Luk 1
1
Luk angɛr ukwagh Jizɔs ukaa ungun kɔ Tiyofilus
1Iyɔr tsɛng vɛ anɔngu ungɛrɛn ukwagh arɔm ghɛ akaa angan a ɛr kɔ atɛ uwas. 2Vɛ angɛr akaa angan vɛ ɔɔr ghu ɔs angan iyɔr mahɛ vɛ ɛn ase avo ashigh vɛ va a ɔɔrɔyi urɛhɛ hun. 3Ne mɔ, mɛkɛr shisha akaa angɛrɛn hun tra kɔ mhiye una, ne mɛ ɛn na ghɛka ukwagh usɛ ungwen mɛ ungɛr uwɛ ukwagh arɔm hun ghu umɔm-umɔm, Unom Tiyofilus. 4Mɛ ɛr man ɛn ufɔ na akaa angan vɛru vɛ tsoghyi mɔ anga jing.
Udugɛr una Aonz aram ɛchi Aonz umar Jon ɔr minden iyɔr kɔ ijɔr
5Ukpɛ ungwen Hɛrɔd aru Unom kɔ utar Judiya, Ɔr ipɛɛn una Aonz ungwen vɛ tayi Zakaraya, aru ɔr umɔm kɔ apɛɛnɛv anav Aonz urɔng ghu amban vɛ tayi na Abija mɔ. Ukwas una Ɛlizabɛ kpa, aru kɔ itum ina Arɔn#1.5 Arɔn Arɔn aru uwanomgban una Ɔr uramen ɛchi Aonz Mosis. Aru ɔr ungwen Aonz avand ghi itsuwan na aru ɔr ipɛɛn una Aonz. Iyɔr Ujus amem amban amba apɛɛnɛv anav Aonz vɛ duwe kɔ itum ina Arɔn.. 6Zakaraya ghɛ Ɛlizabɛ vɛru gbɛngang kɔ ase Aonz, vɛru ghi ibɛrɛn ina uzɔ Aonz Uwun ghɛ mɛnna amem jing. 7Vɛru ghu uwan gha, itiyo ikaa Ɛlizabɛ aru ikem ukwas, avo amem vɛ abe iyɔr shisha.
8Ghɛ ɛru ihɔ ingin urɔng Zakaraya vɛru amban vɛ ɛr utom kɔ itumbɛ Aonz, ne Zakaraya aru ghi ɛrɛn utom apɛɛnɛv kɔ ghi ishigh Aonz. 9Apɛɛnɛv anav Aonz Uwun vɛ tsuwa Zakaraya ghu udo, mɔ vɛ ɛrɛyi kpem-kpem, na aza hin aza song ukwagh uhuman ushiyan kɔ itumbɛ Uwun Aonz imin. 10Mɔ ukpɛ ungwen aru ghi isongnun ukwagh uhuman hun, isum iyɔro iru atire kɔ uwen, ghi iramen ghu Aonz.
11Ne Udugɛr una Aonz Uwun aduwe kɔ Zakaraya, atire kɔ upav ayan hɔ ghɛ atso ukwagh human ushiyan mɔ. 12Mɔ Zakaraya a ɛnɛn ana, ikira-kas igbire un iyɔr ghɛtser un. 13Kpa Udugɛr una Aonz akaa ghu un na, “Zakaraya, ka chiya gha! Aonz amgba ghi iram uwow. Ukwas uwow Ɛlizabɛ, amar uwɛ uwan unombos, una un itiye na Jon. 14Aru ukwagh ushiyan ghɛ isighan kɔ awɛ, iyɔr tsɛng ghɛshiya avo ghu umar una, 15aru itargɛr ɔr hɔ ishigh Aonz Uwun. Aka maayi masɔrum ghɛ masɔrum matarɛnɛm gha. Aru ayiv Ajingɛjing una Aonz, tete ta umar una. 16Un ne ahire iyɔr Izrɛl tsɛng kɔ Aonz Uwun uvo. 17Un ne agba ishigh ghu Aonz Uwun, ghi Ajingɛjing ghɛ ikɔw una Ɛlaja#1.17 Ɛlaja Ɛlaja aru ɔr uramen ɛchi Aonz aram amuu Aonz ashigh a ɛr akaa akondun iyɔr. Ukpɛ Ɛlaja kpem umar Jizɔs mɔ ghɛru anyom iti atar ghu puwɛ. Ɔr uramen ɛchi Aonz Malaki akaa na ɔr ugen ungwen angwe ɛn Ɛlaja ava tete sɛ Ɔr tsɛghan ava.. Un ne agɛma asima utir kɔ ghi myem ghɛ vɛ hɛmbanɛv atogh kɔ ghu mfɔ amban amba gbɛngang, ɛn vɛ wa iyɔr, iyɔr ghu Uwun uvo.”
18Zakaraya apine udugɛr una Aonz na, “Nan mfɔ na ukwagh ungwen ɔɔrum mɔ ava a ɛrɛ? Mbɛ iyɔr ukwas uwam kpa abe iyɔr.”
19Udugɛr una Aonz akaa ghu un na, “Mɛ ngwe Gɛbɛrɛ. Mɛ tiren kɔ ishigh Aonz, un ne atindim na, mɛ va ɔɔr uwɛ urɛhɛ usɛ. 20Ne uru swɛng uku ube uram gha kpem ihɔ ingin akaa angan a ɛr, itiyo ikaa una isima ibɛrɛn ghɛ amuu a aam gha, angan ava a ɛr ghɛ ahɔ ana.”
21Ukpɛ ungumɔ, iyɔr amban vɛru ghi tabɛrɛn Zakaraya kɔ ghu uwen, ka kond avo ghi iyɔr ɛnmɔ ahɛmba ghi ishin kɔ itumbɛ Aonz. 22Mɔ aduwen mɔ, aka abe ghi iramen ghɛ avo gha. Vɛ gbayi ifɔn na a ɛn asan kɔ itumbɛ Aonz, itiyo ikaa aram ghɛ avo ghɛ avo abe ghi iramen gha.
23Kpɛ ungwen Zakaraya abɛɛn utom kɔ itumbɛ Aonz mɔ, ayov kɔ achiya una. 24Katsa tsɛng gha ukwas una, Ɛlizabɛ, awa uyav iwɔɔr itan ayɛr iyɔr ina kɔ achiya. 25Ɛlizabɛ akaa na, “Aonz Uwun a ɛrɛm kwagh usɛ. Ahɔ angan awaiko ghɛ amwe. Atɛng ihoon iyam kɔ ase iyɔro.”
Udugɛr aram ɛchi Aonz kɔ ghu Mɛri umar ɔ Jizɔs
26Mɔ uyav Ɛlizabɛ unɔr iwɔɔr atsindar, Aonz atind Udugɛr una Gabɛrɛ kɔ ihiye Nazarɛ, kɔ Galili. 27Vɛ tind un kɔ inuhun ukwas ingin iru ghi itɔnd uzɔ ɔzun ɔr ungwen vɛ tayi na Josɛf uwan kɔ itum ina Dɛvid. Inuhun ukwas hun vɛ tayi na Mɛri. 28Udugɛr hun aza kɔ Mɛri akaa ghu un na, “Mkaa ghu uwɛ, ukwas ungwen Ibɛrɛn Aonz Uwun ingi ghɛ ana!”
29Ghɛza Mɛri iyɔr kɔ amuu hun, aru ghi imburun zan kine ikaan nana? 30Kpa Udugɛr una Aonz akaa ghu un na, “Ka chiya gha, ukor ibɛrɛn kɔ ghɛ Aonz. 31Uwa uyav umar uwan unombos, uta un itiye na Jizɔs. 32Aru itargɛr ɔr vɛ va tayi un na Ihɛmban Uwan una Aonz. Aonz Uwun ana un ikɔnogh utorogh inagh tir una Dɛvid. 33Ghɛ urun utor kɔ itum ina Jakob kpem-kpem; Utorov unav ube gha.”
34Mɛri apine Udugɛr una Aonz na, “Kɛ nan sɛ akaa angan a ɛrɛ? Mɔ mɛgwe inuhun mana?”
35Udugɛr una Aonz arumun ghu un na, “Ajingɛjing una Aonz ava kɔ ghɛ awɛ, ikɔw Uhɛmban kɔisa aku ghɛ awɛ. Ta ghi itsangna uwan ungwen umar mɔ vɛ atayi un na Uwan una Aonz. 36Kas, Ɛlizabɛ kɔ urɔng uwon ɛr amar uwan mɔ abe iyɔr, ungwen iyɔr vɛ akaa na atsa ghi ikem angwe ghu uyav iwɔɔr atsindar. 37Itiyo-ikaa kas imu umɔm una Aonz agba ghi inya gha.”
38Mɛri arumun na, “Mɛgwe uwan-utom ukwas una Aonz Uwun, ukwagh ungwen ukaa a ɛr ghɛ amwe.” Ne Udugɛr una Aonz ayov.
Mɛri aza ɔ ɛnɛn Ɛlizabɛ
39Ukpɛ ungumɔ, Mɛri aza ayuyu kɔ ahiye ugoo kɔ utar Judiya. 40Mɔ anɔr ghi itumbɛ ina Zakaraya ne akaa ghɛ Ɛlizabɛ. 41Mɔ Ɛlizabɛ amgban ikaan ina Mɛri, uwan atsuwe un kɔ ghu usagh, ne Ajingɛjing una Aonz ayiv ghɛ ana.
42Ne Ɛlizabɛ aram ghi imo gbong kɔ Mɛri na, “Ibɛrɛn iru ghɛ awɛ ghu akasɛv amem, ibɛrɛn iru ghu uwan ungwen umar mɔ! 43Mɛgwe kine sɛ vɛ atughum man ungwen ungɔ Uwun uwam ava kan ghu umwe? 44Mɔ mgban ikaan iyow mɔ, uwan atsuwem kɔ usagh ghi isighan. 45Ibɛrɛn iru kɔ ghu ukwas ungwen ana isima ibɛrɛn ina na, Aonz Uwun a ɛr itɔnd uzɔ ingiyen a ɔɔr un mɔ!”
Mɛri asigha Aonz
46Ne Mɛri akaa na,
“Umuwa uwam atugh Aonz Uwun
47ajingɛjing uwam asigha Aonz Ɔr arǝn uwam,
48itiyo ikaa awa ikɔ ghu ukwas utom una
ugban jimɛ.
Hiye hanagen za kɔ ishi ichend imem iva itam ghi ibɛrɛn,
49Uhɛmban a ɛr akaa ataan ghɛ amwe itiye ina ingi
tsangna.
50Ishon makɔrum ina isambɛr kɔ amban vɛ wa un iko,
ichend ghi ichend.
51Aonz a ɛr itom itaan ghɛ avo ana;
atas iyɔr ugaga tra kɔ ghu mɛmbur uvo.
52Aonz ashire ator kɔ ikɔnuv ivov
ne akond amban vɛ gba ɛjimɛ.
53Ayiv ijonov ghɛ akaa asɛ
ne azɛnda iyɔr utorov vɛ yov avo avo.
54Awa itomov anav Izrɛl uvogh,
a umbur utɛsɛn ishon makɔrum ina.
55Kɔ Abɛraham ghɛ myem anav kpem,
ɛnmɔ ana utir avasɛv atsɛv itɔnd uzɔ.”
56Mɛri atsa kɔ Ɛlizabɛ ukpemberen kɔ iwɔɔr itar tete ne ahire kɔ achiya una.
Vɛ mar Jon ɔr minden iyɔr kɔ ijɔr
57Ne ukpɛ ungwen ghɛ kuma ungwen Ɛlizabɛ amar, amar uwan unombos. 58Iyɔr amban hɔ ahiye una ghɛ urɔngu una vɛ mgba na Aonz Uwun akɔr ishon ghɛ ana shisha, vɛ asigha ghu un.
59Ahɔ akinkini, vɛ va ghi itsengɛn#1.59 Itsengɛn Kɔ ghi ɛr Ujus hanamɔ uwan unombos ungwen abiye ahɔ akinkini vɛ tsɛng un, ɛnmɔ ina uzɔ una Aonz ikaa Tera avo atsɛ. uwan hun, vɛru unan un itiye utir una Zakaraya, 60ne ungɔ una akaa na, “Inga! Vɛ ata un na Jon.”
61Vɛ akaa ghu un na, “Ɔr angwe kɔ itum uyon ungwen arumunun itiye ingimɔ gha.” 62Ne vɛ ɛr utir una ikav ghɛ avo upinen itiye ingin ana uwan una. 63Zakaraya apine ukpand, ne angɛr na, “Itiye ina ingi Jon,” ghɛ kond hanamɔ ɔr ghi iyɔr. 64Kɛsmɛ mɔ Zakaraya ahir ghi iramen va, usighan Aonz.
65Ka kond iyɔr ghi iyɔr amem amban vɛru hɔ ahiye hun, ne iyɔr vɛru ghi iramen akaa angan a ɛr mɔ, hɔ ghi ihiye ugoo kɔ utar Judiya hun. 66Hanamɔ ɔr ungwen amgba akaa angan vɛ umbur kɔ ghɛ asima, upinen na, “Uwan ungwen ava aru kɛ nana?” Itiyo ikaa ikɔw una Aonz Uwun angwe ghɛ ana.
Zakaraya aram ɛchi Aonz ghɛ usighan Aonz
67Ne Zakaraya utir una, Ajingɛjing una Aonz ayiv kɔ ghɛ ana ne aram ɛchi Aonz na:
68“Isighan iru kɔ ghɛ Aonz Uwun, Aonz una Izrɛl,
itiyo ikaa ava kan iyɔr anav ɔ arǝn avo.
69Ana ɔs Ɔr Arǝn Ikɔw ungwen aduwe
kɔ itum ɔr tom una Dɛvid,
70Ɛnmɔ aram ghu aramenɛv ɛchi Aonz amban amba tsangna avo atsɛ.
71Na ar ɔs kɔ ihomov avasɛv
ghɛ ikɔw amban vɛ tsɔn ɔs.
72A ɛr mɔ ɛn atɛs ishon makɔrum kɔ utir avasɛv atsɛv
ghɛ umburun ikur iyan ina ghi itsangna.
73Ikur iyan ingiyen azɛm kɔ utir uwas Abɛraham,
74na adu ɔs kɔ uvogh ihomov avasɛv,
ɛnmɔ ghi ɛr un utom ghu uchiyagh gha.
75A ɛr mɔ ɛn ghi iru tsangna ghɛ gbɛngang, kɔ ghi ishigh inagh kpem ahɔ aas abe.
76Uwɛ, uwan uwam,
vɛ ata uwɛ na, ɔr uramen ɛchi Aonz Uwun una Uhɛmban.
Uwɛ ne ugba Uwun kɔ ishigh utɔr un ihang.
77Uwɛ ɔ ɛr mɔ, ɔ ɔɔrun iyɔr anav na, ghi arǝn iru tas ɔ ɛn Aonz
aguwe akaa abe avo.
78Kɛ na, Aonz angwe ghi ishon makɔrum kaka.
Kɛ mɔ ne Ɔr arǝn ɛn ighang uturu iyam ghu ɔs tra kɔisa,
79iyam ghu amban amba kɔ imiye ghɛ amban kɔ umɛrɛmɛ ukuu,
ghɛ ukɛghɛn avɔr aas kɔ ghi ihang umakun.”
80Jon aves ɔr, atar kɔ Ajingɛjing; ne aruyi kɔ vɛ tim gha kpem, tete ne ahiye utom una Aonz gbɛngang kɔ iyɔr Izrɛl.
Markert nå:
Luk 1: UTA
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
©️2024 Luke Initiative for Scripture Translation
