Matyu 12
12
Jisas atona Dembinai ma nemaf anama sapoma noma'wanai Sabat
(Mk 2:23-28; Lu 6:1-5)
1Anona nemaf esis Juda sapoma noma'wanai Sabat, Jisas nafe' anagon, nataga anona aof sawa witanai ea' nawis. Ea' alupumi ananimi mafe' malomana nolomaham magi anom wit maufi magwa'am. 2Ea' amam Farisi mati waf anama alupumi Jisasi manda'anai ea' mahali'ana ma'i, “Ine' niti waf anama alupumi ine'imi manda'anai. Amam mosombala mi'uli ma nemaf anama Sabat mapoma noma'wanai. Dei' maina amam manda'am na'ama?”
3Ea' Jisas nagwamam na'ipam na'i, “Ipe' pegawa basef amama ea' ma waf fowa' gani dembinai king Devit nanda'anai. Nemaf anama Devit naloma alupumi ananimi nolomaham. 4Anan nawis ipat lu'unai Godi nomon na' bret anama amam pris mondolali maso' Godanai. Ea' anan na'ana naso' alupumi ananimi wapoti' ma'ana etin. Ea' mi'uli ape'inai na'i amam pris atom mea'ana. Enis epes owa'. Anan ina naila mi'uli anama, owa'. 5Ipe' patalifa basef amama mape buk mi'uli Godi ea' ma amam pris manda' maol ipat lu'unai Godi nomon nemaf anama Sabat. Basef amama ma nemaf sapoma noma'wanai amam ina magi'am, owa'. Mumbisila'am mawala mi'uli anama. Ea' amam ina manda' waf aonai, owa'. 6Ae' dei' a'ipipa, enin epen dei' nape na'ae enin nikila' ipat lu'unai Godi. 7Basef mail buk Baibel fowa' amam manda'ami ma'iam na'ama ma'i, God na'i, ‘Ae' ina okom na'i bulmakau mafis pindalalima ae'ami, owa'. Ae' okom na'i ipe' piti sahin owan ipe'isi uwahipis.’
I'i ipe' pegawa basef amama Godi ofagema, ipe' ina pewaloga epes isima owa' sonda' anona waf aonai, pi'i awasi. Owa'etin. Ipe' owa' pegawami. 8Dei' main, ae' ataga epen endilisiwei, ae' atowe ape Dembiwei ma nemaf anama Sabata i'ipipa maina maol andeande'ma pila basef penda'ana nemaf anama.”
Jisas nanda' aman lagel aonainai bo'ona nemaf anama sapoma noma'wanai
(Mk 3:1-6; Lu 6:6-11)
9Jisas nohafel nakwaha aof anama nafe' nawis anona ipat esis Juda sa'i basef sapeinai. 10Ea' nati anona aman lagel aonainai nape ipat anama. Wa'ana naga' dindigina nailana. Anom amam ma'i mogolopa anona eafa meambaso'ma Jisasa anom basef baso'maimi ma monda'mana basef.
Ea' mahali'ana ma'i, “Afa' andeande'ma wigiambama enis epes awesisi ma nemaf anae' sapoma noma'wanai, o owa'?”
11Ea' Jisas nagwamam basef na'ipam na'i, “I'i anona aman ipe'inai sipsip ananinai nefe' newala nepe anona nowaga lounai nemaf anama Sabat sapoma noma'wanai, ipe' pafe' pagianai. 12Waf anama bu'unai. Ea' epes sikila' sipsip endilisi. Ea' na'ama etin ape' monda' waf bu'unai migiambama epes nemaf anama mapoma noma'wanai.”
13Ea' Jisas na'ipa aman anama lagel aonainai na'i, “Dowa lagel ine'inai usi'ina.”
Ea' aman nando lagel ananinai nataga bo'ona wapoti', si'i wa'ana. 14Ea' amam dambami Farisi mohafel mawis ande' munduwa'anima ma'i basef mandame'mama moha Jisas neaga'.
God nandandepa Jisasa neanda' maol ananinai
15Jisas nogawa amam ma'i mohana neaga'. Ea' nakwaha wambel anama nafe' ea' hiesi sailana safe', nanda' isima awes nanda'asi sataga bo'wes. 16#Mt 8:4; Mk 3:12Ea' na'ipas mehip na'i esis ina sowalapa anan si'iana alihina, owa'. 17#Ais 42:1-4Anan na'ipas na'ama etin si'i anom basef God fowa' na'ipa profet Aisaiai. Basef amama mataga endilisi ma'iam na'ama ma'i,
18 # Mt 3:17 “Piti aman anama nanda' maola ae'i, ae' andandepana ea'. Nomonas ae'ami maimailana endilisi, okom ae'anai ea' bo'oma anan. Ae' nambimb ese'ana Ambal Bu'unai Ae'anai nuwalipasa basef ae'ami ma neawaloga epes hiesi owa' seagawa ae'i ma waf bu'unai usi'inai.
19Aman anama ina nonda' megah mahas ninifalis ni'ipas diga lu'unai, owa'. Esis ina some' malogel ananinai noga nie'i eaf lu'unai, owa'.
20Anona elifita sa'unai nondola'i anama anan ina nowalona, owa'etin. Ea' anona lam fandona sa'osa'ombel, anama anan ina nehefana noga', owa'. Anan nope nonda' maol la'ela'ef nefe' nefe' neatagama nemaf anama nonda' waf bu'unai nikila' endilisi waf aonai ma neawala.
21Ea' esis amam nematawa hiesi owa' seagawa ae'i sila basef ananimi sope sohafana ma niegiambamas.”
Esis sa'i Jisas nanda' maol naloma Belsebul, dembinai ma ambagof awami
(Mk 3:20-30; Lu 11:14-23, 12:10)
22 # Mt 9:32-33 Nemaf anama esis sofa'ai anona aman ambal aonai nawisanai safi'mai Jisas. Naep mase'ana malogel ananinai nase'ana, ea' Jisas nanda'ana bo'ona, na'i andeande' naep mati natologon nafe' andeande'. 23Ea' amam nematawa hiesi gegelalasis kwapete'as sa'i, “Aman anama anan Devit akunamana?”#12:23 Esis Juda sa'i agel anama Devit akunamana agel wa'ana ma Krais, God nandandepana nosapa'ana neafi'i.
24 # Mt 9:34, 10:35 Ea' amam Farisi mame' amama mambaso'am ma'i, “Anan natofa ambagof awami ma pepel anan dembinai ma ambagof awami agilinama Belsebul anan atona.”
25Ea' Jisas nogawa ukup amamumi na'ipam na'i, “I'i enis epes hiesi sape etap hiagoma anona kantri sondawaloga biefisa sopa', ina nambimb la'ifis, owa'. I'i enis epes wambota atotona sondawaloga biefisa sopa', esis nambimb ina la'ifisa seapa', owa'. 26I'i wambota Satani sondawaloga biefis seapa', nambimb wambota ananinai la'ifis si'imama? Owa'. 27I'i endilisi ae' atofa ambagof awami ma pepel Belsebuli, dei' emi nigiambama epes ipe'isi satofam? Owa'. Dei' epes isima ipe'isi etis sihi'ambepa basef ipe'imi owa' endilisimi. 28Endilisi, Ambal Bu'unai Godi nigiambama ae' atofa ambagof amama awami. Ea' dei' ipe' pegawa nemaf anama piowis wambota Godi numafipa dei' natagamepa ea'.
29Anom basef wapoti' amama. Enin epen ina la'ifina nefe' nuwis ipat anona aman la'ifinai napeinai nonda' wala amamaga ananimi, owa'. Enin ata' nili' nombalo'ana nowa'ana tatala'ina, anan la'ifina ma niowis nokolawefa nefa' amamaga ma'oh ipat aman anama.
30Emi egafis owa' alupisi ae'asi ma owa' sepe la'ela'ef seloma ae', esis naumbih ae'asi. Emi egafis owa' sekolasa sipsip moloma ae', esis satofa sipsip mafa' mafe' atona etin deindei. 31Ea' ae' dei' a'ipipa, anona nemaf God nokwaha waf aonai naninani hianai noloma basef findiwaimi hiami amam nematawa sanda'ami hi'ilam. Ea' emi egafis sanda' basef findiwama Ambal Bu'unai Godi, anona nemaf God ina nokwahomasam, owa'. 32Emi egafis seanda' anom basef awami findiwama ae' ataga epen endilisiwei, nambimb God nokwahomasa awami amama asasimi. Ea' emi egafis sanda' basef findiwama Ambal Bu'unai Godi, anona nemaf God ina nokwahomasam, owa'. Findiwa aonai la'ela'ef nopais, dei' nogota anae' nefe' anona nemaf nogota nigi' neatagai wapoti' nope la'ela'ef hihif.
Lawag aonai nail nola su'utip awami
(Lu 6:43-45)
33Lawah bu'wami mail mola gwa'aimi bu'wami. Lawah awami mail mola gwa'aimi awami. Dei' main, ape' mati gwa'aimi mailami, mogawa lawah bu'wami awami. 34Ipe' epes aopei si'i iguf mahasi, nambimb ipe' la'ifipa pi'i basef bu'wami? Owa'etin. Maim basef mape si'ima opalef epesi, amama atom esis sawalapama malogof asasimi. 35Epes bu'wasi, esis ukup bu'wami mapeis ea' sawalapa waf bu'unai. Ea' epes awasi waf hianai aonai napeis ea' sawalapa waf aonai atona.
36Dei' ae' a'ipipa. Basef hiami amam nematawa sa'iami, anona nemaf God nohali'asa basef amama ea' nowalogas nemaf anama newaloga epes hiesi anai. 37Basef ipe'imi atom anona nemaf God neme'epamam newaloga ipe' ni'i ipe' epes bu'wipei. Ea' i'i owa', ea' basef amama ipe'imi atom anona nemaf God neme'epamam wapoti' newaloga ipe' ni'i ipe' epes aopei.”
Enis epes sa'i siti amamaga pepel Godi
(Mk 8:12; Lu 11:29-32)
38Ea' nemaf anama anom mawalipasa mi'uli Godi maloma anom Farisi mahali'ana ma'i, “Tisa dembinai, afa' wa'i ine' nenda' anona ikwaf la'ifinai si'i God nanda'anai ma afa' ata' otolona.”
39Ea' Jisas nagwamam basef na'ipam na'i, “Ipe' amam nematawa dei' pape etap anae' panda' waf aonai pewa' alafugaha God. Dei' maina ipe' pa'i piti Ae' enda' anona ikwaf la'ifinai ma ihi'ambepa pepel Godi? Ae' ina ihi'ambepa pepel anama ipe', owa'. Ikwaf anama la'ifinai fowa' God nihi'amba profet Jona atona nambimb ihi'ambepana ipe'. 40Fowa' gani aman anama Jona aol lu'unai nowalo'ana nape opaf nomon nimeguf wanom, owambeh wanom. Ea' na'ama etina ae' ataga epen endilisiwei nambimb epe nimeguf wanom owambeh wanom etap nomon. 41Nemaf anama God newaloga esis amam nematawa esis epes Ninivaisi sohafel sola' basef motanima milipa ma waf aonai ipe' panda'anai. Dei' main, esis Ninive same' basef Godi Jona na'ipasami ea' samboma opalef safe'ma God. Ea' dei' anona nikila' Jona nape na'ae. 42Anona nemaf God nowaloga epes, nemaf anama ano'w nemata'w kwin dembe'wi kwapani gani wa'ol aon nowalama lambihilifinama kohafel koloma ipe' pape na'ae kogwamepa basef motanima milipa kwi'i ipe' epes aopei. Dei' main, kwin akwama kwapani gani etap nafe' notambela ea' kwafi'i kwame' basefa gawa lu'unai dembinai king Solomon nawalipasanai. Ea' dei' anona nikila' Solomoni nape na'ae.
Basefa ambal aonai notanima nafi'i nawis enin epen wapoti'
(Lu 11:24-26)
43Nemaf anama anona ambal aonai nakwaha enin epen nawisi nafi'i, anan nafe' anama fatauguma nogolopa anagon na'i neapoma noma'w. Owa'. Ina nati anagona neape, owa'. 44Ea' na'i, ‘Ae' etanima efe' ipat fowa' apeinai.’ Ea' nafi'i nati ipat anama sambefana andeande' sofalo'mana nape wafina. 45Ea' notanima nafe' nao'wai anom ambagof awami 7-peleim wapoti' mafi'i mawis mape ipat anama. Ambagof amama awami endilisi manda' waf aonai nikila' waf aonai fowa' nali' nanda'anai. Fowa' epen inima nape awen ea' dei' nape awen endilisi nikila' pe fowa' nali' napeinai. Ipe' amam nematawa dei' pape etap anae' panda' waf aonai, anona nemaf pepe awepa na'ama etin si'i epen inima.”
Mama'wana Jisasi kwaloma owapana ananimi
(Mk 3:31-35; Lu 8:19-21)
46Jisas ata' na'ipasa basef etin esis amam nematawa, mama'wana kwaloma owapana ananimi safi'i saitu ande' sa'i si'ipana anom basef. 47Ea' anona aman na'ipa Jisas na'i, “Ine' neme', mama'wena ine'ikwi kwaloma anom owapena ine'imi safi'i saitu ande' sa'i solomena si'i.”
48Ea' anan nagwamana basef na'ipana na'i, “Mama'we owape ae'asi emi egafis?”
49Ea' nanda' lagel nendela'wifa amam alupumi ananimi na'ipas na'i, “Piti mama'we kwaloma owape ae'asi isima. 50Emi egafis sila okom Ahalome nape heven ilif, ma sila waf ananinai, amama atom si'i mama'we owape henitiame ae'asi.”
Markert nå:
Matyu 12: aojF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2013, Wycliffe Bible Translators, Inc. All rights reserved.
