Luke 5
5
1ဘၣ်တနံၤဖဲယ့ၣ်ရှူးဆ့ထၢၣ်လိ နိၣ်ကံးနရ့ၤသး1အကၢၢ်ခွိၣ်နဲၢ်, ဘၠီၣ်ထီဖူၣ်ထီခၠၢတလိၣ်နံးလွိၤအသးဒ်သိး အကနၢ်ဟူဘၣ်ကစၢ်ယွၤအကလုၢ်ကထါအဂီၢ်လိ. 2အဝဲဒၣ် ထ့ၣ်ချံခံဘ့ၣ်ဘၣ်တၢ်စွံၢ်ထီၣ်ပၤအီၤလိ ထံကၢၢ်ခွိၣ်လိ. ဘၠီၣ်မၤညၣ်ဖွိတလိၣ်ဟးထီၣ်ပၤစၢၤလိချံတလိၣ်နဲၢ်အပူၤဘျီးသ့းဝဲအတွံၢ်တလိၣ်လိ. 3ယ့ၣ်ရှူးလဲၤနုလီၤလိ ချံတဘ့ၣ်အပူၤလိ အမဲၢ်စီၤပ့းတရူးအတၢ်, ဘျီးမၢအီၤလိ အကသူယံၤထီၣ်ချံလိထံကၢၣ်ခွိၣ်ပံတံဖွိလိ. အနံၤဝံၤဘျီး ယ့ၣ်ရှူးဆ့နီၤလိ ချံပူၤဘျီး သိၣ်လီၤသီလီၤဘၠီၣ်ထီဖူၣ်ထီခၠၢတလိၣ်လိ. 4အဝဲဒၣ်စံးဆၢဝဲ, ‘ ကစၢ်ဧၢ, ပမၤပၤစၢၤလ့ထီနၤဘျီး ပတဖီၣ်န့ၢ်တၢ်နီတမံၤဘၣ်, လၢၤဘျီး, နမဲၢ်စံးဒ့းန့ၤဘျီး ယကပၤလီၤတွံၢ်တလိၣ်လိ. 5စီၤရှံမိၣ်2စံးဆၢဝဲ, ‘ကစၢ်ဧၢ ပမၤပၤစၢၤလ့ထီနၤဘျီး ပတဖီၣ်န့ၢ်တၢ်နီတမံၤဘၣ်, လၢၤဘျီး, နမဲၢ်စံးဒ့းန့ၤဘျီး ယကပၤလီၤတွံၢ်တလိၣ်လိ.’ 6အဝဲဝီၤ ပၤလီၤတွံၢ်တလိၣ်ဘျီး ဒၣ်ဖီၣ်န့ၢ်နီၢ်ဖီၣ်န့ၢ်သ့းညၣ်တုၤနီၢ်လိ အတွံၢ်ကဘါယၤကွံၤလိ. 7လိတၢ်နံၤအဃိ, အဝဲဝီၤ ဝံၤဝၢ်ဝီၤအစဒ့လိ အမံဖီၣ်တလိၣ်လိ ချံအဂၤတဘ့ၣ်အပူၤဒ်သိး အကဟဲဘျီး မၤစၢၤအဝဲဝီၤ ဟဲဝဲဘျီး မၤပှဲၤချံခံဘ့ၣ်လုၤလိညၣ်, ပှဲၤဝဲတုၤနီၢ်လိချံတလိၣ်ဘူးလီၤဘျၢၣ်ဝဲလိ. 8စီၤရှံမိၣ်ပ့းတရူးထ့ၣ်တၢ်လိ ယ့ၣ်ရှူးအမံၤညါဘျီး စံးဝဲ, ‘ဟးထီၣ်ကွံၤလိ ယအိၣ်တကဲၢ်. ကစၢ်ဧိ, ယမဲၢ်ဘၠီၣ်တၢ်ဒဲးဘးဖွိတဂၤလိ.’ 9အဝဲဒၣ်လါဘၠီၣ်လိအအိၣ်ပကိးအီၤတလိၣ်ကမၢကမၣ်ဝဲကိးဂၤဒ့းလိ အဖီၣ်န့ၢ် ပၤစၢၤညၣ်အိၣ်နီၢ်အိၣ်သ့းအဃိလိ. 10ဘၠီၣ်မၤပကိးတၢ်လါစီၤရှံမိၣ်လိ အမဲၢ်ဝဲစီၤစ့းဘ့းဒဲအဖွိခွါ, စီၤယၤကိာ်လါစီၤယိၤဟၣ်တလိၣ်ကမၢကမၣ်ဝဲနဲၢ်နဲၢ်လိ. ယ့ၣ်ရှူးစံးဘၣ်စီၤရှံမိၣ်, ‘တဘၣ်သးပလံၤတၢ်တဂ့ၤ. စးထီၣ်မုၢ်တနံၤအံၤဘျီးဆူညါနဲၢ်, နကဖီၣ်န့ၢ်ပှၤကညီတလိၣ်လိ.’ 11အဝဲဝီၤစွံၢ်ထီၣ်အချံတလိၣ်လိ ထံကၢၢ်နံၤ, ပၤထီၣ်ကွံၤတၢ်ခဲလုၤခဲဆ့ ဘျီး ပိၤထီၣ်ယ့ၣ်ရှူးအခံနဲၢ်လိ. 12တဘျီနဲၢ် ယ့ၣ်ရှူးအိၣ်ဝဲလိဝ့ၢ်တဖျၢၣ်လိ ဘၠီၣ်ဘၣ်တၢ်ဆါအၢၣ်လိ အလီၤပျံၤနီတကလုာ်အိၣ်ဝဲဒၣ်တဂၤနဲၢ်လိ. ဖဲအဝဲထ့ၣ်ယ့ၣ်ရှူးနဲၢ်ထွိၣ်လီၤပှီၢ် အသးလိယ့ၣ်ရှူးအခီၣ်ထံးဘျီးဃ့ကညးအီၤဘျီးစံးဝဲ, ‘ကစၢ်ဧၢ နသးမဲၢ်အိၣ်ဘျီး နမၤကဆှီၣ်ထီၣ်ဂ့ၤယၤသ့းဝဲလိ.’ 13ယ့ၣ်ရှူးယူၤဝီၤ အစဒ့ဘျီးထွိးဘၣ်အီၤဘျီး စံးဝဲ, ‘ယသးအိၣ်ယဲလိ. မ်နကဆှီၣ်ထီၣ်ဂ့ၤတကဲၢ်.’ ဘျီး တၢ်ဆါအၢၣ် နဲၢ်ဘဟါမၢ်ဂ့ၤဝဲတဘျီဃီလိ. 14ယ့ၣ်ရှူးမၢလီၤအကလုၢ်ဘျီးစံးဝဲ, ‘တဘၣ်စံးဘၣ်ဘၠီၣ်နီတဂၤတဂ့ၤ. မဲၢ်မဲၢ် လဲၤတဘျီဃီလိဘၠီၣ်လုၢ်တၢ်အခွိၣ်အအိၣ်ဘျီး ဒွိးနဲၣ်နသးလိအီၤတကဲၢ်. အနံၤဝံၤအလီၢ်ခံဒ်သိးတၢ်အုၣ်အသးကအိၣ်လိ ဘၠီၣ်ကိးဂၤဒ့းအမံၤညါလိ နဘၣ်တၢ်မၤဟါမၢ်နၤလ့ အဂီၢ်နဲၢ်, လုၢ်ထီၣ်ပၤထီၣ်တၢ်ဒ်စီၤမိၤရှ့မါလွိၤတီၢ်ဝဲအသိးနဲၢ်တကဲၢ်.’ 15လၢၤဘျီး တၢ်ကစီၣ်ဘၣ်ဃးယ့ၣ်ရှူး အဂ့ၢ်ဟူထီၣ်သါလီၤဝဲအါန့ၢ်အလီၢ်ဘျီး ဘၠီၣ်ထီဖူၣ်ထီခၠၢဖးဒွိၣ်ဟဲဒ်သိး အကနၢ်ဟူဘၣ် အတၢ်ကတိၤဘျီးဒ်သိး အတၢ်ဆူးတၢ်ဆါတလိၣ်ကဘၣ်တၢ်မၤဟါမၢ်ဂ့ၤအီၤအဂီၢ်လိ. 16လၢၤဘျီး, အဝဲလဲၤလိ ပှၢ်လၤကျၣ်ဘျီး ဖဲနံၤ,အဝဲဒၣ် ဃ့ဘါထုကဖၣ်တၢ်လိ. 17ဘၣ်တနံၤဖဲယ့ၣ်ရှူးသိၣ်လီၤသီလီၤတၢ်အဆၢကတီၢ်နဲၢ်, ဘၠီၣ်ဖၤရံၤရှဲတလိၣ်ဘျီး ဘၠီၣ်သိၣ်လိတၢ်သိၣ်တၢ်သီတလိၣ်ဆ့နီၤအိၣ်ဖဲနံၤလိ. အဝဲဝီၤဟဲလိ ကယဲၢ်ဝ့ၢ်အိၣ်ဖဲကီၢ်ကၤလံၤလါ ဘျီးကီၢ်ယူဒၤလါဝ့ၢ်ယရူၤရှလ့ၣ်လိ. ကစၢ်အစိကမီၤအိၣ်ဝဲလါ ယ့ၣ်ရှူးလိ အကမၤဘျါဘၠီၣ်ဆူးဘၠီၣ်ဆါတလိၣ်အဂီၢ်လိ. 18ဘၠီၣ်တနီၤဟဲစိၤဘၠီၣ်သ့းတခိပၤတဂၤလိ လီၢ်မ့းအလိၤ, ဘျီးဂုာ်ကျဲးစၢၤလဲၤစိၤနုအီၤလိဟံၣ်ပူၤ ဒ်သိးအကပၤမံလီၤအီၤလိ ယ့ၣ်ရှူးအမံၤညါနဲၢ်လိ. 19လၢၤဘျီး မဲၢ်လိ ဘၠီၣ်အိၣ်ဝဲထီဖူၣ်ထီခၠၢအဃိ, အဝဲဝီၤ တထ့ၣ်န့ၢ်ကျဲၣ်လိ အကစိၤနုအီၤအဂီၢ်ဘၣ်. လိတၢ်နံၤအဃိ, အဝဲဝီၤလဲၤစိၤထီၣ်အီၤလိ. ဟံၣ်ခွိၣ်အွိးဟိထီၣ်ဟံၣ်အခွိၣ်ဘျီး ထွိၣ်စဲၤလီၤအီၤလိ အလီၢ်မံလိၤလိ. ဘၠီၣ်ပၤဖှိၣ်ပကိးအသးတလိၣ်အခၢၣ်သးလိယ့ၣ်ရှူးအမံၤညါလိ. 20ယ့ၣ်ရှူးထ့ၣ်ဘၣ် အဝဲဝီၤ အတၢ်နၤအိၣ်ထဲလဲၣ်ခိနဲၢ်, အဝဲစံးဘၣ်ဘၠီၣ်ဆါတဂၤနဲၢ်, ‘နတၢ်ဒဲးဘးတလိၣ်ဘၣ်တၢ်ပျၢ်ကွံၤအီၤလ့ ယမံဖိၣ်ဧၢ.’ 21ဘၠီၣ်သ့းတၢ်ဘူၣ်တၢ်ဘါ အတၢ်သိၣ်တၢ်သီ တလိၣ်လါ ဘၠီၣ်ဖၤရံၤရှဲတလိၣ်စံးလွိၤပကိးအသးတဂၤလါတဂၤ ဘျီး စံးဝဲ, ‘ဘၠီၣ်လိ အကတိၤကမၣ်ကစၢ်ယွၤလိ ကျဲၣ်ဒ့းအ့ၤအသိတဂၤအံၤမဲၢ်မတဂၤလဲၣ်. ပှၤကညီပျၢ်တၢ်ဒဲးဘးတသ့းနီတဂၤဘၣ်. သ့းထဲကစၢ်ယွၤတဂၤဧိၤလိ.’ 22ယ့ၣ်ရှူးသံညါအဝဲဝီၤအတၢ်ဆိကမိၣ်တလိၣ်ဘျီး စံးဘၣ်အဝဲဝီၤ, ‘ဘၣ်မနီၢ်လိ သုဆိကမိၣ်တၢ်ဒ့းန့ၤအသိးတလိၣ်လဲၣ်. 23မဲၢ်အညိဒွိၣ်လိ ပကစံး, ‘နတၢ်ဒဲးဘးတလိၣ်ဘၣ်တၢ်ပျၢ်ကွံၤအီၤလ့. မဲၢ်တမဲၢ်, ‘ဂ့ၤထ့ဘျီး ဟးတကဲၢ်’ နဲၢ်ဧါ.’ 24လၢၤဘျီး ယကဟ့သုတၢ်အုၣ်အသးလိ ပှၤကညီအဖွိခွါအိၣ်ဘျီး တၢ်စိတၢ်ကမီၤလိ ဟီၣ်ခွိၣ်ချၢလိ အကပျၢ်ကွံၤတၢ်ဒဲးဘးတလိၣ်လိ.’ 25တဘျီဃီ ဘၠီၣ်တဂၤနဲၢ် ဂ့ၤထ့လိ အဝဲဝီၤ ကိးဂၤဒ့းအမံၤညါ, ဟံးထီၣ်လီၢ်မံလိ အဝဲဒၣ်မံလီၤပၤစၢၤဝဲလိ အလိၤ, ဘျီးက့ၤလိ ဟံၣ်အိၣ်လါ တၢ်စံးထီၣ်ပတြၢၤကစၢ်ယွၤလိ. 26အဝဲဝီၤ ကိးဂၤဒ့း ကမၢကမၣ်ဝဲနီဘျီးလိတၢ်ပျံၤတၢ်ဖုး အဒွိၣ်အအါအပူၤ, အဝဲဝီၤ စံးထီၣ်ပတြၢၤကစၢ်ယွၤဘျီး စံးဝဲ, ‘မုၢ်တနံၤအံၤ, ပထံၣ်ဘၣ်တၢ်လိ အလီၤလိၢ်လီၤလၣ်တလိၣ်လိ.’ 27တၢ်မၤအသးတမံၤအံၤဝံၤအလီၢ်ခံနဲၢ်, ယ့ၣ်ရှူးဟးထီၣ်ဘျီး ထ့ၣ်ဘၣ်ဝဲဘၠီၣ်ဃ့သွဲတဂၤလိ အမံၤမဲၢ်ဝဲ စီၤလ့ၤဝံဆ့နီၤဝဲဒၣ်ဖဲ အဝဲၤလီၢ်နဲၢ်လိ. ယ့ၣ်ရှူးစံးဘၣ်အီၤ, ‘ဟဲဘျီးကဲၣ်ဘၣ် ယပျဲၢ်ယဘီၣ်တကဲၢ်.’ 28စီၤလ့ၤဝံဂ့ၤထ့ဝဲ, ပၤတီၢ်တၢ်ခဲလုၢ်ဘျီး ပိၤထီၣ်အခံလိ. 29တုၤနုၤတဘျီ စီၤလ့ၤဝံမၤတၢ်အီၣ်အမူးဖးဒွိၣ်လိ အဟံၣ်ပူၤလိ ယ့ၣ်ရှူးအဂီၢ် ဘျီး လိအဘၣ်တၢ်ကွ့းအီၤတလိၣ်အကျၣ်နဲၢ်အိၣ်ဟူၤလါဘၠီၣ်ဃ့သွဲအိၣ်ဘျၢအသးလါဘၠီၣ်အဂၤတလိၣ်လိ. 30ဘၠီၣ်ဖၤရံၤရှဲတနီၤဘျီး ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတနီၤလိ အဘၣ်ထွဲလါဘၠီၣ်ဃ့သွဲတလိၣ်လါဘၠီၣ်တၢ်ဒဲးဘးဖွိတလိၣ်လဲၣ်.’ 31ယ့ၣ်ရှူးစံးဆၢအဝဲဝီၤ, ‘ဘၠီၣ်လိ အသးတမါတလိၣ်နဲၢ် တလိၣ်ဘၣ်ကသံၣ်သရၣ်ဘၣ်. ဘၠီၣ်လိၣ်ဘၣ်ကသံၣ်သရၣ်နဲၢ်မဲၢ်ဒၣ်ထဲဘၠီၣ်သးတမါတလိၣ်လိ. 32တမဲၢ် ယဟဲဒ်သိ ယကကိးဂ့ၤဘၠီၣ်မူၤဘၠီၣ်နီၢ်တလိၣ်လိ အကပီၢ်ယၢ်လီၤဂ့ၤအသးအဂီၢ်ဘၣ်. မဲၢ်မဲၢ် ယဟဲကိးဂ့ၤ ဘၠီၣ်တၢ်ဒဲးဘးဖွိတလိၣ်လိ.’ 33ဘၠီၣ်တနီၤစံးဘၣ်ယ့ၣ်ရှူး, ‘စီၤယိၤဟၣ်အခ့အပှၤတလိၣ်ဒုၣ်တၢ်အီၣ်ဘျီး ဃ့ဘါထုကဖၣ်ခဲနဲအံၤ, ခဲနဲအံၤ ဘျီး ဘၠီၣ်ဖၤရံၤရှဲအခ့အပှၤတလိၣ်မၤဝဲဒ့းန့ၤအသိးနဲၢ်နဲၢ်လိ. မဲၢ်မဲၢ်နၤနခ့နပှၤတလိၣ် အီၣ်တၢ်လါ အိတၢ်လိ.’ 34ယ့ၣ်ရှူးစံးဆၢဝဲ, ‘ဘၠီၣ်ဘၣ်တၢ်ကွ့းအီၤလိ တၢ်ဖျီအမူးပူၤတလိၣ်နဲၢ် ဖဲတလးမူ ပွိၤခွါ အိၣ်လါ အဝဲဝီၤတလိၣ်အဖၢမုၢ်ဘျီး, သုဆိကမိၣ်သုဒွိးကီၢ်ဝံၤကီၤစ့ၤအီၤကန့ၢ်ဧါ. သပှၢ်ကတၢၢ်တန့ၢ်ဘၣ်. 35လၢၤဘျီး မုၢ်နံၤမုၢ်သီကဟဲဝဲဖဲတလးမူးပွိၤခွါ ကဘၣ်တၢ်ဟံးထီၣ်ကွံၤလိ အဝဲဝီၤ အကဆူကတ့ၤ, ဘျီးဖဲအဆၢကတီၢ်အဝဲနံၤ အဝဲဝီၤကဒုၣ်တၢ်အီၣ်လိ.’ 36ယ့ၣ်ရှူးစံးဘၣ်နဲၢ်နဲၢ်အဝဲဝီၤလိ တၢ်ကတိၤဒိတထ့ၣ်အံၤလိ. ‘ဘၠီၣ်တဖ့ၣ်ယၤကွံၤတၢ်ကံးယၤတလံၣ်တလံၣ်လိ ဆ့ကၤအသီတဘ့ၣ်အလိၤဒ်သိးအကဆးကျးလူၢ်တၢ်ကံးယၤတလံၣ်တလံၣ်လိ ဆ့ကၤအသီတဘ့ၣ်အလိၤဒ်သိးအကဆးကျးလူၢ်ဆ့ကၤ အလီၢ် လ့ၤတဘ့ၣ်အဂီၢ်နဲၢ်နီတဂၤဘၣ်. မဲၢ်မၤဝဲဒ့းနံၤဘျီး အဝဲကမၤယၤဘၣ် ဆ့ကၤအသီတလံၣ်နဲၢ်တဘၣ်လူၢ်အသးလါ တၢ်အလီၢ်လ့ၤနဲၢ်ဘၣ်လိ. 37ဒ့းန့ၤအသိး ဘၠီၣ်တတ့ၢ်နုစပံးထံအသီလိ စပံးထံဒၢၣ်တၢ်ဖံးအလီၢ်လ့ၤတလိၣ်အပူၤနီတဂၤဘၣ်. တၢ်ဂ့ၢ်မဲၢ်လိစပံးထံအသီကမၤပိၢ်ဖးကွံၤစပံးထံဒၢၣ်တၢ်ဖံးအလီၢ်လ့ၤတလိၣ်, စပံးထံကယွၤလီၤကွံၤလါစပံးထံဒၢၣ်တၢ်ဖံးတလိၣ်ကဟးဂီၤကွံၤဝဲဒၣ်အဃိနဲၢ်လိ. 38မဲၢ်မဲၢ် စပံးထံအသီနဲၢ်, ကြၢးလိ နဘၣ်တ့ၢ်နုအီၤလိ စပံးထံဒၢၣ်တၢ်ဖံးအသီတလိၣ်အပူၤလိ. 39ဘျီးဘၠီၣ်အိစပံးထံအလီၢ်လံၤဝံၤဆၢဒွိၣ်နဲၢ်ဒ် စပံးထံအသီနဲၢ်, တအိၣ်နီတဂၤဘၣ်. အဝဲဒၣ်စံးဝဲ, ‘အလီၢ်လ့ၤနဲၢ်ဝံၣ်ဒွိၣ်တကဲၢ်လိ.’
Markert nå:
Luke 5: ktpv-rv
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
