JON 12
12
Betani kito Jisugo thao manuk kapyii
1Katai kito Jisunii tiimaring kapyii, Lazarusnii kalei Be- tani kitei, kaakamaju mah takbai doi leimik saruk tang kasunii Jisunii gongle. 2Ahnyiinii teikikii mpou jangpii tingkhii malot tei tiikada wotakle; sateichii Marthanii nga ngale, ninado mpougo kaswisii tingkhii malot kachii tinglang kak, kaswisii kabam mei kak kito Lazarus tei hangniniile. 3Teito Merinii kama- tei nard mah maikateeng kamanuk thao ser aphang hangninii poigong sanii, Jisu mah pi pazhii kikii manuk kaipyii takpokii, mpoupei mah phyii- taam teipii mpou pi tei piit mateipyii takle, sateichii ki kalung tei gam kamanuk mah kei manam kabi tei- piinii tokryii takle. 4Nlenii mpougo schoi choikai tang karampii Judas Iskariot, boumei kak kiteito hang- ninii teinii tamle, 5“Gam kamanuk thao ai dinar haitumpii joi wosii mah kagameigo kadajangpiinii pyiimakpo?” 6Mpounii ai tam kalei ainii mah kagamei jangpii mpounii kasangpii maningsii tam makle, nlenii mpou ai karagameile ninado mpouda kalei sanahbung lung kiteikii kakai tei mpounii poi mpat kalei jangpiiniile.
7Teijangpii Jisunii tamle, “Mpou- pei rang tiibamlo, mpoupei mah kabam tei n-gu tiikagoi piinei leimik jangpii mpoupeigo makai bamlo.” 8Mah kagameinii gonyiigo kaswisii sating kata leile, nlenii Inii gonyiigo kaswisii taksupii bam makle.
Lazarus go gitang karam jangpii tiikatu
9Jehudimei meimoinii mpou teiki leile katu tei tiwosanii, Jisu jangpii roinii supii, mpounii katai kito tiimaring kapyii Lazarus godo jutang karam jangpii ahnyiinii gong takle. 10Teipiinii kanat kajum tingdimei hangteinii Lazarus godo gitang karam jangpii sam rashii wotakle; 11dapochiinii mpou jangpii Jehudi- mei kak kito mei hangkanii ahnyiigo mazhii supiinii Jisugo malum leitakle.
Jisunii takoigam tongsii Jerosalemki tat kaliit
(Met 21.1-11; Mrk 11.1-11; Luk 19.28-40)
12Adoipiinei leimik tei kaa- kamaju takbaiki kagongmei moi teinii Jisu Jerosalemki gonglei takle katu tei shiitakle. 13Teijangpii ah- nyiinii kananhii tei poisanii mpougo kadoutang karam jangpii gongsii saasii tamle, “Hosanna! Bangpii zei kito gongkalei mpou ai sadoi bile. Isrel ki sagong go Saraanii satoi pyiile!”
14Jisunii takoinah hangninii dou wosanii teiphyiiryiito tongtakle; aitiisii ryiikabam takumpii,
15“Hing sulo Zaiyon mah namdi;
Julo, takoinah gam tongsii,
gonyii mah sagong aiki gong leile!”
16Nunii mpou boumei hangteinii ai ai tiwo makle, nlenii Jisugo pumtei kava kikii tiimaring kapyiitainii ai ai mpoumah kaang kito ryiibamle katu ninado mpou dakii tiibam takle katu tei ahnyiinii maning gongtakle.
17Mpounii roubam kito Lazarus go lat mpatsii katai kito tiimaring kapyii tinglang kak mpougo kaswisii kaleimei hangteinii sakchyii tei pyii- takle. 18Aijangpiiniido meimoi teinii mpougo mang kadou takle, dapodin- chii mpounii tiikamangou siiti ai tiitakle katu tei ahnyiinii shiitakle. 19Teito Farasismei teinii hangni- nanii hangniniigo tamle, “Julo, gonyiinii samah kado tiiwo lakle, julo, sazyii pouryiinii mpoutai switu takle.”
Grikmei kangkanii Jisugo fiikatu
20Takbai tinglang kak mata tang karam jangpii Jerosalemki kagongmei hangkak kitei Grikmei kangkii hai leile. 21Teipiinii ahnyii teinii Galili kito kalei Bethsaida ki Filipda gong- sanii mpou dakii tamle, “Madhiika- pyiipii, nyiinii Jisugo junyiile.”
22Filipnii Andruda gongsii tamle, sateichii Andrunii Filipgo kaswisii mpoupiinanii Jisu dakii tamle, 23Jisunii mpoupiinago khekalatle, “Meinah sapfii mpou teinii pumtei kava kadi doutang karam tinglang tei gongtakle. 24Kasang kasangpii Inii gonyii dakii tam leile, Gihuti hangninii ai sazyii takmangsanii tai kasutanii, tei tei mpouroinapii teitiisii leihumle, nlenii tei tei tai aileponii, ti hangka matile. 25Mpou- mah karing go lungsyiisii kaleimei teinii teitei magale, sateichii sazyii pouryii aito mpou mah karing go ngou karoumei teinii teitei kalui kaga karing jangpii kaibam tangle. 26Mei kata hangninanii gu nga ngasii leileponii, ahnii gutai switang karamle; sateichii Inii kalei nitei gu nga kangamei hangniido teiki tei leitangle; mei kata hangninanii gu nga ngasii leileponii, Pfiinii ahgo dzyiirou tangle.
Jisunii mpoumah katai kaang kito katam
27“Aitoinii gulung kamage takle, sateichii Inii kadapei tam tangpo? Pfii-o, tinglang aikito n-gu keipyiilo. Makle, kaang aijangpii tinglang aiki ai Inii gongtakle. 28Pfii-o, go zei dimatulo.” Teito sating gamto rok hangninii gong takle, “Inii teitei pumtei kava tiido tiimadi takle, sateichii teitei tiido tiimadiloi tangle.”
29Kuto sat kaleimeinii teitei shii wosii ai ai sating tuitakle sii tamle, kakimei kangkanii, “Sating gamlui hangninanii mpougo sam rashiitakle” sii tamle.
30Jisunii khekalatle, “Rok ai gujangpii gongmakle, nlenii gonyii jangpiile. 31Sazyii pouryii aigo samtak tiitang karam tinglang tei aitoile, sazyii pouryii mah apum katiimeigo baatoi tang karam tinglang tei aitoile. 32Sateichii sazyii pouryiito poimakhii sekchii, meihang gotei gudakii Inii chyii gong tangle.” 33Mpounii katam ainii mpounii taitang karam tei kada takumpiinii taitangpo katu tei mangoule.
34Meimoinii khekalatle, “Krista teinii kalui gasii ringtang lesii nyii- mah ajaitingshang kito tamle, teitiileponii, meinah sapfii mpou gotei poisagoi tang karamle katu nangnii kada takumpiinii tam wotangpo? Meinah sapfii mpou ai tapo?”
35Jisunii ahnyii dakii tamle, “Nlailoisii tinglang shangniikii kava tei gonyii go kaswisii gonyii kak kito leitangle, kamyii tei gonyii phyiiryii gong kasu tiisii, gonyiinii kava tei dou kalei kak-kii, tatlo, kadapokii kamyii kito tat kalei mei teinii kadaki tatziipo katu ahnii timakle. 36Kava tei gonyii da kalei kak-kii, kava mah nahmei tiitang karam jangpiinii, kava gotei malumlo.”
Meinah mah malum kasu
Jisunii sam ai tam kaleitai, mpounii tat tutakle ninado ahnyii dato mbeiwo takle. 37Mpounii tiika- mangou siiti hangniikii ahnyii doito tiikido, ahnyiinii mpougo malum makle; 38teipiinii Lungkakalingpii Isaiyanii tam kabam sam hangtei kasangpii madou gong matutang karam jangpii katunii,
“Bangpii, nyiinii katam samtam tei tanii malumpyiipo?
Sateichii tapiidakii Bangpii mah teimaham tei mati mangoupyiipo?”
39Teijangpii ahnyiinii malumpei wolak kiile, dapodinchii Isaiyanii nlailoisii tamle,
40“Ahnyiinii mik ngou matulak tang karam jangpii ninado ahnyii mah lungswi teinii timatulak tang karam jangpii
ninado ahnyiinii guda nlaigongsii,
Inii ahnyiigo rakani tei tii mbipyii matulak tang karam jangpii,
Saraanii ahnyii mik tiimachet aitakle,
sateichii ahnyii mah lungswi tei tiimatai aitakle.”
41Isaiyanii Jisu mah pumtei kava tei ngou kalu jangpii mpounii mpoumah kaang kito tamle.
42Teitiikido Jehudimei ki teima- ham kajum mei hangkanii mpougo malum wotakle, nlenii Jehudimei mah ndwini teito paktoi kasu tiisii, Farasismeigo kahing jangpii ahnyiinii teimah kaang kito madupii rashii makle. 43Kadapokii Saraanii tam kamatoi sung meinii tam kamatoi tei ahnyiinii kisii marai takle.
Jisu mah samkang piinii samtak katii
44Jisunii rok sagoisii tamle, “N-gu kamalum ahteinii n-gu roinii malum makle, nlenii n-gu lang kama- gong mpou godo malumle. 45N-gu kangoumei hangteinii n-gu lang kamagong mpou godo ngou leile. 46N-gu kamalum mei hangteinii kamyii kito lei matulak tang karam jangpii, Inii kava tiisii sazyii pouryii gongtakle. 47Mei kata hangninanii gusam shii wosii teigotei swisu leponii Inii ahgo samtak tiimakle; kadapokii Inii sazyii pouryiigo samtak tiitang karam jangpii gong- makle, nlenii Inii sazyii pouryiigo keipyii tang karam jangpii gongle. 48N-gu mazhii kasu ninado gusam lukasu ahgotei samtak tiitang karam hangninii leile, Inii tam kabam sam teipiinii kalui piinei leimik mpoumah samtak tiitangle. 49Kadapokii Inii gumah teimaham kito tam makle, nlenii n-gu lang kamagong Pfii teinii, Inii kadapei tam tangpo ninado kadapei malhii tangpo katu mpounii n-gu kakhatpyii takle. 50Mpoumah kakhatsam ainii kalui kaga karingle katu Inii tile; teipiinii Inii tam kalei ai Pfiinii gudakii katam tei Inii tam leile.”
Currently Selected:
JON 12: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.