Matius 5
5
Yesus nisi aang co pio
5:1-12
(Luk. 6:20-23)
1Kotika Yesus kito dulun orong yoh, Are nukat hia tungkui lungkuh. Are tuot nyan intin paluh kawan murid-Eh dombut hia-Eh. 2Paluh Are majar iroh. Hie-Eh,
3“Sanangboh dulun co monggantung kobolum eh ma Mohotara, awi are iyohco anggota koluarga Korojaan Sorga!#5:3 Koluarga Korojaan Sorga iyohco dulun co porocaya bahawa Yesus iyohonon Laca Co Tomonjanji Mohotara hintang bolum nyambo kuasai-Eh.
4Sanang dulun co daras kojorung,
awi are angar tomohibur daai.
5Sanangboh dulun co morandah atoieh,
Awi are angar empun bumi.
6Sanangboh dulun co daras bolingu bolum bujur nyan tohimo Mohotara. Are Sanang awi are angar tonyumpu daai.
7Sanangboh dulun co pomasi ma dongai,
awi Mohotara angar porahan komasi ma are.
8Sanangboh dulun co atoieh bujur harus,
awi are angar kito Mohotara daai.
9Sanangboh dulun co mehen kolandah,
Awi Mohotara angar nisi iroh sobagai kawan anak-Eh.
10Sanangboh dulun co tonganiaya tului bolum bujur nyan tohimo Mohotara.
Are Sanang awi are iyohco anggota koluarga Korojaan Sorga!
11Sanangboh ikan co tomohina, tonganiaya, tonondah jahat tului ikan umba Akuh. 12Hiah jaman sinan, kawan nabi Mohotara mahi tongompian isan iyoh. Jadi, jorih jerahboh awi ikan angar haba tombah bahai nyan sorga!”
Kawan murid Yesus somporengu kahing hintang kopandau
5:13-16
(Mrk. 9:50; Luk. 14:34-35)
13“Ikan iyohco kahing dunia. Tapi amun kahing jarin boleh, aroh mungkin tonguan mohoit kole. Kahing cioh aroh boguna bat. Maka, kahing cioh tomende leh paluh tonicak dulun.
14Ikan iyohco kopandau nyan dunia, samah isan kota nyan tungkui lungkuh co aroko lian tocuhuk. 15Atawa somporengu lampu. Amun oko dulun co montin lampu, are aroh nutup eh ma kantang. Sobalik eh, are mandak lampu cioh nyan ika co sompolongah ina ngompandau kokon dulun nyan ponah lopo. 16Alogawi me co pio somporengu kopandau. Jadi, ikan sobulih nguan aang co pio nyan tohimo dulun ina iroh lian kitoeh hintang nara Mohotara co Tamam me nyan sorga.”
Yesus majar tintun Hukum Agama Yahudi#5:16 Oko dulun co bopikir kokon porintah hintang poraturan Mohotara co tonulih ponah Hukum Agama Yahudi incah sobulih monguasai ito. Oko ka dulun co bopikir ito aroh sobulih porhati Hukum Agama Yahudi sama sindo. Ponah kawan ayat tatuh, Yesus monjelas duo pondapat cioh sala. Yesus monjelas bahawa ito aroh ngonyorih Mohotara ma kotuhit ma kawan porintah bewe. Tapi, sipat atoi to nyan uwoilikut cara bolum yoh co ngonyorih Mohotara. Bokon iyoh, hiah waktu Yesus dombut, oko porubahan. Are iyohco Laca Co Tomonjanji Mohotara, co tonisi ‘Kristus’. Poko tului iyoh, ito sobulih umpi Are jarin Laca co momimpin kobolum to, aroh Hukum Agama Yahudi. Ito umba Are leh. Ito aroh sobulih tulak hia Yerusalem hintang ngorban komolum nyan Lopo Mohotara ika haba pongampunan dosa. Ito aroh sobulih nganyap imam ika umpi agama. Ito aroh sobulih tomalak, hintang kawan aang co bokon bagaieh.
5:17-20
(Luk. 6:27-36)
17“Arohboh ikan bopikir bahawa Akuh dombut ika ngomalang porentah hintang poraturan Mohotara co tonulih ponah Hukum Agama Yahudi hintang kokon co tonulih pian kawan nabi. Tapi, Akuh dombut ina kokon co tonulih yoh jarin nyata. 18Ngoneh otuh: Kotahin incah oko langit hintang bumi, arelu oko aranaang mahi co angar tongomalang ingkan Hukum Agama Yahudi, oluco ico hurup atawa ico titik, dapot kokoieh tojadi. 19Poko tului iyoh, amun oko dulun co ngomalang ico ingkan porentah Mohotara, oluco porentah cioh tomangap aroh penting, hintang are majar dongai ka ika ngomalang eh, maka are angar tomangap aroh penting nyan ponah Korojaan Sorga. Tapi amun oko dulun co nguan kokon porentah Mohotara hintang majar dongai ika nguan eh, maka are angar tomangap penting ponah Korojaan Sorga. 20Ngoneh otuh: Ikan sobulih bolum bujur nyan tohimo Mohotara, meleh hangki kawan guru agama Yahudi, hintang meleh hangki pomimpin agama Yahudi ingkan kolompok Parisi. Amun aroh, ikan aroh angar muntam hia ponah Korojaan Sorga.”
Aroh sangit ma konduangmu
5:21-26
21“Ikan ocop ngoneh porentah Mohotara cotuh co tomihi ma tatu hiang to: Aroh ngompatoi;#5:21 Ingkan buku Koluaran 20:13. hintang sika dulun co ngompatoi sobulih tomohukum.#5:21 Ingkan buku Ulangan 5:17. 22Tapi Akuh mantun otuh ma ikan: Sika dulun co sangit ma konduang eh sobulih tomohukum. Sika dulun co mohina konduang eh sobulih tomehen hia muka Kolompok pomimpin agama Yahudi co poko bokuasa ika tomohukum. Sika dulun co naah dongai ‘uong’ angar tomohukum ponah apui noraka. 23Poko tului iyoh, amun iko mehen porsembahan hia Mohotara nyan meja porsembahan. Tapi nyan idi, iko topingkat, oko konduangmu co poroh songai ma iko. 24Naat eh houn porsembahan cioh nyan muka meja porsembahan yoh. Tulakbat ngompio hubungan houn ma konduang mu yoh. Hanyar opah iyoh hopuli ika mihi porsembahan cioh. 25Atawa misal eh, amun oko dulun co nondah iko. Pioleh iko ngompio mosalah ma are nyan waktu ikan dahat ponah solana hia pongadilan. Amun aroh, are angar momaksa iko tomehen hia muka hakim. Paluh, hakim cioh angar nyarah iko hia potugas pongadilan. Potugas cioh angar pokuntam iko hia ponah seper. 26Porhatiboh iko aroh angar pusit ingkan seper sorinai iko nahur kokon danda mu.”
Aroh hokoruh ma co bokon oruh atawa banam mu
5:27-30
27“Ikan ocop ngoneh porentah Mohotara cotuh: Aroh hokoruh ma co bokon oruh atawa banam mu.#5:27 Ingkan buku Koluaran 20:14 hintang buku Ulangan 5:18. 28Tapi Akuh mantun otuh ma ikan: Sika bakah co noto ma kojere bawe co bokon ma oruh eh, borati are ocop hokoruh nyan ponah songaieh. 29Amun matan kontoum mu umpi iko bodosa, ngoluet eh luang mata cioh hintang mende eh! Awi, keleh iko niho ico ingkan anggota betimmu hangki kokon betimmu tomende hia ponah noraka daai. 30Amun silun kontoum umpi iko bodosa, notok hintang mende eh silu cioh! Keleh niho silum mu silai hangki kokon betimu muntam ponah noraka.”
Aroh pisahdarai
5:31-32
31“Oko ka porentah Mohotara cotuh: Sika bakah bana co misahdarai oruh eh sobulih mihi surat pisah ma eh.#5:31 Ingkan buku Ulangan 24:1-4. Noto cotatan nyan Lukas 16:18. 32Tapi Akuh mihi porentah cotuh indam me: Bakah bana co misahdarai oruh eh amun bokon tului oruh eh hokoruh ma bakah bokon, bakah bana cioh monyebap oruh eh umpi dosa hokoruh. Hintang kawan bakah co kawin ma bawe co tomisahdarai yoh mahi umpi dosa hokoruh ka.”
Aroh ngoncunih
5:33-37
33“Ikan ocop ngoneh porentah Mohotara cotuh ka co tomihi indan tatu hiang to: Aroh molangar sumpahmu. Tapi pompaluh nguan ome sumpahmu tohimo Tuhan Mohotara.#5:33 Ingkan buku Imamat 19:12, buku Bilangan 30:2, hintang Ulangan 23:21. 34Tapi Akuh mihi porentah indam me: Aroh sama sino bosumpah oluco hapo langit, awi langit iyohco tahta Mohotara, 35atawa bosumpah hapo bumi, awi bumi iyohco tohucak paan Mohotara. Aroh ka hapo Yerusalem, awi Yerusalem kota tioh Mohotara, laca co bahai kuasai. 36Aroh ka bosumpah hapo kuhungmu, awi iko aroh bokuasa nguan ico kolente balo ngahun atawa uwanmu. 37Antunmu sobulih pompaluh bujur. Amun atoimu mantun iyoh, mantunboh iyoh. Amun atoimu mantun aroh, iko mantun aroh. Aroh mantun labih hangki onon awi uras onon borasar ingkan Lacan Setan.”#5:37 Hiah jaman sinan yoh, oko kawan dulun co hosumpah demi orong aang ika ngorohon janjin doh. Mula tonganta, iroh aroh hosumpah demi Mohotara ina iroh aroh sobulih molalus janjin doh. Tapi Yesus mantun kokon janji sobujureh iyoh co janji nyan tohimo Mohotara. Jadi, amun oko dulun nampa janji ma maksud aroh molalus janji cioh, sobujur eh dulun cioh jahat.
Aroh maleh kojahatan
5:38-42
(Luk. 6:29-30)
38“Ikan ocop ngoneh porentah Mohotara cotuh: mata kanti mata, kosing kanti kosing.#5:38 Ingkan buku Koluaran 21:24, buku Imamat 24:24 hintang buku Ulangan 19:21. 39Tapi Akuh mihi porentah cotuh indam me: Aroh maleh dulun umpi co jahat ma iko. Misal eh, amun dulun nampar sobian kontoummu nyoro ka sobian komuloimu. 40Amun dulun ngadu iko hia pongadilan nuntut iko ika mihi lembonmu, mihieh ka jubahmu. 41Amun oko dulun co momaksa iko nyalan kocun ico kilometer, nyalan umba are kocun duo kilometer.#5:41 Hiah jaman sinan yoh, tontara Romawi boraoi momaksa dulun biasa ika nyanon beban tontara yoh. 42Amun oko dulun co nyawot aranaang hia iko, mihiehboh! Atawa amun oko dulun jere tindah aranaang ingkan iko aroh bosiit.”
Hopomasi ma musuh
5:43-48
(Luk. 6:27-28,32-36)
43“Ikan ocop ngoneh porentah Mohotara cotuh: Hopasiboh sosamah aropme hintang ngodolee#5:43 Ingkan buku Imamat 19:18. musuhmu. 44Tapi Akuh mihi porentah cotuh indam me: Hopasiboh musuh me. Bodoaboh indan dulun co monganiaya iko. 45Awi, Mohotara co Tamam me nyan sorga mongasihi kokon kolunon. Are posomput matanondo indan dulun co jahat hintang dulun co pio. Are potokah ucan indan dulun co bolum bujur nyan tohimo-Eh hintang dulun co aroh bolum bujur nyan tohimo-Eh. Jadi, amun ikan botindak isan Are, ikan angar jarin kawan anak-Eh. 46Amun ikan hopomasi baya ma kawan dulun co hopomasi ma ikan, onon aroh aranaang co istimewa dapot patut haba koponara. Awi kawan takih pajak co jahat nguan isanioh ka. 47Amun ikan mihi tontoke ma kawan konduang me leh, onon aroh alogawi co meleh pio hangki dulun bokon. Awi kawan dulun co arinai nyono Mohotara nguan isanioh ka.
48Poko tului iyoh, jarin somporaka bat awi Tamam me nyan sorga somporaka ka.”
Markert nå:
Matius 5: TBSS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
