Matyu 13
13
Basef womun etina aman nowaha olelemb gwa'aimi aof
(Mk 4:1-9; Lu 8:4-8)
1Nemaf anama atona Jisas nakwaha ipat nawis ande' nafe' nape felefele'ma walemb batupa'manai lu'unai. 2Ea' amam nematawa hiesi safi'i salipana sape. Ea' nalata natoma anona bot sa'unai, esis saitu akata. 3Ea' na'ipasa basef hiami wamon etini na'ipas na'ama na'i, “Anona aman nafe' nowaha olelemb witim si'i rais anona aof. 4Anan nowahom nafe', anom mowa eaf safe'ma ea' amiguf mufia' mafi'i ma'am. 5Ea' anom mowa otambaiguma etap ina lu'una, natoma ilif atogon, ina nowala owin. Ea' mataga mehip. 6Ea' owaf naluwi naham alim masilimb ina mowala etap ea' alim. 7Ea' anom mowala la'afena mandelef wandafumi mataga malomam maofenia wit, ea' ina mail mola gwa'aimi, owa'. 8Ea' anom mowa mafe' etap bu'unai ea' mataga malo mail mola gwa'aimi. Anom mola 100-peleim, anom mail mola 60-peleim, ea' anom mail mola 30-peleim atom. 9Ipe' aligah magalipei ma pame' basef amama, peme'am andeande' ukup okokomam.”
Basef ofagema ma Jisas na'i basef womun etin
(Mk 4:10-12; Lu 8:9-10)
10Ea' amam alupumi ananimi mafi'mai Jisas ma'ipana ma'i, “Dei' maina ine' na'ipasa basef esis womun etin?”
11Ea' nagwamama basef na'i, “God nihi'ambepa basef ofagema mape mandambahi'i ma ipe' piowis kingdom heveni. Ea' epes isima, owa'etin. 12Emi egafis sembale'efa basef Godi nambimb God nowatanimasam wapoti'. Ea' isima owa' sembale'ami, nambimb basef kwawie'im amama esis sombale'efami, God nondalombasam esis sopan etin. 13Basef ofagema ma ae' dei' a'i basef wamun etinami ma esis, amama.
‘Esis sotologon, ea' ina nambimb siti anom amamaga, owa'. Ea' esis some' basef aligah asasimi ea' ina sogawa ofagema, owa'.’ 14Esis sanda'am na'ama ma anom basef fowa'imi mandawalap endilisi. Basef amama anona profet Aisaia fowa' God na'ipanam nanda'ami ma'iam na'ama ma'i,
‘Ipe' anona nemaf pegehembe' peme' basef, ea' ina pegawa ofagema. Ipe' petologon la'ela'ef, ea' ina piti anom amamaga, owa'.
15Dei' main, ukup amam nematawa isima mase'as endilisi, aligah asasimi mase'as ukup iwanima seame' basef. Ea' sasopama naep asasimi ma siti amamaga. I'i owa', seme' basef aligah asasimi ma sogawa basef ofagema ma ukup asasimi. Ama esis somboma opalef sila ae' ma enda'as bo'wes wapoti'. Owa'.’
16Ea' ipe' pandanifel. Dei' main, naep ipe'imi ea' mati amamaga, aligah ipe'imi mame' basef. 17Ae' a'ipipa endilisi, fowa' gani amam profet hiami maloma anom amam manda' waf bu'unai ma'i miti amamaga amama dei' ipe' patulumi, owa'. Ukup amamumi maimailam endilisi ma mame' basef amama ipe' pame'ami. Owa. Amam ina mame'am.
Jisas nawalipama basef ofagema womun etina olelemb gwa'aimi
(Mk 4:13-20; Lu 8:11-15)
18Ipe' peme' basef ofagema amama womun etina aman anama nowaha olelemb gwa'aimi aof. 19Basef amama ma epes siowis kingdom heveni mape na'ama. Olelemb mowa eafi amama si'i epes isima same' basef amama, esis ina okokoma basef, owa'. Ea' Satan nafi'i nofa' basef amama God nase'asam opalef asasimi nakwahom nafe'. 20Ea' anom mowa mafe' anagon otambaiguma, amama si'i enis epes same' basef Godi sofa'am mehip sandanifelamam. 21Isima si'i masilimb ina mowala etap owin. Esis sembale'am nogota bandana etin ea' nemanimi matagamas enis amam nematawa sandaiwa'ma sembale'a basef Godi sanda'as findiwas sahas sanda'masa waf aonai ea' sandahagas satanima. 22Anom mowa mandelef wandafumi la'afen, amama si'i enis epes same' basef sailam safe', ukup matamea ma amamaga amama mape etapi ma ukup maimaila moni maim hiami ea' amama mataga maofania basef Godi. Ea' ina sombale'ef sanda' waf bu'unai la'ifis, owa'. 23Ea' anom mowa etap bu'unai si'i epes isima same' basef bu'wami ma ukup asasimi maimailam sogawama sanda' waf bu'unai. Enis sanda' waf bu'unai si'i olelemb mola 100-peleim, enis si'i mola 60-peleim. Ea' enis si'i mola 30-peleim atom.”
Basef womun etina otalef awami malo aof
24Ea' Jisas na'ipasa anom basef womun etin wapoti' esis amam nematawa hiesi na'i, “Epes siowis kingdom heveni si'i anona aman nafe' nowaha olelemb bu'wami gwa'aimi aof ananinai. 25Anom nimeguf mafe'ma ea', owamb esis hiesi sa'ihi, anona aman naumbihinai nafi'i nowaha otalef awami wapoti' aof anama anan do'ok nowaha olelemb bu'wami ea' nafe'. 26Anom nimeguf mafe'ma ea' olelemb amama bu'wami mataga ma monafa mola gwa'aimi, amam manda' maola aman ofagonama aof ea' mati otalef awami mataga mape maloma olelemb bu'wami.
27Ea' mati na'ama, mafi'i ma'ipa anan ma'i, ‘Dembinai, afa' wa'i ine' newaha olelemb bu'wami aof ine'inai. Ea' otalef amama awami malo. Emi newahom mataga?’
28Ea' na'ipam na'i, ‘Anona aman naumbihinai nanda'am.’
Ea' ma'ipana ma'i, ‘Ine' na'i afa' ofe' ugi otalef amama awami owa'aniam mo'oh atogon?’
29Ea' aman anama na'ipam na'i, ‘Owa'. Na'ama pelalama wit pigiam moloma otalef awami. 30Ipe' kwahowam mope atifima la'isitai, ea' usifa'am. Nogota anama sofa' gwa'aimianai, ae' i'ipa amam manda' maol anama i'ipam i'i, “Ipe' piwa'ania otalef amama awami piwasi'am ondogw mo'oha peofam. Ea' petama wit pefa'am pekolasom mofe' miowis mo'oh ipat ae'anai.” ’ ”
Basef womun etina nalelef anona lawag mastet naloma yis manda' bret natifi
(Mk 4:30-32; Lu 13:18-21)
31Ea' Jisas nase'asa anom basef womun etin wapoti' na'i, “Epes siowis kingdom heveni si'i nalof su'utipi sa'umi. Anona aman nofa'am nawam aof ananinai. 32Nalelef mastetimi sa'usa'umi. Ina lu'um si'i su'utip gwa'aimi lawah hiami, owa'. Amama sa'usa'um endilisi. Ea' mataga malo, lu'um mikila' gwa'aimi hiami mape aofi. Amam mataga si'i lawag lu'unai ea' amiguf mafi'i mala alegah mail agof.”
33Ea' nawalapa anom basef womun etin wapoti' ma esis na'i, “Epes isima siowis kingdom heveni si'i yis ano'w nemata'w kofa'am kwambomam maloma plaua hiami mala dram lu'unai ea' plaua hiami matef lu'um.”
Jisas nawalapa basef womun etin
(Mk 4:33-34)
34Ea' Jisas nawalapa basef amama hiami womun etina amam nematawa isima hiesi. Anan ina na'ipasam alihim, owa'. Na'iam womun etin. 35Anom basef anona aman profet fowa' gani nanda'ami dei' mataga alihim mandawalap mapan. Profet anama na'iam na'ama na'i,
“Anona nemaf ae' ie'i malogel i'i basef womun etin. Ae' ie'i basef mape mandambahi'i dambadamba God nanda' ilif etap mafi'i mafi'i mataga dei'.”
Jisas na'ipa alupumi ananimi ma basef ofagema womun etina otalef awami
36Ea' Jisas nohafel nakwaha esis amam nematawa hiesi nafe' ipat, ea' alupumi ananimi mafi'mai anan ma'ipana ma'i, “Basef amama womun etina otalef awami mataga aof, ine' newalapa ofagema ma afa'.”
37Ea' Jisas nagwamama basef na'ipam na'i, “Aman nowaha olelemb bu'wami anama ae' ataga epen endilisiwei. 38Ea' aof anama si'i wambel etap anae' hiagoma. Ea' olelemb amama bu'wami si'i epes siowis kingdom heveni. Ea' otalef awami, amama si'i epes awasi Satani. 39Ea' aman anama naumbihinai nowaha otalef awami, anan Satan. Ea' nogota anama sola gwa'aimianai, anama si'i nemaf akutainai ma etap anae' hiagoma. Ea' amam amama mola gwa'aimi witi, amama si'i amam ensel. 40Nemaf anama amam motama otalef awami mofam nif hi'ilalm na'ama etin si'i nemaf akutainai. 41Ae' ataga epen endilisiwei anona nemaf ae' esapa'i amam ensel ae'ami ea' motofa amamaga amama hiami manda' epes sanda' waf aonai moloma amam nematawa isima hiesi sanda' waf aonai muli'amonas seakwaha kingdom Ae'anai. 42Ea' amam ensel mokwaha epes isima sefe' nif lu'wami fandomi sepe nif amama selef kwapete'as nalelef tilili talala' sope awes. 43Nemaf anama amam nematawa bu'wasi seataga wanefigeis si'i aon alipunai nalatawi kingdom Ahalomasi. Epes aligah mapaipei, ipe' peame' basef amama andeande'.
Basef womun etina aman nati amamaga satalom otamba hiami mandambahi'i
44Epes siowis kingdom heveni si'i anom amamaga satalom otamba hiami sambaho'am ma'oh anona aof etap. Ea' anona aman nafi'i natolom nambaho'am wapoti'. Anan nandanifel endilisi nafe' nofala enis epes safi'i sase'ana moni ma satala amamaga ananimi hi'alam. Ea' nofa' moni anama nafe' natala aof anama.
Basef womun etina ombahigis satalis otamba hiami
45Anom basef wapoti', epes siowis kingdom heveni si'i anona aman nanda' bisnis nagolopa enis ombahigis bu'wasi etis. 46Ea' nati enis bu'wasi endilisi satalis otamba hiami nofala enis epes safi'i ma sase'ana otamba satala amamaga ananimi hi'alam. Ea' nofa' otamba ma isima nafe' natala ombahigis isima fasisi etis.
Basef womun etina anemb
47Anom basef wapoti'. Epes siowis kingdom heveni si'i anona anemb anom amam mafe' malana nowala walemb batupa'manai lu'unai malimai agof mamumami. 48Ea' anemb anama si'ina ma agof mahende'ana nafi'i akata wata'ita. Ea' mape masifa'ma agof bu'wami atom malo'am holalef. Ea' awami makwahom. 49Ama anona nemaf akutainai etap anae' ea' na'ama etin si'i amam masifa'ma agof bu'wami dei awami dei. Nemaf anama amam ensel mufi'i misifa'mas sanda' waf aonai sape la'afena amam nematawa isima bu'wasi mofa'as mefe' 50mokwahis sefe' nif lu'wami fandomi. Ama seapan nif amama lu'wami sowa selef kwapete'as nalelef tilili talala' sopan la'ela'ef.”
Basef endilisimi amama namumi maloma apimi
51Ea' Jisas nahali' alupumi ananimi na'i, “Ipe' ea' pegawa basef amama hiami o owa'?”
Ea' magwamana basef ma'i, “A'e.”
52Ea' na'ipam na'i, “Amom dambami mawalipasa mi'uli Godi molafa basef ananimi ma miowis kingdom heveni, amam mandahama si'i anona aman ofagonama ipati. Anan nafe' nawis ipat nomon nofa'ai amamaga bu'wami namumi maloma apimi ea' nofa'am nafi'i.”
Esis amam nematawa sape Nasareti sase'ana alafugahama Jisas
(Mk 6:1-6; Lu 4:16-30)
53Jisas nawalipam basef amama womun etin ma ea', nakwaha wambel anama 54nafe' wambel ananinai ofagama. Ea' nawis ipat esis Juda sa'i basef sapeinai nasefela basef Godi na'ipasam. Anan na'iam na'ama esis gegelalasis kwapete' sa'i, “Gawa anama naloma pepel anama ma nanda' amamaga si'i God nanda'ami, anan nofa'ana eti? 55A'i aman anama nogalomana aman nala' ifagwi Maria kolanai? Ape' mogawa owalopana ananimi Jems Josep Saimon Judas mape na'ae. 56Henitiamana ananiwai wape walomapa na'ae. Ea' amamaga amama gawa bu'unai anan nofa'ana eti?”
57Ea' sowa' alafugaha anan.
Ea' Jisas na'ipas na'i, “Anona profet nofa' agel lu'unai wambel hiagoma deindei, sa'i anan dembinai sembale'efana. Ea' ina nofa' agel lu'unai wambel ofagama ananima, wambota ananinai sapoma, owa'.”
58Ea' esis owa' sembale'efana, owa'. Na'ama dei' anan ina nanda' anom amamaga la'ifimi hiami wambel anama, owa'.
Markert nå:
Matyu 13: aojF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2013, Wycliffe Bible Translators, Inc. All rights reserved.
