Gẹnẹsis 1
1
Okha Uyimwẹ
1Vbe omuhẹn, vbe Osanobua yi agbọn kevbe emwi hia ni rre iso. 2Agbọn ma zẹdẹ gha mwẹ ona, emwi i vbe rrọ, ebiebi keghi so gba avbe okun nekhua ni hu yo hu rre vbọ. Ẹtin Osanobua kegha lọyan yo lọyan rre vbe uhunmwu amẹ. 3Osanobua keghi kha wẹẹ, “Gie uwanmwẹ gha rrọọ,” uwanmwẹ keghi gele ladian. 4Emwi ne Osanobua dẹghe keghi sẹ ọre ọyẹnmwẹ. Rẹn keghi wannọ uwanmwẹ hin ebiebi rre. 5Rẹn keghi tie uwanmwẹ “Avan” kevbe ebiebi “Asọn.” Ẹdẹ keghi mu ẹdẹ keghi gbe ọnii kegha re ikpẹdẹ nokaro.
6-7Osanobua keghi kha wẹẹ, “Gie ideghedeghe gha rrọọ, ne ọ wannọ amẹ, ne ọ miẹn ehe na gha rre ihe ughughan eva.” Ọ kegha ye rriọ. Erriọ ọre Osanobua na ru ideghedeghe ne ọ wannọ amẹ ne ọ rre ototọ ẹre hin amẹ ne ọ rre odukhunmwu ẹnrẹn rre. 8Ọ keghi tie ideghedeghe nii “Iso” Ẹdẹ keghi mu ẹdẹ keghi gbe, ọnii na gha re ikpẹdẹ ne ogieva.
9Osanobua keghi kha wẹẹ, “Gie amẹ ni rre ototọ iso si koko ye ihọkpa ne otọe miẹn ehe na ladian.” Ọ keghi gha ye rriọ. 10Rẹn keghi tie otọe nii “Agbọn” ọ keghi tie amẹ ne a si koko nii “Okun.” Emwi ne Osanobua bẹghe keghi sẹ ọre ọyẹnmwẹ. 11Rẹn keghi kha wẹẹ, “Gie erhan vbe irunmwu hia zọ vbe otọe, ke ni gbe ihiagha kevbe eni mọ,” ọ kegha ye rriọ. 12Emwi hia keghi zọ ke otọe rre. Emwi ne Osanobua bẹghe, keghi sẹ ọre ọyẹnmwẹ. 13Ẹdẹ keghi mu, ẹdẹ keghi gbe, ọnii na gha re ikpẹdẹ ne ogieha.
14Osanobua keghi kha wẹẹ, “Gie uwanmwẹ gha rre iso, ne ọ wannọ avan hin asọn rre, kevbe ne ọ rhiema, ẹghẹ ne ikpẹdẹ kevbe ukpo, kevbe ẹghẹ emwiukpo ya suẹn; 15iran ghi gha baa vbe iso, ne iran gha rhie uwanmwẹ ye agbọn” ọ kegha ye rriọ. 16Ẹre Osanobua na yi uwanmwẹ nekhua eveva, ne owẹn gha kha yan avan, ne uki vbe gha kha yan asọn; ọ keghi yi avbe orhọnmwẹ ba ẹre. 17Rẹn keghi viọ nene avbe uwanmwẹ ye iso ne iran gha wan mu otọe. 18Ne iran gha kha yan avan kevbe asọn kevbe ne iran wannọ uwanmwẹ hin ebiebi rre. Emwi ne Osanobua bẹghe keghi sẹ ọre ọyẹnmwẹ. 19Ẹdẹ keghi mu, ẹdẹ keghi gbe, ọnii na gha re ikpẹdẹ ne ogienẹ.
20Osanobua keghi kha wẹẹ, “Gie amẹ vuọn ne emwi ni hiọnrọn ughughan nibun, kevbe ne ahianmwẹ vbe vuọn iso”. 21Ẹre Osanobua na do yi avbe ugbogiorinmwi ni rre okun ke avbe emwi ni ma wu ughughan ni rre amẹ kevbe ahianmwẹ ughughan hia. Emwi ne Osanobua bẹghe keghi sẹ ọre ọyẹnmwẹ.
22Rẹn keghi fiangbe iran hia, rẹn keghi tama emwi ni rre uwe amẹ ne iran gha muan yọ ne iran vuọn okun. Ọ tama avbe ahianmwẹ ne iran vbe gha muan yọ. 23Ẹdẹ keghi mu, ẹdẹ keghi gbe, ọnii na gha rre ikpẹdẹ ne ogisẹn.
24Osanobua na kha wẹẹ, “Gie emwi irri ughughan gha rre otọe, kevbe aranmwẹ oha ughughan nekhua kevbe negiẹrẹ”. Ọ kegha ye rriọ. 25Ẹre Osanobua na yi avbe emwi hia, emwi ne irẹn bẹghe keghi sẹ ọre ọyẹnmwẹ.
26Osanobua keghi kha wẹẹ, “Banbanna nian, ma gha do ma emwa na agbọn, iran gha ye vbe ima, iran ghi khọ mwa. Iran gha mwẹ ẹtin vbe uhunmwu avbe ehẹn, ke avbe ahianmwẹ, avbe emwi irri kevbe avbe aranmwẹ oha nekhua kevbe negiẹrẹ.” 27Ẹre Osanobua na ma emwa nagbọn, ọ na ma iran ne iran ye vbe irẹn tobọ irẹn. Ọ keghi yi iran okpia kevbe okhuo. 28Ọ keghi fiangbe iran vbenian wẹẹ, “Wa ghi biẹlẹ emọ nibun vbe ne a gha na miẹn wẹ uniẹn ruan ghi gba ehe hia vbe agbọn, iran ghi gha khaemwisẹ ya rẹn. I rhie ẹtin nuẹn ya gha kha yan avbe ehẹn, avbe ahianmwẹ kevbe avbe aranmwẹ oha hia. 29I rhie avbe ikpẹ ọmọ erhan kevbe avbe ọmọ erhan hia nuẹn ne u gha re. 30Sokpan ebe vbe irunmwu ọre I viọ ne avbe aranmwẹ oha nekhua kevbe negiẹrẹ kevbe avbe ahianmwẹ ne iran gha re.” Ọ kegha ye rriọ.
31Osanobua keghi ghe emwi hia ne irẹn yi, ẹko ke sẹ ọre ọyẹnmwẹ ẹsẹse. Ẹdẹ ghi gbe ẹdẹ keghi mu, ọnii na gha re ikpẹdẹ ne ogiehan.
Markert nå:
Gẹnẹsis 1: EDO96
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
@ The Bible Society of Nigeria, 1996
