Luke 12
12
1ဖဲဘၠီၣ်ထီဖူၣ်ထီခၠၢ အကထိ တလိၣ် ပၤဖှိၣ်ကတံၤကတူၤနီၢ်တုၤလိ ယီၢ်လွိၤဘၣ်အသးတဂၤလါတဂၤ အဆၢကတီၢ်နဲၢ်, ယ့ၣ်ရှူးစံးဘၣ်ပၤစၢၤအခ့အပှၤတလိၣ်, ‘ပလီၢ်သုသးလိ ဘၠီၣ်ဖၤရံၤရှဲတလိၣ်အကွိၣ်မံၤလိ အမဲၢ်အဝဲဝီၤအတၢ်ပၤမၤအသးနဲၢ်တကဲၢ်. 2တၢ်တမံၤလၢ်လၢ်လိ အဘၣ်တၢ်ကးဘံဃၤအီၤနဲၢ် ကဘၣ်တၢ်အွိးဟိထီၣ်အီၤ, ဘျီး ကယဲၢ် တၢ်ကိးသုၣ်တမံၤလၢ်လၢ်နဲၢ်, ကဘၣ်တၢ်မၤဖျါထီၣ်အီၤလိ. 3လိတၢ်နံၤအဃိ, တၢ်တမံၤလၢ်လၢ်လိ သုစံးပၤစၢၤသုဝဲလိ တၢ်ခံးကျၣ်နဲၢ်, ကဘၣ်တၢ်နၢ်ဟူအီၤလိ မုၢ်ဆါခိအတၢ်ကပီၤအဆၢကတီၢ်ဘျီး တၢ်တမံၤလၢ်လၢ်လိ သုကတိၤကစုၣ်ဒုၣ်ပၤစၢၤသုဝဲလိ ဘၠီၣ်အနၢ်ပူၤလိ ဒၢၣ်အိၣ်ကးဘံဃၤအသးတဖျၢၣ်အပူၤနဲၢ်, ကဘၣ်တၢ်ကိးကလူးမၤဖျါထီၣ်အီၤလိ ဟံၣ်ခွိၣ် အဖီခွိၣ်လိ. 4ယစံးဘၣ်ဝဲသု, ယမံဖီၣ်လိၣ်ဧိ, ဘၠီၣ်လိအမၤသ့းပနီၢ်ခိ, လၢၤဘျီး လိခံက့ၤ, မၤတၢ်လိ အနးဒွိၣ်ဒံးတကဲၢ် တသ့းဝဲတလိၣ်နဲၢ် သးပလံၤတဂ့ၤ. 5ယဒွိးနဲၣ်သုဘၠီၣ်လိ သုကဘၣ်သးပလံၤအီၤနဲၢ်လိ. သးပလံၤကစၢ်ယွၤလိ အမၤသ့းဘၠီၣ်ဝံၤအလီၢ်ခံအိၣ်လါ တၢ်စိတၢ်ကမီၤလိ အကတ့လီၤဘၠီၣ်လိ လၢၢ်ရာ်အပူၤတဂၤနဲၢ်တကဲၢ်. မဲၢ်လိယစံးဘၣ်ဝဲသု, သးပလံၤအဝဲဒၣ်နဲၢ်တကဲၢ်. 6ထွိၣ်ဖှ့းဖွိယဲၢ်ဘ့ၣ်ဘၣ်တၢ်ဆါအီၤလိ စ့ၣ်ခံဘ့ၣ်1တမဲၢ်ဘၣ်ဧါ. လၢၤဘျီး, အဝဲဝီၤတဘၣ်တၢ်သးသပ့ၤကွံၤအီၤနီတဘ့ၣ်လိ ကစၢ်ယွၤဘၣ်. 7သုခွိၣ်သူအဘိၣ်တဖၣ်ဒၣ်ဘၣ်တၢ်ဂံၢ်နီၣ်ဃၤအီၤလိ. လိတၢ်နံၤအဃိ, တဘၣ်သးပလံၤတၢ်တဂ့ၤ, သုလုၢ်သုပှ့ၤဒွိၣ်နဲၢ်ထွိၣ်ဖွိဘျၢအသးတကဲၢ်လိ. 8ယစံးဘၣ်သု, ဘၠီၣ်တဂၤလၢ်လၢ်လိ အအၢၣ်လီၤလိ ဘၠီၣ်အါဂၤအမံၤညါ, ‘လိအဝဲဒၣ်ဘၣ်ဃးလါ ယၤနဲၢ်, ပှၤကညီဖွိခွါ ကမၤတၢ်တမံၤဃီနဲၢ်လိ အဂီၢ်, လိကစၢ်ယွၤအကလူးတလိၣ်အမံၤညါလိ. 9မဲၢ်မဲၢ်, ဘၠီၣ်တဂၤလၢ်လၢ်လိ လိနဲၢ်ယၤလိ ဘၠီၣ်အိၣ်ဘျၢအမံၤညါနဲၢ်, ပှၤကညီဖွိခွါ ကလိနဲၢ်အီၤလိ ကစၢ်ယွၤအကလူးတလိၣ်အမံၤညါလိ. 10ဘၠီၣ်တဂၤလၢ်လၢ်လိ အကတိၤထီဒါ ဘၣ်ပှၤကညီဖွိခွါလိ တၢ်ကတိၤတဘီၣ်နဲၢ်, တၢ်ပျၢ်ကွံၤအတၢ်ကမၣ်သ့းဝဲလိ. မဲၢ်မဲၢ် ဘၠီၣ်တဂၤလိ အကတိၤပစွိပစသးစီဆှံနဲၢ်, တၢ်တပျၢ်ကွံၤအတၢ်ကမၣ်ဘၣ်. 11ဖဲအဝဲဝီၤ ဆှၢသုလိ ဘူၣ်ဘျီၣ်လိ အမဲၢ်တၢ်ဘါလီၢ်တလိၣ်အပူၤ, မဲၢ်တမဲၢ်လိ ပဒွိၣ်ဖးဒွိၣ်လါ ဘၠီၣ်ပၢၤထံပၢၤကီၢ်တလိၣ်အမံၤညါနဲၢ်, တဘၣ်ကွိၢ်ဘၣ်ဂီၤလိ သုကဘၣ်စံးဆၢတၢ်ဒ်လဲၣ်ခိဧိၤ. မဲၢ်တမဲၢ်နကဘၣ်စံးဘၣ်ကတိၤတၢ်မနီၢ်လဲၣ်နဲၢ်တဂ့ၤ. 12တၢ်ဂ့ၢ်ဒ့းအ့ၤ ဆၢကတီၢ်အဝဲနဲၢ်, သးစီဆှံကသိၣ်လိ သုတၢ်လိ သုကဘၣ်စံးဘၣ်ကတိၤအီၤနဲၢ်လိ.’ 13ဘၠီၣ်လိ ဘၠီၣ်ထီဖူၣ်ထီခၠၢအကျၣ်တဂၤစံးဘၣ်အီၤ, ‘သရၣ်ဧိ, စံးဘၣ်ယထီပုၢ်ဝဲၢ်ခွါလိ အကနီၢ်ဖးနဲၢ်ယၤတၢ်စူၣ်လီၢ်ခီၣ်ခွိၣ်လိ ပပၢ်ပၤတီၢ်နဲၢ်ဘၠီၣ်နဲၢ်တကဲၢ်. 14ယ့ၣ်ရှူးစံးဆၢဝဲ, ‘စီၤဧိ မဲၢ်မတဂၤ ဟ့ယၤတၢ်စိတၢ်ကမီၤလိ ယကစံၣ်ညီၣ်တၢ်, မဲၢ်တမဲၢ်ဘၣ်ဘျီး ကနီၤဖးလီၤတၢ်စုၣ်လီၢ်ခီၣ်ခွိၣ်လိ သုခံဂၤအဘၢၣ်စၢၤနဲၢ်လဲၣ်.’ 15ယ့ၣ်ရှူးစံးဆၢဝဲ, ‘စီၤဧိ မဲၢ်မတဂၤ ဟ့ယၤတၢ်စိတၢ်ကမီၤလိ ယကစံၣ်ညီၣ်တၢ်, မဲၢ်တမဲၢ်ဘၣ်ဘျီး ကနီၤဖးလီၤတၢ်စုၣ်လီၢ်ခီၣ်ခွိၣ်လိ သုခံဂၤအဘၢၣ်စၢၤနဲၢ်လဲၣ်.’ 16အနံၤဝံၤဘျီး ယ့ၣ်ရှူးစံးဘၣ်အဝဲဝီၤလိ တၢ်ကတိၤဒိတထ့ၣ်အံၤလိ. ‘တဘျီးဘၠီၣ်တၢ်အိၣ်တၢ်ယၢၤတဂၤလိ အအိၣ်လါဟီၣ်ခွိၣ်လိ အသၣ်ထီၣ်ဂ့ၤနီလိ.’ 17အဝဲဒၣ်ဆိကမိၣ်ထီၣ်လိ အသးပူၤ, ‘ယတၤသူတၤသၣ်ခဲလုၤအံၤ, ယကဂၤဖှိၣ်ပှၤအီၤအဂီၢ်တၢ်လီၢ်တၢ်ကျဲၣ်တအိၣ်ဘၣ်. မဲၢ်ယကမၤဘၣ်ဒ်လဲၣ်ခိလဲၣ်. 18အဝဲဒၣ်စံးလီၤဂ့ၤအသး, ‘ယကမၤယဲဒ့းအ့ၤလိ. ယကမၤလီၤပှၢ်ကွံၤယဘုၣ်ဖီတလိၣ်ဘျီး ဘှီၣ်ထီၣ်ဂ့ၤယဲအဂၤလိ အဒွိၣ်နဲၢ်အလီၢ်တကဲၢ်, ဘျီးယကဂၢ်ဖှီၣ်ပၤယဘုၣ်ဖီလါ ယတၢ်ဖွိတၢ်လ့ၤခဲလုၤနဲၢ်လိ. 19တုၤနုၤတဘျီ, ယကစံးဘၣ်လီၤဂ့ၤယသး, ယသးဧိ နအိၣ်လါတၢ်အဂ့ၤအဘၣ်လိ နလိၢ်ဘၣ်အီၤခဲလုၤ, လိအါန့ၤအါလါအဂီၢ်လိ. အိၣ်မူခၠိကလၤ, အီၣ်တၢ်, အိတၢ် ဘျီးမၤမူၤမၤခုၣ်နသးတကဲၢ်. 20လၢၤဘျီး ကစၢ်ယွၤ စံးဘၣ်အီၤ, ‘ဘၠီၣ်အသးတဆးနၤဧိ. မုၢ်တနၤဃီအံၤနဲၢ်, နကဘၣ်ဟ့လီၤကွံၤနသးသမူလိ. တုၤနုၤတဘျီ တၢ်လိ နပၤဃၤအီၤလိ နနီၢ်ကစၢ်ဒၣ်နဲအဂီၢ်ခဲလုၤနဲၢ်, မတဂၤကဒွိးန့ၢ်ဘၣ်လဲၣ်.’ 21ဘျီးယ့ၣ်ရှူးမၤကတၢၢ်အတၢ်ကတိၤဘျီး စံးဝဲ, ‘ဘၠီၣ်လိ အဂၢ်ဖှိၣ်တၢ်အိၣ်တၢ်ယၢၤဘျၢသးလိၣ်နဲၢ် အနီၢ်ကစၢ်ဒၣ်ဝဲအဂီၢ်, လၢၤဘျီးတကဲၢ်ဒွိၣ်ဝဲလိ ကစၢ်ယွၤအမံၤညါဘၣ်နဲၢ်, တၢ်ကမၤအသးဘျီး အီၤဒ့းအ့ၤလိ.’ 22တၢ်နဲၢ်ဝံၤအလီၢ်ခံ ယ့ၣ်ရှူးစံးဘၣ် အခ့အပှၤတလိၣ်, ‘လိတၢ်တမံၤအံၤအဃိ ယစံးဘၣ်သု, တဘၣ်ကွိၢ်ဘၣ်ဂီၤဘၣ်တၢ်အီၣ်လိ သုလိၢ်ဘၣ်လိ သုကအိၣ်မူအဂီၢ်မဲၢ်ဂ့ၤ, တၢ်ကူတၢ်သွိးလိသုလိၢ်ဘၣ်လိ သုနီၢ်ခိ အဂီၢ်မဲၢ် ဂ့ၤနဲၢ်တဂ့ၤ. 23တၢ်အိၣ်မူနဲၢ် အကါဒွိၣ်နဲၢ်ဒံး တၢ်အီၣ်တၢ်အိ, ဘျီး နီၢ်ခိနဲၢ်အကါဒွိၣ်နဲၢ်ဒံး တၢ်ကူတၢ်သွိးတကဲၢ်လိ. 24ကွၢ်စွိးဝၣ်ဃး တလိၣ်တကဲၢ်. အဝဲဝီၤ တဖှ့းလီၤတချံမဲၢ်ဂ့ၤ, ကူးက့ၤတၢ်မဲၢ်ဂ့ၤနဲၢ်ဘၣ်. အဝဲဝီၤ အဒၢၣ်လိ အကပၤဖှိၣ်တၢ် မဲၢ်ဂ့ၤ တအိၣ်ဘၣ်. ကစၢ်ယွၤ ဒွိးအီၣ်ဒွိးအိအဝဲဝီၤလိ. သုလုၢ်သုပှ့ၤဒွိၣ်နဲၢ်ဒံးထွိၣ်ဘီၣ်တလိၣ်တကဲၢ်လိ. 25မဲၢ်မတဂၤလိသုကျၣ်လိအဘၣ်ယိၣ်တၢ်အဃိ, ထူးထီၣ်ထိအနံၣ်အလါသ့းတဂၤနဲၢ်လဲၣ်. 26တၢ်အဆံးဖွိဒ့းန့ၤအသိးဒၣ်လဲၣ် သုမၤမဲၢ်တသ့းဘျီး, ဘၣ်မနီၢ်အဃိ သုကွိၢ်တၢ်ဂီၤတၢ်လိ တၢ်အဂၤတလိၣ်အဂ့ၢ်လဲၣ်. 27ဖီဒ့ၣ်ညါတလိၣ်ဒွိၣ်ထီၣ်မဲထီၣ်ဝဲလဲၣ်နဲၢ်, ကွၢ်တကဲၢ်. အဝဲဝီၤ တဖံတၢ်မၤတၢ်မဲၢ်ဂ့ၤ, ဆးကူဆးကၤမဲၢ်ဂ့ၤနဲၢ်ဘၣ်. လၢၤဘျီး ယစံးဘၣ်သုလိ စီၤရှလိၤမိၤလိ အအိၣ်လါ အကဟုကညီၤ အတၢ်ထူးတၢ်တီၤခဲလုၤဒၣ်လဲၣ်နဲၢ်, တအိၣ်လါအကူအသွိးဒိၣ်တၢ်ဂ့ၤထဲသိးလါ ဖီဒ့ၣ်ညါတဖိးဘၣ်. 28ဘၠီၣ်လိ အဒွိးသွိးနီၣ်ဧိၤမံၤဧိၤတလိၣ်, လိမုၢ်မဆါတနံၤအံၤအိၣ်ဖဲအံၤ, မဲၢ်မဲၢ် ကဲဝိၤနံၤဘၣ်တၢ်ဒွဲအူၣ်ကွံၤအီၤလိ ဖၣ်ကပူၤနဲၢ်, မဲၢ်ဝဲ ကစၢ်ယွၤလိ. အဝဲကဒွိးကူဒွိးသွိးသုလီၤတံၢ်ဒွိၣ်ဒံးတကဲၢ်တမဲၢ်ဘၣ်ဧိ. သုတၢ်စူၤတၢ်နၤ အိၣ်ပံတံဖွိလိ. 29လိတၢ်နံၤအဃိ, တဘၣ်ကွိၢ်ဂီၤဘျီး သူၣ်ကွိၢ်သးဂီၤဝဲဘၣ်ဃးလါတၢ်လိသုကဘၣ်အီၤဘၣ်တၢ်လိ သုကအိးဘၣ်တၢ်အဂ့ၢ်နဲၢ်တကဲၢ်. 30(တၢ်ဂ့ၢ်မဲၢ်ဒ့းအ့ၤ, ဘၠီၣ်တစူၤတနၤယွၤလိဟီၣ်ခွိၣ်အံၤတလိၣ် ကွိၢ်တၢ်ဂီၤတၢ် ဘၣ်ဃးလါ တၢ်အံၤ တလိၣ်ကိးဘျီးဒ့းလိ. 31သုပၢ် သံညါလိ သုလုဘၣ်တၢ်အံၤတလိၣ်လိ. မဲၢ်မဲၢ် ချုထ့ၣ်နဲၢ်ယွၤအဘီအမုၢ်တကဲၢ်. ဘျီး ယွၤဟ့သုတၢ်အံၤတလိၣ်လိ. 32သိလိ အစှၤတဖူၣ်ဧိ2 သးပလံၤတၢ်တဂ့ၤ. တၢ်ဂ့ၢ်ဒ့းအ့ၤ, သုပၢ်ဘၣ်အသးလိ အကဟ့သုဘီမုၢ်နဲၢ်လိ. 33ဆါကွံၤ သုတၢ်ဖွိတၢ်လံၤတလိၣ်ဘျီး ဟ့တၢ်မၤဘူၣ်လိ ဘၠီၣ်ဖှီၣ်ဖွိယၤဖွိတကဲၢ်. မၤနဲၢ်လိသုဂီၢ်စ့ၣ်အထၢၣ်လိ အယၤကွံၤတသ့းဘၣ်တလိၣ်, ဘျီး ပၤဖှိၣ်သုတၢ်ထူးတၢ်တီၤလိ မွိခွိၣ်, ဖဲအဝဲဝီၤ တစှၤလီၤနီတဘျီဘၣ် အလီၢ်နဲၢ်တကဲၢ်. တၢ်ဂ့ၢ်မဲၢ်လိ တၢ်ဘျၣ်ဟုၣ်အီၤတန့ၢ်ဘျီး တၢ်ဖွိဃၢ်မၤဟးဂီၤကွံၤအီၤတသ့းဘၣ်အဃိနဲၢ်လိ. 34တၢ်ဂ့ၢ်ဒ့းအ့ၤ, ဖဲသုတၢ်ထူးတၢ်တီၤအိၣ်ဝဲအလီၢ်နဲၢ်, သုသးကအိၣ်ဝဲဖဲနံၤကိးဘျီးဒ့းလိ. 35အိၣ်ကတဲၤကတီၤသုသးလိ တၢ်တမံၤမံၤ လိ အကဟဲအဂီၢ်, စၢၣ်တံၢ်သုယီၢ်ဒ့ၣ်ဘျီး ဒွဲၣ်ထီၣ် မဲၣ်အူဒၢတလိၣ်, 36ဒ်တၢ်ခ့တၢ်ပှၤတလိၣ်လိ အအိၣ်ခိးအကစၢ်အတၢ်ဟဲက့ၤလိ တၢ်တ့တၢ်ဖျီအမူးအဂီၢ်အသိးနဲၢ်တကဲၢ်. ဖဲအဝဲဒၣ်ဟဲဘျီး ဒွိသီၣ်တၢ်နဲၢ်, အဝဲဝီၤကအွိးထီၣ်မူတြဲၤလိ အဂီၢ်တဘျီဃီလိ. 37တၢ်ခ့တၢ်ပှၤလိ အကစၢ်ထ့ၣ်လိ အဆိးသီဘျီး အိၣ်ကတဲၤကတီၤအသးဖဲအဝဲဒၣ် ဟဲက့ၤနဲၢ်, ဘၣ်ဆိၣ်ဂ့ၤဝဲလိ. ယစံးဘၣ်သု, အဝဲဒၣ်ကစၢၣ်ဃၤထီၣ်အယီၢ်ဒ့ၣ်လိ ယီၢ်တကိး, ဒွိးဆ့နီၤအဝဲဝီၤ, ဘျီးကမၤအခ့အပှၤအတၢ်မၤလိ အဝဲဝီၤ အဂီၢ်လိ. 38အဝဲမဲၢ်ဟဲက့ၤလိ မုၢ်စူၢ်လါလီၤ, မဲၢ်တမဲၢ် စဲၤခံနဲၢ်အဝဲနံၤဒၣ်လဲာ်, ဘျီး ထ့ၣ်အဝဲဝီၤအိၣ်ကတဲၤကတီၤအသးနဲၢ်, အဝဲဝီၤအကဘၣ်ဆိၣ်ဂ့ၤဝဲ ထဲလဲၣ်ခိလဲၣ်. 39ဘျီး သ့းနီၢ်ထီၣ် တၢ်အံၤတကဲၢ်, ဟံၣ်ကစၢ်မဲၢ်သံညါ တၢ်ဘျၣ်ကဟဲအဆၢကတီၢ်နဲၢ် တမဲၢ်လိ အဝဲဒၣ် ကပျၢ်လီၤတၢ်ဘျၣ်နုလီၤဘၢၣ်ဖျိအဟံၣ်ဘၣ်. 40ဘျီး သုဝဲနဲၢ်နဲၢ် အိၣ်ကတဲၤကတီၤသုသးတကဲၢ်. တၢ်ဂ့ၢ်ဒ့းအ့ၤ, ပှၤကညီဖွိခွါ ကဟဲဝဲဖဲ အဆၢကတီၢ်လိ သုတဆိကမိၣ်လိ အကဟဲဝဲဘၣ်နဲၢ်လိ. 41စီၤပ့းတရုးစံးဝဲ, ‘ကစၢ်ဧိ မဲၢ်နကတိၤတၢ်ကတိၤဒိ အဝဲအံၤလိ ပဂီၢ်ဧါ. မဲၢ်တမဲၢ်, လိ ဘၠီၣ်ကိးဂၤဒ့းအဂီၢ်လဲၣ်.’ 42ကစၢ်စံးဆၢဝဲ, ‘မဲၢ်မဲၢ်ဒ့းန့ၤဘျီး, မဲၢ်မတဂၤ မဲၢ်တၢ်ခ့တၢ်ပှၤလိ အသးတီလါ အကူၣ်ဘၣ်ကူၣ်သ့တဂၤလဲၣ်. အဝဲဒၣ် မဲၢ်ဘၠီၣ်တဂၤလိ အကစၢ်ကဟ့စိဟ့ကမီၤအီၤလိ အကကွၢ်ထွဲဟံၣ်ဘျီး ဒွိးအီၣ်ဒွိးအိတၢ်ခ့တၢ်ပှၤအဂၤတလိၣ် ဖဲအဆၢကတီၢ်ဘၣ်တဘျီဝံၤတဘျီနဲၢ်လိ. 43တၢ်ခ့တၢ်ပှၤအဝဲနဲၢ်, ဖဲအကစၢ်ဟဲက့ၤလိ ဟံၣ်ဘျီး ထ့ၣ်အမၤဝဲဒ့းန့ၤအသိးနဲၢ်, ဘၣ်ဆိၣ်ဂ့ၤဝဲလိ. 44သပှၢ်ကတၢၢ်, ယစံးဘၣ်သု, အကစၢ်ကဟ့စိဟ့ကမီၤအီၤလိ အကကွၢ်ထွဲအတၢ်ဖွိတၢ်လံၤတလိၣ်ခဲလုၤလိ. 45ၢၤဘျီး တၢ်ခ့တၢ်ပှၤအဝဲနံၤ မဲၢ်စံးလီၤဂ့ၤအသး, ‘ယကစၢ်ကဟဲက့ၤအဆၢကတီၢ်ယံၤဒံးဝဲလိ. ဘျီးဝၢၢ်ဘၠီၣ်မ့ၢ်ပှၢ်ဘၠီၣ်ပွိၤခွါခဲလုၤဘျီး အီၣ်တၢ်ဘျီးအိတၢ်လါ အိမူအသးနဲၢ်, 46အကစၢ်ကဟဲက့ၤဝဲ မုၢ်တနံၤလါ အဝဲတမုၢ်လၢ်ဘျီးဖဲအဆၢကတီၢ်လိ အဝဲတသံညါဝဲဘၣ်နဲၢ်လိ. အကစၢ်ကကျီသီၣ်တ့ၤဝဲတကူၤတကူၤ, ဘျီး ပၤအီၤတမံၤဃီလါ ဘၠီၣ်အသးတမူၤတနီၢ်နဲၢ်လိ. 47တၢ်ခ့တၢ်ပှၤလိ အသံညါ အကစၢ်အဲၣ်ဒိးအမၤတၢ်မနီၢ်, လၢၤဘျီး တအိၣ်ကတဲၤကတီၤအသးဘျီး မၤတၢ်လိ အကစၢ်အဲၣ်ဒိးဝဲနဲၢ်, ကဘၣ်တၢ်စံၣ်ညီၣ်ဘျီး ဖျ့အီၤနီၢ်ဖျ့အီၤသ့းလိ. 48မဲၢ်မဲၢ်တၢ်ခ့တၢ်ပှၤလိ အတသံညါအကစၢ်အဲၣ်ဒိးတၢ်မနီၢ်ဘျီး မၤဘၣ်တၢ်တမံၤမံၤလိ အကြၢးဘျီး တၢ်ဖျ့အီၤနဲၢ်. ကဘၣ်တၢ်စံၣ်ညီၣ်ဖျ့ဒၣ်အီၤဖဲအကြၢးအဘၣ်လိ. ဘၠီၣ်တဂၤလိ တၢ်ဟ့တၢ်လိအီၤနီၢ်အီၤသ့းနဲၢ် တၢ်ကမုၢ်လၢ်လိအီၤနီၢ်အီၤသ့းလိ. ဘၠီၣ်တဂၤလိတၢ်ဟ့အီၤတၢ်အၣ်ဒွိၣ်ဒံးတကဲၢ်နဲၢ်, တၢ်ကမုၢ်လၢ်တၢ်လိအီၤအၣ်ဒွိၣ်ဒံးတကဲၢ်နဲလိ. 49ယဟဲစိၤမဲၣ်အူလိ ဟီၣ်ခွိၣ်လိ. ယဆၢမုၢ်လၢ်နီၢ်လိ အကကဲၤထီၣ်ပၤစၢၤနီၢ်လ့ဝဲနဲၢ်လိ. 50တၢ်ဒိးဘျၢတမံၤလိ ယကဘၣ်ဒိးဘျၢယသးနဲၢ်အိၣ်ဝဲ, ဘျီးတချုးဒံးလိ ယဒိးယဲနဲၢ်ယသးဘၣ်ကွိၢ်ဘၣ်ဂီၤဝဲထဲလဲၣ်ခိနဲၢ်လဲၣ်. 51မဲၢ်သုဆိကမိၣ်လိ ယဟဲဝဲဒ်သိး ယကဘၣ်ဟဲစိၤ တၢ်ဃူတၢ်ဖှိၣ်လိ ဟီၣ်ခွိၣ်ဧါ. တမဲၢ်တၢ်ဃူတၢ်ဖှိၣ်ဘၣ်. ယစံးဘၣ်သု, တၢ်လီၤမုၢ်လီၤဖးတခိလိ. 52စးထီၣ်ဝဲအံၤလါဆူညါနဲၢ်, ဟံၣ်ဖွိဃီဖွိတဒူၣ်လိ အဒူၣ်ဖွိထၢဖွိအီၣ်ယဲၢ်ဂၤနဲၢ်ကလီၤမုၢ်လီၤဖး, သၢဂၤဘျီး ခံဂၤနဲၢ်ထီဒါဂ့ၤဝဲ, ဘျီးခံဂၤ နဲၢ်ကထီဒါသၢဂၤလိ. 53ပၢ်တလိၣ်ကထီဒါအဖွိခွါတလိၣ်, ဘျီးဖွိခွါတလိၣ်ကထီဒါအပၢ်တလိၣ်, မိၢ်တလိၣ် ကထီဒါ အဖွိမုၣ်တလိၣ်ဘျီး ဖွိမုၣ်တလိၣ် ကထီဒါ အမိၢ်တလိၣ်,မံၤပှၢ်မ့ၣ်ပှၢ်တလိၣ် ကထီဒါ အဒဲၣ်တလိၣ်ဘျီး ဒဲၣ်တလိၣ် ကထီဒါမံၤပှၢ်တလိၣ်လိ.’ 54ယ့ၣ်ရှူးစံးဘၣ်နဲၢ်နဲၢ် ဘၠီၣ်ထီဖူၣ်ထီခၠၢတလိၣ်, ‘ဖဲသုထ့ၣ်တၢ်အၢၣ်တလိၣ်ဟဲထီၣ်လိ မုၢ်နုၤနဲၢ်, တဘျီဃီ သုစံးသုဝဲ, ‘မွိခွိၣ်ကစူၤလိ.’ ဘျီးတၢ်စူၤဝဲလိ. 55ဘျီးဖဲ သုကလၢၢ်ဘၣ်ကလ့ၤအူလိ ကလ့ၤထ့းတခိနဲၢ်. သုစံး ‘တၢ်ကကွိၢ်ထီၣ်လိ,’ ဘျီး တၢ်ကွိၢ်ဝဲဒၣ်လိ. 56ဘျီးတၢ်ကမၤအသးဒ်လဲၣ်နဲၢ်သုသံညါလိ. မဲၢ်မဲၢ်ဒ့းန့ၤဘျီး ဘၣ်မနီၢ်အဃိ သုတနၢ်ပၢၢ်တၢ်ခဲနဲအံၤအခီပညီလဲၣ်. 57တၢ်လိ ဘၠီၣ်ကြၢးမၤ, တကြၢးမၤနဲၢ်, ဘၣ်မနီၢ်အဃိသုတစံၣ်ညီၣ်ပဲာ်ဖးနီၤဖးလိ သုနီၢ်ကစၢ်ဒၣ်သုဝဲနဲၢ်လဲၣ်. 58ဘၠီၣ်တဂၤမဲၢ်ကစ့းကစွိထီဒါနၤဘျီး ဆှၢနၤလိ ဘၠီၣ်စံၣ်ညီၣ်တၢ်နဲၢ်, ဂုာ်ကျဲးစၢၤနၤတသ့းဖဲအသ့း ဒ်သိး နကဘၣ်မၤဘၣ်လိၤဂ့ၤနသးဘျီး အီၤ, ဖဲသုလဲၤလိကျဲၣ်ဒ်သိး အဝဲသုတတွံၢ်နၤလိ ဘၠီၣ်စံၣ်ညီၣ်တၢ်အမံၤညါဘျီး ဘၠီၣ်စံၣ်ညီၣ်တၢ်သုတဟ့လီၤနၤလိ ပၢၤကီၢ်အစုပူၤ, ဘျီးပၢၤကီၢ်သုတတ့ၢ်နုနၤလိ တၢ်စၢၣ်ဃၤဒၢၣ်တဂ့ၤအဂီၢ်နဲၢ်တကဲၢ်.’ 59ယစံးဘဘၣ်သု, တချုးနလိးတူၤကွံၤတၢ်စံၣ်ညီၣ်အစ့ၣ်အကတၢၢ်တဘ့ၣ်ဒံးဘၣ်ဘျီး, နတပူၢ်ဖျဲးထီၣ်ကွံၤဖဲနံၤဘၣ်.’
Markert nå:
Luke 12: ktpv-rv
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
