JON 10
10
Jaokakoipii mah ndasam
1“Kasang kasangpii Inii gonyii dakii tam leile, ki takam kito liit supiinii, pwidi kaki kito marakhiisii jaokoi kak ki tat kaliit ah teinii karagameile ninado mah kasoumeile. 2Nlenii ki takam kito tat kaliit ah teinii Jao mah Jaokakoipii teile. 3Ki takam kakoipii teinii mpou jangpii ki takam tei laatpyiile sateichii mpou mah jaohang teinii mpourok tei shiile, sateichii mpounii mpoumah jao hang gotei mpou mpou zei tei latsii saba pangpatpyiile. 4Mpounii mpoumah hangtei saba pangpat sek-kii, mpounii ahnyii doi reisii tatleile sateichii jaohang teinii mpoutai swi leile, kadapokii ahnyii- nii mpoumah roktei tile. 5Ahnyiinii mei kakimei taitei swisang swilakle, nlenii ahnyiinii ah dato pakga tangle, dapodinchii ahnyiinii mei kakimei mah roktei timakle.”
6Ndasam ai Jisunii ahnyii dakii tamle, nlenii mpounii ahnyii dakii tam kalei tei kadapeipo katu ahnyiinii timakle.
Jisu kabi Jaokakoipii
7Teipiinii Jisunii ahnyii dakii nlailoisii tamle, “Kasang kasangpii Inii gonyii dakii tam leile, Inii Jaomah takam teile. 8Gudoi reisii kagongmei hangteinii karagamei ninado meimah kasoumei hangle, nlenii Jaohang teinii ahnyiigo shii- pyii makle. 9Inii takam teile, mei kata hangninanii gudato liit leponii, ahgo keipyii tangle sateichii ahnii tatpat tatliitsii hiiboi kabi tei doutangle. 10Karagamei teinii raga tang karam jangpii ninado gitang karam jangpii sateichii tiimaga tang karam jangpii roinii gongle. Inii gonyiinii karing tei doumatu tang karam jangpii sateichii teitei moisii doumatu tang karam jangpii gongle.
11“Inii kabi Jaokakoipii teile. Kabi Jaokakoipii teinii mpou mah Jaonah hang jangpii mpou mah karing tei pyiile. 12Jaohang gotei mpoumah sek tiikasu, Jao kakoipii kasu ninado janglai kalu ahteinii sangyii gong kalei tinglang kak, jao hang gotei rat toi aisii pak tule; ninado sangyii teinii ahnyiigo num wole ninado baamarou maruk toile. 13Mpounii pak tule dapodinchii mpounii Jao hang jangpii samah kado maningsei makle ninado janglai kalumei hangniniile. 14Inii kabi Jaokakoipii teile. 15Pfiinii n-gu tisii kalei takumpii sateichii Inii Pfiigo kati takumpii, Inii gumah hang gotei tile, sateichii gumah hang teinii n-gu tile ninado Inii Jao hang jangpii gumah karing tei matou pyiile. 16Sateichii jaokoi aiki haikasu gumah jao kakido leile; ahnyii goteido Inii pang gong tang karamle, ninado ahnyiinii gumah roktei shii tangle; sateichii ahnyiinii Jaoka- koipii hangniniigo kaswisii jaokoi hangninii tiitangle.
17“Kaang aijangpii Pfiinii n-gu lungsyiile, dapodinchii Inii gumah karing ai nlailoisii dou kabui tiisii Inii gumah karing ai matou pyiile. 18Mei kaniido gumah karing poitoi makle, nlenii Inii guroinapii mazhiisii matou pyiile; Inii teitei matou tang karam gumah teimaham leile, sateichii Inii teitei nlailoisii poiloi tang karam Gumah teimaham leile; kakhatsam ai Inii Pfii dato doutakle.”
19Sam aihang jangpiinii Jehudi- mei kak kiteito njairiit riit pat takle. 20Ahnyii mei hangkanii tamle, “Mpounii sara kashyii hangninii kaswi leile ninado n-gok leile, gonyiinii dajangpii mpou sam shii leipo?”
21Kakimei hangteinii tamle, “Ai sara kashyii kaswi kaleimei mah samtam makle, sara kashyiinii mik kachetmei mah tii-mbipyii wobuipo?”
Jisugo mazhii kasu
22Teitaito Saraa kamaningki tiikamatei mah takbai tei Jerosalem kito pat takle; 23tei tei sateidoule, sateichii Jisunii Solomon mah nsung- bam kamwi ki, Saraa kamaning kilung teito tatsii leile. 24Teipiinii Jehudimei hangteinii mpougo gong bangmagwisii tamle, “Nangnii nyiigo tinglang kada takii maning rarhiisii mbam tangpo? Nang Krista teile- ponii nyiigo madurahapii tampyiilo.”
25Jisunii khekalatle, “Inii gonyii dakii tam takle ninado gonyiinii malum makle, Inii gu Pfii zei kito katiihang teinii gumah sakchyiile; 26nlenii gonyiinii malum makle, dapodinchii gonyiinii gumah jao hang kak kitei haimakle. 27Gumah jaohangnii gumah roktei shiile sateichii Inii ahnyiigo tile ninado ahnyiinii gutai swile. 28Inii ahnyii dakii kalui kaga karing tei pyiile, ahnyiinii madou kado gasang gatu- lakle sateichii mei kaniido ahnyiigo gubah kito numpoitu wolakle. 29Gudakii kapyii gu Pfii teinii hang doito dikile sateichii mei kaniido Pfii mah bah kiteito poitoipei wolakle. 30I ninado Pfii teinii hangniniile.”
31Jehudimei hangteinii mpougo kuitupii rot tang karam jangpii kuitu nlailoisii poi wotakle. 32Jisunii ahnyii dakii khekalatle, “Aikak kito kadapii jangpii gonyiinii n-gu kuitu rotnesiipo?”
33Jehudimei hangteinii mpougo khekalatle, “Tha kabi jangpii nyiinii n-go kuitu rotleziimakle, nlenii Saraago tam kamashyii jangpiiniile, sateichii nangnii mei hangninii tiisanii n-go roinapii n-go Saraa tiikatu jangpiiniile.”
34Jisunii ahnyiigo khekalatle, “Gonyiimah ajaitingshang kiteikii, Inii tam takle, ‘Gonyii sara hangle,’ sii ryiibam makpo? 35Saraa mah samkang gong tang kalu ahnyii gotei mpounii sarahang sii latleponii (Sateichii kabi rasam teinii tiipakpei wolakle.) 36Inii Saraa nah sapfii mpoulesii Inii tam katu jangpii, Pfiinii kalai wosii sazyii pouryiikii lang m-mang kapyii ah gotei, nang Saraago tam mashyiilesii mpoumah kaang kito gonyiinii tam leipo? 37Inii Pfii mah kamaning kamazhii tei tiiziimak leponii n-gu malum sulo, 38nlenii Inii tiiziileponii, gonyiinii n-gu malum mak kido, Pfii teinii gudato leile sateichii Inii Pfii dato leile katu gonyiinii tigong tang karam jangpii tha hangtei malumlo.”
39Nlailoisii ahnyiinii mpougo jumtang karam jangpii tiitakle, nlenii mpounii ahnyii bah kiteito nlek wotakle.
40Teito Jon-nii dwi mpum pyiisii kalei Jordan karyii lugang tei Jisunii nlaipatle sateichii mpounii teikito ntak takle. 41Sateichii mei hang- kanii mpouda gongsii tamle, “Jon-nii siiti tiikamangou mah kado tiimakle, nlenii Jonnii sapfii mpou aipou mah kaang kito katam hangtei kasang takle.” 42Sateichii mei hangkanii bam teikito mpougo malum wotakle.
Currently Selected:
JON 10: NAG2
Highlight
Share
Copy
Want to have your highlights saved across all your devices? Sign up or sign in
Maram Naga, KARANU KABI SAMTAM © Bible Society of India, 2007.