solomon-aam Elaturraanek aprumalriami, irr'iqapiggluteng. 12Peter-aam-llu tangrramiki qalarutai, “Israel-aarmiuni ukuni, ciin irr'ikseciu una? Ciin-llu tangvagcecikuk, piyuangevkalliamegnegu pinimegnegun wangkuk, elluarucimegnegun-llu? 13Agayutiita Abraham-aam, Isaac-aam-llu, Jacob-aam-llu, ciuliamta Agayutiita, ucurnarivkallrukii yun'i Jesus-aaq, tauna tunllerci pikenrillerci-llu Pilate-aam takuani, angicungraaku taum. 14Elpeci tau͡gaam pikenrillruarci tauna Kenciknarqelria, Ellualria-llu, tuqucituli tau͡gaam angitesqumaluku. 15Tuqutarci-llu unguvam Atanra; tauna Agayutem tuqumalrianek makcetaa; wangkuta-llu nallunairisten͞guukut taumun. 16Atra taum ukvervikluku tuaggun atrakun una yuk pinirimauq, tangvak'ngarci nallunrilkessi-llu; cikiutiin-llu ukverem una canrircetaa piniriluku-llu tangrrucirpecetun tamarpeci.”

17“Ilamaa, nallunritamci nallumatacirpecetun tuaten pillruuci ciulirneci-llu. 18Tau͡gaam tuaten piciurtuq Agayutem picirkiullra prophet-aatgun qanrutkumalria, Christ-aq nangteqarkauniluku. 19Taumek umyualinqigci, cauluci-llu, assiilnguci au͡gaumanaurtut, pinirimanaurtuci-llu Agayutmek, 20ayagcetnauraa-llu Christ-aq elpecen̄un apertuumalria tauna Jesus-aaq. 21Tauna qiliim ciuniurarkaugaa, erneq imna engelkarrluku cam tamalkurmi elluarillerkaa, Agayutem qanrutkellra ellualriatgun prophet-aatgun ak'a imumi. 22Moses-aaq qanellruuq, ‘Ataneq Agayun prophet-aamek kelgiarkauguq ilavci iliitnek, wiinga kelellrucimitun, tauna niisngaarkaugarci canek tamalkuitnek elpecen̄un qanllerkainek. 23Niicunrilnguut-llu prophet-aamek taumek, tamarmeng, yuut akunliitnek piunrirarkaugut pinrilngurmek ilaunateng.’ 24Cali-llu prophet-aat tamarmeng, Samuel-aamek ayagluteng, qaneryarameggni man'a qanrutkaat. 25Elpeci kinguveqaiceci prophet-aat; akqutiin-llu Agayutem, ciuliavcen̄un Abraham-aamun qanellrani waten, ‘Kinguverpegun nunam yui tamarmeng atawakumaarkaugut.’ 26Agayutem, unguircecamiu Yun'i, elpecen̄un ciumek ayagcetaa, atawaqercetnaluci cauvkarnaluci tamarpeci assiilngiumallerpecen̄ek.”

Currently Selected:

Acts 3: YPK

Highlight

ਕਾਪੀ।