Génesis 8
8
Ede waipawã daxadi
1Naskadu Noéwe naatiiwi yuinawu idawanabetiruwu yuina dii mera ikawu Epa Dios atu shinadi. Naskaxu Epa Dios wumakayadua newewã webadi. Naa newewane ede daxawakĩ taewadi. 2Ana ede yusidiba. Awianari bai meraduax ede tsekediba. Ana dai meraduaxri ui wediba. 3Naskaidu ciento cincuenta peda ma ikadu wenamashta ede daxapakedi. 4Naskax peda diecisiete uxe siete ma ikadu na xaxuwã bachi awẽ ade Ararat adu rakadi. 5Uxe diez ata peda wistishita enewa daxapakedi. Ma machiwawu uĩtirupini idi.
6Naskadu chipu cuarenta peda ma ikadu Noépa xaxuwãne awẽ weputi wepedi. 7Naskaxu Noépa uka nichidi. Uka nichiadu bai wedai wani tsautiruxakĩba yuyakawasadi. 8Naskata chipu Noépa riwi nichidi. Ma bai betuamaiki tapipaikĩ. 9Bai wichiyabax riwi awiana dasudi wani tsautiruxakĩba enewane bai wepua idi. Naskaitu Noépa xaxuwã weputi aduxu awẽ puña kaĩbaxuadu riwi aki tsautushidi. Xaxuwã mera ikibawerãdi.
10Ma siete peda awiana ikadu riwi nichidi. 11Ma wari kaidu riwi awiana dasudi. Badi xeushtabexu wedi. Naskaitu uĩkĩ Noépa tapidi ma bai betuaitu. 12Naskaxu awiana siete peda ma ikadu awiana riwi nichidi. Nichiadu riwi ana udiba.
13Naskata Noé seiscientos uno wari idi. Naskaidu bai ma betua idi uxe idai taeadu peda wisti. Naskadu xaxuwã awẽ kaĩti wepexu ma bai betua uĩdi. 14Naskax uxe rawe ata peda veintisiete bai betukuiya idi. 15Epa Dios Noé yuidi: 16“Datiã xaxuwã meraduax mewẽ awĩnu mewẽ wakewuwe mewẽ wawawatiwe kaĩkawe. 17Bewe na yuinawu xaxuwã mera ikiyabeawu atu kaĩbawe. Peiyawu yuina idawanabetiruwu na bai adu xaratiruwuri naatiiwi atu kaĩbawe bai aduxu atũ wake ichapa kaĩwanuwu”, Epa Diospa Noé wadi.
18Naskadu Noé awẽ awĩnu awẽ wakewu atũ awĩwuu xaxuwã meraduax kaĩdiwu. 19Naskariwiyai naatiiwi xaxuwã meraduax ikiyabeawu na yuina idawanabetiruwu yuinawu dii mera ikawu bai adu xaratiruwu peiyawuri naatiiwi xaxuwã meraduax tsekediwu. Na baitiixu wudiwu.
20Naskadu xaxuwã meraduax kaĩta Noépa ruwewu petsaidaxu naa kabakixu yuina peiyawu nu pitiruwu sharakui Dios kuwaxudi inaxikĩ.
21Naskadu Epa Dios awẽ duwe shara xetei idibadi. Diospa awẽ shina meraduax iskadi: “Dukuwedewawe awĩwuwaweri wakekuikaxu chaka shinawiyaiwawe ẽ ana atu chakawadakaba.
22Yurawu bai adu iyuwawuadu. Awara wadakata wiwuwaiwudu.
Batsi ipadaka. Xada ipadaka.
Wariri ipadaka. Bechakari ipadaka.
Pedari yaberi ipadaka”, Epa Dios idi.
Markert nå:
Génesis 8: mtsB
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
