Lukas 22
22
Liwo mampatehi Yesus
(Mat. 26:1-5; Mrk. 14:1-2; Yoh. 11:45-53)
1Parami eo bohe Roti to Moma Lairagii to laikahangai mui eo bohe Paskah to Yahudi#22:1 Eo bohe Paskah tempo ei nampalinga katuwu nculi Yesus lako kamatea. Naupawee, kapomana Yesus laisalib, eo Paskah ee nampalinga tempo Alatala moma nampatehi ana ulumbuara to Israel i Mesir pade nangkeni to Israel nehuwu lako Mesir rau i tana to laitipaka-Na hi Abraham, Ishak pade Yakub (hilo Kel. 12:1-27).. 2Imam-imam to i matana pade to nataualu buku Taurat nampali dala bewara mampatehi bongo Yesus, apa naekara hi todea.
Yudas nampobalu Yesus
(Mat. 26:14-16; Mrk. 14:10-11)
3Poma nahae lako ee, Magau Heta nampehuai Yudas Iskariot, hadua lako hampulu rodua ana guru Yesus. 4Etu pade Yudas rau nolibu hante imam-imam to i matana pade kapala-kapala rombonga to nampodoo Hou Alatala, nangkambelai bewa akalana bona mamala'i mampopewai Yesus hi hira. 5Nagoe mpuura nangepe'i pade notiparamo mampawaika'i doi. 6Nahitujumi Yudas hante napa to iulira. Napu ee nopamulami Yudas nampali loga belo mampopewai bongo Yesus hi hira, bona nemo rancanira todea.
Ana-ana guru Yesus nopahadia pangkoni eo bohe Paskah to Yahudi
(Mat. 26:17-19; Mrk. 14:12-16)
7Naratami tempona eo bohe Roti to Moma Lairagii. Eo ee mai kana rahamale ana bimba Paskah to Yahudi. 8Yesus nantudu Petrus pade Yohanes, iuli-Na, “Koimo komi, pade pahadiakatamo pangkoni Paskah to Yahudi bona mangkonita.”
9Nepekunera, “I rima dota-Mu kipahadiaka-Ko pangkoni eo bohe Paskah?”
10Nehono Yesus, “Ane mehua komi i rara ngata Yerusalem, mipotomu mei hadua balailo to nangkeni pobolia ue. Tukumi tauna ee rau i hou to napehuai. 11Napu ee miulika tumpu hou, ‘Guru nampekuneko, i rima kamara to mamala Napangkonii pangkoni Paskah hante ana-ana guru-Na.’ 12Tumpu hou etu mei mantudoka komi kamara pangkonia to nabohe i lolona, to nagana purami parewana. I ritumi mipahadiakata to takoni.”
13Neongko mpuuramo Petrus pade Yohanes rau i Yerusalem. Lairatara ria humaweena nahibali hante to iuli Yesus hi hira. Lauparia pahadiarami pangkoni eo bohe Paskah.
Yesus nampabohara ana guru-Na bona ralingara-'I
(Mat. 26:20-29; Mrk. 14:17-25; Yoh. 13:21-30; 1Kor. 11:23-25)
14Tempona rapamulapi pangkoni eo bohe Paskah to Yahudi, Yesus noncuna nangkoni hingkani-ngkani hante ana-ana guru-Na. 15Iulika-Nara, “Mingki mpuu-'Amo mangkoni pangkoni Paskah ei hingkani-ngkani hante komi kapoma-Ku mangkolo kahehaa. 16Ku'ulika komi, momami Kukoni pangkoni Paskah ei duuna marata tempona patuju eo bohe Paskah to Yahudi rapakadupa, ane Alatala moparenta halaku Magau i dunia to nabou.”
17Napu ee Yesus nangala hangu panginua to laikahini ue anggur, nosukuru-'I hi Alatala pade iuli-Na, “Alami ei pade tirakara dohemi. 18Ku'ulika komi, mopamula welau, momami kuinu ue anggur duuna Alatala moparenta halaku Magau i dunia to nabou.”
19Napu ee laiala-Na roti, nosukuru-'I hi Alatala pade laitubi-tubi-Na tiraka-Na hi ana-ana guru-Na, pade iuli-Na, “Eimi woto-Ku to rapopewai bona mahalama komi. Babei dolami kabiahaa ei halaku pampalingami-'A.” 20Wee moto mui napurapa nangkoni, laiala-Na Yesus panginua ue anggur, laiwaika-Na hi ana-ana guru-Na pade iuli-Na, “Ue anggur to i rara panginua ei mai mawali tanda potipa bou Alatala hante manuhia to rapakaroho hante raa-Ku to matudo ane rasalib-'A mampatolohi komi.
21Naupawee, bona mincani, tauna to mampopewai-'A nangkoni hingkani-ngkani hante Aku i meja ei mai. 22Nakono ami ane Ana Manuhia kana mamate hante dala to laipakatantu Alatala. Naupawee mahilakami tauna to mampopewai-'I.”
23Napu ee ana-ana guru-Na nonepekune hore hira, hema lako hi hira to mobabei lauria.
Hema to neliu pobununa lako ana-ana guru Yesus
24Napu ee ana-ana guru Yesus nonehono hore hira nangkambelai hema to mahipato rauli neliu pobununa lako humaweera. 25Yesus nangulikara, “Magau-magau i dunia ei dota-dotara noparenta todeara. Pade mingkira rauli ‘to Nepotolawai.’ 26Nemo komi ewa hira. To neliu pobununa lako hi komi kana moingku ewa tauna to moma naria bununa, pade to pangkeni kana moingku ewa hadua batua. 27Hema to neliu pobununa, tauna to noncuna nangkonidi, ba to nepakonidi? Natantu ami neliupi pobununa to noncuna nangkoni. Naupawee Aku naria i lentongomi halaku batuami.
28Batena komimi to nampodohe-'A rara humawee pampehoria to namparumpa-'A. 29Etu pade, ewa Tuama-Ku nampaongko-'A nawali Magau rara Poparentaa-Na, wee mui Aku mampaongko komi mawali to poparenta rara Poparentaa-Ku. 30Komi mangkoni pade manginu hameja hante Aku i rara Poparentaa-Ku, pade moncuna i poncunaa magau, moparenta to Yahudi, muli ana Israel to hampulu rodua.”
Yesus nanguli ane Petrus mei mampehapuka-'I
(Mat. 26:31-35; Mrk. 14:27-31; Yoh. 13:36-38)
31Napu ee Yesus nangulika Simon Petrus, “Simon, Simon, epe belo. Perapinami Magau Heta mampehori komi ewa to pohede wuli gando. 32Naupawee laihambayani-Kumoko bona maroho moto peparahayamu hi Aku. Pade ane maroho nculipi peparahayamu hi Aku, pakaroho peparahayara ompimu.”
33Iulina Petrus, “Pue, mahadia'a ratarungku bo mamate hingkani-ngkani hante Iko!”
34Nehono Yesus, “Ku'ulikako Petrus, poma'i motuturua manu ngkawengia ei, tolu ngkanimoko mampehapuka ane laincanimu-'A.”
Yesus nampalingai ana guru-Na ane rapahibali-'I mei hante tauna to nadaa ingkura
35Napu ee iulika-Na muira ana guru-Na, “Pohuro-Ku komi rau nangkarebai Kareba Belo hante moma nangkeni doi, boku pade hapatu, naria komi nakakuraa napa-napa?”
Nehonora, “Moma naria.”
36Iuli-Na Yesus, “Naupawee welau ei, hema to naria doina kana nakeni, wee mui to naria bokuna. Hema to moma naria tono lampana, mobalu waruna napopangoli tono lampa. 37#Yes. 53:12Aku nangulika komi lauria, habana napa to laitulihi rara Buku to Nagaha nangkambelai Aku kana rapaganai. To laitulihi ee mai iwei,
‘Hia mei rapahibali hante tauna to nadaa ingkura.’
Apa napa to laitulihi nangkambelai Aku, bulana laipaganaimi.”
38Iulira ana guru-Na, “Pue, hilo ei mai romata tono lampa.”
Nehono Yesus, “Naganami etu.”
Yesus nohambaya i Bulu Zaitun
(Mat. 26:36-46; Mrk. 14:32-42)
39Napu ee Yesus nehuwu rau hawaliku ngata. Ewa kabiahaa-Na rau-'I i Bulu Zaitun pade ana-ana guru-Na nantuku-'I. 40Naratarapa i ria Yesus nangulikara ana guru-Na, “Pohambayamo komi, bona nemo komi manawu rara pehori.”
41Napu ee nomakomi Yesus maria hampewunua watu ka'awana lako hi ana-ana guru-Na pade notingkodu nohambaya, 42iuli-Na, “Oo Tuama-Ku, ane madota-Ko, alami kahehaa ei lako hi Aku. Naupawee, nemo dota-Ku to madupa, aga dota-Mu.” [ 43Napu ee hadua malaeka lako huruga nerawa nampakaroho rara-Na. 44Naliu ee natetambaikimi kajuu rara Yesus, nohambaya-'I hante mpuu-mpuu duuna ini-Na ewa raa natudo i tana.]
45Nahudupi Yesus nohambaya, nanculimi hi ana-ana guru-Na. Lairata-Nara bulara naleta apa najuu rarara. 46Yesus nangulikara, “Napa pade naleta moto komi? Pematamo pade pohambaya bona nemo komi manawu rara pehori!”
Yesus laihoko
(Mat. 26:47-56; Mrk. 14:43-50; Yoh. 18:1-11)
47Bula-Na nojaritadipi Yesus, narataramo harombonga tauna, pade hadua lako hampulu rodua ana guru-Na to ikahangai Yudas nomako noilodo. Rau'i nampamohuki Yesus pade nampaeki-'I. 48Naupawee Yesus nangulika'i, “Yudas, hante pe'ekimu ei laipopewaimu Ana Manuhia?”
49Hangka laihilora napa to madupa, ana-ana guru Yesus to ntanina nepekune hi Hia, “Pue, bewa ane kiewara hante tono lampa?” 50Pade hadua lako hi hira nampatime batua Imam Bohe hampena naputu talingana mali kana.
51Naupawee, iuli-Na Yesus, “Nemo wetu!” Laidama-Na talinga tauna ee pade laipakauri-Na'i.
52Napu ee iuli-Na Yesus hi imam-imam to i matana, kapala-kapala rombonga to nampodoo Hou Alatala bo totua-totua ngata to Yahudi ntanina to narata mampahoko-'I, iwei, “Iulimi komi Aku ei mai to powao, hampena narata komi nampahoko-'A hante tono lampa pade pato? 53Butu eona-'A dohemi i karawaa Hou Alatala, moma-'A laihokomi. Naupawee eimi logami pade loga Magau Heta to noparenta dunia kalimaua.”
Petrus nampehapuka Yesus
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54Nahudupi Yesus nojarita, laihokorami pade laikenira rau i hou Imam Bohe. Petrus nantukura lako ka'awaana. 55I lentongo karawaa naria tauna nopaduu apu, pade noncunaramo naneru natiku i apu ee mai. Rau muimihawo Petrus noncuna dohera. 56Hadua batua bangkele nampanaa Petrus noncuna naneru, laipenotona belo pade iulina, “Tauna ei mui hadua to nampodohe Yesus!”
57Naupawee laihapuna Petrus pade iulina, “Moma! Moma-'I laincaniku Tauna etu!”
58Poma nahae lako hee, tau ntanina nampanaa Petrus pade nanguli, “Iko ei mui hadua ana guru Yesus!”
Naupawee nehono Petrus, “Bale, moma'a ana guru-Na bo!”
59Maria hajaa lako hee, tau ntanina muipi nanguli, “Nakono mpuu, tauna ei mui hadua to nampodohe Yesus, apa hia ei to Galilea, nahibali hante Yesus pade ana-ana guru-Na to ntanina.”
60Naupawee iulina Petrus, “Bale, moma incaniku napa to iulimu!”
Tempo ee mui, bulana nojaritadipi Petrus notuturuami manu. 61Pue Yesus neili pade nampenoto Petrus. Linganami Petrus ane iuli-Na amimi Pue hi hia iwei, “Kapomana manu motuturua ngkawengia ei, tolu ngkanimoko mampehapuka-'A.” 62Napu ee nehuwumi Petrus lako karawaa hou ee, rau nakeo hante juu rarana.
Yesus laipopore pade laiduahi
(Mat. 26:67-68; Mrk. 14:65)
63Hira to nampodoo Yesus nampopore pade nampaduahi-'I. 64Laiwuntara mata-Na, pade iulikara-'I, “Ulika kami hema to nampajaguru-Ko.” 65Nadea ngaadipi to laiulira nampopore-'I.
Yesus i tingoo to Pobotuhi Agama Yahudi
(Mat. 26:59-66; Mrk. 14:55-64; Yoh. 18:19-24)
66Nabaapi, noliburamo to pobotuhi Agama Yahudi. To nolibu eera totua-totua ngata to Yahudi, imam-imam to i matana pade to nataualu buku Taurat. Laipetuduira bona Yesus rakeni i tingoora. 67Laikenipi Yesus iulikara-'I, “Ane nakono mpuu Ikomi Magau to Pepakahalama to laitipa Alatala, kewokamo kami!”
Nehono Yesus, “Naupa Kukewoka komi, moma-'A miparahaya, 68pade ane Kupekune komi, moma komi mehono. 69Naupawee mopamula welau ei, Ana Manuhia moncuna mali pangkana Alatala to Nabaraka!”
70Napu ee, humaweera nepekune, “Ane wetu, laipangaku-Mu ane Ana Alatala-Ko?”
Nehono Yesus, “Komi motomi nanguli ane Akumi Ana Alatala.”
71Iulira, “Momatamo mamparaluu habi ntanina. Laiepeta motomi napa to iuli-Na!”
Markert nå:
Lukas 22: MYL
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
