Awˬ hkuiˉ puiˍ ve li‸ 4
4
Kaˍiˉnaˆ leh Aˍbeˍlaˆ
1Aˍdanˍ lehˬ, yawˇ ve awˬ miˇ ma Eˇva‸ hta‸ heuˆ taˍ ve pa taw, maˇ maw maw yawˇ yaˇ hu la leh yaˇ paˍ teˇ gʼaˇ paw la ve yoˬ. Oˇ htaˇ Eˇva‸ lehˬ, Gʼuiˬsha awˬ bon na‸ laˇ ve pa taw, ngaˬ chaw yaˇ teˇ gʼaˇ gʼa peuˬ, teh‸ kʼoˆ leh yawˇ hta‸ Kaˍiˉnaˆ #4:1 Chi lehˬ gʼa peuˬ teh‸ kʼoˆ gaˇ ve yoˬ. teh‸ meh piˇ ve yoˬ. 2Awˬ hkʼaw‸ nawˉ awˬ nu ve yaˇ paˍ teˇ gʼaˇ kʼaw‸ paw la leh, yawˇ hta‸ Aˍbeˍ laˆ teh‸ meh piˇ ve yoˬ. Aˍbeˍlaˆ lehˬ yawˬ hawˉ paˍ hpeh‸ leh, Kaˍiˉnaˆ lehˬ muiˬ caˇ paˍ hpeh‸ ve yoˬ. 3Teˇ nyi htaˇ Kaˍiˉnaˆ lehˬ, yawˇ muiˬ gʼa taˍ ve awˬ shiˍ awˬ nu teˇ hpaˍ, Gʼuiˬsha hta‸ tanˇ piˇ tuˬ yuˬ laˬ ve yoˬ. 4Aˍbeˍlaˆ htawˇ, yawˇ ve yawˬ teˇ hpaˍ awˬ hkʼaw lo awˉ lawˉ peuˇ paw la ve yawˬ ehˉ teˇ hkeh yuˬ laˬ leh Gʼuiˬsha hta‸ tuˉ tanˇ piˇ ve yoˬ. Gʼuiˬsha lehˬ Aˍbeˍlaˆ ve tanˇ tuˬ hta‸ nyi ma cawˇ ve yoˬ. 5Ya‸ hkʼaˇ, Kaˍiˉnaˆ ve tanˇ tuˬ hta‸ Yawˇ maˇ ha‸ yuˬ. Chi hta‸ pa taw, Kaˍiˉnaˆ nyi ma zuhˆ jaˇ ve yoˬ. 6Oˇ htaˇ Gʼuiˬsha kʼoˆ ve, Aˬ hto‸ ma pa taw nawˬ nyi ma zuhˆ chehˇ ve le. 7Nawˬ cawˇ ve da‸ ve kanˉ hta‸ te ve kʼo, nawˬ htawˇ gʼa ha lehˬ tuˬ yoˬ. Nawˬ cha‸ chiˆ ve kanˉ hta‸ te ve pa taw, venˇbaˆ lehˬ nawˬ hta‸ te luˬ tuˬ nawˬ ve yehˬmiˉhpe‸ lo gaˬ la peuˬ. Ya‸ hkʼaˇ, yawˇ nawˬ hta‸ taˇ gʼaˇ piˇ lawˬ, teh‸ yawˇ hta‸ kʼoˆ piˇ ve yoˬ.
8Oˇ ve hkʼaw‸ nawˉ, Kaˍiˇnaˆ lehˬ yawˇ ve awˬ nyi paˍ Aˍbeˍlaˆ hta‸ kuˬ leh, Hkeu‸, ngaˬ huiˉ maˬ heh puiˉ hkʼaw lo ca guiˇ-e veuˬ, teh‸ kʼoˆ piˇ leh heh puiˉ hkʼaw lo shiˍ kʼai ve yoˬ. Yawˇ huiˉ maˬ oˇ kaˬ lo gaˬ htaˇ, Kaˍiˉnaˆ lehˬ yawˇ ve awˬ nyi paˍ Aˍbeˍlaˆ hta‸ tiˇ pehˍ ve yoˬ.
9Oˇ htaˇ Gʼuiˬsha lehˬ, Nawˬ ve awˬ nyi paˍ Aˍbeˍlaˆ hkʼaˬ lo le, teh‸ Kaˍiˉnaˆ hta‸ na nyi ve yoˬ.
Kaˍiˉnaˆ kʼaw‸ yaw hkʼaw‸ leh kʼoˆ ve, Ngaˬ maˇ shiˍ. Ngaˬ lehˬ, ngaˬ ve awˬ nyi paˍ hta‸ ha‸ shaˉ shehˍ hpaˇ hpeh‸ ve laˇ, teh‸ kʼoˆ ve yoˬ.
10Gʼuiˬsha kʼaw‸ kʼoˆ ve, Nawˬ aˬ hto‸ ma te chi taw taw haiˬ ve kanˉ hta‸ te ve le. Nawˬ nyi paˍ ve awˬ suhˍ lehˬ miˬguiˬ hkʼaw chehˇ taˍ leh, ngaˬ hta‸ kuˬ chehˇ ve yoˬ. 11Nawˬ lehˬ hkeu ve hta‸ gʼa hkanˍ tuˬ yoˬ. Miˬguiˬ chi lehˬ, nawˬ nyi paˍ ve awˬ suhˍ hta‸ hehˆ dawˬ taˍ peuˬ. Chi hta‸ pa taw, nawˬ muiˬ caˇ gʼa tuˬ ve maˇ heˆ. 12Nawˬ miˬguiˬ hta‸ mehˇ ve htawˇ, miˬguiˬ lehˬ nawˬ hta‸ awˬ shiˍ awˬ nu piˇ laˇ tuˬ ve maˇ heˆ. Nawˬ lehˬ miˬguiˬ chi hkʼoˆ chehˇ kuiˬ awˬ ti hkʼa deh‸ maˇ cawˬ leh gʼa hpaw toˇ chehˇ tuˬ yoˬ, teh‸ kʼoˆ piˇ ve yoˬ.
13Oˇ htaˇ Kaˍiˉnaˆ lehˬ, Nawˬ ciˍ yanˍ laˇ ve chi hehnˇ jaˇ ve pa taw, ngaˬ nawˬ mehˆ gʼuˇ suhˍ gʼa tawˆ kʼai tuˬ yoˬ. 14Ngaˬ lehˬ, miˬguiˬ chi awˬ hkʼoˆ chehˇ kuiˬ awˬ ti maˇ cawˬ leh gʼa hpaw toˇ chehˇ tuˬ ve pa taw, ngaˬ hta‸ mawˬ ve chaw teˇ hpaˍ ngaˬ hta‸ tiˇ pehˍ laˇ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ.
15Oˇ htaˇ Gʼuiˬsha lehˬ, Nawˬ kʼoˆ ve hkʼe maˇ heˆ. Chaw teˇ gʼaˇ gʼaˇ nawˬ hta‸ tiˇ pehˍ ve kʼo, tiˇ pehˍ shehˍ hpaˇ oˇ ve suhˍ pun gʼa kʼaw‸ hkanˍ tuˬ yoˬ, teh‸ kʼoˆ ve yoˬ. Hkʼe te leh, Kaˍiˉnaˆ hta‸ mawˬ ve chaw teˇ hpaˍ yawˇ hta‸ maˇ gʼa tiˇ pehˍ tuˬ, Gʼuiˬsha lehˬ Kaˍiˉnaˆ hta‸ awˬ maiˉ teˇ maˬ piˇ taˍ ve yoˬ. 16Oˇ ve hkʼaw‸ nawˉ, Kaˍiˉnaˆ Gʼuiˬsha mehˆ gʼuˇ suhˍ tawˆ kʼai leh, Eˍdenˍ hko mvuhˇ nyi tawˆ hpawˇ lo cawˬ ve Nawˇdaˆ #4:16 Chi lehˬ, hpaw toˇ ve teh‸ kʼoˆ gaˇ ve yoˬ. mvuhˇmiˬ lo ca hpaw chehˇ kʼai ve yoˬ.
Kaˍiˉnaˆ ve awˬ ceuˬ awˬ hkʼaˇ teˇ hpaˍ
17Kaˍiˉnaˆ lehˬ awˬ miˇ ma heuˆ leh, Eˇnawˆ teh‸ kʼoˆ ve yaˇ paˍ teˇ gʼaˇ cawˬ la ve yoˬ. Hkʼe te leh Kaˍiˉnaˆ lehˬ venˇ teˇ venˇ te leh, venˇ oˇ ve hta‸ Eˇnawˆ teh‸ meh piˇ ve yoˬ. 18Eˇnawˆ ve yaˇ lehˬ Eˇraˆ yoˬ. Eˇraˆ ve yaˇ lehˬ Maˍhuˇyeˍlaˆ yoˬ. Maˍhuˇyeˍlaˆ ve yaˇ lehˬ Maˍtuˉseˍlaˆ yoˬ. Maˍtuˉseˍlaˆ ve yaˇ lehˬ Laˍmehˆ yoˬ. 19Laˍmehˆ lehˬ, Aˍdaˆ leh Ziˍlaˆ teh‸ kʼoˆ ve awˬ miˇ ma nyiˇ gʼaˇ cawˬ ve yoˬ. 20Aˍdaˆ geh lo Yaˍbaˍlaˆ teh‸ kʼoˆ ve yaˇ paˍ teˇ gʼaˇ cawˬ ve yoˬ. Yaˇ paˍ chi lehˬ aˉ po kʼo hkʼaw chehˇ leh yawˬ hawˉ caˇ ve kanˉ hta‸ te ve chaw hui ve awˬ pa lonˉ hpeh‸ ve yoˬ. 21Yawˇ ve awˬ nyi paˍ teˇ gʼaˇ lehˬ, Yuˉbaˍlaˆ teh‸ meh leh, yawˇ lehˬ nawˍ meuˆ tinˍ hteˆ ve kanˉ hta‸ te ve chaw hui ve awˬ pa lonˉ hpeh‸ ve yoˬ. 22Ziˍlaˆ geh lo, Tuˇbaˍlaˆ Kaˍiˉnaˆ teh‸ kʼoˆ ve yaˇ paˍ teˇ gʼaˇ cawˬ ve yoˬ. Yawˇ lehˬ, cheuˬ jaˇ ve ca liˉ paˍ hpeh‸ ve yoˬ. Yawˇ ve awˬ nyi ma lehˬ, Neˍmaˆ teh‸ meh ve yoˬ.
23Teˇ nyi htaˇ Laˍmehˆ lehˬ, yawˇ ve awˬ miˇ ma nyiˇ gʼaˇ hta‸ kuˬ leh,
Aˍdaˆ leh Ziˍlaˆ-oˬ, ngaˬ ve tawˇ hta‸ na sheˬ. Ngaˬ hta‸ dawˆ laˇ ve chaw hta‸ ngaˬ tiˇ pehˍ piˇ peuˬ.
24Kaˍiˉnaˆ hta‸ tiˇ pehˍ ve chaw hta‸ suhˍ pun gʼa kʼaw‸ te hkʼaw‸ piˇ ve kʼo,
ngaˬ hta‸ tiˇ pehˍ ve chaw hta‸ suhˍ chi suhˍ pun gʼa kʼaw‸ te hkʼaw‸ piˇ ve yoˬ, teh‸ kʼoˆ piˇ ve yoˬ.
25Aˍdanˍ leh yawˇ ve awˬ miˇ ma lehˬ, yaˇ teˇ gʼaˇ kʼaw‸ cawˬ la ve yoˬ. Oˇ htaˇ Eˇva‸ kʼoˆ ve, Kaˍiˉnaˆ lehˬ Aˍbeˍlaˆ hta‸ tiˇ pehˍ peuˬ ve pa taw, Gʼuiˬsha lehˬ Aˍbeˍlaˆ awˬ tan ngaˬ hta‸ awˬ nu ve yaˇ paˍ teˇ gʼaˇ kʼaw‸ piˇ laˇ ve yoˬ, teh‸ kʼoˆ leh yawˇ hta‸ Sheˍtaˆ teh‸ meh piˇ ve yoˬ. 26Sheˍtaˆ htawˇ, Eˇno‸ teh‸ kʼoˆ ve yaˇ teˇ gʼaˇ cawˬ ve yoˬ. Awˬ yanˇ oˇ ve hta‸ tanˬ leh chaw yaˇ teˇ hpaˍ Gʼuiˬsha hta‸ oˉ kʼoˍ pui htaˇ, Gʼuiˬsha ve da‸ kehˬ ve awˬ meh hta‸ tanˬ yehˇ hkawˇ shiˍ la ve yoˬ.
Markert nå:
Awˬ hkuiˉ puiˍ ve li‸ 4: LHBE
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Lahu Bible Edited © Thailand Bible Society and Bible Society of Myanmar, 2010, 2020.
