Yohanes 6
6
Yesus nopakoni alima ncobu dua tauna
(Mat. 14:13-21; Mrk. 6:32-44; Luk. 9:10-17)
1Napu ee neongkomi Yesus, rau nedipo Rano Galilea to laikahangai mui Rano Tiberias. 2Nadea tauna nantuku-'I, apa laihilorami tanda-tanda to nepakahera laibabei-Na nampakaurira tauna to nohaki. 3Yesus nanake i lolo bulu pade noncuna i hee hante ana-ana guru-Na. 4Tempo ee mai parami eo bohe Paskah to Yahudi. 5Hangka laihilo-Na Yesus humangkulili-Na, lainaa-Na nadea tauna narata hi Hia. Lauparia iulika-Na Filipus, “Taoli rima roti tapakonikara todea ei mai?” 6Kakonona laincani-Na moto Yesus napa to kana Nababei. Nepekune-'I ewa ee hi Filipus apa mingki Nahilo bewa peparahaya Filipus.
7Nehono Filipus hi Hia, “Naupa roatu doi halaka#6:7 Hampeka doi halaka nahibali hante tomo nobago haeo. rapopangoli roti, moma'i magana rakonira todea ei mai, naupa hore hantubira aga.”
8Lauparia Andreas hadua lako ana-ana guru-Na, tuai Simon Petrus, nangulika Yesus, 9“I hei naria hadua ngana to nangkeni alima ongu roti to laibabei lako jelai pade romaa bau. Naupawee maganakona ee rakonira todea ei mai?”
10Yesus nanguli, “Tudura todea etu mai moncuna.” I hee nadea kawoko natuwu, aji noncunaramo todea i kawoko ee mai. Kadeara todea ee mai, maria alima ncobu dua. Ee mai balailodipi. 11Napu ee iala-Nami Yesus roti ee mai, nosukuru hi Alatala pade laitubi-tubi-Na, laiwaika-Na hi ana-ana guru-Na, bona ratirakara hi hira to noncuna i hee. Laipowee-Na moto mui bau ee mai, pade nangkoni puraramo duura nabohu. 12Nabohurapa, Yesus nangulikara ana guru-Na, “Palimpuru to nelabi lako to laikonira lauria bona nemo maria to ratadi.” 13Lako alima ongu roti jelai ee mai, labina to laipalimpurura naponu hampulu rongu pangkoloapi kadeana.
14Hangka laihilora todea ee mai tanda to nepakahera to laibabei Yesus, iulira, “Hia ei mpuumi nabi to laipatuju Musa marata i dunia.” 15Laincani-Na Yesus ane todea eera mai madota marata mopahuru-'I mawali magaura. Etu pade netibomi lako hee pade rau i bulu hadudua-Na.
Yesus nomako i lolo ue
(Mat. 14:22-33; Mrk. 6:45-52)
16Ngkinuwia mparopi, rauramo ana guru Yesus i rano, 17pade nencawi duanga nedipo rau i Kapernaum. Nalimaumi, poma oa-'I narata Yesus namperumatara. 18Rano hamalina nobalumba habana ngolu bohe. 19Maria alima ba ono kilomi ka'awara lako wiwi rano, laihilora Yesus nomako i lolo ue nampamohuki duangara ee mai. Nampahilo lauria nawulunga purara. 20Naupawee Yesus nangulikara, “Nemo maeka, Aku ei.” 21Nangepe lauria, laipopengkaherami Yesus i rara duanga hante goe rarara, pade tempo ee mui naratami duangara i wiwi rano to rakarauira.
Todea nampali Yesus
22Kanailena, todea to naboliradapa i dipo rano, nampali Yesus apa laincanira ane duanga to naria i wiwi rano wuwu duanga to laihawira ana guru Yesus ee aga. Laincanira mui ane peongkora ana guru Yesus rau nedipo, moma hante Yesus laipodohera. 23Poma nahae lako hee, narata bahangkua duanga lako Tiberias nentuu namohu hante pangkoniara todea roti jelai ee wei, nahudu Yesus nosukuru hi Alatala. 24Hangka laihilora todea ane moma-'I naria Yesus pade ana-ana guru-Na i hee, nengkaheramo i duanga-duanga ee mai pade neongko rau i Kapernaum mampali Yesus.
Roti to nampawai manuhia katuwua
25Hangka todea ee mai notomu hante Yesus i dipo rano ee, pekunera-'I, “Rabi, bulauma-Ko narata i hei?”
26Yesus nampahonoira, “Mpuu-mpuu Ku'ulika komi, laipalimi-'A moma habana laipahamimi patuju tanda-tanda to nepakahera to laibabei-Ku, naupawee laipalimi-'A habana nabohumo komi nangkoni roti. 27Pobagomo moma bona mamparata pangkoni to mamala mapope. Naupawee pobagomo bona mamparata pangkoni to mantaha duu katuwua to moma maria kahuduana. Ana Manuhia to mampawaika komi mei pangkoni etu, apa Hiami to laipelihi pade laiongko Tuamata Alatala mampawaika komi pangkoni ee.”
28Todea ee mai nepekune hi Yesus, “Napa to kana kibabei bona mamala kami mampobago bago to laipodota Alatala?”
29Nehono Yesus hi hira, “Eimi bago to laipodota Alatala mipobago, bona meparahaya komi hi Hia to laihuro Alatala.”
30Iulira todea ee hi Yesus, “Napa tanda to nepakahera to Mubabei to mamala kihilo bona meparahaya kami hi Iko? Napa to Mubabei?” 31#Kel. 16:4, 15; Mzm. 78:24Tumpuloko kami nangkoni roti to laiuli manna i tongo mpada to nabai, ewa naria laitulihi rara Buku to Nagaha iwei, “Laipakoni-Nara hante roti lako huruga.”
32Iuli Yesus hi hira, “Mpuu-mpuu Ku'ulika komi, moma Musa to nampawaika komi roti lako huruga, naupawee Tuama-Ku to nampawaika komi roti to mpuu-mpuu lako huruga. 33Apa roti lako Alatala ee mai nehompo lako huruga pade nampawai katuwua hi manuhia.”
34Lauparia iulikara-'I, “Tuama, waika dolamo kami roti etu.”
35Iuli Yesus hi hira, “Akumi roti to nampawai katuwua. Hema to marata hi Aku, momami maoro taina, pade hema to meparahaya hi Aku, momami mabai wuuna. 36Naupawee iulika-Kumo komi, naupa laihilomi-'Amo, moma komi neparahaya. 37Humawee tauna to laiwaika Tuama-Ku hi Aku, kana marata hi Aku, pade hema to marata hi Aku, moma'i Kuporau. 38Habana nehompo-'A lako huruga moma tumai mobabei dota-Ku moto, naupawee tumai-'A mobabei dota Tuama-Ku to nampahuro-'A. 39Pade eimi dota Tuama-Ku to nampahuro-'A, bona lako humawee tauna to laiwaika-Na hi Aku moma maria to maronto, naupawee Kupakatuwu nculi purara mei i eo kahudua dunia. 40Habana dota Tuama-Ku, bona butu tauna to nampahilo Ana-Na pade neparahaya hi Ana-Na ee mai mamparata katuwua to moma maria kahuduana, pade Aku mampakatuwu nculi'i i eo kahudua dunia.”
41Lauparia, nangkaranguhiramo to pangkeni to Yahudi hi Hia, apa iuli-Na, “Akumi roti to nehompo lako huruga.” 42Iulira to pangkeni to Yahudi ee mai, “Apa moma Hia ei mai Yesus ana Yusuf, to laincanita tina pade tuama-Na? Bewa pade iuli-Na nehompo lako huruga-I?”
43Nehono Yesus hi hira, “Nemo komi mangkaranguhi. 44Ane Tuama-Ku to nampahuro-'A moma mangkeni tauna marata hi Aku, moma hema haduaa to mamala marata hi Aku. Pade hema to marata hi Aku, kana Kupakatuwu nculi'i mei i eo kahudua dunia. 45Naria laitulihi rara buku nabi-nabi iwei, ‘Humawee tauna mei, kana Napatudu Alatala.’ Aji, butu tauna to nangepe pade nantarima popatudu Tuamata Alatala, tauna ee narata hi Aku.
46Moma iuli-Ku ane nariami tauna to nampahilo Tuamata Alatala. Wuwu Hia to narata lako Alatala aga, to nariami nampahilo Tuamata Alatala. 47Mpuu-mpuu Ku'ulika komi, hema to meparahaya hi Aku, hia mamparata katuwua to moma maria kahuduana. 48Akumi roti to nampawai katuwua. 49Tumpulokomi nangkoni roti to laiuli manna i tongo mpada to nabai, pade hira ee mai namate puraramo. 50Naupawee moma ewa ee hante roti to nehompo lako huruga. Hema-hema to mangkoni roti to nehompo lako huruga ee mai, moma'i mamate. 51Akumile roti to nehompo lako huruga to nampawai katuwua. Hema to mangkoni roti ei mai, matuwu'i duu kahae-haena, pade roti to Kupopewai ee mai woto-Ku, to Kupopewai bona manuhia mamparata katuwua to moma maria kahuduana.”
52Nangepe to iuli Yesus lauria, nonehonoramo to pangkeni to Yahudi ee mai hore hira, iulira, “Bewa Hia ei mai mampopewai woto-Na takoni?”
53Lauparia Yesus nangulikara, “Mpuu-mpuu Ku'ulika komi, ane moma komi mangkoni woto Ana Manuhia pade manginu raa-Na, moma komi mamparata katuwua to moma maria kahuduana. 54Tauna to mangkoni woto-Ku pade manginu raa-Ku, hia mamparata katuwua to moma maria kahuduana pade Kupakatuwu nculi'i mei i eo kahudua dunia. 55Apa woto-Ku mpuu-mpuu pangkoni pade raa-Ku mpuu-mpuu inua. 56Tauna to nangkoni woto-Ku pade nanginu raa-Ku, hia nohangu rara hante Aku pade Aku nohangu rara hante hia. 57Tuama-Ku to nampahuro-'A, Hiami puu katuwua pade Aku natuwu habana Tuama-Ku. Wee moto mui butu tauna to mangkoni woto-Ku, kana matuwu habana Aku. 58Eimi roti to nehompo lako huruga, moma nahibali hante roti to laikonira tumpulokomi, to napu nangkoni roti ee namate moto muira. Naupawee butu tauna to mangkoni roti ei, hia mei matuwu duu kahae-haena.” 59Humawee lauria laiuli Yesus i Kapernaum tempo-Na nopatudu i hou pepuea.
To pantuku Yesus to nekangkaura i Galilea
60Napura nangepe humawee to laiuli Yesus, nadeara to pantuku Yesus to nanguli, “Nakoro gaga patudu to iuli-Na lauria. Hema to mampakule mampoingkuka patudu lauria?”
61Naupawee laincani-Na Yesus ane hira to pantuku-Na nangkaranguhi nangkambelai to iuli-Na. Iulika-Nara, “Nongkuadi? Nadua rarami nangepe to iuli-Ku? 62Bewa ane mihilo Ana Manuhia mengkahe nculi rau i katidaa-Na lomona? 63Inoha to Nagaha to nampawaika manuhia katuwua, naupawee roho manuhia moma ibukuna nampawaika manuhia katuwua. Humawee lolita to laiulika-Ku komi narata lako Inoha to Nagaha, pade lolita eemi nampawaika manuhia katuwua. 64Naupawee naria komi to moma neparahaya.” Apa laincani-Nami Yesus lako pamulana hema to moma meparahaya pade hema mei to mampopewai-'I hi bali-bali-Na. 65Iuli-Na mui Yesus, “Etu pade iulika-Ku komi ane moma hema haduaa to mamala marata hi Aku ane moma'i Nakeni Tuamata Alatala hi Aku.”
66Hinungkai lako tempo ee mai, nadea to pantuku-Na nekangkaura pade momaramo nadota nantuku Yesus. 67Nampahilo lauria, Yesus nangulikara hampulu rodua ana guru-Na, “Moma komi rau dohera?”
68Nehono Simon Petrus hi Hia, “Pue, rau hi hemamo kami? To iuli-Mu etu mai patudu to nampawai katuwua to moma maria kahuduana. 69Laiparahaya kami pade laincani kamimi ane Ikomi Huro to Nagaha lako Alatala.”
70Nehono Yesus hi hira, “Apa moma Aku motomi to nampelihi komi to hampulu rodua ei? Naupawee hadua lako hi komi ei laipobatua Magau Heta.” 71To laipatuju-Na Yudas, ana Simon Iskariot. Habana Yudas eemi mei to mampopewai Yesus hi bali-bali-Na. Yudas ee hadua lako hampulu rodua ana guru Yesus.
Markert nå:
Yohanes 6: MYL
Marker
Del
Kopier
Vil du ha høydepunktene lagret på alle enhetene dine? Registrer deg eller logg på
