LUK 9
9
Sawltah sawm leh nite nasep
(Mat. 10.1-14; 14.1-14; Mak. 6.7-13)
1Tuachi’n Jesu’n anuazui sawm leh nite ahankhawm a, dawi zousie tunga silbawltheina leh thuneina tualeh natnate suhdam theina apie hi. 2Aman amaute Pasian gam thu gen ding leh damloute sudam dingin asawlkheta hi. 3Tualeh Aman akung uah, “Na khuolzin chiengun, chiengkhut ahiei, thungpi ahiei, tanghou ahiei, sum ahiei, bangma keng sih un, puonah zong athuop in keng sih un. 4Na lutna inn uah tungden unlen, tualeh tuana kipat in kipankhie un. 5#Nasep. 13.51#Luk. 10.4-11Tualeh ahing na lamdawn lou pouma tua khopi akipat na peidoh chiengun amauh mawpaina etsahna dingin, na kephang ua leivui thingkhie un,” achi hi. 6Tuachi’n akuonta ua, khantanhoi gen kawm leh munchin a mite sudamin khochin ah apei kawikawi uhi.
Herod lungbuoina
7 #
Mat. 16.14; Mak. 8.28; Luk. 9.19 Tuachi’n leengpa Herod in asilbawl zousie ana zata a; kimkhat in Johan ahing kiata hi, achi ua, 8Kimkhat in Elijah hing kilah ahita, achi ua, tualeh midangten, Nidang lai a guolneite khat hing thou kia ahita achi zieh un, alungbuoita hi. 9Tualeh Herod in “Johan lah alu tanta ing a, hinanleh hichi lawmlawm a athu ka zahzah nalai koi adiei?” achi hi. Tuachi’n Ama mu atumta hi.
10Tualeh sawltahte ahing kinuale un, asilbawl zousiete uh Ama ahil uhi. Tuachi’n Jesu’n amauh azawpi a Bethsaida kichi khopi a koima umlouna mun sip khat ah atuom in apeipita hi. 11Hinanleh mipiten athei tah un Ama azui ua; tualeh Aman amauh ana kipahpi a, akung uah Pasian gam thu ahil a, suhdam kiphamaw pouma asudam hi.
Mipi tul nga vahna
(Mat. 14.15-21; Mak. 6.35-44; Jn. 6.1-14)
12Tualeh ni tumkuon ahing hi tahin, sawm leh nite ahing pei ua akungah, “Eite tana, mun sip a um ihi ziehun, mipite ikimvel a khopite leh khoneute a pei a giehna leh nehledawn ding sui dingin sawlkhetain,” achi uhi. 13Hinanleh Aman akung uah, “Nouten aneh ding uh pie un” achi hi. Amaun “Mipi hizapi ading iva leipieh sih leh tanghou pheng nga leh nga ni chiloungal bangma inei sih uh,” achi uhi. 14Aziehpen mi tul nga vel ahi uhi. Tuachi’n Aman anuazuite kungah, “Sawm nga nga in, apawl pawl in tousah un,” achi hi. 15Tuachibangin abawl ua, tualeh abawn un atousah chietta uhi. 16Tuachi’n Aman tua tanghou ngate leh nga nite ala a, van lam en touin aguolzawl a, aphalsuo a, anuazuite kungah, mipite mai a lui dingin apie hi. 17Tuachi’n abawn un ane ua agilva chiet ua, tualeh aneh val nengte uh seu sawm leh seu ni aluoh dim uhi.
Peter in Khrist ahi chia aphuonna
(Mat. 16.13-21; Mak. 8.27-31)
18Tualeh Jesu amatanga athum lai in anuazuite akungah aum ua; Aman akung uah “Mipite’n kei khu koi ahi ahing chi uoi?” chi’n adong hi. 19#Mat. 14.1,2; Mak. 6.14,15; Luk. 9.7,8Tuachi’n amaun adawng ua, “Baptispa Johan ahing chi uh, hinanleh kimkhatten Elijah ahing chi ua, tualeh adangten nidanglai a guolneite lah a khat hing thou kia ahi ahing chi uhi,” achi uhi. 20#Jn. 6.68,69Aman akung uah, “Ahileh nouten koi ka hi na hing chi uoi le?” achi hi. Peter in adawng a, “Pasian Khrist na hi,” achi hi. 21Tualeh Aman tam thu koima kunga hillou dingin khau tahin thu apie hi.
Jesu’n ashi ding leh athawkiana ding agen lawhna
22“Mihing Tapa in sil tampi ah thuohgimna athuoh dinga, upate leh siempu liente, tualeh laigielmite deilouin a um dinga, thain a um dinga, tualeh ni thumniin athou kia ding hi,” achi hi.
Nuazui dihtah hinaman
(Mat. 16.24-27; Mak. 9.34-38)
23 #
Mat. 10.38; Luk. 14.27 Tuachi’n Aman amaute zousie kungah, “Mi koipou in ahing zui ut uleh amaleh ama kingaisah louin nichin in akross puo in hing zui heh. 24#Mat. 10.39; Luk. 17.33; Jn. 12.25Aziehpen koi hinanleh ahinna humbit ut in, ataan dinga, hinanleh koipou keima zieh a ahinna taanin ahumbit ding hi. 25Mi’n leitung pumpi nei henlen, ama kisumang in, ahisihleh ahinna taan taleh ama adingin bang aphatuom diei?
26Koipou keima leh ka thute zumpi khu, Mihing Tapa in Ama thupina toh, a Pa thupina toh, vansawlsiengte thupina toh, ahing pei chiengin ahing zumpi ding hi. 27Hinanleh thudihtah ka hing hil ahi, tana ding mi pawlkhat, Pasian gam amu masangsie uh shina chiem vawt lou ding a um uhi.
Mel lamdanna
(Mat. 16.28—17.9; Mak. 9.1-9; 2 Pet. 1.17,18)
28Tam thute agen nua ni giet ding velin, Peter, Johan leh Jakob, azawpi a muol tung a thungen dingin apei uhi. 29Tualeh thungetna anei lai in amel puohdan leh amaisuo ahing kiheng lamdanga, tualeh apuonsilte avam a atesitset ta hi. 30Tuachi’n Ngai vawi, mi ni Ama toh akihou ua, tuate gel khu Mosi leh Elijah ahi uhi. 31Amauh thupina toh ahing kilah ua, Jerusalem a, ashina suhbukim ding thu agen uhi. 32Hinanleh Peter leh akunga umte a imut uh asuoh mama a, hinanleh ahah teitei ua, Jesu thupina leh akunga Ama toh mi ni dingte amu uhi. 33Tualeh amaun Jesu apeisan kuon lai un, Peter in Jesu kungah, “Pu aw, ei a dingin tana um ahoi hi, bawhinn thum i bawl dinga, Nanga dingin khat, Mosi adingin khat, tualeh Elijah a dingin khat,” achi a, bang ahiei agen chi zong theilou in.
34Tambanga a genlai in, meilum ahing kai a, amauh alie a; meilum lah a alut bep un azauta uhi. 35#Isai. 42.1; Mat. 3.17; 12.18; Mak. 1.11; Luk. 3.22#2 Pet. 1.17,18Tuachi’n meilum lah akipat in aw khat ahing pawt a, “Tami ka Tapa deitah ahi, a thu Ngai un,” achi hi. 36Tualeh aw gin akhawl tahin, Jesu amatanga um amuta uhi. Tualeh asip dide ua, tua hun laiin asil mute uh, koima kungah, ahil sih uhi.
Pasal naupang dawi mat suhdamna
(Mat. 17.14-18; Mak. 9.14-27)
37Tualeh azing nia muol akipat ahing kum suh lai un, mipi thupitah in Ama ana dawn uhi. 38Mipi lah a kipat thakhat in mi khat akikoukhie a, “Siepa aw, ka hing ngen ahi, Ka tapa en in, ka tapa nei sun ahi. 39Ngai vawi, dawi in aman a thakhat khat in akikoudoh zel a, tuachi’n akama chilphuon bozen in asugenthei lenga, tualeh a sidupsah a, genthei tahin anuasie zel hi.
40Tuachi’n na nuazuite kungah deldoh dingin ka ngen a, hinanleh adeldoh thei sih uhi,” achi hi. 41Tuabepin Jesu’n adawnga, “Ginna neiloute leh khang hilhate Aw, na kung ua bangtan vei hing umpi a, hing thuohpi ding ka hiei? Na tapa tanah hing pui in,” achi hi. 42Amapa ahing peilai in dawiin tuolsenan anei a, abawl gentheita hi. Tuabepin Jesu’n hagau bua khu aphawh a, naupang khu asudam a, apa kungah apeta hi.
Ashina ding Jesu’n agenlawh niveina
(Mat. 17.22,23; Mak. 9.30-32)
43Tualeh amaute zousie in Pasian silbawltheina thupi khu lamdang asa mama uhi. Hinanleh mi chin in Jesu silbawl zousie lamdang asah mama chiet lai un, Jesu’n anuazuite kungah, 44“Tam thu kigente na bil sung uah lut heh; Mihing Tapa khu mite khuta matsah a um ding ahizieh in,” achi hi. 45Hinanleh amaun, a thugen atheisiem sih ua, athei louna ding ua, ama ua dinga im ahi ziehin, tualeh athugen khu Ama adong ngam sih uhi.
Kingaingiemna thupina dih ahi
(Mat. 18.1-5; Mak. 9.33-40)
46 #
Luk. 22.24
Tuachi’n alah uah koi ahiei alien pen ding chiin kiselna aneita uhi. 47Jesu’n alungtang ua angaituo uh athei a, naupang neu khat akai a, akungah a um sah a, 48#Mat. 10.40; Luk. 10.16; Jn. 13.20Akung uah, “Koipou ka min zieh a tam naupang neu kipahpi khu kei hing kipahpi ahi; tualeh kei hing kipahpi khu, ahing sawlpa kipahpi ahi; Noute zousie lah a aneupen khu, athupi pen ahi ding hi,” achi hi. 49Tuachi’n Johan in adawnga, “Pu aw, mi khat na min a dawite deldoh ka mu ua, ka hing zuina ua apan khah lou zieh in, ka khamta uhi,” achi hi. 50Hinanleh Jesu’n akungah, “Ama khaam sih un, aziehpen ei hing doulou pouma ei lam a pang ahi,” achi hi.
Samaria miten Jesu anuolna uh
51Tualeh Ama lahtou a aum ding hun ahing nai tahin Jerusalem khuo a pei ding atum chinten a, 52Tualeh amasangah thupo ding mi asawl masa a, amauh na pei masa in Ama dinga guotsa diem a na koi dingin Samarimite khuo khat ah alutta uhi. 53Hinanleh amai suo khu Jerusalem lam a pei dinga akilat ziehin amaun, Ama ana kipahpi sih uhi. 54#2 Leeng. 1.9-16Anuazuite Jakob le Johan in tam thu athei tah un, “Mangpa, Elijah bawlbangin amauh katum dingin, van a kipat in mei hankhesuh lei hoi nasa ei?” achi uhi. 55Tualeh Ama akihei a, “Amauh aphawh a, bangchibang lungsim puo na hi uoi chi na kithei sih uhi.” 56Aziehpen Mihing Tapa mihingte hinna sumang dinga hing pei ahi sih a, hinanleh amauh hundam dinga hing pei ahi zaw hi, achi hi. Tuachi’n khodang ah apeita uhi.
Nuazui dihtah hina
(Mat. 8.18-22)
57Tualeh lampi a apei lai un mi khat in Mangpa, “Na peina phot ah ka hing zui ding,” achi hi. 58Jesu’n akungah, “Si-alten kuo anei ua, tungleeng vaten zong bu anei uh, hinanleh Mihing Tapa in alu ngatna ding mun anei sih,” achi hi. 59Tualeh Aman midang khat kungah “Hing zuiin” achi hi. Hinanleh aman, “Mangpa, ka pa hing vui sah masa phot in,” achi hi. 60Jesu’n akungah, “Mishi in a mishi uh kivui uheh, hinanleh nangpen pei inlen Pasian gam thu va hilin” achi hi.
61 #
1 Leeng. 19.20
Tualeh midang khat in zong, Mangpa, “Ka hing zui ding, hinanleh ka inn a mite Mangpha ka va hah masa phot ding hi,” achi hi. 62Jesu’n akung ah, “Mi koipou loukaina langkawn akhut a tukawm a nualam en khu, Pasian gam mi hitaah ahi sih,” achi hi.
Currently Selected:
LUK 9: ZOUBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
