ዮሃንሳ 4
4
የሱሳነ ሳማረ ማጫስዉ
1የሱሲ ዮሃንሳፐ ዳሮ ካልያ አሳ ባኮ ሺሸይሳነ ፃማቀይሳ ፋርሳወት ስእዶሶና። 2ግድኮካ የሱሳ ታማረት ፃማቅዶሶናፐ አትሽን፥ የሱሲ ኦናካ ፃማቅቤና። 3የሱሲ አሳይ እያባ ገይሳ ስእዳ ዎደ ይሁዳፐ ደንድድ ጋልላ ብስ። 4እ፥ ጋልላ ብሸ ሳማረራ አናይስ አቶናባ ግድስ።
5ሄሳ ግሾ፥ ያይቆብ ባ ናኣ ዮሰፋስ እምዳ ጋድያ ማታን ደእያ ስካረ ጌተትያ ሳማረ ካታማ ብስ።#መ 33:19፤ እያ 24:32. 6ሄ በሳን ያይቆባ ሃ ኦላይ ደኤስ። የሱሲ ሄመን ዳቡርድ ሄ ሃ ኦላ ማታን ኡትስ። ሄ ዎደ ሳእ ኡሱፑን ሳተ ሄራ።
7እስ ሳማረ ካታማ ማጫስ ሄ ኦላፈ ሃ ትካናዉ ያሱ። የሱሲ ሄ ማጫሴኮ፥ “ታና ሃ ኡሻርክ” ያግስ። 8ሄ ዎደ የሱሳ ታማረት ካ ሻማናዉ ካታማ ብዶሶናሽን።
9ሄ ማጫስያ ዛራዳ፥ “ኔኒ አይሁደ አሰ ግዳሸ፥ ሳማረ ማጫስ ግድያ ታና ዋናዳ ሃ ኡሻ ጋይ?” ያጋሱ። ሄሳ እያ ግዳይ አይሁደት ሳማረታራ ጋሄቶና ግሾሳ።#እዝ 4:1-5፤ ናህ 4:1-2.
10የሱሲ ዛሪድ፥ “ኔኒ ፆሳ እሞታነ ሃ ታና ኡሻ ገይስ ኦነኮ ኤርዳባ ግድያኮ እያ ነ ዎሳና፤ እካ ነዉ ደኦ እምያ ሃ እማናሽን” ያግስ።
11ማጫስያ ዛራዳ፥ “ጎዳዉ፥ ነዉ ዱቅያባይ ባዋ፤ ኦላይካ ዝቃ። ያትን፥ ደኦ እምያ ሃ ነ አዉፐ ኤካኔ? 12ኑስ ሀ ሃ ኦላ እምዳ ኑ አዋ ያይቆባፐ ኔኒ አይ? እ፥ እያ ናይትነ እያ መሄይ ሀ ኦላፈ ኡይዶሶና” ያጋሱ።
13የሱሲ፥ “ሀ ሃፈ ኡይዳ ኦንካ ዛር ሳሞታና። 14ሽን ታኒ እማና ሃ ኡያ ኦንካ ኡባካ ሳሞተና። ታኒ እሚያ ሃይ እያ ግዶን መርና ደኦ እምያ ጎግያ ፑልቶ ግዳና” ያግስ።
15ማጫስያ ዛራዳ፥ “ጎዳዉ፥ ታኒ ሳሞቶና መላነ ሃ ትካናዉ ሀ በሳ ዮና መላ ታዉ ሄ ሃ እማ” ያጋሱ።
16የሱሲ ኢኮ፥ “ባዳ ነ አዝና ፄጋዳ ያ” ያግስ።
17ማጫስያ ዛራዳ፥ “ታዉ አዝን ባዋ” ያጋሱ።
የሱሲ ኢኮ፥ “ታዉ አዝን ባዋ ጋሸ ባላባካ። 18ነዉ ካሰ እቻሹ አዝናት ደኦሶና። ሀእ ኔራ ደእያ አደይ ነ አዝና ግደና። ኔኒ ሀእ ቱማ ኦዳዳሳ” ያግስ።
19ማጫስያ ዛራዳ፥ “ጎዳዉ፥ ኔኒ ናበ ግደይሳ ታኒ ኤራስ። 20ኑ አዋት ሀ ዙማ ቦላ ፆሳ ጎይንዶሶና። ሽን ህንተ አይሁደት አስ ፆሳስ ጎይናናዉ በሲያ በሳይ የሩሳላመና ጌታ” ያጋሱ።
21የሱሲ፥ “ሀ ማጫሰተ ታና አማና፤ ሀ ዙማ ቦላ ዎይኮ የሩሳላመን አዋስ ህንተ ጎይኖና ዎደይ ያና። 22ህንተ ሳማረት ኤሮናይሳ ጎይነታ። ሽን ኑኒ አቶተይ አይሁደፐ ያ ግሾ ኑ ኤረይሳ ጎይኖስ። 23ሽን አዋስ ቱማን ጎይነይሳት አያናንነ ቱማተን ጎይናና ዎደይ ማታትስ፤ ሀእካ ጋክስ። ህዛ፥ አዋይ ኮየይ ሀይሳ መላ ኦግያን ጎይነይሳታ። 24ፆሳይ አያና፤ እያዉ ጎይነይሳት አያናንነ ቱማተን ጎይናናዉ በሴስ” ያግስ።
25ማጫስያ ዛራዳ፥ “ክርስቶስ ያናይሳ ታኒ ኤራይስ። እ ያ ዎደ ኑስ ኡባባ ኦዳና” ያጋሱ።
26የሱሲ፥ “ሀ ኔራ ኦደተይ ታኒ እያ” ያግስ።
27ኤንቲ ኦደትሽን፥ የሱሳ ታማረት ብዳ በሳፈ ስምዶሶና። የሱሲ ማጫሳራ ኦደትሽን ኤንቲ በእድ ዳሮ ማላለትዶሶና። ሽን ማጫሴኮ፥ “አይ ኮያይ?” ዎይኮ የሱሳኮ፥ “ኢራ አይስ ኦደታይ?” ግዳይ ኦንካ ባዋ።
28ሄሳፈ ጉየ፥ ማጫስያ ባ ሃ ኦቱዋ አጋዳ ጉየ ካታማ ባዳ አሳኮ፥ 29“ታኒ ኦዳባ ኡባ ታዉ ኦድዳ አድያ በአናዉ የተ። እ ክርስቶሳ ግዳንደሻ?” ያጋሱ። 30አሳይ ካታማፐ ከይድ የሱሳኮ ብዶሶና።
31ሄስ ሀንሽን፥ እያ ታማረት የሱሳኮ፥ “ጉባ ማርክ” ያግድ ዎስዶሶና።
32ሽን እ፥ “ታዉ ህንተ ኤሮና ካ ታ መይስ ደኤስ” ያግስ።
33ሄሳ ግሾ፥ እያ ታማረት ባንታ ግዶን፥ “እያዉ ምያባ አስ ኤሆና አገና” ያግዶሶና።
34የሱሲ ኤንታኮ፥ “ታ ካይ ታና ኪትዳይሳ ሸንያ ኦናይሳነ እያ ኦሱዋ ፖላናይሳ። 35ህንተ፥ ‘ኦይዱ አጌናፐ ጉየ ካይ ጫከታና’ ጌከትዬ? ሽን ታኒ ህንተዉ ኦዳይስ፤ ካይ ካፅድ ሺሾስ ጋክዳይሳ ሎይ ፄልተ። 36ዘረይስነ ጫከይስ እስፈ ኡፋይታና መላ ጫከይስ ዳሞዝያ ኤኬስ ቃስ ካ መርና ደኦስ ሺሼስ። 37ህዛ፥ ‘እሶይ ዘሬስ፤ ሀንኮይ ቃስ ጫኬስ’ ግያ ኦዳይ ቱማ። 38ህንተ ዳቡርቦናይሳ ሺሻና መላ ታኒ ህንተና ኪታስ። ሀራት ኦ ዳቡርዳሱዋን ገልድ ህንተ ኤንታ ዳቡራ አይፍያ ኤክደታ” ያግስ።
39ማጫስያ፥ “እ፥ ታኒ ኦዳ ኡባባ ኦድስ” ጋዳ ማርካትዳ ግሾ ሄ ካታማን ደእያ ሳማረ አሳፐ ዳሮት የሱሳ አማንዶሶና። 40ሳማረ አሳይ የሱሳኮ ይድ፥ ባንታ ማታን ጋምአና መላ የሱሳ ዎስን እ ያን ናምኡ ጋላስ ኡትስ።
41እ ኦድያ ቃላ ግሾ ካሰይሳፈ ዳሮ አሳይ አማንዶሶና። 42ቃስ ኤንቲ ማጫሴኮ፥ “ሀእ ኑ አማነይ ኑ ሁጰን እ ገይሳ ስእዳ ግሾሳፈ አትሽን፥ ኔኒ ማርካትዳ ግሾሳ ግደና። ቃስ እ ቱማ ሀ አላምያ አሸይሳ ግደይሳ ኑኒ ኤርዳ” ያግዶሶና።
እስ ሹማ ናአ ፓፁዋ
43ናምኡ ጋላሳፐ ጉየ፥ የሱሲ ያፐ ከይድ ጋልላ ቢታ ብስ። 44የሱሲ ባ ሁጰን፥ “ናበይ ባ ቢታን ቦንቸተና” ያግድ ካሰትድ ኦድስ።#ማቶ 13:57፤ ማር 6:4፤ ሉቃ 4:24. 45የሱሲ ጋልላ ጋክዳ ዎደ ጋልላ አሳይ እያ ሞክዶሶና። አይስ ጊኮ፥ ፓስካ ባኣለ ቦንችያ ጋላስ ኤንቲ የሩሳላመን ደእያ ግሾ እ ኦዳባ ኡባ በእዶሶና።#ዮሀ 2:23.
46የሱሲ ሃ ዎይነ ኡሽ ላምዳ በሳ፥ ጋልላን ደእያ ቃና ካታማ ብስ። ቅፍርናሆማን ካዎ ኬን ኦያ እስ ሹማስ ናአይ ሀርገትስ።#ዮሀ 2:1-11. 47የሱሲ ይሁዳፐ ጋልላ ይዳይሳ ሄ ሹማይ ስእድ እያኮ ይስ። ሀይቃናዉ ማትዳ ባ ናኣ ብድ ፓና መላ የሱሳ ዎስስ።
48የሱሲ ሹማኮ፥ “ፆሳይ ኦያ ማላታታነ ኦራባታ በኦና ደእሸ ህንተ ኡባራካ አማነከታ” ያግስ።
49ሹማይ ዛሪድ፥ “ጎዳዉ፥ ታ ናአይ ሀይቆና ደእሽን ታራ የርክ” ያግስ።
50የሱሲ፥ “ነ ሶ ባ፤ ነ ናአይ ፓፃና” ያግስ።
ሄ ሹማይ የሱሲ ግዳይሳ አማንድ ባ ሶ ብስ። 51እ ባ ሶ ብሽን እያ አይለት እያኮ ይሸ እያራ ኦገን ጋሄትድ፥ “ነ ናአይ ፓፅስ” ግዶሶና።
52እ ባ አይለታ ባ ናኣስ አይ ሳተን ሎእዳኮ ኦይችስ። ኤንቲ ዛሪድ፥ “ዝነ ላፑን ሳተን ምሻይ አግስ” ያግዶሶና። 53ናኣ አዋይ የሱሲ ባኮ፥ “ነ ናአይ ፓፃና” ግዳይ ሄ ሳትያን ግደይሳ አኬክስ። ሄሳ ግሾ፥ እነ እያ ሶ አሳ ኡባይ አማንዶሶና።
54ሄስ የሱሲ ይሁዳፐ ጋልላ ይድ ኦዳ ናምአን ማላታ።
Markert nå:
ዮሃንሳ 4: GFBEVF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Word for the World International and The Word for the World Ethiopia
