Génesis 9
9
Diosweta Noépa shinadiwu
1Diospa tsai shara Noé yuidi awẽ wakewuya. Tsai iskara atu yuidi: “Wake ichapa akawe baitiixu adu inuwu. 2Yuina wetsa keskarawu bai aduawu biki besexikadi. Peiyawu wumakaya ikawu bai adu ikawu enewa mera ikawu nawuna mi atũ bitsisipa ipadaka. 3Naatiiwi yuinawu ma pitiru piti wadanabeawu ma pitiru. Nawu batu inai. 4Naskaweke dabi ibiya ma pitiruba. Na ibi uduax nu ika. 5Naskatari dukuwede ẽ ñukaxiwi awa chakawabismaiki yuinawuri. Yuinatu yura reteke naa yuina ma retetiru.
6Yurã wetsa reteke
naari wetsã retepakedaka
Epa Diospa dukuwede
na keskaramai udiwadike.
7Naskake wake ichapa akawe
baitiixu adu inuwu”, Diospa Noé yuidi.
8Diospa Noé awiana yuidi awẽ wakewuya: 9“Batuweta ẽ shinakuiyai matu kaiwuu uduax ichapanawã kaĩpakedakawuwetari. 10Naatiiwi peiyawu yuina idawanabetiruwu yuina dii mera ikawu batuwe xaxuwã mera ikiyabeawu na ẽ batu yui naatiiwi na yuinawu bai adu ikawu. 11Ana ẽ awiana waipawane bai wepudakaba naatiiwi yurawu yuinawu ẽ ana aweskawadakaba. Batuweta naa ẽ shinakuiyai ana wetsadakaba. 12Batuweta naa ẽ shinakuiyai yuinawuwetari naskapakedaka. 13Ewẽ nawawai nishu mera ẽ waa. Na bai adu ikawawe naatiiwixu uĩpakedakawu na nu shinakuiyai. 14Bai adu nishu ẽ ubayaidu nadu ewẽ nawawai ipadaka. 15Waipawane yurawu yuinawuriwi ẽ ana atu adaitidakaba. Batuweta yuinawuwetari na ẽ shinakuibis ẽ shinaxiwi. 16Naskake nawawai nishu mera ẽ uĩkĩ ẽ shinaxiwi. Na yurawuweta yuinawuwetari ẽ shinakuipakedaka ẽ shinabis. 17Na ẽ batuweta shinakuiyai yuinawuwetari da bai aduxu”, Epa Diospa Noé naduri yuidi.
Noé awẽ wakewuwe
18Noé awẽ wakewuwe xaxuwã meraduax tsekediwu. Awẽ ade Sem Cam Jafet. Cam wake wistiya awẽ ade Canaán. 19Naa tres Noépa wake idi. Naawuweta awiana na baitiixu wake ichapa kaĩwadiwu. 20Noépa bae yuduki taewadi. Naskaxu wibi wadadi awẽ ade uva. 21Peda wetsa Noépa uva ede#9.21 Uva awẽ ede (vino) wukaxadu nu paetiru. ayax paedi. Awẽ yuina wichi tapas meradua ñewa rakadi. 22Naskaitu Cam awẽ apa ñewa uĩkĩ awẽ uchi rawe yui kai kadi Campa awẽ rewuduwu Canaánĩtawu idi. 23Naskaidu dikawerãkaxu Semweta Jafet awẽ rakuti wekaxu apa chituria uĩkakĩ wepudiwu. Chitekiri wukaxu apa rakudiwu chituria uĩnuwuba. 24Naskax Noé paei buinakawa tapidi awẽ wake chipuketu Canaánpa chituria uĩke 25yuikĩ iskawadi:
“Canaán awẽ kaiwuunuax ichapanawãwu kaĩpakedakawu chaka iixikadi.
Canaán kaiwuunuax ichapanawãwu kaĩpakedakawu
mewẽ uchĩ raweta atũ yudubatiwu iixikadi”, Noépa Cam wadi.
26Awiana yuidi:
“Mi Sempa awẽ Dios sharakui. Canaánitawu atũ uibatiwu inuwu.
27Naskata Epa Diospa Jafet bai ewapa waxunu
awẽ udiwetsa Sempa awẽ pexe mera awe inu.
Naskax Canaán awẽ kaiwuunuax ichapanawã kaĩpakedakawuri Semweta Jafet atũ uibati inupukuwi”, Noépa yuidi.
28Naska na waipawã daxayaidu chipu Noé trescientos cincuenta wari iyupaudi. 29Naatiã Noé awẽ wari novecientos cincuenta wari idi. Naatii wari akax dadi.
Markert nå:
Génesis 9: mtsB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
