Mbandukulu 5
5
Bana ya Adami kubanda na Sete tii na Nowa
1Yayi ni mukanda ya bankumbu ya bana ya Adami.
Ntangu Nzambi yidikaka muntu, yandi yidikaka muntu na kifwani ya Nzambi. 2Yandi yidikaka kento na bakala. Yandi sakumunaka bawu mpe yandi bokilaka bawu bantu na kilumbu yina yandi yidikaka bawu.
3Ntangu Adami lungisaka bamvula nkama na makumi tatu (130), yandi butaka mwana yina vwandaka mutindu yandi, na kifwani ya yandi. Yandi pesaka yandi nkumbu Sete. 4Na manima ya mbutukulu ya Sete, Adami zingaka bamvula bankama nana (800). Adami butaka dyaka bana ya bakento na ya babakala. 5Adami zingaka bamvula bankama yivwa na makumi tatu (930) mpe yandi kufwaka.
6Ntangu Sete lungisaka bamvula nkama na tanu (105), yandi butaka Enose. 7Na manima ya mbutukulu ya Enose, Sete zingaka bamvula bankama nana na nsambwadi (807). Yandi butaka dyaka bana ya bakento na ya babakala. 8Sete zingaka bamvula bankama yivwa na kumi na zole (912), mpe yandi kufwaka.
9Ntangu Enose lungisaka bamvula makumi yivwa, yandi butaka Kenane. 10Na manima ya mbutukulu ya Kenane, Enose zingaka bamvula bankama nana na kumi na tanu (815). Yandi butaka dyaka bana ya bakento na ya babakala. 11Enose zingaka bamvula bankama yivwa na tanu (905), mpe yandi kufwaka.
12Ntangu Kenane lungisaka bamvula makumi nsambwadi, yandi butaka Maalalele. 13Na manima ya mbutukulu ya Maalalele, Kenane zingaka bamvula bankama nana na makumi yiya (840). Yandi butaka dyaka bana ya bakento na ya babakala. 14Kenane zingaka bamvula bankama yivwa na kumi (910), mpe yandi kufwaka.
15Ntangu Maalalele lungisaka bamvula makumi sambanu na tanu, yandi butaka Yelede. 16Na manima ya mbutukulu ya Yelede, Maalalele zingaka bamvula bankama nana na makumi tatu (830). Yandi butaka dyaka bana ya bakento na ya babakala. 17Maalalele zingaka bamvula bankama nana na makumi yivwa na tanu (895), mpe yandi kufwaka.
18Ntangu Yelede lungisaka bamvula nkama na makumi sambanu na zole (162), yandi butaka Enoke. 19Na manima ya mbutukulu ya Enoke, Yelede zingaka bamvula bankama nana (800). Yandi butaka dyaka bana ya bakento na ya babakala. 20Ntangu Yelede lungisaka bamvula bankama yivwa na makumi sambanu na zole (962), yandi kufwaka.
21Ntangu Enoke lungisaka bamvula makumi sambanu na tanu, yandi butaka Metusela. 22Enoke vwandaka tambula kintwadi na Nzambi. Na manima ya mbutukulu ya Metusela, yandi zingaka bamvula bankama tatu (300). Yandi butaka dyaka bana ya bakento na ya babakala. 23Enoke zingaka bamvula bankama tatu na makumi sambanu na tanu (365). 24Enoke tambulaka kintwadi na Nzambi. Na manima, yandi zimbanaka, samu ti Nzambi bakaka yandi.
25Ntangu Metusaleme lungisaka bamvula nkama na makumi nana na nsambwadi (187), yandi butaka Lameke. 26Na manima ya mbutukulu ya Lameke, Metusaleme zingaka bamvula bankama nsambwadi na makumi nana na zole (782). Yandi butaka dyaka bana ya bakento na ya babakala. 27Metusaleme zingaka bamvula bankama yivwa na makumi sambanu na yivwa (969), mpe yandi kufwaka.
28Ntangu Lameke lungisaka bamvula nkama na makumi nana na zole (182), yandi butaka mwana ya bakala. 29Yandi pesaka mwana yina nkumbu Nowa, samu na kutuba ti: «Yandi yayi ke bomba beto samu na bisalu ya beto, mpe mpasi yina beto fwana kutala, samu na kusala ntoto yina Yave siingaka.» 30Na manima ya mbutukulu ya Nowa, Lameke zingaka bamvula bankama tanu na makumi yivwa na tanu (595). Yandi butaka dyaka bana ya bakento na ya babakala. 31Lameke zingaka bamvula bankama nsambwadi na makumi nsambwadi na nsambwadi (777), mpe yandi kufwaka.
32Ntangu Nowa lungisaka bamvula bankama tanu (500), yandi butaka Seme, Ame na Yafete.
Markert nå:
Mbandukulu 5: BNT
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© (Active), Wycliffe Bible Translators, Inc. All rights reserved.
