Tegagia 14
14
I Burama numangi ira mokole i sabaano oleo ka tumulungio i Lo'oti
14:1-16
1I tempo atuu mokole Amarapeli inso i Sineari, mokole Arioki inso i Elasari, mokole Kedorilaomeri inso i Elami, ka mokole Tideali inso i Goimi, 2mpetea umewaio mokole Bera inso i Sodomo, mokole Birisia inso i Gumora, mokole Sinabi inso i Adima, mokole Siemeberi inso i Seboimi, ka mokole i wita Bela, onaemo wita Soari. 3Luwuno mokole andio ntepo'asa ka me'aiwa i Lembono Sidimi, onaemo Tahi Mopa'i. 4I larono hopulu ka orua nta'u dompetenunu ndi Kedorilaomeri, sine a nta'u kohopulu ka otolu me'ewa ira. 5A nta'u kohopulu ka opaa haweomo i Kedorilaomeri saru luwuno mokole anu perongano, ka do'amba menangi ira to Repaimi i Asiteroti-Karanaimi, to Susimi i Hami, to Emimi i Siawe-Kiriataimi 6ka to Hori i Seiri, mentorukunodo, hawe i Eli-Parani umpeda i pada one. 7Ka do'amba mpekule ka mehawe i Eni-Misipati, onaemo Kadesi. Domenangio luwuwitado to Amale, ka to Amori mbo'u, anu mpo'ia i Hasesoni-Tamari. 8Ka i'amba mokoleno wita Sodomo, mokoleno wita Gumora, mokoleno wita Adima, mokoleno wita Seboimi, ka mokoleno wita Bela, onaemo wita Soari, melako ka mpo'atora baresi peteado umewai ira i lembono Sidimi, 9umewaio mokole Kedorilaomeri inso i Elami, mokole Tideali inso i Goimi, mokole Amarapeli inso i Sineari, ka mokole Arioki inso i Elasari, opaa mokole mo'ewai olima. 10Lembono Sidimi atuu, bukeako sumuru tere. Tempono dopolai mokoleno wita Sodomo ka mokoleno wita Gumora, tedonta ira i larono, sekono ondae anu da mentuwu mpolai i mentorukuano. 11Domerontuo iwali luwuno arataano Sodomo ka Gumora saru luwuno kaanga, ka do'amba melako. 12Domewawao mbo'u anano pepaekompono i Burama, onaemo i Lo'oti, anu mo'ia i Sodomo, saru arataano, ka do'amba melako.
13Ka i'amba asa mia anu tola hawe ka itutuluo teweweu andio ndi Burama, to Ibarani atuu, anu mo'ia umpeda a ngkeu tarabantino i Mamere, to Amori, pepaekompono i Esikoli ka i Anere. Ondae atuu wali-wali pe'asano i Burama. 14Mansano rumongeo i Burama, nine anano pepaekompono tinawa, iwawa ira tolu etu ka hopulu ka oalu miano anu ntepaguru, luwuno ata anu mehina i rahano, ka i'amba lumulu ira iwali hawe i Dani. 15I tempono wongi itia ira atano atuu mpebawaa umewai ira iwali. Domenangi ira ka domelulu ira iwali hawe i Hoba i utarano Damasi. 16Iwawao mekule luwuno arataa atuu. I Lo'oti mbo'u, anano pepaekompono atuu, saru arataano iwawao mekule, kanatuu koa mbo'u luwuno beine ka luwuno miano.
Tepohawedo i Burama saru mokoleno Sodomo ka i Melekisedeki
14:17-24
17Mokoleno wita Sodomo meluarako lumako i Lembono Siawe, onaemo Lembono Mokole, tumotowoo i Burama anu mekule umarino numangio i Kedorilaomeri ka luwuno mokole anu perongano.
18 #
Ibr. 7:1-10
I Melekisedeki, mokole i Salemi, mowawa roti ka anggoro; Onae asa mia sando mpesomba-Do Ue Ala Anu Tedoa Mantande. 19Ka i'amba rumonsoo i Burama, ipotae, ”Po'ineeomo i Burama Doronsoo Ue Ala Anu Tedoa Mantande, Anu Mokogagio langi ka tolino, 20ka inunde-unde Iramo Ue Ala Anu Tedoa Mantande, anu meweengako iramo iwalimu a ngkaemu.” I Burama moweeakono asa ntia hopulu inso a luwuno. 21Mokoleno Sodomo motaeakono i Burama, ”Weeakunemo luwuno mia atuu, ka alaomo tiamu arataa atuu.” 22Sine motae i Burama ndi mokoleno Sodomo atuu, ”Mesumpa aku ndi Ondae i Ue, Ue Ala Anu Tedoa Mantande, Anu Mokogagio langi ka tolino, 23Nahi aku mo'ala maupo hapa inso a luwuno arataamu atuu, asa bite bana ke maupo onggono sapatu naahi, kasi upotae: Kuweweuomo i Burama gagi kaea. 24Tiaku siimo, sangkadio hapa anu domengkaanomo luwuno ataku andio ka tiado mbo'u i Anere, i Esikoli ka i Mamere, luwuno mia anu melako saru ongkue. Po'ineeomo singge mia umalao tiano.”
Markert nå:
Tegagia 14: XMZ
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
LAI 2021
