Matius 5
5
Panguli nangkambelai hema to morahi
(Luk. 6:20-23)
1Hangka Yesus nampahilo tauna to nadea ee, nanake-'I rau hangu bulu. Noncuna-'Ipi, narataramo to pantuku-Na hi Hia. 2Lauparia pamula-Nami nopatudura iwei,
3“Morahiramo tauna to muntu nampaharumaka Alatala,
apa hirami to mawali todea rara poparentaa Alatala.
4Morahiramo tauna to nadua rarara,
apa Alatala mei mampakasana rarara.
5Morahiramo tauna to moma nahombo,
apa hirami to mantarima humawee to laitipa Alatala hi todea-Na.
6Morahiramo tauna to mingki mpuu manoro i tingoo Alatala,
apa Alatala mei mampakadupa dotara matuwu manoro.
7Morahiramo tauna to na'ahi rarara hi tau ntanina,
apa hira mei mamparata ahi rara lako Alatala.
8Morahiramo tauna to moma norompenga rarara,
apa hira mei mampahilo Alatala.
9Morahiramo tauna to nampopohingkabelo hingka manuhia,
apa hira mei rauli ana-ana Alatala.
10Morahiramo tauna to laipakaheha habana nanoro ingkura,
apa hirami to mawali todea rara poparentaa Alatala.
11Morahimo komi ane habana Aku, komi rapopore, rapakaheha bo rapakudaa hante humawee jarita to moma nakono. 12Apa laipowee moto muira nabi-nabi to natepailodo lako hi komi. Aji, kagoemo komi ane to ewa ee madupa hi komi, apa nabohe tomomi i huruga.”
Poi i dunia pade baa hi dunia
13“Komi etu mai ewa poi i dunia. Ane matawoodimi poi ee, hante napapi rapakapoiki? Momami naria bununa, wule ratadidimi pade ratodura tauna.
14Komi etu mai ewa baa hi dunia. Ngata to i lolo bulu moma'i nateleru. 15Wee moto mui, moma hema to motutuni poindo pade natalouni hante loya, naupawee naboli i lolo poboliana ami bona poindo ee mampawantaki humawee tauna i rara hou. 16Wee moto mui komi, kana mewanta baami i tingoora tauna, bona rahilora ingkumi to nabelo pade raunera Tuamami to i huruga.”
Yesus pade patudu Taurat
(Luk. 6:27-36)
17“Nemo mipekiri, ane Aku narata mopoti patudu Taurat ba patudu nabi-nabi. Moma-'A narata mopoti patudu lauria, aga tumai-'A mopaganai'i. 18Apa mpuu-mpuu Ku'ulika komi, kapomana langi bo dunia maronto, nau hangu huruf bo hangu titik lako patudu Taurat moma maronto, kapomana humawee to laitulihi rara patudu Taurat ee madupa. 19Etumo, hema to notungkai mampakaronto hangu aga parenta buku Taurat, naupa parenta to neliu kakodina moto'i, pade mopatudu ewa ee hi tau ntanina, hiami to rapemakodi i rara poparentaa Alatala. Naupawee, hema to mampoingkuka patudu Taurat ee pade mopatudu tau ntanina mobabei ewa ee mui, hiami to rapemabohe i rara poparentaa Alatala. 20Etumo, Ku'ulika komi, moma komi mamala mawali todea rara poparentaa Alatala ane ingkumi moma nelabi kanorona i tingoo Alatala lako hira to nataualu buku Taurat pade to Farisi.
21 #
Kel. 20:13; Ul. 5:17 Laiepemimi bewa parenta to laiparata hi tumpulokota, ‘Nemo mepatehi’ pade ‘Ba hema-hema to nepatehi, kana rahuku.’ 22Naupawee Ku'ulika komi, butu tauna to nahodo hi ompina kana rahuku, pade hema to nampopore ompina, kana rakeni i tingoo to Pobotuhi Agama. Wee moto mui, hema to nangulika ompina nadoyo, kana rahuku i rara apu naraka. 23Etumo, ane mukeni pewaimu hi Alatala i meja pantunua kurban, pade tempo ee lailingamu naria ompimu to naria hodona hi iko, 24bolimi olu pewaimu ee i tingoo meja pantunua kurban, dungku koimoko mohingkabelo hante ompimu ee, pade manculidako mojuju pewaimu hi Alatala. 25Ane maria tauna to mampangadukako, dungku pohingkabelomoko hante hia i lentongo dala kapomami marata i tingoo to pobotuhi. Bona nemo napopewaiko hi to pobotuhi, pade to pobotuhi ee mampopewaiko hi to nampodoo tarungku, bona napahuako i rara tarungku. 26Mpuu-mpuu Ku'ulika komi, momako mehuwu lako tarungku ee kapomana mubayari mpapu indamu.
27 #
Ul. 5:18
Laiepemimi parenta owi iwei, ‘Nemo mogau hala.’ 28Naupawee Ku'ulika komi, butu tauna to nampanaa hadua bangkele pade nampokailu'i, nogau halami i rara bongona. 29Aji, ane mata kanamu mampakadohako, dungkimi pade tadimi. Aginapi hamika matamu malali, nemo romika matamu maria naupawee rateneko i rara naraka. 30Wee moto mui, ane pale kanamu mampakadohako, tompomi pade tadimi. Aginapi hamika palemu malali, nemo romika palemu maria naupawee rapahuako i rara naraka.
31 #
Ul. 24:1-4
Pade naria mui parenta owi iwei, ‘Hema-hema to mampogaaka bangkelena kana mampawai bangkelena ee hura pogaa.’ 32Naupawee Ku'ulika komi, hema-hema to nampogaaka bangkelena, bo moma'ihawo naria bangkelena ee mai nogau hala, hia ee mai nampopogau hala bangkelena. Pade ba hema-hema to nampobangkele bangkele to laipogaaka balailona, hia ee nogau hala.
33 #
Im. 19:12; Bil. 30:2 Laiepemi muimi parenta to laiparata hi tumpulokota, ‘Nemo mosumpa pade moma rababei. Kana mubabei napa to laiulimu rara sumpamu i tingoo Pue.’ 34Naupawee Ku'ulika komi, nemo mpuu komi maria mosumpa. Nemo komi mosumpa mangkahangai langi, apa langi ee poncunaa Alatala, 35ba mangkahangai dunia, apa dunia ei pentodua paa-Na. Nemo mui mosumpa mangkahangai ngata Yerusalem, apa ngata Yerusalem ee po'ohaa Alatala, Magau to nabohe baraka-Na. 36Nemo mui mosumpa mangkahangai woomi moto, apa moma komi nabaraka mopakabula bo mopakawuri nau hangkau wuluami. 37Ulimi io ane io. Ulimi moma ane moma. Habana, to nelabi lako ee mai narata lako Magau Heta.
38 #
Im. 24:20; Ul. 19:21 Laiepemimi parenta owi, ane hema to mampakakeru ompina, hia mui kana rapakakeru. ‘Mata rapahawa mata, ngihi rapahawa ngihi.’ 39Naupawee, Ku'ulika komi, nemora mipehawai to nadaa ingkura hi komi. Ane maria to mampahapa peli kanami, waika mui'i peli kaimi. 40Ane maria to mampangaduka komi habana nampokailu warumi, waika mui'i waru pokarolapiimi. 41Ane maria to mopahuru komi mangkeni parewana hakilo ka'awana, kenika'imi rokilo ka'awana. 42Waika tauna to merapi hi komi. Pade nemo mipoarai tauna to mingki melume hi komi.
43 #
Im. 19:18
Laiepemimi parenta owi iwei, ‘Potowemi hingka manuhiamu pade podaa balimu.’ 44Naupawee Ku'ulika komi, potowemi balimi pade hambayanira tauna to nampakaheha komi. 45Ane iwee ingkumi, laitukumimi ingku Tuamami to i huruga. Apa Alatala nampopebere eo hi tauna to nadaa ingkura pade to nabelo ingkura, pade nampopanau uda hi tauna to nanoro ingkura pade hi tauna to nadaa ingkura. 46Ane wuwu to nampotowe komi moto mipotowe, moma maria tomomi to Nawaika komi Alatala. Apa hira to peduhu paja mui nampotowe tauna to nampotowera. 47Ane wuwu ompi-ompimi moto to mibila, nahibali moto komi hante hira to moma nangincani Alatala, apa hira ee mai laibilara moto mui ompira. 48Etumo, kana mabelo mpuu ingkumi pade moma makahalaia, ewa ingku Tuamami i huruga.”
Markert nå:
Matius 5: MYL
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
