METIU 18
18
Tanii kadi disangpiipo
(Mrk 9.33-37; Luk 9.46-48)
1Teitinglang ki boumei teinii Jisuda gongsii n-nhiile, “Sating gam sazyii kito tapiinii kadi disangpiipo?” 2Teito mpounii nahmei kacheng hangniniigo lat tosii, ahgo ahnyii sumkii masatsanii tamle, 3Inii gonyii dakii kasangpii tam leile, “Gonyiinii tiikalisii nahmei ka- chengmei takum kasutanii, gonyiinii sating gam sazyii kitei liitsang liit lakle. 4Nahmei kacheng aitakum- piinii mpouroinapii mpougo poi sagoi supii poisanasii kalei mei teinii sating gam sazyii kito kadi disang- piile. 5Sateichii ai kakum nahmei kacheng hangniniigo guzei kito lukaipyiisii kalei meitei n-gu lukaiziile.
Kem tiimatu tang karam jangpii kahem
(Mrk 9.42-48; Luk 17.1-2)
6“Nlenii n-gu malum kalei nahmei kachengmei aihang kak kito hangniniigo mei kata kangkanii tiikou aileponii, mpou kagung kikii kakaryii kuitu kuikaisii dwijai katuk ki takliitsii dwikito ngalum kalei teiniipou mpoujangpii bibwi tangle. 7Kem tiimatu tang karam kahem jangpiinii sazyii pouryii kadaziikapii kamage tangpo! Kadapokii kahem teinii gongling tangle, nlenii kahem tiikakaimei tei kadaziikapii kamage tangpo!
8“Sateichii gopi mak-kii go-bahnii n-go kem tiimatusii leileponii, teitei tat ndangsii godato rat toi ailo; gobah hangna mak-kii gopi hangna pungsii kalui kaga mibam kikii toikai kalei sungnii, gobah hangninii mak-kii gopi hangninii gasii karing bamki kaliit teinii gojangpii bibwile. 9Sateichii go miknii n-go kem tii- matusii leileponii, teitei lat mpatsii godato rat toi ailo, gomik hangna pungsii mibam kikii toikai kalei sungnii mik lamkii chetsii karing bamki kaliit teinii gojangpii bibwile.
Maga kalei Jaonah mah ndasam
(Luk 15.3-7)
10“Gonyiinii ai kacheng hang kak kito hangninii godo maning kamala tiikasu tiisii tiigat tolo; kadapokii Inii gonyii dakii tam leile, Sating gamto ahnyii mah sating gamlui hangnii sating gamto kalei gu pfii jutei taksupii ngou leile. 11Kadapokii meinah sapfii mpou teinii maga kalei gotei keipyii tang karam jangpii gongtakle.
12“Gonyii kada takumpii ma- ningpo? Mei hangninanii Jaonah hai kalei teikak kito Jaonah hangninii maga aileponii, mpounii reksok- chyiisii sokchyii nkhii gotei zang gamkii kaibamsanii maga kalei gotei maa fiilakpo? 13Sateichii mpounii teitei dou woleponii, Inii gonyii dakii kasangpii tam leile, mpounii gatu kasu reksokchyiisii sokchyiinkhii gotei sung ai hangninii jangpii kisii ntabuile. 14Teijangpii ai kacheng hang kak kito hangninii kagodo maga matutang karam ai sating gamto kalei gu pfiinii kamaning kamarei teimakle.
Kem tiisii kalei sanapii hangninii
15“Gosanapiinii go phyiiryiito tiima aileponii mpouda maasanii mpoumah tiikama tei mangoulo, nlenii gonei hangna roina kalei kak kito makumpii tiilo, nangnii katam tei mpounii shiileponii, nangnii gosa- napii gotei douloi wotakle. 16Nlenii nangnii katam tei mpounii shiisu leponii, sakchyii hangna hangtum mah mwi kito samkang hangtei sat matutang karam jangpii, mei hangninii mak-kii mei hangna n-go kaswisii hai wolo. 17Sateichii ahnyiinii katam tei mpounii shiisei suleponii, Charsh dakii tamlo; sateichii mpounii charsh samteido shiiseisu leponii, nangnii mpougo Lui kakimei ninado aha kahamei hangninii takumpii poi wolo.
Kamazhii ninado mazhii kasu
18“Inii gonyii dakii kasangpii tam leile, sazyii pouryiito gonyiinii ma- zhii kasu tei sating gamtodo mazhii lakle, sateichii sazyii pouryiito kamazhii tei sating gamtodo mazhii tangle.
19“Nlailoisii Inii gonyii dakii tam leile: Sazyii pouryiito gonyii kak kito mei hangnanii mah kata hangninii khang tang karam teimah kaang kito lungswi nja woleponii, sating gamto kalei gu pfiinii ahnyiigo teitei tiipyii tangle. 20Kadapokii gu zei kito hangna mak-kii hangtumnii ndwi kalei kitei Inii ahnyiigo kaswisii leile.”
Kaleipyii kasu kikaleimei hangniniimah ndasam
21Teito Pitar-nii tatpi mpougo n-nhiile, “Bangpii, gusanapiinii gu- phyiiryiikii tiimasii leihum leponii, kadaziika katang tei Inii ahgo kama kaleipyii tangpo? Kaleipyii sanakii katangpo?”
22Jisunii mpou dakii tamle, “Ka- leipyii sanakii katangsii Inii godakii tam makle,” nlenii reksana-sana#Reksana sana, katunii nlai gale katugole. 23Teijangpii sating gam sazyii tei mpouki kalei meigo kaswisii ajhii kamasak katu mareisii kalei sagong hangninii go poi ka-nda leile. 24Sateichii mpounii fiihaotu sek-kii talent#Ai talent ai jang kahemei hangninii mah tingkum kearii sii mangii nkhii mah pumjang mai sungdo moile. thang kearii pung ka- lei mei hangninii mpouda pang gong takle, 25sateichii mpounii ruipei kalak jangpii mpoumah Abangpiinii mpougo mpou-nou, mpou nahmei hang go sateichii mpoumah kabam hangtei sana tei ruitang karam jang- pii joitoi ailosii mwija pyii aitakle. 26Teipiinii ki kaleipii teinii sagong doitei koumang kok kumsii mpounii khang takle, ‘n-gu shang- niikii koi seilo sateichii Inii n-go mahlyii hang ruikai pyii tangle.’ 27Teito ki kalei- piimah bangpii teinii mpougo lung- syiisii mpatpyii takle sateichii sanah pungkalei teido magapyii takle.
28Nlenii kikaleipii teinii tat kapat tinglang kak, mpoumah dinar#Dinar-Rom mah sanah, dinar hangninii ai tingneikii pumjang maile. haikii pungkalei mpougo njoisii kikaleimei hangniniigo kadou takle, sateichii mpounii jumsii mpougo karokto tuinei wosii tam takle, ‘nangnii pow pungkalei tei rui ailo.’ 29Teipiinii mpougo njoisii kikaleipii teinii koumangsii mpou dato khang takle, ‘n-gu tinglang shangniikii koiseilo’ sateichii ‘Inii godakii pow tei ruikai pyii tangle.’ 30Teito mpounii mazhii- sei sutakle, nlenii mpounii pow tei rui kasutatei mpougo kabang kikii kai aitakle. 31Mpougo njoisii kikalei mei hang teinii pat kalei tei ngou wosii hangkapii lung kamagesii, pat kalei hangtei ahnyii mah Bangpii dakii gong tam takle. 32Teito mpou mah Bangpii teinii mpougo lat magongsii mpou dakii tamle, “Nang kikalei kaikashyiipii! Nangnii gudato kakhang taiswisii Inii gomah pow hangtei magapyii takle; 33Inii n-go lungsyii kapyii takumpii nangdo n-go njoisii kikalei ahgo lungsyiipyii kajyii makde? 34Sateichii mpoumah Abangpii teinii rarhiisii mpounii pungkalei hangtei rui matei kasuta tiikamage matutang karam jangpii mpougo kabang kikii pyiitoi ai takle.
35“Gonyiinii gonyii sanapiigo gonyii lung kito kaleipyii suleponii, sating gamto kalei gu pfiiniido gonyii dakii tei tiitangle.”
Currently Selected:
METIU 18: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.