Génesis 1
1
Chikichik tsawan tumainnum najankamu
1Yuus yama nagkamchakka nayaimpin, tura nugkancha najanawaiti. 2Turasha nugka atinka nayantsajai pachimnaik káshi jas ajakuiti. Tumakaisha Yuusa Wakaní nayantsanam muchitu jakuiti. 3Iman jas aun Yuus chichaak: ¡Tsaaptin atii! tusa tinaiti. Tusa tamauwaik tsaaptin jasuiti. 4Tumamtai Yuus pegker iisuiti. Tura tsaaptinan káshijai akankauwaiti. 5Tura tsaaptina juka “tsawai tutai atii” tusa tinaiti. Tura káshia juka “káshi tutai atii” tusa tinaiti. Nu aina najankamunam chikichik tsawan tumain uminkauwaiti.
Jimar tsawan tumainnum najankamu
6Nunikmatai Yuus chichaak: “Entsan kanakiarti” tusa tinaiti. Tusa tamauwaik entsa aina kanakiaruiti. 7Tura entsa nugkanam atinan, tura entsa yaki atinjai Yuus akantrauwaiti. Turamu asa imanisag ashi juaruiti. 8Tumamtai Yuus chichaak: “Ju entsa kanak agkaru juaka juka nayaim tutai atii” tusa tinaiti. Nu aina najankamunam jimar tsawan tumain uminkauwaiti.
Tres tsawan tumainnum najankamu
9Nunikmatai Yuus chichaak: “Entsa nugkanam a ju iruuntrati, tumamtai nugka atin muku jastii” tusa tinaiti. Tusa tamauwaik muku jasuiti. 10Tumamtai Yuus chichaak: “Muku jasa juka nugka tutai atii. Antsu entsa aina iruuntrara juka nayants tutai arti” tusa tinaiti. Tura umik Yuus pegker iisuiti. 11Tura chichaak: “Arak aina, nupa aina tura númi aina nugkanam tsapakar yagkurukar nerekarti” tusa tinaiti. Timau asa imanisag uminkauwaiti. 12Tura nugkanmagka: Arak neren aina, nupa neren aina, númi neren ainasha ashi tsapakuiti. Tumamtai Yuus pegker iisuiti. 13Nu aina najankamunam tres tsawan tumain uminkauwaiti.
Cuatro tsawan tumainnum najankamu
14-15Yuus chichaak: “Nugkan tsaaptin amajsatin aina, tsawai etsantratnusha tura káshi etsantratin ainasha nayaimpinam arti”. Tura “nu aina nuka tsawan aina, tura uwí ainasha nekatai atii”, tusa tinaiti. Timau asa imanisag uminkauwaiti. 16Tura Yuus etsantratnun jimaran najanawaiti. Tsawai etsantratnun etsan ima untan najanawaiti. Antsu káshi etsantratnun nantun shikapchin najanawaiti. 17-18Tura Yuus tsawantan akankataj tau asa, nugkan tsaaptin amajsatin ainan, tsawai etsantratin, tura káshi etsantratin ainasha nayaimpinam arti tusa tama imanisag uminkauwaiti. Tumamtai Yuus pegker iisuiti. 19Nu aina najankamunam cuatro tsawan tumain uminkauwaiti.
Cinco tsawan tumainnum najankamu
20Tura Yuus chichaak: “Entsanam matsamsatin ainasha, tura nanamtin ainasha nugkanam matsamsatin arti”, tusa tinaiti. Timau asa imanisag uminkauwaiti. 21Nayantsanam matsamsatnun kuntin shir uun ainan, tura chikich kuntin ainan tura nanamtin ainancha nanaas yaki yujastinan najankauwaiti. Nuna tura umik Yuus pegker iisuiti. 22Tura entsanam matsamsatin ainan chicharuk: “Yamaika entsa ainanam, tura nayants ainanmasha pampaartarma, tura nanamtin ainancha ju nugkanam pampaartarma”, tusa tinaiti. 23Nu aina najankamunam cinco tsawan tumain uminkauwaiti.
Seis tsawan tumainnum najankamu
24Tura Yuus chichaak: “Kuntin tagku ainan, tagkuchu ainan, tura japinas yujau ainancha ashi nugkanam pampaartarma”, tusa tinaiti. Timau asa imanisag uminkauwaiti. 25Nu kuntin ainan najanak umik Yuus pegker iisuiti. 26Tura Yuus chichaak: “Namak ainan, nanamtin ainan, kuntin ainan, tura japinas wekain aina nunasha nagkasau atin yamaika shuar iya jumamtinak najanami”, tusa tinaiti. 27Tusa niya numamtinan aishmagkun nuwajai najanawaiti. 28Tura namak aina, nanamtin aina, kuntin aina, tura japinas wekain aina nusha nagkasau atinaitrume, tusa Yuus pegkernum chicharkauwaiti. 29Tura Yuus chichaak: “Arak neren ainan, tura númi neren ainancha ashi umirkajrume. Nu ainaka atum yuatin ainawai”, tusa tinaiti. 30Tura kuntin ainan, nanamtin ainan tura japinas wekain ainancha chicharuk: “Atum yuatnurminka nupa ainan ashi umirkajrume” tusa tinaiti. Timau asa imanisag uminkauwaiti. 31Yuus nuna ashi najanak umik pegker iisuiti. Nu aina najankamunam seis tsawan tumain uminkauwaiti.
Markert nå:
Génesis 1: hubDBL
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2010, Wycliffe Bible Translators, Inc. All rights reserved.
