Popodalaina 4
4
I Keni beto I Ebolo
1Ego na marene sa kole tavitia si Ivi na maqotana ko sa bogata ko sa vapodoa isa si Keni, poni pira sau sa na maqotana, <<Qa vaporea ara sa kai tinoni pa vaitokai tai Iahova,>> sau.#4.1 Na isongona i <<Keni>> beto na paranga Hiburu isa sa tapeluku <<Qa vaporea>> sa na ovelaidi sa qai vaiqiro. 2Pa liguna lao sa vapodoa mule isa si Ebolo na tasina.#4.2 Na ginuana na isongo <<Habel>> isa sa tapeluku Ebolo sa <<na rovu kolo, singo>>. Na toa tai Ebolo sa aputai jola vei na rovu kolo babi na singo tinoni
Ego i Ebolo sa na tinoni kopu gogodo sipi, goto i Keni sa na tinoni umuma pa peso. 3Ego sa jola kai totoso kakasana sa sa pogoso pa vuana na peso si Keni ko na ona vaivana lao tai Iahova sau. 4Poni i Ebolo ba sa pogoso tugu pa podo moedi ira nona sipi beto sa pogoso lameniria sa na gogosoto jongaidi nona sipi. Poni i Iahova sa doro tavaraguania si Ebolo beto na ona vaivana, 5goto i Keni beto na ona vaivana sa sake doro tavaraguaniria. Ko sa iku vuvurungia si Keni ko sa titigore betona na isumatana.
6Poni pira saunia i Iahova si Keni, <<Ai sa vei ko sa iku vuvurungigo tu? Ai sa vei ko sa titigore betona tu na isumatamu? 7Vei muna roitinia ao sa na tuvisi, poni sa muna engamua gu sao? Goto vei munake roitinia ao sa na tuvisi, poni na sela sa sa korapa opo veranigo gu pa atakamana, ko ao sa na ona nyorogua isa ba ao tu sa muna lalaenia isa,>> saunia.
8Ego sa parangia i Keni si Ebolo na tasina ko totonai tu qai korapa pa mumuqu, sa sa turu rajai i Keni si Ebolo na tasina ko sa vaivamate pale.
9Beto sa parangia i Iahova si Keni, <<Pai tu i Ebolo na tasimu?>> saunia.
Poni pira sau si Keni, <<Koi! Qake gigilai.>> <<Na qua jujuno ara ko mana kole kopunia sa na tasiqu?>> sau.
10Poni pira sau si Iahova, <<Na sa qu roitinia sao? Mu vainongoro ko! Na ovovelena na orunguna na tasimu sa sa kekebo lame taqu koko pa peso. 11Ko kopira ao sa, sa leve palenigo na peso isa sa mamanga ko sa bukua na orunguna na tasimu pa limamu ao. 12Tonai muna roitia ao sa na peso, sa na peso mina aru mulenia nona neqi ko minake vanigo na vagisona. Muna kai tinoni lekogo lao lame beto muna vidulai lao lame pa peso sao,>> saunia.
13Poni sa paranga lao tai Iahova si Keni, <<Kei! Sa lavata jola vivitiginia na qua ngongo sa na vinakilasa qa gosoria api sa. 14Pa ngeni api qu iju votu palenisiu pa ia ko kopira mana pae pa isutamamu ao sara. Kopira mana kai tinoni lekogo lao lame beto kai tinoni vidulai lao lame pa peso sara, ko ira na tinoni mai batisiu sa kode mai vai vamate palesiu,>> sau.
15Ba pira saunia i Iahova si Keni, <<Dai! Minake vei isa. Na tinoni mina vai vamatea i Keni sa mina gosoriagana ka vitu vinakilasa,>> sau. Beto sa sa vakolenia kai vinagigila i Iahova si Keni ko ira mai batia sa maike kotia sau.
16Ko sa votu taloa pa susuverena tai Iahova si Keni beto sa lao suvere pa ia pa Nodi, #4.16 Pa paranga Hiburu na ginuana na isongo <<Nodi>> sa <<Lekogo lao lame>>, na ovelena sa vaiqiro vei na paranga <<Nadi>>, isa na paranga na ginuana <<Lekogo lao lame>> beto isa mina vei i Keni sau pa 4:12, 14. pa kale sagere tapo pa Idini.
17Ego i Keni sa kole tavitia sa na maqotana ko sa vabogatia ko sa vapodoa si Inoke. Pana totoso isa sa sa korapa roitinia isa sa kai gugusu ko sa vaisongo tutunia tugu i Inoke na tuna marene sa na gugusu isa.
18Ego pa ti Inoke qi pore si Iradi, ko i Iradi qi vaporea si Mehujaeli, i Mehujaeli qi vaporea si Metusaeli, beto i Metusaeli qi vaporea si Lemeki.
19Ego i Lemeki sa tekuria sa karu maqota, na isongona kame si Ada beto na isongona na vinaruana si Zila. 20I Ada sa vapodoa si Jabali; isa na tamadi ira qai susuvere pa aqaqo beto ira qai papausu manugu mamade nenedi. 21Na isongona na tasina marene si Jubali; isa na tamadi ira qai rarusia na mike beto qai ivivu. 22I Zila ba sa pore tuna marene tugu, na isongona si Tubalikeni, na tinoni sa roroiti votuniria soku gogoto sakasa roroitidi pa aeana beto na boronisi. Na luluna rereko i Tubalikeni si Naama.
23Ego pira sauniria i Lemeki sa karu maqotana,
<<Ada beto i Zila, mu nongoria na ovovelequ ara;
Agou na maqotana i Lemeki, mu vatalinganiria na parangaqu.
Qa vai vamatea ara kai tinoni sara ura sa vapalekasiu,
Qa vai vamatea ara kai koburu ura sa kirususiu.
24Vei ka vitu vinakilasa mina gosoriagana
Sa na tinoni sa vamatea i Keni,
Poni sa na tinoni sa vamatea i Lemeki
Sa mina gosoriagana ka vitungavulu vitu vinakilasa,>> sauniria.
25Ego i Adama sa kole tavitia mule sa na maqotana ko sa vapodoa sa kai marene ko sa vaisongonia i Seti, #4.25 Pa paranga Hiburu sa na isongona i <<Seti>> beto na paranga sa tapeluku <<sa vakole vanisiu>> sa na ovelaidi qai vaiqiro. Totonai sa podo sa na koburu api poni sa na maqotana i Adama sa doro veinia na Tamasa sa vakole vania kai koburu ko sa vei sa vaisongonia i Keni. <<ura na Tamasa sa vakole vanisiu mule kai koburu na beina i Ebolo, isa sa vai vamatea i Keni,>> sau sa na maqotana. 26I Seti sa vaporea tugu vei sa kai tuna marene, ko qi vaisongonia i Enosi.
Ego pa totoso isa sira na tinoni sa qai podalai gigigalia sa na isongona i Iahova.
Markert nå:
Popodalaina 4: LGA
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
© 2024, Islands Bible Ministries. All rights reserved.
