LUK 16
16
Sumkem mi dihtatlou gente thu
1Tualeh Jesu’n anuazuite kungah, “Tam thu zong agen a, Mi hausa koi ahiei in sumkempa khat anei a, tua mipa’n asum amawh thangzah sieng pieh ta hi, chiin akungah hehna ahing tung hi. 2Tuachi’n aman amapa ahan a, a kungah, Na tungtang thu ka zah khu bangchi dan ahiei? Na sum kep tuotna dan hing pelut in, tubansie sumkem a pang nawnlou ding na hi, achi hi. 3Tuachi’n sumkempa’n alungsim in, Bangchi ding kata diei? Ka pu in ka sum kep hing tawpsah ding ahita a, lei lai ding lah ka ngap sih a, khutdaw ding lah ka zumin. 4Sumkep ahing tawpsah chienga, a inn ua ahing um sah theina dingin, ka bawl dan ding ka theita, a chi hi. 5Tuachi’n apu sum bate zousie akungah ahan chiet a, amasapen kungah ka pu sum bangza ahiei na bat? achi hi. 6Aman sathau tena za khat achi hi. Tuachi’n aman akungah, na lai la zuai inlen, tou inlen, kintah in sawmnga gielin, achi hi. 7Tualeh adang khat kungah, Nang bangza ahiei na bat? achi hi. Aman bu tena za khat achi hi. Tuachi’n aman akungah, na lai la inlen sawmgiet giel in, achi hi.
8Tua sumkem dihtat lou pa’n lemgel theitah a abawl ziehin apahtat ta hi. Aziehpen vah tate sangin tam leitung tate atulai khang thu uah apilzaw uhi. 9Tualeh ka hing hil ahi, dihtatlouna sumin na lawm dinguh kibawl un, hausatna abei hun chienga kumtawna umna a noute ahing umsah theina dingun. 10“Koizong tawmnou khat tunga gin um khu tampi tung ah zong a gin um ahi, tualeh koizong tawmnoukhat tunga gin umlou khu tampi tungah zong agin um sih hi. 11Tuaziehin dihtatlouna sum tunga na gin um sih u’leh, koi ahiei noute hing muonga sumtah hing kem sah ding? 12Tualeh midang neisa tunga bawn na gin um sih u’leh koiin ahiei nouma a tahtah hing pe ding?
13 #
Mat. 6.24
Suoh khat in Pu ni nna asem khawm thei sih; aziehpen khat muda in khat a it ding a, ahisihleh khat hum in khat asimmaw kha ding hi. Pasian nna leh sum nna na sem khawm thei sih ding uhi, achi hi.
Jesu’n Pharisaite avauna
14Tualeh Pharisai sum ngainaten zong tam thute zousie aza ua, Ama anuisan uhi. 15Aman akung uah, “Noute pen mite mitmu a kisiem tangsahte na hi uhi. Hinanleh Pasian in na lungtang uh athei hi; aziehpen mite laha kitawisang khu Pasian mitmu a kidahhuoi tah ahi.
16 #
Mat. 11.12,13 “Dan leh guolneite thu khu Johan hing um tan chieng aum a, tua bansie Pasian gam khantanhoi thu akigen a, tualeh michinin tuanah apaulut sawm chietta uhi. 17#Mat. 5.18Tualeh dan thu sut vom neunou khat aman sangin, lei leh van amanthai abailam zaw ding hi.
Kikhulna thu a Jesu thuhil
18 #
Mat. 5.32; 1 Kor. 7.10,11 “Koipou azi khul a, zi dang kitenpi pouma angkawm ahi; tualeh koipou apasal in akhulsa kitenpi pouma angkawm ahi.
Mi hausapa leh Lazar
19“Mihausa koi ahiei khat a um a, puon sandup leh puon malngat asil a, ni chin in nuomsa tahin a um hi. 20Tualeh amin Lazar kichi apumtanga hima a dim mi hausapa kotpi bul a alupsah zel uh khutdaw khat a um a, 21Mi hausapa dawkan a akipat khateneng kia pou neh a kigilva sah alunggul hi. Tuathamlouin uite ahing pei ua, ahimate alieh piehzel uhi.
22Tualeh hichi ahing hi a, tua khutdawpa ashi a, vansawlsiengten Abraham angsungah a peipi uhi. Mi hausapa zong ashi a akivui ta hi. 23Tualeh mishi khuo ah gimthuohin a um a, adah tou a, gamlapi a Abraham leh a angsung a Lazar um khu amuta hi. 24Tuachi’n akikou a, Pa Abraham Kei hing khotuo inlen, Lazar in akhutme dawn tui ah hing die henlen ka lei suvot dingin hing sawl in, tam meikuongah ka thuohgim sengta hi, a chi hi.
25Hinanleh Abraham in Tapa nangman na dam lai in sil hoite na kimu a, tuamabangin Lazar in sil hoiloute amu hi, chi geldohin, hinanleh tuin vang ama hamuonin a um a, nang pen gimthuohin na um hi. 26Tualeh tamte chilou zong, koute leh noute kikaal ah guom thupitah a um hi; tua khu tamlang gal a kipat noute kunga hing pei utte ahing pei theilouna ding u’leh, tualang gal a kipata kou kunga hing pei utte, ahing pei thei louna ding un, achi hi. 27Tuachi’n aman ahileh, Pa ama khu ka pa inn a sawl dingin ka hing ngen hi. 28Aziehpen sanggam pasal nga ka nei a, amauh vahil leh tuachilou in ama u’zong tam gim thuohna mun ah ahing pei kha ding uhi, achi hi.
29Abraham in akungah, amaun Mosi leh guolneite anei uhi, tuate thu na ngaikhie uheh, achi hi. 30Tuachi’n aman Hilou e, Pa Abraham, mishi lah kipat mi khat va pei leh akisia ding uhi, achi hi. 31Hinanleh aman akungah, Mosi leh guolneite thu angaikhiet nuom sih u’leh, mishi lah akipat mi khat thoukia nanleh zong atahsang tuom sih ding uhi, achi hi,” achi hi.
Currently Selected:
LUK 16: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.
