Luke 16
16
1ယ့ၣ်ရှူးစံးဘၣ် အခ့အပှၤတလိၣ်, ‘ဘၠီၣ်တၢ်အိၣ်တၢ်ယၢၤအိၣ်ဝဲတဂၤလိအအိၣ်လါ ဘၠီၣ်အံးထွဲကွၢ်ထွဲ အတၢ်ဖွိတၢ်လံၤတဂၤလိ. အဝဲဘၣ်တၢ်စံးဘၣ်အီၣ်လိ အဘၠီၣ်ကွၢ်ထွဲတၢ်ဖွိတၢ်လံၤတဂၤအံၤ မၤလုၤဂီၤခိလိအစ့ၣ်လိ. 2ဘၠီၣ်အတၢ်အိၣ်တၢ်ယၢၤ ကိးဝီၤအဘၠီၣ်ကွၢ်ထွဲတၢ်ဖွိတၢ်လံၤ အဝဲနံၤဘျီး စံးဘၣ်အီၤ, ‘နဂ့ၢ်နကျိၤလိ ယနၢ်ဟူဘၣ်အီၤတမံၤအံၤမဲၢ်တၢ်ဒ်လဲၣ်ခိ. ဟ့ထီၣ်တၢ်ပၤဖျါအလၢအပှဲၤဘၣ်ဃးလါ နတၢ်ကွၢ်ထွဲပၢၤဃၤယတၢ်စုၣ်လီၢ်ခီၣ်ခွိၣ်တကဲၢ်. တၢ်ဂ့ၢ်ဒ့းအ့ၤ, နကဲၣ်ယဘၠီၣ်ကွၢ်ထွဲတၢ်စုၣ်လီၢ်ခီခွိၣ်တသ့းလၢၤဘၣ်.’ 3တုၤနုၤတဘျီ, ဘၠီၣ်ကွၢ်ထွဲတၢ်ဖွိတၢ်လံၤဆိကမိၣ်ဝဲလိ အသးပူၤ, ‘ယကစၢ်ထူးထီၣ်ကွံၤယၤလိတၢ်မၤအလီၢ်လိ. မဲၢ်ယကဘၣ်မၤဒ်လဲၣ်ခိ. ယကခူၣ်တၢ်ပူၤအဂီၢ်ယဂံၢ်ယဘါတအိၣ်ဘၣ်. ဘျီး ယကဃ့အီၣ်ယဆၣ်အဂီၢ် ယမံၤဆှးလိ. 4ခဲနဲအံၤ, ယကဘၣ်မၤဒ်လဲၣ်နဲၢ်ယသံညါလိ. ယမဲၢ်မၤဒ့းန့ၤဘျီး ဖဲယတၢ်မၤတအိၣ်လၢၤအဆၢကတီၢ်နဲၢ်, ယကအိၣ်လါ ယမံဖီၣ်တလိၣ်လိ ယကတူၤလိၤခီၣ်ဆၢ ယၤလိ အဝဲဝီၤ အဟံၣ်ပူၤဃီပူၤလိ. 5လိတၢ်နံၤအဃိ, အဝဲဝီၤ ကိးဝီၤဘၠီၣ်တလိၣ်လိ အအိၣ်လါ အကမၢ်လိ အကဘၣ်လွိးတူၤဂ့ၤအကစၢ်လိ. အဝဲဒၣ်စံးဘၣ်ဘၠီၣ်အဆိကတၢၢ်တဂၤ, ‘နဒ့ကမၢ်လိ နကဘၣ်လွိးဂ့ၤယကစၢ်နဲၢ်အိၣ်ထဲလဲၣ်ခိလဲၣ်.’ 6အဝဲဒၣ်စံးဆၢဝဲ, ‘သ့ၣ်စၤယံးသွိအဒၢၣ်တကယၤလိ.’ ဘၠီၣ်ပၢၤတၢ်စုၣ်လီၢ်ခီၣ်ခွိၣ်စံးဝဲ, ‘နစရီအိၣ်လိဖဲအံၤ, ဆ့နီၤဘျီးကွ့းလီၤယဲၢ်ဆံတကဲၢ်.’ 7အဝဲစံးဘၣ်ဃါ ဘၠီၣ်အသီတဂၤ, ‘နဒ့ကမၣ်လိ နကဘၣ်လွိးဂ့ၤအိၣ်ဝဲထဲလဲၣ်ခိ. အဝဲဒၣ် စံးဆၢဝဲ, ‘ဘုၣ်အကွိၢ်တကယၤလိး.’ ဘၠီၣ်ပၢၤတၢ်စုၣ်လီၢ်ခီၣ်ခွိၣ်စံးဝဲ, ‘နစရီအိၣ်လိအံၤ, ဆ့နီၤလါကွ့းလီၤဃိးဆ့တကဲၢ်.’ 8ဘၠီၣ်ပၢၤတၢ်စုၣ်လီၢ်ခီၣ်ခွိၣ်တဂၤအံၤ အကစၢ်စံးထီၣ်ပတြၢၤအီၤလိ. မၤဝဲဒၣ်တၢ်ပှဲၤဝဲလိ တၢ်ကူၣ်သ့းကူၣ်ဘၣ် ဒ့းအ့ၤအသိးအဃိနဲၢ်လိ. တၢ်ဂ့ၢ်ဒ့းအ့ၤ ဖဲလိအဘၣ်ဃးလါ တၢ်ကွၢ်ထွဲသူကျဲၤတၢ်လိ အတၢ်ဂ့ၢ်တၢ်ကျိၤတလိၣ်အဂ့ၢ်နဲၢ် ဘၠီၣ်လိ ဟီၣ်ခွိၣ်တစိၤအံၤတလိၣ်ကူၣ်ဘၣ်ဖးသ့းဒွိၣ်နဲၢ်ဘၠီၣ်ဘၣ်ဃးလါ တၢ်ကပီၤလိၣ်တကဲၢ်လိ.’ 9ဘျီး ယ့ၣ်ရှူးကတိၤတၢ်ဘျီး စံးဝဲ, ‘ ဘျီးလိ တၢ်နံၤအဃိ ယစံးဘၣ်သု, ဒ်သိးသုကမၤန့ၢ် သုမံဖီၣ်အဂီၢ်, သူဟီၣ်ခွိၣ်အတၢ်အိၣ်တၢ်ယၢၤ, ဘျီး တုၤအလုၤကွံၤဘျီး သုကဘၣ်တၢ်တူၤလိၤခီၣ်ဆၢသုလိဟံၣ်အထူအယိၣ်နဲၢ်တကဲၢ်. 10ဘၠီၣ်တဂၤလၢ်လၢ်လိ အမူၤအနီၢ်ဝဲလိ တၢ်အဆံးဖွိတလိၣ်အပူၤနဲၢ်, ကမူၤကနီၢ်ဝဲလိ တၢ်ဂ့ၢ်ဖးဒွိၣ်တလိၣ်အပူၤလိ. ဘၠီၣ်တဂၤလၢ်လၢ်လိ အတမူၤတနီၢ်ဝဲလိတၢ်အဆံးဖွိနဲၢ် ကတမူၤတနီၤဝဲလိ တၢ်အဖးဒွိၣ်တလိၣ်အပူၤလိ. 11မဲၢ်မဲၢ်ဒ့းနံၤဘျီး, လိတၢ်ကွၢ်ထွဲပၢၤဃၤဟီၣ်ခွိၣ်အတၢ်အိၣ်တၢ်ယၢၤအပူၤနဲၢ်သုမဲၢ်တမူၤတနီၤသုဝဲဘျီး တၢ်နၤနဲၢ်သုလၢတၢ်အိၣ်တၢ်ယၢၤနီၢ်နီၢ်အဂီၢ်နဲၢ်, ကသ့းဝဲလိ ကျဲၣ်ဒ်လဲၣ်ခိလဲၣ်. 12ဘျီးသုမဲၢ်တမူၤတနီၢ်ပၤစၢၤသုဝဲဘၣ်ဃးလါ တၢ်လိ အမဲၢ်ဘၠီၣ်တဂၤဒၣ်အတၢ်နဲၢ်, မဲၢ်မတဂၤကဟ့သုတၢ်လိ အမဲၢ်သုတၢ်နဲၢ်လဲၣ်. 13တၢ်ခ့တၢ်ပှၤတဂၤမၤကစၢ်ခံဂၤအတၢ်မၤတသ့းဘၣ်. အဝဲကသးဟ့အဝဲတဂၤ, ဘျီး အဲၣ်ဝဲ အဂၤတဂၤလိ. အဝဲဒၣ် ကတီဝဲတဂၤဘျီး အဝဲတဂၤလါ တပၤကဲဘၣ်အဂၤတဂၤလိ. သုမၤကစၢ်ယွၤအတၢ်မၤလါ စ့ၣ်အတၢ်မၤ ခံခါဟူၤ တသ့ဘၣ်.’ 14ဘၠီၣ်ဖၤရံၤရှဲတလိၣ်နၢ်ဟူဘၣ်တၢ်အံၤတလိၣ်ခဲလုၤ, ဘျီး အဝဲဝီၤနံၤဘၣ်ဖါလဲယ့ၣ်ရှူး, တၢ်ဂ့ၢ်မဲၢ်လိ အဝဲဝီၤ အဲၣ်စ့ၣ်အဲၣ်တိၢ်အဃိလိ. 15ယ့ၣ်ရှုးစံးဘၣ်အဝဲဝီၤ, ‘သုမဲၢ်ဘၠီၣ်တလိၣ်လိ အမၤဖျါထီၣ်အသးဒ်အမူၤအနီၢ်ဝဲအသိး, လိပှၤကညီအမံၤညါ, လၢၤဘျီးကစၢ်ယွၤသံညါသုသူၣ်သုသးလိ. တၢ်ဂ့ၢ်ဒ့းအ့ၤ, တၢ်လိပှၤကညီဆိကမိၣ်လိအအိၣ်လါအလုၢ်အပှ့ၤဖးဒိၣ်နဲၢ်, လိကစၢ်ယွၤအမံၤညါမဲၢ်တၢ်လိအလီၤသးဘၣ်အၢၣ်နဲၢ်လိ. 16စီၤမိၤရှ့အတၢ်သိၣ်တၢ်သီလါဝံအတၢ်ကွ့းတလိၣ်အိၣ်ဝဲဒၣ်တုၤလိ ဘၠီၣ်ဘျၢတၢ်စီၤယိၤဟၣ်အဆၢကတီၢ်လိ. စးထီၣ်ဖဲနံၤတၢ်သးခူအကစီၣ်ဘၣ်ဃးလါ ကစၢ်ယွၤအဘီအမုၢ်ဘၣ်တၢ်ဟီတရါလီၤအီၤ, ဘျီးဘၠီၣ်ကိးဂၤဒ့းဂုာ်လဲၤနုဝဲလိ ကစၢ်ယွၤအဘီအမုၢ်အပူၤလိ. 17လၢၤဘျီးမွိခွိၣ်လါဟီၣ်ခွိၣ်နဲၢ် ဟါမၢ်ကွံၤညိနဲၢ်ဒံးလ့ၤတၢ်သိၣ်တၢ်သီအလ့ၤမဲၣ်ဖျၢၣ်အဆံးကတၢၢ်တဖျၢၣ်ကဟါမၢ်ကွံၤဝဲတကဲၢ်လိ. 18ပွိၤခွါတဂၤလၢ်လၢ်လိ အပၤမၢ်ကွံၤအမါဘျီး န့ၢ်အမါလိ ဘၠီၣ်မ့ၣ်ပှၢ်အဂၤတဂၤနဲၢ်, မဲၢ်အအဲၣ်ဘၢတၢ်, ဘျီးပွိၤခွါတဂၤလိအန့ၢ်အမါလိ ဘၠီၣ်မ့ၣ်ပှၢ်တဂၤလိအဘၣ်တၢ်ပၤမၢ်ကွံၤအီၤနဲၢ်, မဲၢ်အမၤကမၣ်ဘၠီၣ်အမါလိ. 19‘တဘျီနဲၢ်, ဘၠီၣ်တၢ်အိၣ်တၢ်ယၢၤအိၣ်ဝဲတဂၤလိ အကူးအသွိတၢ်ကူးတၢ်သွိးလိ အပူၤဒွိၣ်ကတၢၢ်တလိၣ်ဘျီး မုၢ်လၢ်ဝဲတၢ်အီၣ်အမူးဖးဒွိၣ်ကိးနံၤဒ့းလိ. 20ဘၠီၣ်ဖှီၣ်ဘၠီၣ်ယၤအိၣ်နဲၢ်နဲၢ်ဝဲတဂၤလိ အမံၤမဲၢ်စီၤလါစရူး, လိအအိၣ်ဝဲတၢ်ပူၤလီၢ်ပူၤကျဲၣ်ဘျၢအသးလိ အလိၤဘျီး ဘၠီၣ်ဟဲစိၤနုဝဲလိ ဘၠီၣ်တၢ်အိၣ်တၢ်ယၢၤတဂၤနဲၢ် အမူတြဲၤအခီၣ်ထံး, 21အဝဲအိၣ်လါ တၢ်မုၢ်လၢ်လိ အကအီၣ်ကအိတၢ်လိ ဘၠီၣ်အီၣ်တၢ်အိတၢ်လိ အလီၢ်တ့ၤဝဲလိ ဘၠီၣ်တၢ်အိၣ်တၢ်ယၢၤတဂၤအစီၤနီၢ်ခွိၣ်အဖီလၤနဲၢ်လိ. လၢၤထွံၣ်တလိၣ်ဟဲဘျီး လ့ၣ်အဝဲဒၣ်အပူၤလီၢ်ပူၤကျဲၣ်တလိၣ်လိ. 22ဖဲနံၤဘျီး ဘၠီၣ်ဖှီၣ်ဘၠီၣ်ယၤတဂၤသ့းဝဲ, ဘျီးဘၣ်တၢ်စိၤထီၣ်အီၤလိအလူးတလိၣ်လိ စီၤအၤဘြၤဟၣ်အကပၤ, လိတၢ်အီၣ်အမူးလိမွိခွိၣ်နဲၢ်လိ. ဘၠီၣ်တၢ်အိၣ်တၢ်ယၢၤတဂၤသ့းဘျီးဘၣ်တၢ်ခူၣ်လီၤအီၤလိ. 23လိပျုၤပူၤနဲၢ်အဝဲဒၣ် ဘၣ်တူၢ်ဘၣ်နီတၢ်ဘျီး အဝဲကွၢ်ထီၣ်တၢ်လါထ့ၣ်စီၤအၤဘြၤဟၣ်လိအယံၤ, အိၣ်လါစီၤလါစရူးလိ အကပၤလိ. 24လိတၢ်နံၤအဃိ အဝဲဒၣ် ကိးထီၣ်ဝဲ, ‘ပၢ်စီၤအၤဘြၤဟၣ်ဧိ, သးဘၣ်ဃဲၤယၤတကဲၢ်. ဘျီးမၢစီၤလါစရူးဘျၢလီၤအစုၣ်မုၢ်အစွိးနါလိထံကျၣ်ဘျီးဟဲမၤခုၣ်လီၤယပျ့ၤနဲၢ်တကဲၢ်. တၢ်ဂ့ၢ်ဒ့းအ့ၤ, ယအိၣ်လိ တၢ်တူၢ်ဘၣ်တၢ်နးတၢ်ဖှိၣ်ဖးဒွိၣ်အပူၤ, လိမဲၣ်တခါအံၤအပူၤလိ.’ 25လၢၤဘျီး စီၤအၤဘြၤဟၣ်စံးဝဲ, ‘ယဖွိခွါဧိ သ့းနီၢ်ထီၣ်ဂ့ၤတကဲၢ်. လိနအိၣ်မူအဆၢကတီၢ်နဲၢ်, နဘၣ်တၢ်ဟ့နၤလိ တၢ်ဂ့ၤတလိၣ်လိ. လၢၤခဲနဲအံၤဘျီးအဝဲအနီၢ်ကစၢ်ဒၣ်ဝဲအိၣ်ဘၣ်ဝဲမူၤမူၤခုၣ်ခုၣ်လိတၢ်လီၢ်ဖဲအံၤ, မဲၢ်မဲၢ်နၤတခိ နအိၣ်လိ နဘၣ်တူၢ်တၢ်အပူၤလိ တၢ်လီၢ်ဖဲအံၤ,မဲၢ်မဲၢ်နၤတခိ နအိၣ်လိနဘၣ်တူၢ်တၢ်အပူၤလိ. 26လိနံၤအမံၤညါ, တၢ်ပူၤဖးထိအိၣ်ဝဲဒၣ်လိ ပဘၢၣ်စၢၤတပူၤ, ဘျီးဘၠီၣ်အိၣ်ဖဲအံၤတလိၣ်မဲၢ်အဲၣ်ဒိးလဲဝဲလိ နအိၣ်နဲၢ် လဲၤဝဲတသ့းဘၣ်. ဘၠီၣ်အိၣ်လိ သုအိၣ်ဖဲနံၤတလိၣ်နဲၢ်နဲၢ်မဲၢ်ဟဲလိပအိၣ်တသ့းဝဲဘၣ်. 27ဘၠီၣ်တၢ်အိၣ်တၢ်ယၢၤစံးဝဲ, ‘မဲၢ်မဲၢ်ဒ့းန့ၤဘျီး, ပၢ်ဧိ ယဃ့ကညးနၤ, ဆှၢလီၤစီၤလါစရူးလိယပၢ်အဟံၣ်. 28ယထီပုၢ်ဝဲၢ် ပွိၤခွါ အိၣ်ဝဲ ယဲၢ်ဂၤနဲၢ်. မၢအဝဲလဲၤဘျီး ဟ့ပလီၢ်အဝဲဝီၤ, ဒ်သိးအဝဲဝီၤ အသုတဟဲဘၣ်ဝဲလိ ယအိၣ်ဖဲအံၤ လိတၢ်ဘၣ်တူၢ်တၢ်အလီၢ်တတီၤအံၤတဂၤနဲၢ်တကဲၢ်. 29စီၤအၤဘြၤဟၣ်စံးဘၣ်ဝဲ, ‘နထီပုၢ်ဝဲၢ်ပွိၤခွါတလိၣ်အိၣ်လါစီၤမိၤရှ့ဘျီး ဝံအတၢ်ကွ့းတလိၣ်လိ အတၢ်ဟ့ပလီၢ်အဝဲဝီၤအဂီၢ်လိ. မ်နထီပုၢ်ဝဲၢ်ပွိၤခွါတလိၣ် ကနၣ်အဝဲဝီၤ အတၢ်ကတိၤတကဲၢ်. 30ဘၠီၣ်တၢ်အိၣ်တၢ်ယၢၤစံးဆၢဝဲ, ‘ပၢ်အၤဘြၤဟၣ်ဧၢ, တၢ်အဝဲနံၤ တလၢတပှဲၤဒံးဘၣ်. မဲၢ်ဘၠီၣ်တဂၤဂၤ မဲၢ်ဂ့ၤထ့ဂ့ၤလိ တၢ်သ့းဘျီးလဲၤလိ အဝဲဝီၤအအိၣ်နဲၢ်, ဘျီးအဝဲဝီၤ ကဃၤကွံၤအသးလိအတၢ်ဒဲးဘးတလိၣ်လိ. 31လၢၤဘျီး စီၤအၤဘြၤဟၣ်စံးဝဲ, ‘အဝဲဝီၤ မဲၢ်တစူၤစီၤမိၤရှ့လါဝံတလိၣ်အတၢ်ကွ့းနဲၢ်, ဘၠီၣ်တဂၤမဲၢ်ဂ့ၤထ့ဂ့ၤလိ တၢ်သ့းနဲၢ်နဲၢ်. တမဲၢ်အဝဲဝီၤ ကစူၤကနၤတၢ်ဘၣ်.’
Markert nå:
Luke 16: ktpv-rv
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
