Matius 8
8
Yesus nampakauri hadua tauna to nohaki kusta
(Mrk. 1:40-45; Luk. 5:12-16)
1Nanaupi Yesus lako bulu ee, nadea tauna nantuku-'I. 2Tempo ee mai naratami hadua to nohaki kusta hi Hia notingkodu i tingoo-Na pade nanguli, “Tuama, ane madota-Ko, mamala'a Mupakauri.”
3Lauparia, Yesus noulu pale-Na nampadama tauna ee pade iuli-Na, “Madota-'A. Kaurimoko.” Hampiniri mata naurimi tauna ee lako hakina. 4Napu ee Yesus nangulika tauna ee, “Hilo, nemo mukewo hi hema-hema bewako nauri. Naupawee, koimoko pade pahiloi wotomu hi imam pade popewaimi kurbanmu hi Alatala ewa to laiparenta Musa bona humawee tauna mampahilo ane naurimoko.”
Yesus nampakauri hadua batua kapitee tantara i ngata Kapernaum
(Luk. 7:1-10; Yoh. 4:46-53)
5Tempo Yesus nehua i ngata Kapernaum, hadua kapitee tantara Roma narata hi Hia pade nerapi tulungi, iulina, 6“Tuama, naria batuaku i hou nadua ntomo hampena napungku pade momami bukuna nemata. Napepa mpuu iepena.”
7Yesus nangulika'i, “Tulau-'Adamo mampakauri'i.”
8Naupawee, iulina kapitee tantara ee, “Tuama, moma'a mahipato mantarima-Ko i houku. Ulimi nau hamati romati aga, maurimi batuaku. 9Habana, aku ei to laiparenta moto mui'akuwo pade naria mui tantara to laiparentaku. Ane kutudu hadua tantaraku, ‘Koimoko,’ rau mpuu'imi. Ane ku'ulika mui hadua ntanina, ‘Maimoko,’ marata mpuu'imi. Ba ane kutudu hadua batuaku, ‘Pobago ei,’ napobago mpuumi. Wee moto mui Iko Tuama, laiparahayaku ane humawee napa to Mu'uli kana madupa.”
10Pangepe-Na Yesus lauria, nahera-'I pade iulika-Nara todea to nantuku-'I, “Mpuu-mpuu Ku'ulika komi, moma naria lairata-Ku haduaa tauna to Israel ewa tauna ei kabohe peparahayana. 11Ku'ulika mui komi, madea mei tauna to momara muli to Yahudi marata lako humangkulili dunia, mangkoni hingkani-ngkani hante tumpulokota Abraham, Ishak pade Yakub i rara poparentaa Alatala. 12Kakonona to Yahudi eera mai to laipelihi Alatala mawali todea rara poparentaa-Na. Naupawee hira ee mai ratene i rara kalimaua to neliu mpuu kalimauna. I riami potantangia pade kapepaa.”
13Lauparia, Yesus nangulika kapitee tantara ee, “Panculimoko. Mawalimi ewa to iperapimu habana neparahayako.” Tempo ee mui, naurimi batua kapitee tantara ee.
Yesus nampakauri paniana Petrus to bangkele pade tau ntanina
(Mrk. 1:29-34; Luk. 4:38-41)
14Napu ee, Yesus rau i hou Petrus. I hee, laihilo-Na paniana Petrus to bangkele noturu habana nangkarani. 15Yesus nangkakamu palena, pade narontomi pangkaranina. Lauparia, nematami nopahadia pangkoni Yesus.
16Lau ngkawengiapi, tauna narata hi Yesus nangkeni nadea tauna to laipehua anudaa. Hante nanguli hamati romati, Yesus nampopalai anudaa ee pade nampakaurira to nohaki. 17#Yes. 53:4 Lauria nadupa nopaganai lolita Alatala to laiuli nabi Yesaya owi, iwei,
“Hiami to nangkolo kapepaata
pade nampakauri hakita.”
Bewa mantuku Yesus
(Luk. 9:57-62)
18Hangkani tempona, nadea mpuu tauna nahiromu i humpii Yesus. Nampahilo todea ee mai, Yesus nangulikara ana guru-Na mangkeni-'I rau i dipo Rano Galilea hante duanga. 19Lau meongkorapa, narata hadua to nataualu buku Taurat hi Yesus pade nangulika-'I, “Guru, metuku'a dohe-Mu nau rima karaua-Mu.”
20Yesus nangulika'i, “Nculaku naria wulou po'ohaana pade tonci naria dumuna, naupawee Ana Manuhia moma naria podulea woo-Na moturu.”
21Naria mui to ntanina lako to pantuku-Na nangulika-'I, “Tuama, paliu'akuwo olu manculi mampauruhi tuamaku. Ane mamatedimi tuamaku, ku'uruhi olu popatanana pade kutukuda-Ko.”
22Naupawee, Yesus nangulika'i, “Tuku-'Amo. Paleleramo tauna to namate mopatana to namate.”
Yesus nampakaora ngolu bohe
(Mrk. 4:35-41; Luk. 8:22-25)
23Napu ee nengkahemi Yesus i rara duanga pade ana-ana guru-Na nantuku-'I. 24Bulara noduanga, ngkali naratami ngolu bohe i rano ee hampena duangara ke nono matala lairumpa balumba. Tempo ee Yesus bula-Na naleta. 25Lauparia, ana-ana guru-Na narata nampalike-'I, iulira, “Pue, tulungi! Mamatetamo!”
26Naupawee, Yesus nangulikara, “Napa pade naeka komi? Nakura gaga peparahayami!” Napu ee, nokangkoremi Yesus nampakamaro ngolu bohe pade rano ee. Nentuu mpuumi ngolu nantawiri pade narodo mpuumi rano ee mai.
27Pangkahilora to nadupa lauria, namangka purara ana guru-Na pade iulira, “Hemadi Tauna ei, hampena ngolu pade rano nanturuhi parenta-Na?”
Yesus nampakauri rodua tauna to laipehua anudaa
(Mrk. 5:1-20; Luk. 8:26-39)
28Karatara Yesus i dipo rano i pongataara to Gadara, narataramo lako podayoa rodua tauna to laipehua anudaa rau nampotomuka Yesus. Naheke mpuura hampena moma hema haduaa tauna nabia noliu i dala ee. 29Nongareramo nanguli, “He, Ana Alatala, napa uruhia-Mu hante kami? Napa iala-Mu tumai? Tumai-Ko mampakaheha kami naupa poma tempona?”
30Moma na'awa gaga lako hee, nadea wawu bulara nampali pangkoni. 31Lauparia, nerapiramo anudaa to nampehuai tauna eera hi Yesus, iulira, “Ane Mupopehuwu kami lako hi tauna eira, tudumo kami rau mampehua wawu-wawu mairia.”
32Yesus nangulikara, “Koimo komi!” Rau mpuuramo anudaa ee mai nampehua wawu-wawu ee, pade ngkali nokumenoramo wawu ee rau i wiwi tua pade nengkanawu i rara rano hampena namate naonga purara.
33Lauparia, hira to nampodoo wawu ee nokumeno rau rara ngata nangkewoka humawee tauna napa to nadupa hi wawu-wawu ee mai pade hi rodua tauna to laipehua anudaa. 34Nangepe lauria, humawee tauna i rara ngata nehuwu rau nampotomuka Yesus. Hangka laipotomukara-'I, perapira mpuu hi Yesus bona Napalahimi pongataara.
Markert nå:
Matius 8: MYL
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
