Mak 8
8
Da Yensa afoolenne ñanraagof wuuliyeŋ arenekeŋ
1Afúrumi na, dam faka timaŋo jup andék anlahun Yensa. Adékiidek, guyaahálahánin adét. Angu fo guyaahálaŋo adétne, Yensa ahuyor ñantaalibehinem k'andéker anwaalaham. Banjógunay ayéjeeniŋ:
2- Jamaŋo immi, inini buruhu ásibaŋ alallaŋ ginguyoŋne nanka. Inini k'agune guyaahálaŋo adédet. Arinkum akabkab 3ifak ibenuh biki ídekeh gíyejeeniŋ aŋŋúñ andék annen a gubaarhu kúugo imbeŋ a binaalo maro ayikyik m'anfúrumor biŋantin.
Nim Yensa alóbne. 4Kanda balóbi nim ñantaalibehinem anyéjem:
- Nanka k'enguyoŋne a kanaŋaŋo, beeraŋ ginyikunkunoŋne guyaahálaŋo h’abárháneeniŋne?
5Banlóbi nim Yensa ayéjeeniŋ:
- Inini ñómbuur ñoliheeraŋ agune nanka?
Anyéjem:
- Ñómekila ingi ñonak.
6Ayéjeeniŋ:
- Nétemuŋ!
Bajahi ayéj jamaŋo nip annooh a réeŋo. Bannoohi, Yensa adooh úmbuuro k'aramun Díino. Baramuni Díino, afac ñómbuuro k'anéer ñantaalibehinem k'andék ankib jamaŋo. 7Agida anyikyik mees ñokat ñopinam ñótedaa. Yensa afak adooh ñómár k’aduwar ñómár iniman n’ansaliyehne. Bakaani nim, anéer ñantaalibehinem k’ankib. 8Angu dam jamaŋo nip anfoolane f'anhay. Bambollay ñantaalibehinem andék andooh hofallaheno, te hómár anrumunrumun hatehel hámekila ingi hanak. 9Agida jamaŋo m'ansorne na dam ambábár bi ñanraagof wuuliyeŋ arenekeŋ. Angu banfoolay mees, Yensa ayéjeeniŋ ambicay aŋŋúñ. 10Bayéjeeniŋ aŋŋúñ, Yensa anyifa a sídeeno ingi ñantaalibehinem k'andék ba a didiirahu Dalmanuta.
Da ñanfarasiyaŋo ankiinane Yensa akandeeniŋ tamaseer
11Na a didiirahu Dalmanuta ñanfarasiyaŋo andékirne andék antíb Yensa. Agida n’ansíiba buneninkinem k’ampiren annéerem kayúuleno. Angu bampút ankomb siññopunay ingi Yensa k’ammincinkem balóbo k'adék akandeeniŋ tamaseer n’ópájul n’ajellihinkinehne maro Díino abúuñuremne.
12Yensa banlóbem nim anuumul pef k'ayéj:
- Horaŋ akanne ki jamaŋo inini ampokun gúfeku tamaseereŋ bareŋ? Janteneŋ baŋ k'íteekinoonuŋ marigeno. Dikaan tamaseer ki ki karo nómár aséediya maro Díino abúuñureemne.
13Yensa balóbi nim mees andék anyifa a sídeeno, úmár ingi ñantaalibehinem k'andék anjuc ambénneeniŋ na.
Láwiirhu ñanfarasiyaŋo ingi Herod
14Angu Yensa anguy a sídeeno ingi ñantaalibehinem. Kanda f'aŋŋane hadéko ñantaalibeŋo anfiiram budoku úmbuuro. Agida anlahlah na kómbuur ínkonduk bareŋ. 15Angu Yensa ayéjeeniŋ:
- Káánunteŋ láwiirhu ñanfarasiyaŋo ingi inno Umaasaŋo Herod.#8.15 Ho ñanfarasiyaŋo anlókine ki Yensa akandáreeniŋ tamaseereŋo, te aji fégireŋeŋ anfoyhuneh búdomo maro Yensa ingine Úbáku Díino. Ásibaŋo innoŋ apiren aguy ininkaman wúuro m’ayéjeh a nintiku Díino ingi hakaanankánam: «Aji fégiri ingi sígihum, dídom!»
16Fo Yensa alóbne nim ñantaalibehinem anyéjayeh:
- Karo n'inyikuroŋoŋne úmbuuro galóbohne?
17Angu f'anlóbne nim Yensa apájul k’ayéjeeniŋ:
- Horaŋ akanne k'uwoñoŋ ineeŋ? Ulaheŋlah karo ni yikuroŋne úmbuuro, gúmár akanne íyejoonuŋ úkáánumáŋ láwiirhu ñanfarasiyaŋo ingi inno Umaasaŋo Herod? Gúmár gireŋ! Inini, karo fanti buwutoŋ? Karo jamméejenkánan amibane baman manini? 18Karo ígihinan ingi ilaahánan jóndoŋ? Karo lentaaroŋ dam? 19F'efacne ñómbuuro ñómákilaŋo k'ifoolen índiigeeno wuuliyeŋ amákilaŋo, f'ambollane gufoolaŋo, ninkinan hatehel haliheeraŋ gujaheŋne a hofallaheno?
Yensa bamiiheeniŋ nim ñantaalibeŋo anjaabiyem anyéjem:
- Hatehel haala ingi hanak.
20Banlóbi nim Yensa afak aŋoolin amiiheeniŋ ayéjeeniŋ:
- K'angu dam d'epoculne ñómbuuro k'ifoolen agofoŋo wuuliyeŋo arenekeŋo, hofallaheno ha dam hatehel haliheeraŋ gurumuneŋne?
Anjaabiyem anyéjem:
- Hatehel hámekila ingi hanak.
21Banjaabiyem nim Yensa ayéjeeniŋ:
- Angu baman manini, ninkinan fanti buwutoŋ maro me guyikhum úmbuuro kaanundum tana?
Nim Yensa ayéjeeniŋne.
Da Yensa ajébunne úpiminno a saariŋo n’aretuhne Betsayida
22Angu andék ingi sídeeno f'andék anjuc ampút a saariŋo n’aretuhne Betsayida. F'angune bim ayik m'andoohor údiigeen úpimi ba imbi Yensa k’ankiinaham dáde amapundeeniŋ údiigeeno k'ajéb. 23Banlóbem nim Yensa alah údiigeeno a silah k'atuulenem f'andék anfúr a saariŋo. Bambéni saariŋo, Yensa alotun ígihu údiigeeno. Balotuni mees, amapun ígihinem k'ayéjem:
- Angu inini, gúfegefeg?
24Yensa balóbi nim, údiigeeno ayoofun ígihinem k'ayéjem:
- Ífefeg ñanraagofoŋo, kanda yaaŋáraŋ. Akankaan iniman munnoŋ m'aŋay hadék.
25Angu Yensa amapun ígihinem anakin. F'aŋoolinne amapun ígihinem, údiigeeno akir afég nimbun. 26Angu Yensa ayéjem:
- Inini, ŋoolint a dígo, kanda dahu údekum si saariŋo de!
Balóbi nim údiigeeno adék adoona.
Ka Piyer alóbne maro Yensa agune Umaasaŋo Mu Díino Acaabenne
27Afúrumi na, Yensa ingi ñantaalibehinem anfúrum Betsayida ankok bi akooroŋo n'antéejane Sesariya Filipay. Andékeh anwooñoh ki Yensa amiih ñantaalibehinem ayéjeeniŋ:
- Ninkinan ii, neeraŋ guyennehineŋne? Neeraŋ jamaŋo anyéjne imbi me? A búpájihinin me ingine hantaŋ?
28Ñantaalibeŋo anjaabiyem anyéjem:
- Ah! Índukoŋo anyéjyej f'ugune tala Yaya M'ayicimehne, índukoŋo anyéj f'ugune tala Anabila Eli, índukoŋo anyéj fi anabiyoŋ adúk. Nim jamaŋo aŋŋane gumiihooraŋo.
29Banlóbi nim, Yensa aŋoolin amiiheeniŋ ayéj:
- Kanda ninkinan nuko, neeraŋ gunuk ulaheŋne me me?
Balóbi nim Simon Piyer aŋoyindem ayéjem:
- Me nuko, a siwosenku me, fi ugune Umaasaŋo Mu Díino Acaabenne.
30Angu Piyer balóbi nim Yensa ayéjeeniŋ amincin:
- Ukoŋkoŋ, kanda dahu úduk úteekineŋ wúur.
Nim Yensa anwooñne ingi ñantaalibehinem.
31Angu afúrumi n’anlóbne na dam, Yensa akomb gukawandinku ñantaalibehinem a gubaarhu n’aniirorunkunehne. Ayéjeeniŋ:
- Ingah! Údiigeeno M'acaabenaane ayokáneh dáde. Ñanlaamero ingi ñankeekihu Hañaañeno ingi ñanlaameku alimaamaŋo ancucunkunom k’ankaanam k'abujaa. Nim gankankunehne maro hómár añantañanta ayikem. Kanda aniirodir, dahankánam akenghineh a biniirohunom ingi bumburunku arinkinem nip k'aŋoolin ajéb.
32Nim Yensa atéekinne ñantaalibehinem arenn. Kanda balóbi nim, Piyer alaham k'ambááhála hotir. Bambááhálay ayéjem:
-Ingah! Dahu úyej nim!
33Balóbem nim Yensa anoorla aning ñantaalibehinem k'asekur Piyer ayéjem:
- Seetano déker! Piyer, aji úlobi nim ŋayro gútib ho Díino asíibane gukaano. Ho jamaŋo ansíibane gútibehne.
Nim Yensa asekurne Piyer.
34Afúrumi na, Yensa ahuy barumuno b’aŋantinne hotir k'akawandineeniŋ ingi ñantaalibehinem ayéjeeniŋ:
- Ninkinan, ningeŋ baŋ, wúur m'asíiba hadék ingi me añantay abénn kawosenku bigokánam. Añantay alóki k'aniiro,#8.34 Agida ingi gugáreko anñañaañ maro wúuro añantay alóki «buyoofunku dinlihano.» Te na dinlihano ha Yensa alóbumohne, hámár agune ha jamaŋo andoohohne ba bubujhu ñanrifaŋo. A waato nómár immereŋ gansíiba bubujhu urifa, andooh dinlihan dinak, ankilenahin k’ankir anfaaŋunahin na wúuro úmár. Wúuro úmár ayokáneh dáde. añantay alóki ki jamaŋo anféginem, aŋan ñankindenkinem a gutifilinkum. 35Moŋon moŋon asíibane gupahunku ñankindenkinem, úmár akir afootahunehne. Kanda m'alóki k'abujaa a gubaarhu n'atifilineemne ingi n'atéekinehne jamaŋo Kúmbuuñaamo Kúnsuuminno, wúuro úmár ayikhineh kanjébo ka bandór. 36Ningeŋ baŋ! Aji wúur adohoy ingi sembe f'adék ayik nááfulo jup k'adék fo aniiro, hóge kunyiko kúmár anafahánam jahanama? Wówo! Danafaham. 37Hóge wúur apiren acaam Díino ki biki Díino aŋanam jahanama? Dapiren! 38Jamaano no waato inno anhalakihalaki, anfak anlápur. Aji ayiki m'aguy a bájegenenkánan m'aroh gutifilinkum wola aroh a nintiku h'élobohne, me mees irokuneh gúyejo maro wúuro úmár unaam. Da Údiigeeno M'acaabenaane aŋoolinekinehne a duniyaŋo ingi bafuku Báábám ingi maleekaŋaŋo, arokuneh gúyejo maro wúuro úmár unaanam.
Nim Yensa ayéjeeniŋne.
Markert nå:
Mak 8: GD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Copyright Vision Intégrale, Senegal
