Matius 2
2
Pira-pira dulun co ahli moramal kawan potondu dombut nyembah nyuku Yesus
2:1-12
1Yesus tonganak nyan kota Betlehem, nyan propinsi Yudea. Iyoh tojadi hiah waktu Laca Herodes momorintah daerah cioh.#2:1 Laca Herodes momorintah tapi are incah nyan pinda Laca Roma co tonisi Kaisar. Opah Yesus tonganak, oko pira-pira dulun co ahli moramal kawan potondu dombut hia kota Yerusalem. Iroh dombut ingkan negri co ocu nyan topit tosok ondo. 2Iroh hokisok ma kawan dulun nyan idi. Hien doh, “Kaih kito ico potondu co nyomput nyan negri kaih nyan derah Tosok ondo. Kaih monau potondu cioh iyohco pociri oko daja co punai tonganak co angar jarin Laca dulun Yahudi. Nyan omohboh daja cioh? Awi, kaih dombut ika nyembah nyuku Are.”
3Kotika Laca Herodes ngoneh borita tintun daja cioh co angar jarin laca, maka are jarin giha. Sanioh ka kokon dulun nyan Yerusalem.#2:3 Laca Herodes jarin takut awi are aroh kolu laca bokon monu kuasaieh. Kawan dulun Yahudi jarin takut awi Laca Herodes korinah dangas. Iroh aroh monau cara are angar ngolawan Laca dulun Yahudi yoh. 4Jadi, Laca Herodes ngumpur kokon imam kopala hintang kawan guru agama Yahudi. Are nyawot ina iroh mara ma are, monurut kawan nabi nyan omoh Laca Co Tomonjanji Mohotara cioh angar tonganak.
5Iroh museh, “Laca cioh angar tonganak nyan kota Betlehem nyan propinsi Yudea. Awi nyan jaman sinan, oko nabi iyohonon kawan dulun co porapot tungon ingkan Mohotara co nulih antun Mohotara tuh: 6‘Ooi ponduduk Betlehem nyan derah Yehuda! Oko ico beti dulun co angar tonganak nyan kota me co angar jarin pomimpin dulun Israel, umat-Kuh. Poko tului iyoh, ikan aroh angar bat tomangap kota co aroh penting nyan derah cioh!’ ”#2:6 Ingkan buku nabi Mikha 5:1.
7Opaiyoh Herodes naah kawan dulun co ahli moramal kawan potondu yoh ina sopopak ma are socara tonih-tonih. Are haba kotorangan co tangar ingkan iroh tintun hiaharai potondu cioh nyomput portama kali. 8Opaiyoh are nyuhu iroh hia Betlehem ma tungon cotuh, “Tulak hintang nganyap Daja cioh ma kotoliti. Opah ikan popak Are, jion maraeh ma akuh. Ina akuh mahi boraoi tulak nyembah nyuku Are.”
9-10Opah ngoneh antun Laca Herodes yoh, iroh tulak. Kitan doh kole potondu co piji kitan doh nyomput nyan negri doh derah Tosok ondo yoh. Jadi, iroh korinah jorih jerah. Potondu cioh mongarah iroh ponah solanan dapot umbot nyan hunyung lopo, ika Daja cioh oko. 11Iroh muntam hia ponah lopo cioh paluh noto Daja cioh ma Maria, tinai-Eh. Iroh tuot bolutut nyembah nyuku Daja cioh, paluh mukap kotak tolungan harta doh. Iroh mihi kawan porsembahan indai-Eh, iyohonon bulou, manyan hintang mur. 12Sorinai buli hia negri doh, Mohotara poringat iroh nyan ponah nupi ina iroh aroh hopuli hia Herodes. Jadi iroh buli buah calan co bokon.
Tinan taman Yesus mehen Are buho hia negri Mesir
2:13-15
13Opah kawan dulun co ahli moramal kawan potondu yoh tulak, molekat Mohotara dombut hia Yusup ponah nupi. Molekat cioh mantun, “Laca Herodes angar nganyap Daja conon ina lian ngompatoi Are. Jadi monyunbat, mehen Daja conon ma tinai-Eh buho hia Mesir. Nukuiboh nyan idi dapot Akuh mantun kole ma iko ika hopuli.” 14Maka monyunbat Yusup. Nyan momi cioh ka, are mehen Daja cioh ma tinai-Eh buho hia Mesir. 15Iroh nukui nyan idi dapot Laca Herodes matoi. Poristiwa cioh tojadi ina antun Tuhan Mohotara jarin nyata. Hiah jaman sinan oko nabi co porapot antun Mohotara yoh co nain otuh: ‘Akuh angar naah Anak-Kuh pusit ingkan Mesir.’
Laca Herodes ngompatoi kokon anak daja nyan sokitar Betlehem
2:16-18
16Kotika Herodes monau bahawa kawan dulun co ahli moramal kawan potondu yoh ocop nipueh, are jarin sangit lau. Paluh, are nyuhu ina kokon dajan bakah nyan kota Betlehem hintang sokitar eh tongompatoi, iyohonon kawan daja co umur kurang ingkan duo toun. Are mompokira umur Daja cioh ingkan kotorangan co habaeh ingkan kawan dulun co ahli moramal kawan potondu yoh, ingkan waktu iroh kito potondu co nyomput yoh. 17Poristiwa cioh tojadi ina antun Mohotara jarin nyata. Hiah jaman sinan nabi Yeremia nulih antun Mohotara yoh co nain otuh: 18‘Nyan kota Rama,#2:18 Antun ingkan buku nabi Yeremia 31:15. Rahel iyoh co oruh Yakup. Hiyah jaman Yeremia Rahel ocop tahi matoi. Tapi Rahel tomanggap ‘Tinan kokon dulun Israel’. Jadi nabi Yeremia hapo kiasan cioh. Hiyah jaman Yeremia, dulun Israel jarin tahanan prang paluh tomehen hia negeri bokon. Iroh incah nangih waktu iroh nyihin kota Rama co dokin kota Betlehem. Ponah ayat cotuh, Matius monganggap nubuat cotuh tomolalus bat. Hiyah jaman Yesus tonganak, dulun Israel nyan sokitar kota Betlehem nganih awi laca Herodes ngompatoi kawan anak doh. tokoneh kawan suara nangih nohuang. Koturunan Rahel jorung lau nangih kawan anak doh. Iroh aroh kolu tomohibur tului kawan anak doh arelu oko bat.’
Yusup mehen koluargaeh hopuli ingkan negri Mesir
2:19-23
19Yusup hintang koluargaeh incah oko nyan negri Mesir. Tapi, opah Laca Herodes matoi, molekat Tuhan Mohotara poleha arop kole ma Yusup ponah nupi. 20Hien molekat cioh, “Kawan dulun co bousaha ngompatoi Daja conon ocop matoi. Awi iyoh monyunbat, mehen Daja conon ma tinai-Eh hopuli hia tana Israel.” 21Paluh, Yusup monyun. Are mehen Daja cioh ma tinai-Eh hopuli hia tana Israel.
22Tapi, Yusup ngoneh bahawa Arkelaus, anak bakah Laca Herodes, ocop nganti tamaieh momorintah propinsi Yudea. Jadi, Yusup takut tulak hia idi.#2:22 Yusup takut awi mungkin Arkhelaus angar narus kewak tamaieh ika ngompatoi Yesus, Laca Co Tomonjanji Mohotara. Paluh, are tonosehat ponah nupi, maka are tulak ma koluargaeh hia propinsi Galilea. 23Iroh tulak hia kota co araieh Nasaret paluh nukui nyan idi. Poristiwa cioh tojadi ina antun Mohotara jarin nyata. Nyan jaman sinan kawan nabi nulih bahawa Laca Co Tomonjanji Mohotara angar tonisi ‘Dulun Nasaret’.
Markert nå:
Matius 2: TBSS
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
