Luke 22
22
Ko e Fa‘ufa‘u ke Tāmate‘i ʻa Si̇̄sū
(Mātiu 26:1-5,14,16; Ma‘ake 14:1,2,10,11; Sione 11:45-53)
1Pea na‘e ofi ʻa e Kātoanga Kaimāta‘elēvani̇́, ʻa ē ‘oku ui ko e Pāsová. 2Pea kuo alēlea ʻa e kau faifekaú mo e kau mataotao ʻo e Tohitapú pē ‘e anga fēfē ha‘anau fakapoongi fakafufū ʻa Si̇̄sū, ka naʻa nau manavahē ki he kakai̇́.
Ko e Loto ʻa Siutasi ke Lavaki‘i ʻa Si̇̄sū
(Mātiu 26:14-16; Ma‘ake 14:10,11)
3Pea toki hū ʻa Sētane ‘ia Siutasi ‘Isikāliote, ko e toko taha ʻo e toko hongofulu mā uá.
4Pea ʻalu atu ʻa Siutasi ki he kau faifekaú, mo e kau leʻo matapā ʻo e Temipalé, ‘o nau alea ki ha founga ‘e lava ke ne lavaki‘i ai ʻa Si̇̄sū kiate kinautolu. 5Pea naʻa nau fiefia lahi ai, pea nau talaʻofa, te nau ‘oange ha pa‘anga kiate ia. 6Pea na‘e loto ki ai ʻa Siutasi, ʻo ne toki kumi ha faingamālie, ha mamaʻo ʻa Si̇̄sū mei he kakai̇́, ke ne lavakiʻi ai ia.
Ko e Taumafa ʻa Si̇̄sū mo e Kau Akó
(Mātiu 26:17-25; Ma‘ake 14:12-21; Sione 13:21-30)
7Pea ʻi he aʻu ki he ʻaho ʻo e Kātoanga Kaimāta‘elēvani̇́, ʻa ē ‘oku tāmateʻi ai ʻa e Lami Pāsová, 8Pea naʻe fekau atu ʻa Pita mo Sione, ʻo ne pehēange: ‟Mo ō atu ʻo teuteu ʻa e Pāsová ma‘atautolu, koeʻuhi̇̄ ke tau kai ia.”
9Peá na ʻeke ange: ‟Ko fē ʻa e feitu‘u ‘okú ke loto ke ma teuteu ai iá?”
10Pea folofola ʻa Si̇̄sū kiate kinaua: ‟Ko eni, ʻi ho‘omo aʻu atu ki he koló, te mo fetaulaki mo ha tangata, ‘okú naʻe fua mai ha hina vai. Mo muimui ai, ʻo aʻu ki he ʻapi ‘oku ʻalu ki ai̇́, 11Peá mo tala ki he toko taha ‘oku ‘o‘ona ʻa e ‘api̇́, ‘Oku ʻeke mai ‘e he tangata‘eiki̇́, pē ko fē ʻa e loki te ne kai ai ʻa e Pāsová, mo ʻene kau akó? 12Peá te ne taki kimoua ki ha loki lahi ʻi ‘olunga kuo ‘osi maau. Mo teuteu ai ʻetau Pāsová.”
13Pea ō atu ʻa Pita mo Sione, ʻo na ʻilo ʻo hangē tofu pē ko e meʻa naʻe folofolaʻaki ʻe Sīsuú. Peá na teuteu ai ʻa e Pāsová.
Ko e ‘Ohomohe ʻa e ʻEiki
(Mātiu 26:26-30; Ma‘ake 14:22-26; 1 Kolinitō 11:23-25)
14Pea ʻi he hokosia ʻa e taimi ke kai ai ʻa e Pāsová, pea nofo hifo fakataha ʻa Si̇̄sū mo ʻene kau ʻApositoló ʻi he tēpilé. 15Pea naʻe folofola kiate kinautolu: ‟Naʻe mātuʻaki faka‘amu ʻa hoku lotó ke tau kai fakataha ʻa e Pāsova ko ʻeni̇́ kimuʻa pea toki hoko mai hoku fakamamahiʻi̇́. 16He ‘oku ou tala kiate kimoutolu, he‘ikai te u toe kai ʻi he kātoangá ni, kae‘oua kuo fakakakato ia ʻi he Pule‘anga ‘o e ‘Otuá.”
17Pea to‘o ‘e Si̇̄sū ʻa e ipú, ‘o naʻe fai ha fakafeta‘i, ʻo ne folofola: ‟Mou toʻo eni, pea mou inu kotoa pē mei ai ʻekimoutolu. 18He ‘oku ou talaatu, he‘ikai te u toe inu mei he fua ʻo e vainé, kae‘oua kuo hokomai ʻa e Pule‘anga ‘o e ‘Otuá.”
19Pea naʻe to‘o foki ha fo‘i mā, ‘o naʻe fai ha fakafeta‘i. Pea naʻe pakipaki ia ‘o naʻe ʻoatu kiate kinautolu, ʻo ne folofola: ‟Ko hoku sinó eni, ʻa ia ʻoku foaki ko homou fetongi. Mou fai eni, ko e fakamanatu kiate au.”
20Pehē foki ʻene toʻo ʻa e ipú, hili ʻenau kai ʻa e Pāsová, ʻo ne folofola: ‟Ko e ipu ko eni̇́, ko e kovinānite fo‘ou ia, ʻoku fai ʻaki hoku totó, ʻa ia ʻoku lilingi ko homou fetongi. 21Ka ko eni, ko e nima ʻo e toko taha te ne lavaki‘i aú, ‘okú ma kai fakataha, ʻi he keinangaʻangá ni!
22He ko e Foha ‘o e Tangatá, ʻe ʻalu atu ia ‘o hangē tofu pē ko e meʻa kuo tu‘utu‘uni ke ne fou ai̇́. Ka ʻe malaʻia ʻa e toko taha te ne lavaki‘i iá!”
23Pea nau kamata fe‘ekenaki fakaekinautolu ai, pē ko hai nai ʻiate kinautolu te ne fai ha meʻa pehē.
Ko e Fekīhiaki pē ko Hai ‘Oku Mā‘olungá
24Pea na‘e hoko ha feki̇̄hiaki ʻi he kau akó fakaekinautolu pē, pē ko hai ‘iate kinautolu ‘oku taumuʻa tahá. 25Pea lea ange ʻa Si̇̄sū kiate kinautolu: ‟Ko e ngaahi haʻa tu‘i ‘o māmani̇́, ʻoku nau fakafieʻeiki ki he kakai̇́ pea ko kinautolu ʻoku fakaaoao ki he kakai̇́, ʻoku nau ui ʻakinautolu, ko e kau Fietokoni! 26Ka ko kimoutolu, ke ʻoua te mou fai pehē: ka ko ia te ne fie hoko ko e lahi ‘iate kimoutolú, ke ne hoko ʻo tatau mo ha tamasiʻi, pea ko ia ʻoku taki̇́, ke ne tatau mo ha sevāniti. 27He ko hai ‘oku lahi̇́? Ko ia nofo ki he tēpilé pē ko ia ‘okú tauhi ki he tēpilé? ʻIkai ko e toko taha ʻoku nofo ki he tēpilé? Ko ia! Ka ‘oku ou ʻi heni aú, ko e sevāniti!
28He ko kimoutolu, kuo mou ʻiate au maʻu pē, ʻi hoku ngaahi ʻahiʻahi ʻoʻokú. 29Pea kuo u tuʻutuʻuni maʻamoutolu ha puleʻanga, ‘o hangē tofu pē ko e finangalo ʻeku Tamai̇́, ke ʻoʻoku foki ha puleʻanga. 30Koeʻuhi̇̄ ke mou kai mo inu mei heʻeku tēpilé, ʻi hoku puleʻangá, pea te mou nofo ki ha ngaahi taloni ‘e hongofulumāua, ‘o mou fakamaaua ʻa e matakali ‘e hongofulumāua ʻo ʻIsileli̇́.”
‘E Sivi‘i e Kau Ako ʻa Si̇̄suú
(Mātiu 26:31-35; Ma‘ake 14:27-31; Sione 13:36-38)
31‟‘E Saimone, Saimone ē! Ko eni, kuo tuʻu mai ʻa Sētane ke ne sivi‘i kimoutolu tāutaha, ‘o hangē ko hono sivi ‘o e uité. 32Ka kuo u hūfia koe, ke ‘oua naʻa vaivai ho‘o tui̇́, pea ko koe, ʻoka ke ka foki mai leva, peá ke tokoni‘i ho ngaahi tokouá.”
33Ka naʻe pehēange ‘e Pita: ‟ʻEiki, kuo u ʻosi mateuteu ke fakahū pili̇̄sone fakataha au mo koe, pē ka aʻu ki hano tāmate‘i au, te u fiemālie pē ke fou ai.”
34Pea folofola ʻa Si̇̄sū: ‟‘Oku ou talaatu kiate koe, Pita, ‘e te‘eki ke ʻuʻua ʻa e moá he poó ni, kuo ‘osi tu‘o tolu hoʻo fakahā, ‘oku ‘ikai te ke ʻilo ‘e koe au.”
Ko e ‘Ū Meʻa ‘Oku Fai ʻAki e Fonongá
35Pea naʻe fehu‘i ange kiate kinautolu: ‟ʻI he taimi naʻá ku fekau ai ke mou ō atu, pea ‘oua ʻe toʻo ha kato pa‘anga, pē ha kato vala, pē ha senitoló, naʻa mou masiva ʻi ha meʻa?” Pea nau pehēange: ‟‘Ikai!”
36Pea talaange ‘e Si̇̄sū kiate kinautolu: ‟Ka ko eni, kapau ‘oku ʻi ai ha‘o kato pa‘anga, pē kato meʻakai, ʻalu mo ia. Peá ka ‘oku ‘ikai haʻo heletā, pea fakatau atu ho pulupulú ʻo kumi ʻaki mai ha heletā! 37He ‘oku ou talaatu kiate kimoutolu, ko e meʻa ko ʻeni naʻe hikitohi he Tohitapú, kuo pau ke fakakakato ʻiate au, ʻa e pehē: Pea naʻe lau ia ko e taha ʻo e kau maumaulaó. He ko e meʻa kotoa pē ʻoku kau kiate aú, ʻe hoko ia ʻo moʻoni.”
38Pea nau pehēange: ‟ʻEiki, Ko eni, ko e heletā ‘ʻeni ‘e ua!” Pea folofola ʻa Si̇̄sū kiate kinautolu: ‟ʻOku feʻunga pē ia.”
Ko e Lotu ʻa Si̇̄sū
(Mātiu 26:36-46; Ma‘ake 14:32-42)
39Pea ʻalu atu ia hangē ko ʻene anga maheni̇́ ʻo fononga ki he Mo‘unga ‘Ōlivé, pea muimui atu kiate ia ʻene kau akó. 40Pea ʻi heʻene aʻu ki Mo‘unga ‘Ōlivé, naʻá ne talaange kiate kinautolu: ‟Mou lotu ke ‘oua naʻa mou tō ki ha ʻahiʻahi.”
41Pea ki‘i laka si‘i atu ʻa Si̇̄sū, ʻo tatau mo e mamaʻo ʻo hano tolongi ha foʻi maka, ‘o naʻe tū‘ulutui ai ‘o lotu. 42ʻO ne pehē: ‟‘E Tamai, kapau te ke finangalo ki ai, ke ke to‘o ange muʻa meiate au ʻa e ipu ko eni̇́, ka neongo iá, kae ʻoua naʻa fai hoku lotó, ka ke fai pē ho finangaló.”
43Pea naʻe ʻalu hifo kiate ia ha ʻāngelo mei langi ke tokoniʻi ia. 44Pea ʻi he lahi ʻene mamahi̇́ naʻe fakautuutu ai pē ʻene lotú, pea naʻe hoko hono pupuhá, ʻo hangē ha ngaahi tulutā taʻataʻá, naʻe ngangana ki he kelekelé.
45Pea tu‘u hake ia mei heʻene lotú, ‘o foki atu ki heʻene kau akó, ʻo ne ʻilo, tā kuo nau ʻosi māʻumohe kinautolu, koe‘uhi̇̄ he kuo nau ongosia.
46Pea pehēange ‘e ia kiate kinautolu: ‟Ko e hā kuo mou mohe ai̇́? Mou ʻā ‘o lotu ke ‘oua naʻa ʻahiʻahiʻi kimoutolu!”
Ko e Puke Pōpula ‘o Si̇̄sū
(Mātiu 26:47-56; Ma‘ake 14:43-50; Sione 18:3-11)
47Pea lolotonga ʻene kei lea peheé, ʻiloangē kuo aʻumai ha fuʻu kakai, ‘oku taki mai ‘e he toko taha ʻo e toko hongofulu mā uá, naʻe hingoa ko Siutasi̇́. Pea ʻunuʻunu atu ʻa Siutasi kia Si̇̄sū, ‘o naʻe ‘uma kiate ia. 48Pea pehēange ‘e Si̇̄sū ki ai: ‟‘E Siutasi, ko e ‘uma koā ‘okú ke lavaki‘i ʻaki ʻa e Foha ʻo e Tangatá?”
49Pea ʻi he mamata ʻa e kakai naʻe kau mo iá, ki he meʻa kuo hokó, naʻa nau pehēange: ‟ʻEiki, te mau taaʻiʻaki ia ʻa e heletaá?” 50Pea taa‘i leva ‘e hanau toko taha, ʻa e sevāniti ʻa e Taula‘eiki Lahi̇́, ‘o naʻe tuʻusi hono telinga to‘omata‘ú.
51Pea tali ‘e Si̇̄sū ʻo ne pehē: ‟Tukuā! Kuo feʻunga pē ia.” Pea naʻe ala ki he telinga ‘o e tamaio‘eiki̇́ ʻo ne fakamoʻui.
52Pea pehēange ʻe Si̇̄sū ki he kau faifekaú, mo e kau leʻo matapā ʻo e Temipalé, pea mo e kau mātuʻa ʻo e lotú na‘e ōmai ko hono puke iá: ‟Ko ho‘omou to‘o heletā mai mo e ʻakaú, he ko ha hiamatea aú? 53Ko e ʻaho kotoa pē mo ʻetau ʻi he Temipalé, kae ‘ikai te mou ala ʻo puke ai au. Ka ko homou taimi̇́ eni, he ko e pule ia ʻa e fakapo‘uli̇́.”
Ko e Faka‘ikai‘i ‘e Pita ʻa Si̇̄sū
(Mātiu 26:57,58,69-75; Ma‘ake 14:53,54,66-72; Sione 18:12-18,25-27)
54Pea naʻa nau puke ʻa Si̇̄sū, ‘o taki atu ia ki he ʻapi ‘o e Faifekau Pulé. Pea naʻe muimui atu ʻa Pita, mei he mamaʻó. 55Pea kuo tafu ha afi he lotoʻā ‘o e ‘api̇́. Pea ʻalu atu ʻa Pita ‘o taʻutu fakataha mo kinautolu naʻe fakamāmāfana ai̇́.
56Pea naʻe fakatokanga‘i ia ‘e ha fefine ngāue naʻe nofo ai, mei̇́ he tapua ʻa e maama ʻo e afi̇́, ʻo ne sio fakamama‘u kiate ia, pea naʻe toki pehēange: ‟Ko e siana ko ʻeni̇́ foki, na‘e faʻa ʻiate iá!”
57Ka naʻá ne fakaʻikaiʻi ia, ʻo ne pehē: ‟Fefine, ‘oku ‘ikai te u ʻilo ʻa e tangata ko ʻená!”
58Pea fuoloa si‘i mei ai, kuo toe mamata kiate ia ha toko taha kehe, ʻo ne pehēange: ‟Ko koe foki, ko e taha ʻokinautolu.” Ka naʻe talaange ‘e Pita: ‟Tangata! ʻOku ʻikai ko au ʻena ia!”
59Pea ‘osi nai ha houa ‘e taha mei ai, kuo toe fakapapauʻi ange ʻe ha taha kehe, ʻo pehē: ‟ʻOku moʻoni ʻaupito ia! Na‘e faʻa kau ʻa e tangatá ni mo ia, he ko e tangata Kāleli foki ʻeni!”
60Pea pehēange ‘e Pitá: ‟Tangata! ‘Oku ‘ikai ke mahino kiate au ʻa e meʻa ʻokú ke laú.” Pea lolotonga ʻene kei leá, mo e ʻuʻua ʻa e moá.
61Pea tafoki mai ʻa e ʻEiki̇́ ‘o sio fakahangatonu atu kia Pita. Pea toki manatu‘i ‘e Pita ʻa e folofola ʻa e ʻEiki̇́, heʻene pehē kiate ia: ‟‘E te‘eki ke ʻuʻua ʻa e moá he poó ni, kuo ʻosi tu‘o tolu hoʻo fakahā, ‘oku ‘ikai te ke ʻiloʻi ʻe koe au.”
62Pea ʻalu atu ʻa Pita ki tuʻa ‘o naʻe tangi mamahi ai.
Ko hono mananukia mo hono tā ʻo Si̇̄suú
(Mātiu 26:67-68; Ma‘ake 14:65)
63Pea ko e kau tangata naʻa nau le‘ohi ʻa Si̇̄suú, naʻa nau vaʻingaʻaki ia ʻo nau toutou taaʻi ia. 64Pea naʻa nau fakapūlouʻi ia, pea nau toki fehuʻi ange, ʻo pehē: ‟Talamai angé pē ko hai naʻá ne taa‘i koé!” 65Pea na‘e lahi mo e ngaahi lea kovi kehekehe naʻá nau fai kiate ia.
Ko Hono Faka‘eke‘eke ‘o Si̇̄sū ‘e he Fakataha‘anga Lahi ‘o e Kakai Siú
(Mātiu 26:59-66; Ma‘ake 14:55-64; Sione 18:19-24)
66Pea ʻi he pongipongi haké, naʻe fakataha mai ʻa e kau mātuʻa ʻo e lotú, mo e kau faifekaú, mo e kau mataotao ʻo e Tohitapú pea naʻe taki atu ʻa Si̇̄sū, ‘o fokotu‘u ʻi honau lotolotongá. 67Pea nau ʻeke ange: ‟Kapau ko e Mi̇̄saiá koe, fei mo ke fakahā mai!” Pea pehēange ‘e Sīsuú: ‟Kapau te u ʻio atu, he‘ikai te mou tui ki ai. 68Pea kapau te u ʻeke atu kiate kimoutolu, he‘ikai te mou tali mai!
69Ka mei̇́ he taimi̇́ ni, ʻe fakanofo ʻa e Foha ʻo e Tangatá ki he to‘omata‘u ‘o e ‘Otua Māfimafi̇́.”
70Pea nau pehēange kotoa pē: ‟Tā ko e ʻAlo koe ‘o e ‘Otuá?” Pea tali ‘e Si̇̄sū: ‟Ko kimoutolu ʻena ʻoku mou lau, ko au ia.”
71Pea nau kaila kotoa pē: ‟Tā ʻoku ʻikai te tau toe fiemaʻu ha kau fakamo‘oni! He kuo tau fanongo tonu kotoa pē, ki he lea kuó ne fai̇́!”
Currently Selected:
Luke 22: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
