Luke 15
15
1တနံၤနဲၢ် ဘၠီၣ်ဃ့သွဲအိၣ်ဘျၢအသးလိၣ်လါ ဘၠီၣ်တၢ်ဒဲးဘးဖွိတလိၣ်ဟဲဒ်သိ အကကနၣ်ယ့ၣ်ရှူးအတၢ်စံးတၢ်ကတိၤအဂီၢ်လိ. 2ဘၠီၣ် ဖၤရံၤရှဲလါ ဘၠီၣ်သ့းတၢ်ဘူၣ်တၢ်ဘါအတၢ်သိၣ်တၢ်သီတလိၣ်စးထီၣ်ကဒူးကဒ့ၣ်တၢ်ဘျီးစံးဝဲ, ‘ဘၠီၣ်တဂၤအံၤတူၤလိၤဘၠီၣ်တၢ်ဒဲးဘးဖွိတလိၣ်ဘျီး အီၣ်ပကိး အိပကိးတၢ်လါ အဝဲဝီၤနဲၢ်လိ.’ 3လိတၢ်နံၤအဃိ, ယ့ၣ်ရှူးစံးဘၣ်အဝဲဝီၤလိ တၢ်ကတိၤဒိ တထ့ၣ်အံၤလိ. 4ပစံးမံစိၢ်, သုဝဲအကျၣ်တဂၤအိၣ် လါသိအဒုၣ်တကယၤဘျီး လီၢ်မၢ်ကွံၤနဲၢ်အီၤတဒုၣ်လိ. အဝဲကမၤဒ်လဲၣ်ခိမီ. အဝဲဒၣ်ကပၤတီၢ်သိအဂၤခွံဒုၣ်လိ အီၣ်ဆၣ်အလီၢ်ဘျီး လဲၤလူၤချုသိလိ အဟါမၢ်ကွံၤတဒုၣ်တုၤအထ့ၣ်နဲၢ်ဂ့ၤဝဲ တဘျီလိ. 5ဖဲအထ့ၣ်ဂ့ၤဝဲနဲၢ်, ကသူၣ်ခုသးခုဝဲထဲလဲၣ်နဲၢ် ကပၤထီၣ်ဝဲလိ အဖံနါခွိၣ်, 6ဘျီး ကဟဲက့ၤစိၤဝဲလိ ဟံၣ်လိ တၢ်နံၤဝံၤဘျီးအဝဲဒၣ် ကကိးဖှိၣ်ဝဲအမံဖီၣ်ပကိးလါ ဟံၣ်ကပွိၤကပၤတလိၣ်တပူၤဃီဘျီး စံးဘၣ်အဝဲဝီၤ, ‘ယထ့ၣ်နဲၢ်ဂ့ၤယသိလိ အဟါမၢ်တဒုၣ်အဃိ ယသးခူနီလိ. ဘျီး ပဘၣ်သူၣ်ခူသးခူပကိးလိ အဃိတကဲၢ်. 7ဒ့းန့ၤဘျီး, ယစံးဘၣ်သုလိ မွိခွိၣ်နဲၢ်, တၢ်သးခူကအိၣ်ဝဲလိ ဘၠီၣ်တၢ်ဒဲးဘးဖွိတဂၤလိ အပီၢ်ယၢ်လီၤဂ့ၤအသးအဃိအၣ်နဲၢ်ဘၠီၣ်မူၤဘၠီၣ်နီၢ်ခွံဆံဂၤလိ အပီၢ်ယၢ်လီၤဂ့ၤအသးအလီၢ်တအိၣ်ဘၣ်တလိၣ်အဃိတကဲၢ်လိ. 8မဲၢ်တမဲၢ် ပစံးဝဲဒၣ် ဘၠီၣ်မ့ၣ်ပှၢ်တဂၤလိ အအိၣ်လါ စ့ၣ်အဘ့ၣ်တဆ့ဘျီး အတၢ်ဟါမၢ်နဲၢ်ဝဲ တဘ့ၣ်လိ အဝဲဒၣ် ကမၤဝဲဒ်လဲၣ်နဲၢ်ကဒွဲၣ်ထီၣ်ဝဲမဲၣ်အူဒၢတဖျၢၣ်, ဟံးနီၣ်ခွဲသံၣ် ဘျီးခွဲခၠီၣ်အဟံၣ်ဘျီးကွၢ်ဝဲတၢ်လီၤတံၢ်လီၤဆ့းလိ တၢ်ခဲလုၤခဲဆ့တုၤနီၤဝဲလိ အထ့ၣ်ဂ့ၤဝဲ တဘျီနိၤလိ. 9အဝဲထ့ၣ်ဂ့ၤဝဲဘျီး ကိးဖှိၣ်အမံဖီၣ်လိ အအိၣ်လိအကပွိၤကပၤဘျီးစံးဘၣ်အဝဲဝီၤ, ‘ယသးခုနီလိ ယထ့ၣ်ဂ့ၤယစ့ၣ်လိ အဟါမၢ်နဲၢ်ယၤတဘ့ၣ်အဃိနဲၢ်လိ. ဘျီးပဘၣ်သးခူပကိလိအဃိတကဲၢ်. 10ဒ့းန့ၤအဃိ ဘျီးယစံးဘၣ်သု, ကစၢ်ယွၤအကလူးတလိၣ်သူၣ်ခူးသးခူးလိ ဘၠီၣ်တၢ်ဒဲးဘးဖွိတဂၤလိ အပီၢ်ယၢ်လီၤဂ့ၤအသးအဃိနဲၢ်လိ. 11ယ့ၣ်ရှူးစံးသီတဘျီးဝဲ, ‘ဘၠီၣ်အိၣ်ဝဲတဂၤလိအအိၣ်လါအဖွိခွါခံဂၤလိ.’ 12ဖွိလိ အဆံးတဂၤနဲၢ်စံးအပၢ်, ‘ပၢ်ဧၢ ယတၢ်န့ၢ်သါလိ ယကဘၣ်န့ၢ်ဘၣ်လိၣ်နဲၢ် ဟ့လီၤယၤခဲနဲအံၤတကဲၢ်.’ လိတၢ်နံၤအဃိ အဝဲဒၣ်နီၤလီၤနဲၢ်တၢ်စုၣ်လီၢ်ခီၣ်ခွိၣ်လိ ဖွိခံဂၤနဲၢ်အဂီၢ်လိ. 13အိၣ်တကဲၢ်ဘျီး ဒၣ်ဖွိခွါအဆံးတဂၤဆါကွံၤအတၢ်စုၣ်လီၢ်ခီၣ်ခွိၣ်လိအန့ၢ်ဘၣ်ဝဲ တလိၣ်ဘျီး စိၤထီၣ်စ့ၣ်လိ အန့ၢ်ဝဲလိၣ်ဝံၤဟးကွံၤလိ အဟံၣ်လိ. အဝဲဒၣ်လဲၤလိ ထံယံၤကီၢ်ယံၤဖးထိ, ဘျီးဖဲနံၤအဝဲမၤလုၤကွံၤအစ့ၣ်အတိၢ်လိ တၢ်လုၢ်ကိလုၢ်ကပၤအပူၤလိ. 14အဝဲဒၣ်သူလုၤကွံၤတၢ်လိ အအိၣ်ဝဲခဲလုၤလိ. တၢ်နံၤဝံၤအလီၢ်ခံတၢ်သၣ်ဝံၤလီၤဒိ ဖးဒွိၣ်အိၣ်ထီၣ်ဝဲဒၣ်လိ ကီၢ်အဝဲနံၤအပူၤဘျီး ဘၠီၣ်ဂၤဒၣ်အတၢ်တအိၣ်ဂ့ၤနိၤဝဲနီတမံၤနိၤဧိ. 15လိတၢ်နံၤအဃိ အဝဲဒၣ် လဲၤမၤတၢ်လိ ဘၠီၣ်ထံဖွိကီၢ်ဖွိဖဲနံၤတဂၤအအိၣ်ဘျီး ဟံၣ်ကစၢ်မၢဝဲလိ အဝဲဘၣ်လဲၤကွၢ်အထွိးတလိၣ်လိ အစံၤပူၤနဲၢ်လိ. 16အဝဲဒၣ် အဲၣ်ဒိးအီၣ်ပှဲၤအဟူဖၢလိ ထွိးဆၣ်လၢၤ, ဘၠီၣ်တဟ့ဒွိးအီၣ်တၢ်လိ အကအီၣ်ဝဲ အဂီၢ်နီတမံၤဘၣ်. 17လိခံကတၢၢ်အဝဲဒၣ်သ့းနီၢ်လီၤဂ့ၤအသးဘျီးစံးဝဲ, ‘ယပၢ်အပှၤလိ အမၤလဲလီၤတၢ်လိၢ်ဒၣ်အီၣ်ဘၣ်တၢ်ဒွိၣ်နဲၢ်ဒံးယၤတကဲၢ်လိ. မဲၢ်မဲၢ်ယၤယအိၣ်ဖဲအံၤနဲၢ်တုၤနီၢ်လိ ယကသ့းဘၣ်ယသးလိတၢ်သၣ်ဝံၤလီၤဒွိၣ်အဃိလိ. 18ယကဂ့ၤထ့ဘျီး က့ၤလိ ယပၢ်အအိၣ်ဘျီး ယကစံးဝဲ, ‘ပၢ်ဧိ, ယမၤကမၣ်ဘၣ်လ့ကစၢ်ယွၤလါနၤလ့. 19ယတကြၢးတဘၣ်လိ ဘၠီၣ်ကကိးယၤလိ နဖွိခွါဘၣ်. ပၤယၤဒ်နပှၤမၤတၢ်ဖွိလိအမၤလဲၤတၢ်အသးအကျၣ်တဂၤအသိးနဲၢ်တကဲၢ်. 20လိတၢ်နံၤအဃိ အဝဲဒၣ်ဂ့ၤထ့ဘျီး က့ၤခွိၣ်ခံဂ့ၤဝဲလိ အပၢ်အအိၣ်လိ. ဘျီးအဝဲဒၣ်အိၣ်ဆ့းခိလါ အဟံၣ်နဲၢ် အပၢ်ထ့ၣ်အီၤ အသးပူၤပှဲၤလါတၢ်သးဘၣ်ဃဲၤဝံၤ အဝဲစံၣ်ဝီၤဝဲဘျီး ဖိၣ်ဃၤအဖွိခွါဘျီး နၢမူအီၤလိ. 21ဖွိခွါကတိၤတၢ်ဘျီး စံးဝဲ, ‘ပၢ်ဧိ, ယမၤကမၣ်ဘၣ်လ့ကစၢ်ယွၤလါနၤလ့. ယတကြၢးတဘၣ်လိဘၠီၣ်ကကိးယၤလိ နဖွိခွါဘၣ်.’ 22လၢၤဘျီး အပၢ်ကိးဝီၤအခ့အပှၤတလိၣ်ဘျီးစံး, ‘မၤကမ့းကမွိတကဲၢ်, ဟဲစိၤဆ့ကၤဖးထိအဂ့ၤကတၢၢ်တဘ့ၣ်ဘျီး ဒွိးသွိးထီၣ်အီၤတကဲၢ်. 23တၢ်နံၤဝံၤအလီၢ်ခံ လဲၤဟံးနဲၢ်ပွိၢ်လိ အဘီၣ်တဒုၣ်ဘျီး မၤသ့းအီၤဝံၤဘျီး, ပကသးခူပကိးခီဖျိတၢ်အီၣ်တၢ်အိအမူးနဲၢ်တကဲၢ်. 24တၢ်ဂ့ၢ်မဲၢ်ဒ့းအ့ၤ ယဖွိခွါတဂၤလိ အသ့းဝံၢ်လ့လၢၤဘျီး ခဲနဲအံၤ အဝဲဒၣ်ဂ့ၤထ့ထီၢ်ဂ့ၤဝဲလ့. အဝဲဒၣ်ဟါမၢ်လၢၤဘျီး ခဲနဲအံၤ ဘၣ်တၢ်ထ့ၣ်န့ၢ်ဂ့ၤအီၤလ့. မၤသးဒ့းန့ၤဘျီး ပစးထီၣ်တၢ်အီၣ်တၢ်အိအမူလိ. 25ဖဲလိတၢ်ဆၢကတီၢ်အဝဲနံၤနဲၢ်, ဖွိခွါအဒွိၣ်တဂၤအိၣ်ဝဲဒၣ်လိ စံၤပူၤလိ. ဖဲအဝဲဒၣ်ဟဲက့ၤဘျီး ဘူးထီၣ်ဝဲလိ ဟံၣ်နဲၢ်နၢ်ဟူဝဲတၢ်သးဝံၣ်လါ တၢ်ဂဲၤကလံၣ်ဘီၣ်တိၤလိ. 26လိတၢ်ဒ့းန့ၤအဃိအဝဲဒၣ်ကိးဝီၤအခ့အပှၤအကျၣ်တဂၤဘျီးသ့းကွၢ်ဝဲ, ‘တၢ်သီၣ်တၢ်သဲအဝဲအံၤမဲၢ်ဘၠီၣ်မၤတၢ်မနီၢ်လဲၣ်.’ 27အခ့အပှၤတဂၤစံးဝဲလိ, ‘နပုၢ်အဆံတဂၤဟဲက့ၤတုၢ်လိဟံၣ်ဘျီး နပၢ်မၤသ့းပွိၢ်လိ အဘီၣ်တဒုၣ်မဲၢ်လိ နပုၢ်ဟဲက့ၤဂ့ၤဝဲခၠိကလၤ အဃိလိ.’ 28ဘျီး အဖွိခွါ အဒွိၣ်တဂၤအသးဒွိၣ်ထီၣ်တုၢ်နီၢ်လိ တက့ၤနုၤဝဲလိ ဟံၣ်ပူၤဘၣ်. လိတၢ်နံၤအဃိ အပၢ်ဟဲထီၣ်လိ တၢ်ချၢဘျီး ဃ့ကညးအီၤဒ်သိး အကက့ၤနုလိ ဟံၣ်ပူၤလိ. 29အဝဲဒၣ်စံးဆၢအပၢ်, ‘ကွၢ်လိအံၤ, ယမၤနဲၢ်နတၢ်လိ အနံၣ်အလါတလိၣ်အံၤ အပူၤ ဒ်ကုၢ်တဂၤအသိးတကါဘၣ် ယတလုၤခါပတၢ်နကလုၢ်နီတဘီၣ်ဘၣ်. နဟ့ယၤလိ တၢ်မနီၢ်တမံၤလဲၣ်. လိယကမၤတၢ်သူၣ်ဖှ့းသးညီလိ ယမံဖီၣ်အဂီၢ် ပတ့လ့တဒုၣ်နီၣ်ခၠါနတဟ့ၣ်ယၤဘၣ်. 30မဲၢ်မဲၢ် နဖွိခွါတဂၤအံၤ မၤလုၤဂီၤနတၢ်စုၣ်လီၢ်ခီၣ်ခွိၣ်ခဲလုၤလိ တၢ်ဂဲၤဧူၤဘၠီၣ်မ့ၣ်ပှၢ်ဟးဂီၤဘျီး ဟဲက့ၤတုၤလိ ဟံၣ်ဘျီး နမၤသ့းပွိၢ်လိ အဘီၣ်ကတၢၢ်တဒုၣ်လိ အဝဲဒၣ်အဂီၢ်လိ. 31အပၢ်စံးဆၢဂ့ၤဝဲ, ‘ယဖွိခွါဧၢ, နအိၣ်လါယၤဖဲအံၤဃါဃ့လ့ဘျီး တၢ်ခဲလုၤလိ အအိၣ်လါယၤနဲၢ်မဲၢ်နတၢ်ခဲလုၤလိ. 32လၢၤပဂ့ၤအီၣ်လါတၢ်အီၣ်တၢ်အိအမူးဘျီး သူၣ်ခူသးခူလိ. ဘၣ်မနီၢ်လဲၣ်နဲၢ်, နပုၢ်သ့းပၤစၢၤဝဲ, မဲၢ်မဲၢ်ခဲနဲအံၤ အဝဲဒၣ်ဂ့ၤထ့ဂ့ၤလိ. အဝဲဒၣ်ဟါမၢ်ပၤစၢၤလၢၤဘျီး ခဲနဲအံၤ ဘၣ်တၢ်ထ့ၣ်န့ၢ်ဂ့ၤလ့အီၤလ့.’
Markert nå:
Luke 15: ktpv-rv
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
