Matiusu 9
9
Naga o nyawa womatengo wolugu de o Yesusu wihitogumu unangika
Maruku 2:1-12; Lukasa 5:17-26
1De o Gadara ma nyawa ona yogahokoka la o Yesusu wanoa manga tonaka gea de ahao Una de iwinii-niiki yosobo ho yofarenoli manga ngotiroko de yomahihorali o Galilea ma akere ma ngooto ma honongaikali. De manga dumutu gea to Una ai kapongo o Kapenaumika. 2De yomahiadonoka genangoka de naga womatengo wolugu-lugu abe ai dodiawo iwiao o Yesusino. De wolugu-lugu gea una ka womaiduoka dika ai nanaooka. Ho ka de o Yesusu wamake wolugu-lugu gea de ai dodiawo abe iwiaoino de wahioriki abe ona mata-mata manga hiningaka de duru iwingakuoka Unangika. De mangale manga ngongakuino gea ho o Yesusu witemo wolugu-luguika wato, “Ahi ngofaka, ufa ani hininga ihuha, angamoi naa ani howono Ma Jouika Ngohi takokiofioka.”
3Masara genangoka naga o nyawa ko manga ngoe, de yamuruono naga abe o Musa ai Paretaino yotobadoto-dotoko, de ona gea ka de yoihene abe o Yesusu ai demo wolugu-luguika de ona manga hiningaka ato, “Ei, Una naa Ma Jou wingelo ai demoino. Angamoi Una womahitouna abe Ma Jou dika ai karajaanga la o nyawa manga howono waofi. Ho naa Una duru womahikurutiye abe womahitero-tero de Ma Jou!” Hokogea itagi manga hiningaka.
4De o Yesusu Una duru wahioriki to ona manga hininga ho Una wataere onangika wato, “Adodoa ho hokogea nia hiningaka de nitemo-temo ma dorou Ngohino? Marai ngini niato to Ngohi ahi kuaha ko iwa? 5Masara Ngohi naa naga de ahi kuahaka ho hiadono ngaro totemo tato, ‘Ani howono taofioka,’ eko ngaro totemo tato ‘Nomomiki de nomaloiki,’ ma gea ka idadi todiai mata-mata. 6Ho gea totemo la ngini ka idadi nihihioriki abe Ngohi naa o Nyawa ma Ngofaka abe o Horogaka de tauku toboa masara o nyawaino tomaboa. De gea tomahitaana ahi kuaha nako hiadono una tihuloko la womomiki de gea ahao ka idadi womadagi.” Ho gea o Yesusu wotemo ibooto onangika de ahao wolugu-luguikali wotemo wato, “Ho naa ngonaika tonitemo, Ngona nomomikoka, de ani nanao nagoraka de nolio ani tauika, angamoi ngona naa Ngohi tonihitogumoka.”
7De ka itodokanino ka dau de una womaokoiye, de wolio ai tauika! 8Ho genangoka o nyawa manga ngoe duru yokokiheranga de yokokihawanoo abe ma titi gea idadioka abe duru to ona mata-mata manga hima-himangoka. De hiadono ona iwihigiriiri Ma Jouiye ma titi Una wihidoaka o Yesusika de to Una ai kuaha kohaamoko.
O Yesusu wiahoko o Matiusu la witobaniiki de nagali abe o Yesusu womahitararono ma titi o kia hiadono Una wadodiawo o howono ma nyawaika
Maruku 2:13-17; Lukasa 5:27-32
9De genangoka de o Yesusu de iwinii-niiki ona yosobo de manga dodagi ma goronaka de Una wimake womatengo ai romanga o Matiusu. De to una ai karajaanga wotobagaho-gahoko o pajaka ma tiwi, ho gea o Yesusu wimake wogogeruku o pajaka yogaho-gahoko ma tau ma ngioka. De ahao o Yesusu wiahoko unangika wato, “Naino la nohiniiki Ngohi.” Ka de hokogea wotemo de o Matiusu womaoko de o Yesusu winiikoka.
10De ipahaino de o Yesusu de iwinii-niiki naga o Matiusu ai tauoka, yomakutuono yolomo ai tau ma goronaka gea. De naga utu genangoka abe manga datoro ito-totorou, abe ona utu o Matiusu ai dodiawo abe onangoo yotobagaho-gahoko o pajaka ma tiwi. Ho ona mata-mata gea yolomo yomakutuono o Matiusu ai tauoka. 11De nagali genangoka o Farisi ma doomuino ma nyawa, de ona gea ka de iwimake abe o Yesusu womahisapurika de o nyawa abe manga datoro ito-totorou de ona duru iwihininga kuranga o Yesusika. Ho ona yaleha iwinii-niikika ato, “Adodoa ho nia guru gea yomakutuono yolomo de o pajaka yogaho-gahoko de o nyawa utuoli abe yodiaioka itorou Ma Jouika? Gea duru ko itiaiua!”
12De o Yesusu woihene to ona manga demo gea ma titi Una ho wapaluhu wato, “De nako o nyawa ko yopopanyakeua ngaro ufa dika yomahibau ona yohou-hourika, masara abe de manga panyakeoka ona gea yoperelu o duduhunu abe yohou-hourino.”
13De ahao wohigila-gila ai demo la utuohi wahitararono onangika wato, “Abeika nimatotoihene de niongano-nganono Ma Jou ai Demo-demoino moi naa abe ma dodihiraino de ihitulihukuoka. De genangoka Ma Jou wotemo wato,
‘Nako abe o nyawa yomahihuba Ngohino, gea manga datoro irahai de imakiniiki de ahi mau. De naga moioli abe o nyawa yapake o hininga ma dora manga date-datekika, enangoo ma datoro ma rahai. Masara nako ma titi hinooto gea de hohidotelega abe o kiakahi ikurutiye to Ngohi ahi himangoka, gea abe o nyawa yatobapake manga hininga ma dora manga date-datekika, ka genangohi ikurutiye.’ # 9:13
Hosea 6:6
Hokogea Ma Jou ai demo ma dodihiraino. Ho koaho ngini naa nimadotokohi ma demoino gea ka hiadono duru niataoko ma titi genangino. De duru ma demo gea ma titi hiadono Ngohi naa tolomo de ma nyawa naangoka!”
“Abe ahi datorino naa de tomahimatoko ahi hininga ma dora o nyawa ahi date-datekika naa. De hongoli tomahingahu abe gea ma titi ho hiadono Ngohi naa toboa o duniauku. Abe Ngohi toboa ko ma titiua la tahoko ona gea abe manga wowango itotiaioka, masara ona abe nagahi de manga howonokahi Ma Jouika, ona gea Ngohi tahoko.” Hokogea o Yesusu ai demo ona o Farisi ma doomuika gea angamoi ona ato bote to ona manga wowango itotiaioka Ma Jou ai himangoka.
O Yesusu wahitararono abe ko idadiua manga hirahi ma dodotoko imakasapuru de to Unangoli ai dodotoko ma hungi gea
Maruku 2:18-22; Lukasa 5:33-39
14De o wange moiuku de naga yoboa o Yesusino yamuruono naga abe ona gea o Yohanese Wotobaohi-ohiki ai nyawa. De yoboaino de iwileha o Yesusika ato, “Ngomi abe wiwinii-niiki o Yohanese ngomi naa mipuaha, de ona gea abe yanii-niiki o Farisi ma nyawa onangoo yopuaha. Ho adodoa ho to Ngona ani nyawa de ko yopuahaua?”
15De o Yesusu ma oraha wapaluhu onangika de womahiketero abe ma titi Una ma hirete de ona iwinii-niiki. Ho gea wapaluhu onangika wato, “Hokokia to ngone nanga biaha ma titi o gogilaka? Abe nako nanga gogilaka ma rame-rameoka de nanga dutu-dutu de nanga dodiawo kiani ihirame-rame ka ma moi de una abe woila-ilaka. Ko idadiua naga manga hininga ma huha de hiadono yopuaha abe ma oraha una woila-ilaka nagahi de de ona! Kiani manga hininga de ma garagoka dika. Masara ahao naga ma oraha abe ai dodiawoino iwiaoka woila-ilaka gea o ngi moiikali, de gea ma oraha ahao manga hininga idadi ihuha de yopuaha ho ko yolomuahi o inomo. De hokogenangoo to Ngohi ahi nyawa abe ihinii-niiki. Mangale ma titi abe Ngohi nagahi onangoka ho ngarouahi de ona yopuaha. Masara ahao naga ma oraha abe Ngohi ko ihiwaka onangoka de gea ahao ona ka idadi yopuaha.”
16De ahao o Yesusu wohigila-gilahi ai demo angamoi woigo la ona ihioriki abe ma titi o Yahudi ma nyawa manga hirahi ma dodotoko gea duru ko idadiua ihikasapuru de to Unangoli ai dodotoko ma hungi gea. De Una wodiai o hiketero wato, “Abe nako naga nanga baju moi ma dekanoka biaha hapake-pake de ikakihoka ho hato hatapa, nako ma dadapa gea ka ma hungiohi, gea ko idadiua hohiduguriti de ma baju abe gea ma dekanoka. Angamoi gea ahao ma dadapa ma hungi ikororomo de atauru ma didingino ho ma baju ma dekanoka gea ikakiholi, masara ma kakihi ma hungi gea utuohi ilamoko.”
17De ma moioli o Yesusu wohiketero wato, “Abe nako naga o angguru ma teongo ka ma hungiohi, gea ko idadiua hoguhe o popojeuku abe ma popoje gea ma dekanoka, done ahao ma teongo ihaga de ma popoje ma dekana ipotoka, de gea ahao ma teongo ikopoaka de ma popojeoo duru iwederoka. Ho nako ma teongo ma hungi, kiani hoguhe o popoje ma hungiuku, angamoi done nanga angguru ma teongo ipoaka de ihihangoka de nanga popojeoo duru iwederoka.”
De hokogea o Yesusu wohiketero la wadotoko abe ko idadiua o hirahi ma dodotoko imakasapuru de to Unangoli ai dodotoko ma hungi gea.
O Yesusu womihimomiki momatengo mohonengoka de womihitogumu momatengoli abe duru mokangela
Maruku 5:21-43; Lukasa 8:40-56
18De o Yesusu Una wotemo ai gogiriakahi abe o Yohanese Wotobaohi-ohiki iwinii-niikika de naga womatengo woboa Unangino. Abe una gea o Yahudi ma nyawa manga dodotoko ma tau ma hibaluhu. Ho una woboaino de watilabukuku o Yesusu ai himangoka de wihingahu Unangika wato, “Marai to ngohi ngohi ora ahao naa mohonengoka. Ho ngohi togahoko Ngona nohiniiki de nomiso de ani giama, angamoi ngohi tohioriki Ngona ka idadi nomihimomiki ami honengino la mowangoli.” 19De o Yesusu womodeke ho Una de iwinii-niiki yosobo la iwiniiki ma hibaluhu ai tauika.
20De ahao manga dodagi ma goronaka de naga momatengo abe o ngofeka yomakamake de duru muna mokangela ma titi ami mede. De muna gea ami taongo ngimoi de hinooto ibooto mokangela. Ho ka itodokanino de muna gea moboa o Yesusu ai poretino de o Yesusu ai baju ma barenika maso, 21angamoi muna momatemo mato, “Ngaro ka ai baju dika taso, ma ka idadi totogumu.”
22Ho ka de maso ai bajuika de o Yesusu womadogilioro de womitemo munangika wato, “Ngohi ora, ufa ani hininga ihuha, angamoi ma titi ngona naa ani ngongakuino hiadono notogumoka.” De duru ma oraha gea dika de to muna ami kangela ko iwaka.
23De ipahaino de yogila-gila hiadono yomahiadonoka o Yahudi ma nyawa manga hibaluhu ai tauika. De genangoka Una woihene o nyawa manga ngoe manga gigoro o hagaaga de o gari. De nagali abe yowuu-wuwu o sulingi abe hoka manga biaha nako o nyawa yohonenge. 24De ona gea o Yesusu wamake de ahao wahuloko ona mata-mataika wato, “Ngini nikokihupuoka ma tauoka naa! Angamoi o ngofeka naa muna ko mohonengua, masara ka imikiookoka dika.” De ona manga ngoe genangoka ka de yoihene o Yesusu ai demo gea de iwigie-giete dika Unangika. 25Masara ipahaino de ona ko manga ngoe yokokihupuoka, de ahao o Yesusu wowohama ami ngiika. De ahao womiso ami giamika, de muna ka momomiki de hiadono momaokoiye! 26De gea womihimomiki ibooto ami honengino de ma nyawa genangoka duru yomaketeade-ade ma titi ma heheranga gea hiadono ihiabari o tonaka gea ma amokika.
O nauru yahinooto yorafi-rafi de o Yesusu wahitogumu onangika
27De o Yesusu de iwinii-niiki ona ma hibaluhu ai tauoka de yosobo, de naga o nauru yahinooto yorafi-rafi abe iwihidoo-doduru ai poretino. De ona yahinooto yopoa-poaka o Yesusika ato, “Mia Baluhu o Yesusu! O Dautu ai Toforauku! Ngomi mimagahoko la Ngona nomidorahi de nomiduhunu ngomi naa!”
28De o Yesusu ona yomahiadonoka o tau moi de yowohamika ma goronaika la genangoka yomahiaini, de ona yahinooto yorafi-rafi ka iwihidoo-doduruohi. De hiadono onangoo yowohama ma tau ma goronaika. Ho o Yesusu waleha ona yorafi-rafika wato, “Sarakia, ngini ningaku abe Ngohi ka idadi tinihitogumu la hiadono nimahioriki?”
De ona yahinooto yopaluhu ato, “Iya, mia Baluhu, ngomi naa mingaku abe Ngona ka idadi nomihitogumu.”
29De ahao Una waso to ona manga lakoika de wotemo wato, “Mangale ma titi ti ngini nia ngongakuino ho gea hiadono nitogumoka.” 30De ka itodokanino de ona yahinooto yomahiorikoka! De gea o Yesusu duru wahuloko onangika wato, “Abe naa idadioka ufa nihiabari o nyawaika ngaro onagonaika dika ma ko idadiua niade-ade.” 31Masara ona gea yosobo de ihiabari o nyawa mata-mataika ma titi o Yesusu ai kuaha, ho hiadono ma tonaka ma amokika gea de o nyawa mata-mata iwihioriki.
Womatengo womou de iwibare-barene o tokata de o Yesusu wihitogumu unangika
32De ona yahinooto yosoboka de ahao naga o nyawa utu iwiaoino o Yesusino womatengo abe una gea womou-mou. De una womou mangale ma titi o tokata iwibare-barene unangika. 33De o Yesusu wohititoko ma tokata womou-mouoka gea, de ka de ma tokata wohihupuoka de ka idadi una gea wotemo-temo! De o nyawa ko manga ngoe abe naga yolega-lega de yakokimake o Yesusu ai datoro gea, ona duru yokokiheranga. De ona yomakoketemo ato, “Ngaro nanga tonaka naa o Isiraele ma tonaka ma amokika ma ko ma moiuahi idadi hokonaa!”
34Masara nagali o Farisi ma nyawa genangoka de ona iwingelo o Yesusika de yotemo ato, “Aa! Una gea ma titi moi dika hiadono ka idadi wohititoko o tokata o nyawaino, abe gea ma titi to Una ai kuaha iboa o tokata ma hidimonino!”
O nyawa ka yokurangohi abe yomahikarajaanga moi de de o Yesusu
35De o Yesusu Una ka ihikaika wotagi-tagi de wotulu-tulu abe o kota-kotaika de o kapongo homoi-homoiika ma tonakoka gea. De ma ngi homoi-homoioka de Una wadotoko manga dodotoko ma tau-tauoka de wahingahu-ngahu o Abari ma Rorahai abe ma titi ahao Ma Jou wahikoano ai nyawaika. De o kiaika dika woiki de o nyawa ko manga ngoe wahitogumu manga popanyakeino de manga badanga ma kokangelaino gea. Abe ngaro ma panyake eko ma kangela o kia dika naga ma Una ka wahitogumu genangino. 36De gea to Una ai hininga ma dora duru itagi o nyawa mata-mataika abe yokokiboaino Unangino. Angamoi Una wahioriki to ona manga kangela duru ma dodubuho de ko moiua yaduhunu onangika. De Una wamao abe ona gea yomaketero hoka o domba ko iwa ma gogoana la yaduhunu de yapaliara enangika.
37De gea o Yesusu wotemo iwinii-niikika wato, “Abe naga o nyawa duru ko manga ngoe abe yoigo ato yotoihene o Abari ma Rorahai, masara ngone ka hokurangohi abe hahingahu-ngahu o nyawaika. Ho ka idadi tahiketero ona gea hoka o redi ma amoko ma hasili abe gea imahidiaiukuoka la o nyawa yoboaino de youtuku, masara ona youtu-utuku duru yokuranga. 38De gea Ma Jou abe wohikaaturu ai redioka ma gugutuku. Ho naa Ngohi togahoko la ngini nimaniata nanga Baluhika de duru nigahoko la Una ahao wahidingoto youtu-utuku ma nyawa utuohi yowoe ai redi ma goronaika. La onangoo gea inaduhunu nanga karajaanga ma goronaka.” De hokogea o Yesusu ai demo iwinii-niikika abe wato kiani o nyawa utuohi yowoe yahingahu-ngahu o Abari ma Rorahai o nyawa-nyawaika.
Markert nå:
Matiusu 9: MJDD
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
Gereja Firman Allah, Yayasan Misi Masyarakat di Pedalaman
