ዮሃንሳ 11
11
አላዛራ ሀይቁዋ
1ብታነ ጉታን አላዛራ ጌተትያ እስ አደይ ሀርገትስ። ብታነይ ማይራማነ እ ምችያ ማርታ ደእያ ጉታ።#ሉቃ 10:38-39. 2ሄ ማይራማ ጎዳ ቶሁዋ ሽቶ ትያዳ ባ ብናናን እያ ቶሁዋ ቁችዳሮ። ሀርገትዳይ እ እሻ አላዛራ።#ዮሀ 12:3. 3ሄሳ ግሾ፥ ምቸት፥ “ጎዳዉ፥ ነ ዶሰይስ ሀርገትስ” ግድ የሱሳኮ ኪትዶሶና።
4የሱሲ ሄሳ ስእዳ ዎደ፥ “ሀ ሀርገይ፥ ፆሳይነ እያ ናአይ ቦንቸታና መላፐ አትሽን፥ ሀይቆስ ጋያ ሀርገ ግደና” ያግስ።
5የሱሲ ማርታ፥ እ ምችዉነ አላዛራ ዶሴስ። 6ሽን አላዛር ሀርግዳይሳ የሱሲ ስእድ ባ ደእያ በሳን ናምኡ ጋላስ ጋምእስ። 7ሄሳፈ ጉየ፥ የሱሲ ባ ታማረታኮ፥ “ዛሪድ ይሁዳ ቢታ ቦስ” ያግስ።
8እያ ታማረት ዛሪድ፥ “አስታማርያዉ፥ ጉ ዎደፐ ካሰ አይሁደት ነና ሹቻን ጫድድ ዎናዉ ኮይዶሶና፤ ሀእካ ያ ባኔ?” ያግዶሶና።
9የሱሲ፥ “እስ ጋላሳን ታማነ ናምኡ ሳተይ ደኤስ ግደነዬ? ጋላስ ሄመትያ አስ ሀ አላምያ ፖኡዋ በእያ ግሾ በተና። 10ሽን ቃማ ሄመትያ ኦንካ ፖኦይ ባይና ግሾ፥ በቴስ” ያግስ። 11የሱሲ ሄሳ ግዳፐ ጉየ ኤንታኮ፥ “ኑ ዶስያ አላዛር ስክስ፥ ሽን እያ ደንናዉ ታኒ ባና” ያግስ።
12እያ ታማረት ዛሪድ፥ “ጎዳዉ፥ እ ስክዳባ ግድኮ እያዉ ሎአና” ያግዶሶና።
13የሱሲ አላዛር ሀይቅዳይሳ ኦድስ፥ ሽን ኤንታዉ ጮ ስኮ ዳንስ። 14ሄሳ ግሾ፥ የሱሲ ጌሽድ ኤንታኮ፥ “አላዛር ሀይቅስ። 15ህንተ አማናና መላ ታኒ ሄ በሳን ደኦናይሳስ ህንተ ግሾ ኡፋይታይስ። አነ የተ፤ እያኮ ቦስ” ያግስ።
16ሄሳፈ ጉየ፥ ድድሞሳ#11:16 ድድሞሳ፦ ጉሳይ መንተ ጉሱ። ጌተትያ ቶማስ ባ ላገ ታማረታኮ፥ “አስታማርያራ ሀይቃናዉ ኑካ ቦስ” ያግስ።
የሱሲ ደንዶነ ደኦ
17የሱሲ ጋክያ ዎደ አላዛር ሞገትን ኦይዱ ጋላስ ግድስ። 18ብታነይ የሩሳላመፐ ሄ ክሎ ምትረ መላ ሃኬስ። 19ዳሮ አይሁደት ማርታነ ማይራሞ ኤንታ እሻይ ሀይቅዳይሳስ ምንናዉ ይዶሶና።
20ማርታ የሱሲ ይዳይሳ ስአዳ እያ ሞካናዉ ከያሱ፥ ሽን ማይራማ ሶን አታሱ። 21ማርታ የሱሳኮ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን። 22ሽን ሀእ ግድኮካ ኔኒ ዎስያባ ፆሳይ ነዉ እማናይሳ ታኒ ኤራይስ” ያጋሱ።
23የሱሲ፥ “ነ እሻይ ሀይቆፐ ደንዳና” ያግስ።
24ማርታ እያኮ፥ “ዉርሰ ጋላስ እ ሀይቆፐ ደንዳናይሳ ኤራይስ” ያጋሱ።
25የሱሲ ኢኮ፥ “ታኒ ደንዶነ ደኦ፤ ታና አማንያ ኦንካ ሀይቅኮካ ደኦን ዳና። 26ቃስ ደኦን ደኤይነ ታና አማንያ ኦንካ ሀይቀና። ሄሳ ኔኒ አማናይ?” ያግስ።
27ማርታ ዛራዳ፥ “ጎዳዉ፥ ኤ ታኒ አማናይስ! ኔኒ ፆሳ ናኣ፥ አላምያ ያናዉ ደእያ ክርስቶሳ ግደይሳ ታኒ አማናይስ” ያጋሱ።
28ማርታ ሄሳ ግዳፐ ጉየ፥ ባዳ ባ ምችዉ ጌማን ፄጋዳ፥ “አስታማረይ ይድ ነና ኮዬስ” ያጋሱ። 29ማይራማ ሄሳ ስእዳ ዎደ ኤለሳ ደንዳ ኤቃዳ የሱሳኮ ባሱ። 30ሄ ሳተን የሱሲ ማርታራ ጋሄትዳ በሳን ደኤስ፤ ቡሮ ጉታ ጋክቤና። 31ማይራሞ ምንሸ ኢራ ሶን ደእያ አይሁደት፥ እያ ደንዳ ኤቃዳ ኤለሳዳ ካረ ከይዳይሳ በእድ፥ ዱፎ ባዳ ዬካናዉ ሀንያ ዳንን እዮ ካልድ ከይዶሶና።
32ማይራማ የሱሲ ደእያሱዋ ባዳ እያ በእዳ ዎደ እያ ቶሁዋ ቦላ ኩንዳዳ፥ “ጎዳዉ፥ ኔኒ ሀይሳን ደእዳባ ግድያኮ ታ እሻይ ሀይቀናሽን” ያጋሱ።
33የሱሲ ማይራማነ ኢራ ደእያ፥ አይሁደት ዬከይሳ በእድ፥ ባ ዎዛናን ዳሮ ሴለትድ፥ 34“አዉን ሞግደቲ?” ያግድ ኦይችን፥ “ጎዳዉ፥ ያዳ በአ” ያግድ ዛርዶሶና።
35የሱሲ አፉፅስ። 36ሄሳ ግሾ፥ አይሁደት፥ “እ አላዛራ አይ መላ ዶስያኮ በእተ” ያግዶሶና።
37ሽን ኤንታፈ እሶት እሶት፥ “ሀይስ ቆቅያ ፄልስዳይስ ሀ አደይ ሀይቆና መላ ኦናዉ ዳንዳኤነሽን?” ያግዶሶና።
አላዛር ሀይቆፐ ደንዱዋ
38ቃስካ የሱሲ ሴለትድ፥ አላዛር ሞገትዳ ዱፉዋ ብስ። ሄ ዱፎይ ሹቻን ጎርደትዳ ጎንጎሎ። 39የሱሲ፥ “ሹቻ ደንተ” ያግድ ኪትስ።
ማርታ፥ “ጎዳዉ፥ እ ሀይቆሳፐ ኦይዱ ጋላስ ግድዳ ግሾ፥ ሀእ ፅንቃና” ያጋሱ።
40የሱሲ ማርታኮ፥ “ነ አማንያባ ግድኮ ፆሳ ቦንቹዋ በአናይሳ ታኒ ነዉ ኦዳብክና?” ያግስ። 41ኤንቲ ሹቻ ደንን የሱሲ ሳሎ ፑደ ፄልድ፥ “አዋዉ፥ ታና ነ ስእዳ ግሾ ነና ጋላታይስ። 42ነ ኡባ ዎደ ታና ስኤይሳ ታኒ ኤራይስ። ሽን ሀይሳን ኤቅዳ አሳይ ኔኒ ታና ኪትዳይሳ አማናና መላ ታኒ ኤንታ ግሾ ሀይሳ ጋይስ” ያግስ። 43የሱሲ ሄሳ ግዳፐ ጉየ፥ ባ ቃላ ቁ ኦድ፥ “አላዛራ፥ ሃ ከያ!” ያግስ። 44ሀይቅዳ አደይ ዚትዳ መላ ኩሸይነ ቶሆይ ሻሎን ቃሸትድ ደእሽን እያ አይፈይ ካረይ ጎዘትዳ መላ ዱፉዋፐ ከይስ። የሱሲ ኤንታ፥ “ብርሽተ፥ ቦ ጊተ!” ያግስ።
ክርስቶሳ ቦላ ማቀትዶሶና
(ማቶ 26:1-5፤ ማር 14:1-2፤ ሉቃ 22:1-2)
45ሄሳ ግሾ፥ ማይራምኮ ይዳ አይሁደታፐ ዳሮት የሱሲ ኦዳይሳ በእድ እያ አማንዶሶና። 46ሽን ኤንታፈ እሶት እሶት ፋርሳወታኮ ብድ የሱሲ ኦዳይሳ ኤንታዉ ኦድዶሶና። 47ሄሳፈ ጉየ፥ ካህነ ሀላቃትነ ፋርሳወት ሻንጉዋ ሺሽድ፥ “ሀ አደይ ዳሮ ማላታታ ኦያ ግሾ ኑ አይ ኦኖ? 48ኑኒ እያ ስእ ግድ አግኮ አሳ ኡባይ እያ አማናና። ቃስ ሮመ ቢታ አሳት ይድ ኑ ፆሳ ኬነ ኑ ደርያ ይሳና” ያግዶሶና።
49ኤንታፈ እሶይ ቃያፋ ገይስ፥ ሄ ላይ ካህነ ሀላቃ ግድዳይስ፥ “ህንተ አይኮካ ኤረከታ! 50አሳ ኡባይ የይሳፈ አሳ ኡባ ግሾ እስ አስ ሀይቀይስ ሎኦ ግደይሳ ኤረከቲ?” ያግስ። 51እ ሄሳ ባፐ ግቤና። ሽን ሄ ላይ ካህነ ሀላቃ ግድያ ግሾ፥ የሱሲ አይሁደ አሳ ግሾ ሀይቃናዉ በሰይሳ ትንብተ ኦድስ። 52ቃስ የሱሲ አይሁደ አሳ ፃላላስ ግዶናሽን ላለትድ ደእያ ፆሳ አሳ ኡባ እስፈ ሺሻናዉነ እስ አስ ኦናዉ ሀይቃና።
53ሄ ጋላሳፐ ዶምድ ኤንቲ እያ ዎናዉ ማቀትዶሶና። 54ሄሳ ግሾ፥ የሱሲ አይሁደታ ግዶን ቆንጨን ስመረትቤና። ሽን መላ ቢታ ማታን ደእያ ኤፍሬማ ጉታ ብስ። ባ ታማረታራ ሄ በሳን ጋምእስ።
55አይሁደት ቦንችያ ፓስካ ጋላሳይ ማትስ። ቃስ ዳሮ አሳይ ባንታና ጌሻናዉ ፓስካ ቦንችያ ጋላሳይ ጋካናፐ ስን ሄ ቢታፈ የሩሳላመ ብዶሶና። 56ኤንቲ ፆሳ ኬን ኤቅድ የሱሳ ዩሳ ናግያ ግሾ፥ “አይ ቆፔቲ? የሱሲ ባልያ ቦንቻናዉ ዬኔ?” ያግድ እሶይ እሱዋ ኦይችዶሶና። 57ካህነ ሀላቃትነ ፋርሳወት የሱሳ ኦይካናዉ፥ እ ደእያሱዋ ኤርያ ኦንካ ባንታዉ ኦዳና መላ ኪትዶሶና።
Markert nå:
ዮሃንሳ 11: GFBEVF
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
The Word for the World International and The Word for the World Ethiopia
